San Juan 9
9
Jesusi pátenharhini éskatarasti
1Enga uéntapka, Jesusi achetini ma exemaspti enga pátenharhi kángorhenhapka. 2Ka jurhengorheri jémbechaksï kurhamarhespti:
–Jurhentpiri, ¿Andisï inde acheti ísï kángorhenha? ¿Tátjemba ka amamberi k'amanharhitskua jimboeski o inderi k'amanharhitskua jimboeski?
3Jesusi arhiaspti:
–No inderi jimboesti, ka níjtu tátjemberi o amamberi k'amanharhintskue, jimbosï ísï jati eska indeni jimbo xarharaaka ambe enga xáni Diósï újka uni. 4Enga jurhiakuejka, jatsiskachi ánchperata úkuni imani engarini axaka; jimboka chúrexamka enga nónema újka ánchekorheni. 5Engani jámberi íni parhakpeni jámani jaka, parhakpeni anapu erajkutarakueska.
6Ísï uandaspti ka t'uantskarani, kuechenda jimbo atsïmu sáni úspti ka pátenharhini éskuarhu atanharhikuspti. 7Ka uandaspti:
–Ni jupanharhintani itsï jatakua Siloerhu (enga “Axakata” arhikuekajka),
Pátenharhi niraspti eska na arhinhapka ka jupanharhintaspti ka exepunguasptia. 8Jimesï anapuecha ka iámendu ima engaksï exepka eska tumina kurhajkorheni jarhasïrempka, kurhamarhekorhesïremptiksï:
–¿Andi no indesï uaxandetini jarheni tumina kurhajkorheni?
9Máruksï uandasïrempti:
–Jo indesti.
Máteruksï uandani:
Nombe, no jindesti, jinisï májkueni jánharhiti.
Ka ima enga patenharhipka uandakorhesïrempti:
–Jo, jíska.
10Ka kurhamarhesptiksï:
–¿Ka nénari jámani iásï úsïngia exeni?
11Ka pátenharhi arhiaspti:
–Ima acheti enga Jesusi arhinhajka, atsimurini atanharhikusti, ka arhistirini: Ni itsï jatakua Siloerhu ka jupanharhintsï. Ji niraska, ka jupanharhintatini, eskaska.
12Jimajkuksï kurhamarhespti:
–¿Andi nani jámaxaki ima acheti?
Ka ima arhiaspti:
–No míteska.
Jesusi néna éskataraski pátenharhini
13Pátenharhinksï fariseuechani pákuaspti, 14sábadu jurhiatekuespti enga Jesusi atsïmu jimbo eskatarantapka. 15Ka imaksï kurhamarhespti néna jámaspi enga úempkia exenia. Ka ima arhiaspti:
–Eskuarhurini atsïmu atanharhikusti, jupanharhintaska, ka úsïngia exeni.
16Máruksï fariseouecha uandasïrempti:
Ne emanga ísï niátaka, no Diósïristi, jimboka no janhanharhisïnga sábadu jurhiatekuani.
Ka máteruksï undasïrempti:
–¿Nénajtu úpirini indeni járhati milagru xarhataani enga k'amanharhintstika?
Ísïksï arhijperaparini arhukurhispti, 17ka ménderuksï uéntaspti kurhamarheni imani enga patenharhipka:
–Ka engakini ísï éskataraka, t'u imeri ambe, ¿Ambe sáni uandasïni?
Ima uandaspti:
–Jucheti jimbo Diósïri uandaristi.
18Ka judiouechaksï no uékaspti jakajkuni eska pátenharhispka ka eska iásï úsïrempkia eskani, ka tátjembani ka nánde jémbanksï p'itajkorheaspti, 19ka kurhamarhesptiksï:
–¿I chári sapiski? ¿Uandantaxakijtsï eskajtsï pátenharhi kángorheska? Ka ¿Néna jimbosï iásï újkia exeni?
20Tátjemba jembechaksï undaspti:
–Míaxakachi eska juchariska, ka eskaksï pátanharhini kángorheska; 21k'óruchi no míteska néna jimbosï újkia exeni, nójtuksi míteska ne eskatarantaski. Indeni kurhamarhekorhe je; k'éristia, indeksïni úatia aiangukorheni.
22Tátjembechaksï chéta jimbo ísï uandaspti, jimbokaksï judiouecha arhijperatixapka eskaksï petantapiringa tángorhentskuarhu néni enga jiókorhepiringa eska Jesusi Krístuespka. 23Jimboksïsï ísï uandapti tátjembecha: “K'éristia, kurhamarhekorhe je.”
24Judiouechaksï ménderu p'itajkorhespti imani enga pátenharhipka, ka arhisptiksï:
–Sésijtsïni aiangu Diósïni japarini. Jimbokani jucha míteska eska ima acheti k'amanharhintstiska.
25Jimajkani ima arhiaspti:
–Enga ambe k'amanharhintstika, ji no míteska. K'óruni míteska eskani ji no éskasïrempka ka iásï éskasïngia.
26Ménderuksï kurhamarhespti:
–¿Ambekini úcheski? ¿Nénakini kámaski éskatarantani?
27Ima arhiaspti:
–Arhiskaksïnia, ka chájtsïni ísku kurhajchasïnga. ¿Andijtsïsï uéjki eskaksïni méntku úndaaka aianguni? ¿Andi chájtu uékaxaki chúxapani?
28Útakusptiksï enga ima ísï arhiapka, ka arhisptiksï:
–T'úri jindeka imeri jurhengorherini; jucha Moisesiri jurhengorheriska. 29Ka mítetixakachi eska Diósï Moisesinisï uandaxekuka, ka indenchi no jamberi míteska nani jutiski.
30Ima enga pátenharhipka arhiaspti:
–¡Nénajtia isï! Cha no míteni nani jutiski, ka imarini úni jámberi éskatarantani. 31Sésichi mítetixaka eska Diósï no kurhauasïnga k'amanharhintstichani; p'amojpitichanisï kurhajchaajti ka imechani engaksï ísï irekajka eska ima námendu uéjka. 32Nómeni mítekorhexapti eska nema éskatantapiringa máteru nemani enga pátenharhi kángorhenhaka. 33Eka imani achetini no Diósï axapiringa, nómbema úpirindi úni.
34Ísï jimboksï arhispti:
–¿Tekaasïnijtsïni juchantsïni t'u xukani? Engari iámu k'amanharhintatini kángorhenhaka. Ka tángorhentskuarhuksï petantaspti.
Jesusi parhakpeni sési péjpentani jurhasti
35Jesusi mítespti eskaksï pátenharhini petantaspka; ka enga na kúpka kurhamarhespti:
–¿T'u Acha Uájpani mintsikasïnki?
36Ima arhispti:
–Arhirini ima néski, ka ji jakajkuaka.
37Jesusi arhispti:
–Xériskaria: Jíska, jíndeni jinguniri uandaxexaka.
38Acheti tinguixurhikuspti Jesusini ka arhispti:
–Acha, mintsikasïngakini.
39Tátsekua Jesusi uandaspti:
Ji parhakpeni sési péjpentanisïni juka, eskaksï pátenharhicha éskaaka ka eskaksï pátenharhiaka ima engaksï exejka.
40Máru fariseouecha engaksï jima jápka, ísïksï kurharini kurhamarhespti:
–¿Arhikuekaxakiri eskani juchajtuni no exesïnga?
41Jesusi arhiaspti:
–Engajtsï no exepiringa, nójtsï k'amanharhintapiringa. Ka engajtsï uandakorheni jaka eskajtsï exesïnga, k'amanharhintstiskajtsï.
Valgt i Øjeblikket:
San Juan 9: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
