San Lucas 2
2
Jesusiri andajpenukua
1Jimajkani ísï, k'éri irecha Sésari Augustu juramuspti eska ma parhakpeni karajperanhantapiringa. 2I miújperantskua jimajkani únhaspti enga Kirinu Siria juramuni jápka. 3Ka iámenduechaksï jatsipirindi nirani níntani imeri iretani jimbo karakorhentani.
4Ísï jimbo, Jose uéakuspti imani iretani Nasareti, enga Galilea jaka, ka Beleni karhamaspti, enga Judea jaka, jima engajtu irecha Dabi kángorhenhapka, jimboka Jose Dabiri sïrukuespka. 5Imeri kurhajkorhekata Maria jinguni enga sapini erokorheni jápka, jiniksï niraspti karakorhentani. 6Ka engaksï Beleni jápka, niáraspti jurhiata enga Maria charhakuni kángorhepiringa. 7Ka uájpa urhetini úakasï jatakuarhu kángorhespti, ka takusï irhirhitaspti, ka chekakuarhu aponhaspti, jimboka jájkorhekuarhu no ambandespka.
Ánjelicha ka karichi eranguticha
8Jima Beleni no iauani jarhareti, karichi erangutichaksï jámaxapti engaksï juátarhu pakarempka karichichani kuákorheani. 9Ka mátirku Acheri ánjeli ma xarhakuaspti, ka ma uirhipandani Acheri t'íntskua t'íntskakuaspti; ka kánekuaksï chérakorhespti. 10Enga úpka, ima ánjeli arhiaspti: “Ásï che je, jimbokaksïni ambakiti aiangperakuasï juácheni juka, imani enga jimbo kánekua tsípenhaaka. 11Iásï Dabiri iretarhu p'ímutantspiri ma andajpenusti, enga Acha Krístueka. 12Arisïjtsï mítentaaka: Tataka sapichuni májtsï xéntaaka takusï irhiakukata ka chekakuarhu aponhetini.”
13Ka ístuksï mátirku, ánjeli jinguni, máteru ánjeli auandarhu anapuecha xarharaspti, engaksï Diósïni k'éri ambe arhimpka, ísïksï uandaparini:
14“¡Jini auandarhu k'éri t'íntskua Diósïristi!
¡Ka parhakpeni Diósïri xénhchakatecha, sési pájperanhe!”
15Ka engaksï ánjelicha karhanchentapka, karichi erangutichaksï arhijperaspti:
–Ju je Beleni exeni ambesï úkorhe, engajtsïni Acha aianguka.
16Ka sóntkuksï niraspti, ka Mariani ka Josenksï xéntaspti; ka tataka sapichu chekakuarhu aponhetixapti. 17Ka engaksï xéntapka, p'iárasptiksï uandantani enga xáni tataka sapichueri ambe ánjeli arhiapka. 18Ka iámendu engaksï kurhauempka imani ambe engaksï karichi eranguticha uandantempka ískuksï pakarerasïrempti. 19Ka Maria eratsentaparini iámendu íni ambe mintsitarhu patsakorhesïrempti. 20Ka karichi erangutichaksï Diósïni k'éri ambe arhipantaspti ka pirekupantanksï, iámendu imani ambe jimbo engaksï exepka ka kurhani, jimboka iámendu ambe ísï úkorhespka eskaksï na aiangunhapka.
Jesusi sapiparini k'éri tiósïo pánhaspti
21Ka enga na iúmu tanimu jurhiatekua jatiripkia, tataka sapichu ts'iuerakuani pasïri p'ikujtsïkumenhapirindi, ka Jesusi arhinhataranhaspti, ísï eska ánjeli Mariani na arhipka enga nótki sapini kámani jápka.
22Enga na nitamapkia jurhiatekuecha, ka jimboka Moisesiri juramukuarhu ísï arhisïnga, tataka sapichunksï Jerusaleni páspti Achani míndakuntani. 23Ísïksï jámaspti jimboka Acheri juramukuarhu ísï karakata jarhaska: “Ts'iueriti urheti, Acha míndamenhaati.”#2.23 Ex 13.2,12. 24Ka nirasptichkaksï kéjtsïtakua pákuni, ísï eska Acheri juramukua na arhijka: Tsimani jipunhi k'érati o tsimani jipunhi sapinharhichani.
25Jimajkani isï, Jerusaleni irekaxapti acheti ma enga Simeoni arhinhempka. Acheti kaxumbitispti ka k'éri tiósïo jándini, enga erokorheni jápka eska Israeli p'ímutanhantapiringa. Ka Espiritu Sántuni incharhekorhetixapti, 26ka aianguspti eska nótki uarhini japiringa eska urheta Krístuni exepiringa. 27Simeoni k'éri tiósïo niraspti jimboka Espiritu Sántu ísï p'ikuastaspka; ka engaksï Jose ka Maria Jesusintu pápka, ísï úni eska juramukua na arhijka, 28Simeoni sapini kamanharhispti ka Diósïni ísï k'éri ambe arhispti:
29“Acha, iásï k'ória, íntspeskaria engari aiatspepka:
Ekari uéjka jurajkunia eska chéti jántspiri sési p'ikuarheraparini uarhiaka.
30Jimbokani chéti p'ímutantskuani exeskia
31engari iámendu iretechani japarini uénaka úskuni.#2.30-31 Is 40.5; 52.10.
32Erajkutarakua enga ma parhakpeni t'íntskaraaka#2.32 Is 42.6; 49.6; 52.10.
ka enga chéti ireta Israeli k'érika.”#2.32 Is 46.13.
33Jesusiri tátjemba ka amambaksï ísku pakareraspti Simeonini kurharini enga tataka sapichueri ambe uandempka. 34Jimajkani Simeoni újchakuraspti, ka Mariani, Jesusiri amambani arhispti:
–Exe, i tataka sapichu erakukatesti, uánekua Israeli anapuecha inderi jimbo tsînchenhaati ka uánekua sési niánhantaati. Indeni Diósï xarhataati, ka uánekuaksï no jiókaati, 35ka indeni jimbori t'u nósesi p'ikuarheraaka, ísï eskaksïni mintsitarhu tiámu ma jarhanhani, ka mítekorheati enga xáni ambe jatanhetsperanhajka.
36Ístu jima jarhaspti Diósïri uandari ma enga Ána arhinhempka, kánekua kutsimiti ma enga Fenueli uájpepka ima enga Aseriri sïrukuepka. Ima kánekua sapichu uambuchaspti ka uámbani jinguni iúmu tsimani uéxurhini irekorhespti, 37ka tsîndisptia ka t'ámu ekuatse t'ámu (84) uéxurhini jatirisptia. Ka k'éri tiósïo nómeni kéndikusïrempti, ka tiósïo k'arhinda japarini ka uandamukukorheparini Achani chúrekua ka jurhiakua marhuakusïrempti. 38Nana Ánajtu tiósïo ima jándu niáraspti, ka uénaspti Diósïni k'éri ambe arhini ka tataka sapichueri ambe aianguani imechani engaksï Jerusaleni p'ímutantskua erokorheni jápka.
Nasaretiksï níntasti
39Engaksï na k'amarapka iámu ambe úni, eska Acheri juramukua na arhistatspejka, Nasaretiksï níntaspti enga Galilea jaka. 40Ka tataka sapichu t'arhexexapti ka uiuinhaxeni jarhani ka mímixeni jarhani, ka Diósï xénhchasïrempti.
Tataka sapichu k'éri tiósïo pakarasti
41Jesusiri tátjemba ka amambaksï p'indekua jatsispti mándani uéxurhini Jerusaleni nirani Páskueri k'uíncheni. 42Ka enga Jesusi témbeni tsimani uéxurhini jatiripkia, imaksï iámendu karhamaspti Jerusaleni k'uíncheni. 43Ka nimatiru, k'uanhatsentani jámani, tátjemba ka amambaksï no exespti eska Jesusi Jerusaleni pakaraspka. 44Ma jurhiatekuaksï xanharasptia eratseparini eska Jesusi máteruecha jinguni k'uanhatsentaxapka, ka engaksï jámapka imeri márkuechani kurhamarheani ka engaksï jinguni xáni mítperapka, 45nóksï xéntaspti. Ka k'uanhatsentasptiksï Jerusaleni Jesusini jirinhantani.
46Tanimu jurhia jimboksï k'éri tiósïo xéntaspti, ima juramukua jurhentpiricha jinguni uaxakatini jarhani, kurhajchaani ka mámaru ambe kurhamarheaxapti; 47ka iámendu engaksï xáni k'urhajchani jápka eratsentanksï pakarerasïrempti, jimboka kánekua mímixespka ka sési mókukorhesïrempti ambe enga kurhamarhenhapiringa.
48Engaksï tátjemba ka amamba exepka, ískuksï pakaraspti; ka amamba arhispti:
–Jucheti uátsï, ¿Andijtsïnisï ísï manata? Táte jingunksïni uandanheaparini jámaska jirinhantani.
49Ka Jesusi arhintaspti:
–¿Andijtsïnisï jirinhantani jápi? ¿Andi nójtsï míteski eskani jucheti Táteri k'umanchekuarhu japiringa?
50Ka imaksï no kurhangukuspti ambesï arhikuekani jápi.
51Tátsekuaksï tátjemba ka amamba jinguni Nasareti níntaspti, ka Jesusi jima irekaspti kurhandirakuaparini. Ka amamba iámendu íni ambe mintsitarhu patsakorhepasïrempti. 52Ka Jesusi mímixekua káneraxapti ka iójtarhani jarhani, ka Diósï xénhchasïrempti ka ístuksï iámenduecha xénhchanhasïrempti.
Valgt i Øjeblikket:
San Lucas 2: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
