San Lucas 11
11
Jesusi uandamukukorheni jurhentpespti
(Mt 6.9-15; 7.7-11)
1Ma xanhari Jesusi uandamukukorhexapti; ka enga na k'amarapka, jurhengorheri jémba ma arhispti:
–Acha, jurhendajtsïni uandamukukorheni, méntkueni eska Juánu jurhengorheri jémbechani na jurhendaapka.
2Jesusi arhiaspti:
–Na engajtsï jatini uandamukukorheaka, arhi je:
Táte, chéti jakangurhikua k'éristi.
Chéti irechekuajtsïni janoche.
3Mándani pauanijtsïni t'irekua íntsku.
4K'amanharhintskuechantsïni púacheantsï,
ísï eskani juchajtuni na púakuantajka
iámendu imechani engajtsïni jánhechejka.
Ásïjtsïni jiáreta eskachi nósesi jásï ambe únhchaaka,
[sánderu sáni, nóambakitintsïni kénditache.]
5Jesusi arhiasptiteru:
–Ju je eranhaskani eska cha ma ísï p'íchpirini ma kámsïnga, ka eskaksïni ima terujkani chúrekua uámutachesïnga ka arhinksïni: P'íchpiri, tanimu echakua kurhindarini p'ítseta, 6jimboka jucheti p'íchpiri ma iauani uératini iáiasï janoska, ka nómbema jatsiska ambe íntskuni. 7Ka eska ima incharini jatinku arhintaaka: Ásïrini ójkutani ja; míkorhexatia, ixu k'uínnhaxatia. Nóteruni úakia jauarani t'úngeni ambe íntskuni. 8Arhiakaksïni eska jauaraaka, no jimboka p'íchpiri jémbeska, sánderu sáni jimboka niáchataskia, jauaraati ka iámu ambe íntskuati ambe enga xáni uékani jaka. 9Ísï jimboksïni arhisïnga: Kurhajkorhe je, ka intsïnhakajtsï; jirinha je, ka xéntaakajtsï, uámutatspe je, ka mítamenhaakajtsï. 10Jimboka ima enga kurhajkorhejka, intsïnhasïndi; ka ima enga jirinhajka, xéntasïndi; ka ima enga uámutatspejka, mítamenhasïndi.
11“Cha ma ísï engajtsï sapichani káajka, ¿Tekaapirini akuitse ma íntskuni chári sapini engaksïni kurucha kurhacheni jauaka? 12O ¿K'uarapu ma íntskuni ekaksïni ima t'irekua kurhacheni jauaka? 13Nándijtsï chéia engajtsï no ambarhaka, jurhenaskajtsï chári sapichani sési ambe íntsaani, ¡Na xáni no Diósï auandarhu anapu Espiritu Sántuni íntsaua imechani engaksï kurhakuaka!”
Jesusinksï nósesi aiangpekuspti
(Mt 12.22-30; Mc 3.20-27)
14Jesusi nóambakitini petarhetantaxapti achetini ma enga nunuxipka; ka enga na nóambakiti uérhentapkia, nunuxi uénaspti uandani. Ka ísku pakareranhaspti, 15ka máruksï uandaspti: “Belsebu, nóambakiticheri k'éri íntskusti uinhapekua eska úaka nóambakitichani petarhpeantani.”
16Máteruksï, uékani ts'éjkuni arhisptiksï eska auandarhu mínda ma xarhatakuapiringa. 17Ka Jesusi, míteparini ambe engaksï eratseni jápka, arhiaspti:
“Náki uéjki ma juramukua arhukurhitini, jandiojku k'amakurhikorhesïndi, ka k'umanchekuarhu uarhiperanhatini k'amandenhasïndi. 18Ístu, enga Nóambakiti arhukurhikorheska, ¿Nénateru juramua? Íni ambe uandasïnga jimbokajtsï cha uinhamu uandaxaka eskani ji nóambakiti Belsebu jimbo nóambakitichani petarhpentasïnga; 19ka enga ambe ísïka, ¿Chári jurhengorherichani ne íntsasïni uinhapekua eskaksï úaka nóambakitichani petarhpentani? Jimbo, imajkuksïni chánksïni uekajpaati. 20Ka engani ji Diósïri uinhapekua jimbo nóambakitichani petarhpentajka, arhikuekasïndi eskaksïni Diósïri irechekua janocheskia.”
21“Enga acheti uinhapiti ma atajpetarakuechani jingunku jatsiaka ka kuáni jarhani imeri k'umanchekuani, nómbema sïpamenhaati enga xáni ambe jima patsani jaka. 22K'óru enga jurhajka máteru sánderu uinhapiti ma ka andani, euakorheati atajpetarakuechani enga sési xékorhetarempka, ka imeri kángorhekua arhungustpeati.”
23“Ne enga no jíndeni jingunika, jucheti ikiatspiristi, ka ima enga no jíndeni jinguni tánantajka etsandurhisïndi.”
Nósesi jásï Espiritu k'uanhatsentani jámsïndi
(Mt 12.43-45)
24“Enga nósesi jásï espiritu ma nemani uérhentajka, k'arhik'arhindu jámani jarhasïndi jirinhani nani mintsikorheni; ka enga no xéntajka, uandasïndi: Jucheti k'umanchekuarhu k'uanhatsentaaka, jima engani uéraka. 25Ka enga na k'uanhatsentajka, ísï xéntasïndi eska k'umanchekua ma enga sési péntskata jarhajka ka sési k'arhatakata. 26Jimajkani nirasïndi ka máteru iúmu tsimani sánderu nósesi járhatichani espirituechani tánantaasïndi, ka iámenduksï imani incharhesïndi jima irekorheni, ka tátsekua sánderu nósesi jarhasïndia.”
Ima ambe enga sési jimbo jukaparhaka
27Enga Jesusi íni ambe uandani jápka, uarhiti ma teruakuni ísï uératini uinhachaspti:
–¡Tsípe ima nana engakini kángorheka ka t'arhexerankini!
28Ima arhispti:
–¡Sánderu sánksï imasï tsípeati engaksï kurhajka ambe enga Diósï uandajka, ka engaksï kurhandirakujka!
Máruksï kurhajkorhespti eska mínda xarhatapiringa
(Mt 12.38-42; Mc 8.12)
29Sánderu uánepanhaxapti Jesusini kurhajchani, ka ima uénaspti arhiani: “Iásï anapuecha jukari no ambarhanhasti; míndaksï kurhajkorhesïndi eskaksï xéranhaaka, enga úka, xánderku ísïksï xarhatamenhaatia eska Jonasi na xarharapka. 30Jimboka májkueni eskaksï Nínibe anapuecha na Jonasini axamenhapka, iásï anapuechajtuksï májkueni acheti Uájpani axamenhasti. 31Ima jurhia kurhamarhperantskuarhu, engaksï iásï anapuecha terunharhitanhaaka, kétsemani anapu nana irecha arhinharhikuauati; jimboka íni parhakpeni ima sánderu iauani uératini jurhaska Salomoniri mímixekuani kurhani, ka ima enga ixu jaka Salomoni jinguni sánderu k'éri ambesti. 32Imani jurhiatekua kurhamarhperantskuarhu Nínibe anapuechajtuksï jauaraati, engaksï iásï anapuecha arhinharhikunhani janhaaka, ka imajtuksï arhinharhikuauati; jimbokaksï Nínibe anapuecha móantaspka engaksï Jonasiri aiangpekuani kurhapka, ka Jonasi jinguni sánderu k'éri ambesti ima enga ixu jaka.”
Anhanhatakueri erajkutarakua
(Mt 5.15; 6.22-23)
33“Nónema étskusïndi erajkutarakua ma ka jískani o kápchakurani, iótakuarhusï pérajti, eska ne engaksï inchaaka erajkuaka. 34Chéti éskuechaksï erajkutarakuesti; ka engaksï ambakeka, iámu chéti anhanhatakua erajkukuarhu jámani jauati; ka ekaksï nóambarhaka, chéti anhanhatakorhekua pájpakandu jámani jauati. 35Xéparini eska erajkutarakua enga t'u jatanhetini jaka no pájpakandekueka. 36Jimboka eka iámu chéti anhanhatakua erajkutarakua kámka ka nósani pájpakaxeni, iámu amberi sési exeaka, ísï eska jiájkani engakini erajkutarakua ma t'íntskaracheni jarhajka.”
Jesusi tátechani xukaaspti
(Mt 23.1-36; Mc 12.38-40; Lc 20.45-47)
37Enga Jesusi k'amarapkia uandani, fariseo ma imo p'imarhespti t'irerani, ka Jesusi niraspti ka uaxakapani t'ireni. 38Fariseo ísku pakaraspti enga exepka eska no urheta jupajkuspka t'ireni jámani, eska no ísï úspka eska na p'indekuepka. 39Ka Acha arhispti:
–Chájtsï fariseouecha tsúntsuni ka urhanini kutsuparhakuantasïnga, ka incharini ísïjtsï uinirixaka imani ambe enga sïpakateka ka nósesi andakateni. 40¡Inchandimecha! ¿Nójtsï míteski eska ima enga inchanhetini anapu ambe úka, táparhakuni anapu ambejtu ima úska? 41No jatsikorherichani mintsita jinguni intsïmbea je, ka ísïjtsï iámu pímpinhaxentaaka.
42“¡Áke cha, fariseouecha! Engajtsï Diósïni sáni arhutakujka iámendu jásï xakua engajtsï ikarakorhejka, ka nójtsï úsïnga sési pájperani ka xénhchperani eska Diósï na uéjka. Jimboka tsimani ambesï úkueka.”
43“Áke cha fariseouecha engajtsï k'érikuarhu uaxakanhchajka ka uékantsï eskaksïni xanhari jimbo k'éri ambeni uandajpaaka.”
44“¡Áke cha, engajtsï ísïka eska uarhiri jatsintskata! Enga t'auajchakunhajka no míteparini eska jima jarhasïnga.”
45Jimajkani juramukua jurhentpiri ma arhispti:
–Jurhentpiri, engari ísï uandajka juchantsïni jamberijtsïni pájtamasïnga nósesi p'ikuastani.
46Ka Jesusi uandaspti:
–¡Áke chájtu juramukua jurhentpiricha! Engajtsï máteruechani kuiparhataajka imani ambe enga nónema újka páni, ka cha k'órujtsï no jamberi uékani pirekorheni.
47“¡Áke cha! Engajtsï kasïperakuantaajka jatsintskuani imani Diósïri uandarichani engaksï chári ióntki anapuecha uándikuaka. 48Indeni ambejtsï úrini xarhatasïnga eskajtsï jaiapanhentaska engaksï chári ióntki anapuecha úka, jimbokaksï ima uándikuaska ka chájtsï jatsintskuechani sési jájkukuani.”
49“Jimbosï Diósï imeri mímixekua jimbo uandati: ‘Diósïri uandarichani ka uandakua párichanksïni axacheaxaka, ka márujtsï atauaka ka márujtsï no xénhchani káuaka’ 50Jimboka Diósï iásï anapuechani maiampetarauaka engaksï xáni Diósïri uandaricha uarhika, jiájkani uératintki enga parhakpenika. 51Jiájkani uératintki enga Abeli uarhika ka jiájkani jamberi enga Sakariasï uarhika, imani engaksï tiósïo ataka jima terujkani enga kéjtsïtatarakua jaka. Ísï jimbo, arhixakaksïni eskaksï imecheri uarhikuani iásï anapuecha arhiparhatanhaaka.”
52“¡Áke cha, juramukua jurhentpiricha! Engajtsï mítakua jurhengorhekueri no uinhajka; ka cha jamberijtujtsï no inchasïnga níjtsï jiáretaajki inchani imechani engaksï inchanhchani jaka.”
53Enga Jesusi jima uéntapka, juramukua jurhentpiricha ka fariseouechaksï kánekua ikiaspti, ka uénasptiksï Jesusini ch'urhureni uánekua ambe kurhamarheparini, 54mámaruksï jirinhakuntaparini nóna imeri uandakua jimbo inchajperatarani.
Valgt i Øjeblikket:
San Lucas 11: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
