Génesis 17
17
Pasïri p'ikuts'ïkukua eska mínta
1Abrami t'amu ekuatse ka témpeni iumu t'amu (99) uéxurhini jatiripsti enka ACHA xarhakupka ka arhini: Ji Diósï iámu uinhapitispka, kaxumpekua jinkuni ireka.
2Ka pakatperakua ma úaka t'unkeni jinkuni, uánekua sïrukuechani kámaakari.
3Abrami tsérhukua antaskueraspti ka Diósï arhispti:
4Aiachexakakini eskari uánekua k'uiripuni tátekuauaka. 5T'úri nóteruri Abrami jakankurhiaka, iásïri Abrahami jakankurhiaka, jimpori uánekua k'uiripueri tátekuauaka. 6Ka uánekua sïrukuechani íntsauaka, chéti sïrukua k'éri iretechatechani uaxastauati ka uapatsekuechani ka máruksï irecheuati. 7T'unkeni ka chéti sïrukuechani jinkuni uáka pakatperakua. Ka méntku ísï pakaraati pakaptperakua, ka ji chéti ka chéti sïrukueri Dióasïuak'a. 8T'únkeni ka chéti sïrukuani íntskuaka íni echeri enkari jaka irekani, Kanaani echeri, ka chéti sïrukueri Diósïuaka méntku ísï.
9Diósï arhispti Abramini: Ísï jáma eskachi na pakatperaka ka eskaksï ísï úaka chéti sïrukuecha méntku ísï.
10I jintesti pakatperakua enka chá jinkuni úni jaka, ka janhanharhi je, t'ú ka chéti sïrukuecha: Eskaksï iámentu tatakecha pasïri p'ikuts'ïkuaka. 11Cháts'ï pasïri p'ikuts'ïkuaka, ka ima mínteuati chá jinteni jinkuni. 12Iámentu charhukuecha enkaksï tatakeuaka ka enkaksï iúmu tanimu (8) jurhiatekua antap'enutini jauaka pasïri pikuts'ïkukua je, enkaksï xáni chári sïrukueuaka, enkaksï chenio antap'ekuaka, enkaksï p'iananhaaka ka no jima anapueni, enka no chári sïrukueuaka. 13Imaksï enkaksï chéni anapueuaka ka jántspirichani enkari piauaka imaniri tsïkuiri p'ikuts'ïkukuauaka, enkari ísï úska, imaniri jimpo arhikuekaxaka eskarini jinteni marhuacheaka. 14Imaksï enkaksï no pasïri p'ikuts'ïkumenhaaka, iretarhu anapuechaksï uántikuati jimpori no janhanharhiska jucheti pakapterakuani.
15Diósï arhisti Abrahamini: Sarai chéti uarhiti, nóteru isï jakankurhiati, iásï Sara jakankurhiati.
16Úch'akuraaka ka sapini ma kónteaka imani jinkuni, ka ima nánteuati uapatsekuecheri, irechecheri ka iretecheri enka imeri sïrukuecha uaxastaaka.
17Abrahami tsérhukua antaskueraspti ka tsípeparini arhispti, jantiok'u uantaspti: ¿T'arhepiti ma, iumu ekuatse (100) uéxurhini jatiri sapini kámani? ¿Ka Sara t'amu ekuatse ka témpeni (90) uéxurhini jatiri sapi kámani? 18Abrahami arhispti Diósïni:
¡Eska Ismaeli uák'a t'unkeni japantiru irekani!
19Diósï arhispti: Sara chéti uarhiti sapi ma kámaati, enka chétiuaka ka Isaakiri jakankurhitaaka. Ji míataka pakatperakua ka eskaksï no mirikurhiaka pakatperakuani imeri sïrukuecha.
20Ka Ismaeli, imantuni úcha'akuraaka ka uánekua sïrukua konteka. Ima témpeni tsimani juramuticheri táte jempeuati, ka ji úaka eska imeri sïrukua, k'éri ma ireta uaxastaaka, 21Pakatperakua Isaaki jinkuni úaka, íni jurhiatekua ma uéxurhini jimpo Sara sapini ka kónteni jauati.
22Enka Diósï k'amarapka Abrahami jinkuni uantaxeni, kéntikuspti jima uératini. 23Abrahami ima jurhiatekua ísï, Isamelini, uáp'ani ka iámentu jántspirichani enkaksï imecho anatap'enupka ka iámentu enka xáni p'iaapka, iámentu tatakechani enkaksï k'umanchekuarhu ánchekorhempka, pasïri p'ikuts'ïkukuaspti eska Diósï na arhipka. 24Abrahami t'amu ekuatse ka iumu t'amu (99) uéxurhini jatirispti enka pasïri p'ikusïkupka. 25Ismaeli enka uáp'epka témpeni tanimu (13) uéxurhini jatirispti enkaksï pasïri p'ikuts'ïkukupka. 26Abrahami ka imeri uáp'a Ismaeli, tsimarheniksï pasïri p'ikutsïkuspti ima jurhiani. 27Ka iámentu tataka jima anapuechani pasïri p'ikuts'ïkuspti, jántspirichani enkaksï jima antap'enupka, ka imechani enkaksï uérakua anapuepka, ka enkaksï tumina jimpo pianhapka.
Valgt i Øjeblikket:
Génesis 17: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.