San Lucas 15
15
Karichi eranguti enga karichini kuátapka#15.1-7 Las tres parábolas del cap. 15 forman una unidad literaria, en la que Jesús contesta a los fariseos que lo criticaban por tratar con gente de mala fama (vv. 1-2). El punto culminante se encuentra en la conclusión de la tercera parábola (vv. 25-32).
(Mt 18.10-14)
1Iámendu ima engaksï Roma axakua tumina tánempka, ka máteru engaksï nósesi úrini mítekatepka andarherasïremptiksï Jesusini kurhajchani. 2Indeni ambe jimboksï fariseoecha ka juramukua jurhentpiricha arhinhchasïrempti, arhiparini:
–I k'amanharhintstichani sési eroasïndi ka imecha jinguni t'iresïndi.
3Jimajkani Jesusi íni uandantskua terukutarantskua uandaspti: 4“¿Ne cha ma ísï enga iúmu ekuatse (100) karichichani káajka ka enga ma kuátajka, no máteru t'ámu ekuatse témbeni iúmu t'ámu (99) juátarhu jurarkuasïnki, ka nirani jirinhantani karichini enga kuátaka, ka no níntasïndi eka no xéntani jarhajka? 5Ka enga exentajkia, tsípeparini ichandisïndi 6ka enga chénjembo niántajka, p'íchpiri jémbechani ka irengutichani tánantaasïndi ka arhiasïndi: ‘Ju je jíndeni jinguni tsípeni, jimbokani xéntaskia karichini engani kuátapka.’ 7Aianguxakaksïni eska májkueni tsípekua jarhasïnga auandarhu enga k'amanharhintsti ma Diósïni andarhentajka, eska t'ámu ekuatse témbeni iúmu t'ámu (99) engaksï no uétarhenchajka Diósïni andarhentani.”
Uarhiti enga tuminani tsîtapka
8“O máteria: ¿Náki uarhiti enga témbeni tumina kámani jauaka ka ma tsîtani no erajkutarakua ma étskusïnki ka iámu k'umanchekuarhu iatsitakuarhu k'arhatani? ¿Ka no jurajkuntani jirinhantani enga no xéntani jauaka? 9Ka enga na xéntajka, tánantaasïndi imeri p'íchpirichani ka irengutichani ka arhiani: ‘Tsípe je jíndeni jinguni, jimbokani xéntaskiia tumina engani tsîtapka.’ 10Arhixakaksïni eskaksï méntkueni tsípesïnga Diósïri ánjelicha enga k'amanharhintsti ma Diósïni andarhentajka.”
Acheti enga uájpani tsîtapka
11Jesusi uandantasptijtu: “Acheti ma tsimani sapichani kásïrempti, 12ka ima enga sánderu sapichuepka tátjembani arhispti: ‘Táte, íntskurini enga xáni juchetika, imani ambe engarini jíndeni pakatacheaka.’ 13Namoni jurhia tátsekua, uájpa sapichu atarantaspti enga xáni imeripka, ka imani tumina jimbo iauani máteru k'éri iretarhu niraspti, ka jima nánditerkueni irekaparini tumina iámu ambendarhespti. 14Ka enga na k'amajkutapkia, ka imani k'éri iretarhu kánekua nómbe t'irekua jarhani ima uénaspti k'arhimaparini jámani. 15Niraspti jima anapu achetini ma ánchekorheta kurhakuni, ka ima uéramani axaspti kúchi erangutaraani. 16Uarhisïrempti k'arhimani ka kúchicheri t'irekua jamberi uéksïremptia arhani, ka nónema intsïmbesïrempti. 17Enga jamberi sési eratsentapka: ‘¡Uáni ánchekorherichaksï jucheti táteo t'irekua jukari jamberi jatsikorhesti, ka ji ixu uarhixaka k'arhimani! 18K'uanhatsentaaka jucheti táteo ka arhiaka: Jucheti Táte, Diósïni ka t'úngenikini k'amanharhichentaska; 19nóteruni nitatarheska chéti uájpeni; chéti ánchekorheri ménirini káma.’ 20Ísï jimbo xanhari jatantaspti ka tátjemberi k'umanchekuarhu k'uanhatsentaspti.”
“Enga útasï iauaniteru jápka, tátjemba exespti ka p'amojkuspti. Uiriaspti kúntani ka kamakamataspti ka putinharhikuni erontatini. 21Ima arhispti: ‘Jucheti Táte, Diósïni ka t'úngenikini k'amanharhichentaska; ka nóteruni nitatarheska chéti uájpeni.’ 22Ka tátjemba jántspiri jémbechani juramukuaspti: ‘Kókuani, takusï sánderu ambakiti peta je, ka xukutantsï je; jukajkurhakua tiripitiri ma inchajkurhata je, ka kuarhachijtu jatsikuntani je. 23Jua je úakasï sapichuni enga sánderu p'ukuka ka ata je. ¡K'uínchekuachi úaka ka k'éri máchi t'ireaka! 24Jimboka i jucheti sapi uarhirixapka ka tsíntasti; tsînchespti ka xéntaskachia.’ Ka k'uínchekuaksï uénaspti.”
25“Enga ísï úkorheni jápka, uájpa urheti juátarhu jámaxapti. Enga niántani jápka, kústakua kurhaspti ka eska uarhanhaxapka. 26Jimajkani jántspirini ma ióarhispti ka kurhamarhespti ambe úkorhexapi. 27‘Chéti erachi junguasti ka chéti táte úakasï sapichu sánderu p'ukurakatani atarkorhesti, jimboka sési janonguaska nómbema úkorhenchatini.’ 28Ka uájpa urheti xáni ikiaspti enga jamberi no uékempka inchantani, ísï jimbo, tátjemba nitsïkorhespti kómarhini eska ichantapiringa. 29Ka ima tátjembani arhispti: ‘Míteskari namoni uéxurhinikini marhuacheskia, ka nómenirini íntskuska náuejki karichi sapichu ma eskani jucheti p'íchpirichani jinguni t'irekua ma úntapiringa. 30Ka iásï k'ória enga i chéti sapi janonguaka enga chéti tumina uarhiti ísku jándichani jinguni ambendarheka, ka t'u indeni úakasï sánderu p'ukurakatani atakuni.’ 31Tátjemba arhispti: ‘Jucheti uátsï, t'úri méntku jíndeni jinguni jarhaska, ka iámu ambe eskani xáni jatsika chétisti. 32K'óru uétarhexapti k'uíchekua úni k'éri t'irekua ma jinguni ka tsípeni, jimboka chéti erachi enga uarhirini jápka, tsíntasti; tsînchespti ka xéntaskachia.’ ”
Valgt i Øjeblikket:
San Lucas 15: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
