San Lucas 22
22
Teruatperanhasti Jesusini jupikani
(Mt 26.1-5,14-16; Mc 14.1-2,10-11; Jn 11.45-53)
1Andamutaxaptia k'uínchekua enga kurhinda no xarhipiti jukari anhajka enga Páskua arhinhajka. 2Ka tátecheri juramutichaksï ka juramukua jurhentpirichaksï chérhpeparini jirinhakuntaxapti néna Jesusini atani uándikuni.
3Jimajkani Nóambakiti Judasïni incharhespti, enga Jesusiri témbeni tsimani jurhengorheri jémba mépka, engaksï Iskariote arhimpka. 4Ima niraspti tátecheri juramutichani ka tiósïo kuarichani uandaxekuani, ka aiakuaspti Jesusini intsïnharhitaani. 5Imaksï tsípespti ka Judasïnksï tumina aiakuspti. 6Ka ima aiakorhespti ka úndaspti jirinhakuntani néna ka nani Jesusini intsïnharhitaani jima enga no jánhapiringa.
Acheri Páskua anapu t'irekua
(Mt 26.17-29; Mc 14.12-25; Jn 13.21-30; 1~Co 11.23-26)
7K'uínchekua janospti enga no xarhipiti jukari kurhinda anhajka, jiájkani enga karichi Páskua anapu atanhempka. 8Jesusi Pédruni ka Juánuni axaaspti, arhiaparini:
–Níjtsïni je Páskueri chúrekua t'irekua tánacheni.
9Imaksï kurhamarhespti:
–¿Naniri uéksïni eskachi tánakata ambe péraaka?
10Jesusi arhiaspti:
–Iretarhu ínchaakuni jámantsï achetini ma kúmaaka enga k'amukua ma jimbo itsï páni jauaka. Chúxapa je nani enga inchantajka, 11ka imani k'umanchekuarhu anapu k'érini arhi je: Jurhentpiri uéksïndi míteni: ¿Nánisïni jucheti jurhentpirichani jinguni chúrekua anapu t'irekua Páskueri t'irea? 12Imaksïni exeraati k'umanchekua k'éri ma sési jántskantskata, enga karhakua jaka, engachi chúrekua t'ireaka. Jima péra je ambe engajtsï xáni tánajka.
13Nirasptiksï ka iámu ambe ísï úkorhespti eska Jesusi na arhiapka, ka chúrekua anapu t'irekuaksï Páskueri tánaspti.
14Enga na t'irekuepkia, Jesusi ka jurhengorherichaksï uaxakaspti t'ireni. 15Ka Jesusi arhiaspti:
–¡Xáni engani uékani jápka Páskueri t'irekuani cha jinguni arhani, jimbokani nósesi kánhaaka! 16Aianguxakaksïni eskani jiájkani jamberi nóteru auaka, engachi na ménderu Diósïri irechekuarhu márku auakia.
17Ka enga na tsúntsuni p'íkupka, diósmaiamukua arhintaspti, ka uandani:
–Inde je ka intsïmpera je; 18jimbokaksïni arhixaka eskani nóteru itsïmaaka uberi itsïrhukua enga jamberi Diósïri irechekua janonguaaka.
19Tátsekua kurhinda p'íkuspti ka diósmaiamukua arhispti, k'epekuspti ka íntsaaspti, uandaparini:
–I jucheti anhanhatakuesti, enga chári sési jimbo intsïnharhitpenhaaka ka atanhani uándikunhani. Ísïjtsïni míantsï je.
20Engaksï na k'amarapkia t'ireni, tsúntsuni májkueni kámaspti, uandaparini:
–I itsïmakua jimbanhe pakatperakuesti enga jucheti iurhiri jimbo ts'ïrimeranhaka, enga chári sési jimbo tsîtakorheaka. 21K'óru míte je, eska ixu jarhaska ima engarini sïpataaka, jíndeni jinguni t'irexati. 22Jimboka acheti Uájpa jatsiska imani xanharini jatani enga míndanhaka ka ¡Jarhonheni ima enga intsïnharhitpeaka!
23Jimajkanksï ima uénaspti kurhamarhperani:
–¿Néxamu ísï kámaa?
Nésï sánderu k'ériua
24Ka tátsekuaksï jurhengorhericha uinhamu jupiperaspti míteni uékani néxamusï sánderu k'éri ambepirini. 25Enga úpka, Jesusi arhiaspti: “Irechechaksï uinhandirasïndi juramukuaani iretechani ka juramutichaksï uandakorhesïndi eskaksï iretani marhuakuxaka. 26Ka chájtsï no xáxeaka. Jimini ménderueniaru, ne enga sánderu k'érika chánksïni jinguni jatsisti ima sánderu sapichueni, ka urherukuti máteruechani marhuakuaue. 27Jimboka ¿Andi ne sánderu k'éri ambeski? ¿Ima enga uaxakakorhejka t'ireni o ima enga kéntpejka? ¿Andi no ima sánderu k'ériski enga uaxakajka t'ireni? Ka ji cha jinguni kéntpiriska.”
28“Chájtsïni nómeni jurajkuska engani nósesi nitamakorheka. 29Jimboksïnisï juramukua ma jurajkucheni jaka, ísï eskarini jucheti Táte jíndeni na juramucheka, 30ka chájtsï jíndeni jinguni jucheti irechekuarhu t'ireaka ka itsïmantani, ka k'érikuarhuecharhujtsï témbeni tsimani Israeli anapu iretechani uaxakaaka útakuani.”
Jesusi uandantasti eska Pédru no míteni uandaaka
31Acha uandasptiteru:
–¡Simonita! Exe, Nóambakiti sésikua kurhajkorhesti chánksïni tríjueni uauatani; 32ka jíkini arhijpecheska, eska chéti jakajkua no xántkueuaka. Ka engari na jíndeni jinguni k'uanhatseaka, jarhuataa chéti erachichani sési anhaxurhikorhetini jakajkiuni jarhani.
33Simoni arhispti:
–Acha, t'u jinguni k'ataperakuarhu jamberi niuaka, ka t'u jinguni jamberi uarhiaka.
34Jesusi arhispti:
–Pédru, arhixakakini eska iásï t'arhechu nótki jamberi uerani jauaka, engarini t'u t'uíni tanimu xanhari no míteni uandaakia.
Jesusi ts'éjkukua niáranchasti
35Tátsekua Jesusi kurhamarheaspti:
–Engaksïni nóma tumina jinguni axapka, ka engaksïni nóma t'irekua ambe jinguni axapka, ka engaksïni xándurharku axapka, ¿Ambejtsï uétarhenchaspki?
Ka imaksï arhispti:
–Nóma ambechi uétarhenchaspka.
36Jimajkani arhiaspti:
–Iásï jimini ménderuenia, ima enga jatsika tumina juáe, ka ístu akua ambe juáe; ka ne enga tiámu atajpetarakua no jatsikorheka, chereparhakua atarante ka piákorhe. 37Jimbokaksïni aianguxaka eskani jatsiska ísï úkorhenchani eskaksï karakatecha na arhijka: Ka nósesi járhatichani jinguni miuinhantasti.#22.37 Is 53.12. Jimboka iámu ambe enga jucheti ambe xáni karakata jaka jatsiska úkorheni.
38Imaksï arhispti:
–Acha, tsimani tiámu atajpetarakuachi kámaxakaia.
Ka ima arhiaspti:
–Sésku jauatia.
Jesusi Getsemani uandamukukorhesti
(Mt 26.36-46; Mc 14.32-42)
39Tátsekua Jesusi uéraspti, ka eska na p'indekua jatsipka, Olibu juátarhu niraspti; ka jurhengorherichaksï chúxapaspti 40Engaksï niárapka, arhiaspti:
–Uandamukukorhe je, nóksïni terungutpiri andani.
41Xáni jarhareaspti eska ma xáni iauiani pérajka tsakapu k'uanirani, ka tinguixurhispti uandamukukorheni. 42Uandaparini: “Táte, engari uéjka, íni k'amek'amechantskuarini kénditache; k'óru ásï ima úkorhe engani ji uéjka, ima úkorhe engari t'u uéjka.”
43[Enga ísï úkorheni jápka, auandarhu anapu ánjeli ma xarharaspti uinhapekua íntskuni. 44Ka náuejki xáni nósesi p'ikuarherani jápka, Jesusi sánderu uinhamu uandamukorhesïrempti, ka iurhirini jásï aparheta kánekua iurhuiurhujkutaxapti.]
45Enga na jauarapka jima enga uandamukukorheni jápka, niraspti jima niántani engaksï jurhengorhericha jápka, ka imaksï t'uíni k'uíxaptia jimboka mískorhekua andaaspkia 46ka arhiaspti:
–¿Andijtsïsï k'uíni jaki? Jauara je ka uandamukukorheni je, ásïksïni terungutpiri ande.
Na enga Jesusi jupinhaka
(Mt 26.47-56; Mc 14.43-50; Jn 18.2-11)
47Jesusi útasï uandaxapti, enga uánekua niáranhapka. Ima enga Judasï arhinhempka ka enga imeri jurhengorheri mépka urhekupaaxapti. Andarheraspti Jesusini ka putinharhikuni, 48ka Jesusi arhispti:
–Judasï, ¿Putinharhikua ma jimbojkuri intsïnharhitpexaki Acheti Uájpani?
49Ima engaksï Jesusini jinguni jámani jápka, ísï exerinksï kurhamarhespti:
–Acha, ¿Akuarheauachi?
50Ka ima ma isï k'éri táteri jántspirini ataspti, ma akandani kachujpandikuspti. 51Ka Jesusi uandaspti:
–Jurajkua je jauatia.
52Ka Jesusi táta urhejtsïkurichani ka k'éri tiósïo kuárichani ka arhijtsïkpirichani engaksï jupikani niárapka arhiaspti:
–¿Andijtsïsï tiámu atajpetarakua ka chkári anhajkutini juki, enajkini ambe ji sïpajkurhe? 53Mándani pauani k'éri tiósïo chánksïni jinguni jámaxaka, ka nójtsïni méni jupikaska. K'óru i jándu cháristi, enga pájpakandeni jarhajka.
Pédru Jesusini no míteni uandasti
(Mt 26.57-58,69-75; Mc 14.53-54,66-72; Jn 18.12-18,25-27)
54Jesusinksï jupikaspti ka k'éri tátoksï páspti. Pédru sántku jarhaxapaxapti. 55Jima terunukuaksï kurhikaspti, ka uaxaparhakusptiksï; ka Pédrujtu imechani jinguni uaxaparhakuspti. 56Enga ísï úkorheni jápka, uarhiti jántspiri ma enga exepka imajtu jurhentani jarhani jatsikueraspti erateni ka uandaspti:
–Íjtu ima jinguni jámaxapti.
57Ka Pédru no jiókorhespti uandaparini:
–Nana, ji no míteska imani.
58No sáni ióndani, máteru nema exespti ka arhini:
–T'újturi imechani jinguni jámsïnga.
Ka Pédru uandaspti:
–Nóchka ambeta, ji no imecha jinguniska.
59No ióndani, máteru ménderu inchandimentaspti arhini:
–Sési jimbo i imani jinguni jámaxapti. Ka támu Galilea anapuesti.
60Pédru uandaspti:
–Nóchkanda míteska, t'u ambendi uandajki.
Enga Pédru nótki k'amarani jápka ísï uandani, t'arhechu ma ueraspti. 61Jimajkani Acha p'irhikorhespti Pédruni erani, ka Pédru míjpaani eska Acha arhispka: “Iásï t'arhechu nótki uerani jauati engarini t'u t'uíni tanimu xanhari no míteni uandaakia.” 62Ka Pédru uéntaspti, ka k'amek'amechantaspti uerani.
Na engaksï Jesusini teresmarhupka
(Mt 26.67-68; Mc 14.65)
63Ima acheticha engaksï Jesusini kuáni jápka teresmarhusïremptiksï ka atanksï. 64Jónharhikusïremptiksï ka kurhamarhenksï:
–¿Arhitki nékini ataia?
65Ka nósesi ambeteruksï arhisïrempti.
Jesusi k'éri tángorhentskuarhu
(Mt 26.59-66; Mc 14.55-64; Jn 18.19-24)
66Enga na erandepkia, judiouecheri arhijtsïkpirichaksï ka tátecheri juramuticha ka juramukua jurhentpirichaksï tángorhentaspti, ka Jesusinksï k'éri tángorhentskuarhu páspti. Jimaksï kurhamarhespti:
67–Arhijtsïni, ¿Jeteru t'úsï Krístue?
Ka ima uandaspti:
–Engaksïni jo arhiska, nójtsïni jakajkucheaka. 68Ka engaksïni ambe ma kurhamerheska, nójtsïni úaka mókucheni. 69Enga úka, iásïtki uératini acheti Uájpa, Diósï uinhapitini t'irejkandani uaxakakutini jauatia.
70Tátsekuaksï iámenduecha kurhamarhespti:
–Jiájkani, ¿T'u Diósï uájpeski?
Jesusi arhiaspti:
–Chájtsï uandaska.
71Ka imaksï uandaspti:
–¿Ambeteruchi úraua uandantstichani? Kurhajchakorheskachia.
Valgt i Øjeblikket:
San Lucas 22: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
