ଯୋହାନ୍ 8

ବ୍ୟାଭିଚାର୍ ରେ ସାବ୍ କାନ୍ କୁଡ଼ି କେ ଛାମା

1ମେନ୍ଦୋ ୟୀଶୁ ଆୟାଃ ଚେଲାକୋ ଲୋଃ ଜାଏତୁନ୍ ଦାରୁ ବୁରୁ ତେ ସେନୋଃ ନାଏ। 2ଏଟାଃ ହୁଲାଙ୍ଗ୍ ସେତାଃ ପାଡ଼୍ ଇନିଃ ଆଡୋଃଗି ମାନ୍ଦିର୍ ରାଃ ରାଚା ରେ ହିଜୁଃନାଏ, ଆଡୋଃ ସବେନ୍ ହୋଡ଼ୋକୋ ଇନିଜାଃ ନାଡ଼େଏ ହିଜୁଃ ଜାନାକୋ ହାର୍ ଇନିଃ ଦୁବ୍ କେତେ ଇନ୍‍କୁକେ ଶିଖାଅ କେଃକୋୱାଏ। 3ଏନ୍ତେ ଆଇନ୍ ଗୁରୁକୋ ଆଡୋଃ ଫାରିସୀ ହୋଡ଼ୋକୋ ମିୟାଃ କୁଡ଼ି କେ ଆଉକିଜାକୋ, ଅକନିଃ ବ୍ୟାଭିଚାର୍ ରେ ସାବାକାନ୍ ତାଇକେନାଏ, ହାର୍ ଇନିଃକେ ଥାଲା ରେ ତିଙ୍ଗୁ କେତେ ୟୀଶୁ କେ କାଜିକିଜାକୋ, 4“ହେ ଗୁରୁ, ନେ କୁଡ଼ି ବ୍ୟାଭିଚାର୍ ତାନ୍ ଲୋଃ ସାବ୍ କାନାଏ। 5ମୁଶା ନାବୀ ରାଃ ଆଇନ୍ ରେ ଆଏଃ ଆଲେକେ ଆନାଚୁ ଏମ୍ କାଦାଏ ଚି ନେଲେକାନ୍ କୁଡ଼ିକୋକେ ଦିରି ଥେର୍ କୋ ଚାହି, ଏଣ୍ଡେ ଆମ୍ ନେ କୁଡ଼ି ଆଃ ବିଷାୟ୍ ରେ ଚିନାଃ କାଜିତାନାମ୍?” 6ଇନ୍‍କୁ ଇନିଃକେ ପାର୍ଖାଅ ଲାଗିନ୍ ନେ କାଜି କାଜିକେଦାକୋ ଏନାତେ ଇନିଃ ରେ ଦୋଷ୍ ଲାଗାଅ ଲାଗିନ୍ ଜାହାନ୍ କାଜିକୋ ନାମେୟା। ମେନ୍ଦୋ ୟୀଶୁ କବଃ କେତେ ସାର୍ସାର୍ ତେ ଅତେ ରେ ଅହଲ୍ ଲାଗାଅ ଜାନାଏ। 7ଚିମ୍ତା ଇନ୍‍କୁ ଇନିଃକେ କୁଲିକାତି ତାଇନାକୋ, ଏଣ୍ଡେ ଇନିଃ ସିଧା ଜାନାଏ ହାର୍ ଇନ୍‍କୁକେ କାଜିକେଦାଏ, “ଆପେ ଏତେ ଅକଏ ଚିଉଲା ହ କାଏ ପାପ୍ କାଦାଏ, ଇନିଃ ସିଦା ନିଈକେ ଦିରି ଥେର୍ କାଏ।” 8ହାର୍ ଆଡୋଃଗି କବଃ କେତେ ଅତେ ରେ ସାର୍ସାର୍ ତେ ଅହଲ୍ ଲାଗାଅଜାନାଏ। 9ମେନ୍ଦୋ ନେୟା ଆୟୁମ୍‍କେତେ ମାରାଙ୍ଗ୍ ଏତେ ହୁପୁଡିଙ୍ଗ୍ ସାନ୍, ମିହୋଡ଼୍-ମିହୋଡ଼୍ କେତେ ଆକୋ ପାପୀ ତାନ୍‍କୋ ଏନା ଆଟ୍‍କାର୍ କେତେ ଅଡୋଙ୍ଗ୍ ଜାନାକୋ, ହାର୍ ୟୀଶୁ ଏସ୍କାର୍ ଗି ତାଇଜାନାଏ, ହାର୍ କୁଡ଼ି ହେନ୍ତାଃ ଗି ଥାଲା ରେ ତିଙ୍ଗୁ ତାଇଜାନାଏ। 10ୟୀଶୁ ସିଧା ଜାନାଏ ହାର୍ ଇନିଃକେ କାଜିକେଦାଏ, “ହେ କୁଡ଼ି, ଇନ୍‍କୁ କୋତାଃ ସେନୋଃ ଜାନାକୋ? ଚିନାଃ ଜେତାଏ ଆମ୍‍କେ ଦାଣ୍ଡ୍ ରାଃ ଆନାଚୁ କାକୋ ଏମ୍ କେଦା?” 11ଇନିଃ କାଜିକେଦାଏ, “ହେ ସାହେବ୍, ଜେତାଏ ହ କାହା।” ୟୀଶୁ କାଜିକେଦାଏ, “ଇଙ୍ଗ୍ ହ ଆମ୍‍କେ ଦାଣ୍ଡ୍ ରାଃ ଆନାଚୁ କାଇଙ୍ଗ୍ ଏମାମେତାନା; ଜୁ ଅଡ଼୍ଆଃ, ହାର୍ ଆୟୁର୍ ତେ ଆଲୋମ୍ ପାପ୍ ୟା।”

ୟୀଶୁ ଅତେଦିଶୁମ୍ ରେନ୍ ମାସ୍କାଲ୍

12ଏନ୍ତେ ୟୀଶୁ ଆଡୋଃଗି ହୋଡ଼ୋକୋକେ କାଜିକେଦାଏ, “ଇଙ୍ଗ୍ ଅତେଦିଶୁମ୍ ରାଃ ମାସ୍କାଲ୍ ତାନିଙ୍ଗ୍; ଅକଏ ଇଙ୍ଗ୍‍କେ ଅତୋଙ୍ଗିଙ୍ଗ୍ ୟାଏ ଇନିଃ ନୁବାଃ ରେ କାଏ ସେନେୟାଏ, ମେନ୍ଦୋ ମାସ୍କାଲ୍ ନାମେୟାଏ ଏନା ଇନିଃକେ ଜାନାଓ ଜୀଦାନ୍ ଏମେୟାଏ।” 13ଫାରିସୀ ହୋଡ଼ୋକୋ ଇନିଃକେ କାଜିକିଜାକୋ, “ଆମ୍ ଆମାଃ ଗୋୱା ଆମ୍‍ଗି ଏମ୍ ତାନାମ୍, ଆମାଃ ଗୋୱା ସାର୍ତି ନାହାଲା।” 14ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଆଗାର୍ ଇଙ୍ଗ୍ ଇଙ୍ଗ୍ଆଃ ଗୋୱା ଇଙ୍ଗ୍ ଏମ୍ ତାନିଙ୍ଗ୍, ଏଣ୍ଡେ ହ ଇଙ୍ଗ୍ଆଃ ଗୋୱା ସାର୍ତି ତାନାଃ, ଚିୟାଃଚି ଇଙ୍ଗ୍ ସାରିୟାଇଙ୍ଗ, ଚି ଇଙ୍ଗ୍ କୋତାଃ ଏତେ ହିଜୁଃ କାନିଙ୍ଗ୍ ହାର୍ କୋତାଃ ତେ ସେନୋଃ ତାନିଙ୍ଗ୍? ମେନ୍ଦୋ ଆପେ କାପେ ସାରିତାନା ଚି ଇଙ୍ଗ୍ କୋତାଃ ଏତେ ହିଜୁଃ ତାନିଙ୍ଗ୍ ୟାଦୋ କୋତାଃ ତେ ସେନୋଃ ତାନିଙ୍ଗ୍। 15ଆପେ ହୋଡ଼ କୋୱାଃ ପାହୋମ୍ ଲେକା ବିଚାର୍ ୟାପେ, ଇଙ୍ଗ୍ ଅକେୟାଃ ହ କାଇଙ୍ଗ୍ ବିଚାର୍ ୟା। 16ହାର୍ ଆଗାର୍ ଇଙ୍ଗ୍ ବିଚାର୍ ରିକାୟାଇଙ୍ଗ୍ ଏଣ୍ଡେ ହ ଇଙ୍ଗ୍ଆଃ ବିଚାର୍ ସାର୍ତି ତାନାଃ; ଚିୟାଃଚି ଇଙ୍ଗ୍ ଏସ୍କାର୍ ବାଙ୍ଗୁଇଙ୍ଗ୍‍ୟା, ମେନ୍ଦୋ ଇଙ୍ଗ୍ ମେନାଇଙ୍ଗ୍‍ୟା, ହାର୍ ଆପୁ ହ ମେନାଇଜା ଅକନିଃ ଇଙ୍ଗ୍‍କେ କୁଲ୍ କାଦିଙ୍ଗାଏ। 17ଆପେୟାଃ ମୁଶା ନାବୀ ରାଃ ଆଇନ୍ ରେହ ଅଲାକାନା ଚି ଦୁଇ ଝାନ୍ ରାଃ ଗୋୱା ମେଶା କେତେ ସାର୍ତି ହୋବାଅଃୱା। 18ପାହିଲା ଇଙ୍ଗ୍ ଇଙ୍ଗ୍ଆଃ ଗୋୱା ଏମ୍ ତାନିଙ୍ଗ୍, ହାର୍ ଏଟାଃ ଆପୁ ଇଙ୍ଗ୍ଆଃ ଗୋୱା ଏମ୍‍ତାନାଏ ଅକନିଃ ଇଙ୍ଗ୍‍କେ କୁଲ୍ କାଦିଙ୍ଗାଏ।” 19ଇନ୍‍କୁ ଇନିଃକେ କାଜିକେଦାକୋ, “ଆମାଃ ଆପୁ କୋତାଃ ରେ ମେନାଇଜା?” ୟୀଶୁ କାଜିରୁଆଡ଼୍ କେଃକୋୱାଏ, “ନାଦୋ ଆପେ ଇଙ୍ଗ୍‍କେ ସାରିୟାପେ, ନାଦୋ ଇଙ୍ଗ୍ଆଃ ଆପୁ କେ, ଆଗାର୍ ଇଙ୍ଗ୍‍କେ ସାରିତେପେ, ଏଣ୍ଡେ ଇଙ୍ଗ୍ଆଃ ଆପୁ କେ ହଗି ସାରିତେପେ।” 20ନେ କାଜି ଇନିଃ ମାନ୍ଦିର୍ ରାଃ ରାଚା ରେ ଶିଖାଅତାନ୍ ଇମ୍ତା ଭାଣ୍ଡାର୍ ଅଡ଼୍ଆଃ ରାଃ ନାଡ଼େଏ ରେ କାଜିକେଦାଏ, ହାର୍ ଜେତାଏ ହ ଇନିଃକେ କାକୋ ସାବ୍‍କିଜା, ଚିୟାଃଚି ଇନିଜାଃ ଦୁକୁ ସାହାତିଙ୍ଗ୍ ହାର୍ ଗୋଜୋଃ ରାଃ ସାମାୟ୍ ଏନ୍ ସାନ୍ କା ସେଟେର୍ ଲେନା।

ୟୀଶୁ ଆୟାଃ ବିଷାୟ୍ ରେ କାଜିକେଦାଏ

21ୟୀଶୁ ଆଡୋଃଗି ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ସେନୋଃ ତାନିଙ୍ଗ୍ ହାର୍ ଆପେ ଇଙ୍ଗ୍‍କେ ଦାଣାଇଙ୍ଗ୍ ୟାପେ ହାର୍ ଆପେ ଆପେୟାଃ ବେଗାର୍ ପାପ୍ ଛାମା ରେଗି ଗୋଜୋଗାପେ, ଅକତାଃ ଇଙ୍ଗ୍ ସେନୋଃ ତାନିଙ୍ଗ୍, ହେନ୍ତାଃ ଆପେ କାପେ ହିଜୁଃ ଧାଡ଼ିୟା।” 22ଏନାତେ ୟାହୁଦୀ ଗୁରୁ କୋ କାଜିକେଦାକୋ, “ଚିନାଃ ଇନିଃ ଆଏଃଗି ଗୋଜେନାଏ, ଯେ କାଜିୟାଏ, ‘ଅକତାଃ ଇଙ୍ଗ୍ ସେନୋଃ ତାନିଙ୍ଗ୍ ହେନ୍ତାଃ ଆପେ କାପେ ହିଜୁଃ ଧାଡ଼ିୟା?’ ” 23ୟୀଶୁ ଇନ୍‍କୁକେ କାଜିକେଦାଏ, “ଆପେ ନେତାଃ ଅତେଦିଶୁମ୍ ରେ ଜାନାମ୍ କାନାପେ, ଇଙ୍ଗ୍ ସିର୍ମାଦିଶୁମ୍ ତେ ହିଜୁଃ କାନିଙ୍ଗ୍; ଆପେ ଅତେଦିଶୁମ୍ ରେନ୍ ତାନ୍‍ପେ, ଇଙ୍ଗ୍ ଅତେଦିଶୁମ୍ ରେନ୍ ନାହାଲାଇଙ୍ଗ୍। 24ଏନାମେନ୍ତେ ଇଙ୍ଗ୍ ଆପେକେ କାଜିକେଦାଇଙ୍ଗ୍ ଚି ଆପେ ଆପେୟାଃ ବେଗାର୍ ପାପ୍ ଛାମା ରେଗି ଗୋଜୋଗାପେ; ଚିୟାଃଚି ଆଗାର୍ ଆପେ କାପେ ବିଶ୍ଵାସେୟା ଚି ଇଙ୍ଗ୍ ଇନିଃଗି ତାନିଙ୍ଗ୍ ଏଣ୍ଡେ ଆପେ ଗୋଜୋଗାପେ ହାର୍ ଆପେୟାଃ ପାପ୍ କା ଛାମା ଅଗା।” 25ୟାହୁଦୀ ଗୁରୁ କୋ ଇନିଃକେ କାଜିକେଦାକୋ, “ଆମ୍ ଅକଏ ତାନ୍‍ମେ?” ୟୀଶୁ ଇନ୍‍କୁକେ କାଜିକେଃକୋୱାଏ, “ଇନିଃଗି ତାନିଙ୍ଗ୍ ଅକନିଃ ସୁରୁଏତେ ଆପେକେ କାଜିପେ ତାନିଙ୍ଗ୍। 26ଆପେୟାଃ ବିଷାୟ୍ ରେ ଇଙ୍ଗ୍‍କେ ଥିମ୍ବାଗି କାଜି ରାଃ ମେନାଃ ଆଡୋଃ ବିଚାର୍ ରିକା ରାଃ ମେନାଃ, ମେନ୍ଦୋ ଇଙ୍ଗ୍ଆଃ କୁଲ୍‍ନିଃ ସାର୍ତି ତାନିଃ, ହାର୍ ଅକନାଃ ଇଙ୍ଗ୍ ଇନିଃତେ ଆୟୁମା କାଦିଙ୍ଗ୍, ଏନାଗି ଅତେଦିଶୁମ୍ ରେନ୍ ହୋଡ଼ୋକୋକେ କାଜିତାନିଙ୍ଗ୍।” 27ଇନ୍‍କୁ କାକୋ ବୁଝାଅଜାନା ଚି ଇନିଃ ଆଲେ ତେ ଆପୁ ଆଃ ବିଷାୟ୍ ରେ କାଜି ତାନାଏ। 28ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, ଚିମ୍ତା ଆପେ ଇଙ୍ଗ୍ ମାନ୍‍ୱା ରାଃ ହୋନ୍ କେ ଚେତାନ୍ କ୍ରୁଶ୍ ରେ ରାକାବିୟାପେ, ଏଣ୍ଡେ ସାରିୟାପେ ଚି ଇଙ୍ଗ୍ ଇନିଃଗି ତାନିଙ୍ଗ୍, ଇଙ୍ଗ୍ ଇଙ୍ଗ୍ଆଃ ତେ ଜାହାନାଃ କାଇଙ୍ଗ୍ କାମିୟା, ମେନ୍ଦୋ ଜେଲେକା ଆପୁ ଇଙ୍ଗ୍‍କେ ଶିଖାଅ କାଦିଙ୍ଗାଏ ଏନ୍‍ଲେକାଗି ନେ କାଜିକୋ କାଜିୟାଇଙ୍ଗ୍। 29ଇଙ୍ଗ୍ଆଃ କୁଲ୍‍ନିଃ ଇଙ୍ଗ୍ ଲୋଃ ମେନିଜା, ଇନିଃ ଇଙ୍ଗ୍‍କେ ଏସ୍କାର୍ କାଏ ବାଗେ କାଦିଙ୍ଗାଏ, ଚିୟାଃଚି ଇଙ୍ଗ୍ ସବେନ୍ ଇମ୍ତା ଏନ୍ କାମି ଗି କାମିୟାଇଙ୍ଗ୍, ଅକନାଃ ତେ ଇନିଃ ସୁକୁୱାଏ। 30ୟୀଶୁ ନେ ବାକାଣ୍ କାଜିତାନ୍ ଇମ୍ତା ରେ, ଥିମ୍ବାଗି ହୋଡ଼ୋକୋ ଇନିଜାଃ ରେ ବିଶ୍ଵାସ୍ କିଜାକୋ।

ସାର୍ତି ଆପେକେ ରାଡ଼ା ପେୟାଏ

31ଏନ୍ତେ ୟୀଶୁ ଏନ୍ ୟାହୁଦୀ ଗୁରୁ କୋକେ ଅକନ୍‍କୋ ଇନିଃକେ ବିଶ୍ଵାସ୍ ଲିଜାକୋ, କାଜିକେଃକୋୱାଏ, “ଆଗାର୍ ଆପେ ଇଙ୍ଗ୍ଆଃ ବାଚାନ୍ ରେ ତାଇନ୍ ରେଦୋ ପେ, ଏଣ୍ଡେ ସାର୍ତି ଗି ଇଙ୍ଗ୍ଆଃ ଚେଲା ହୋବାୱାପେ। 32ଆପେ ସାର୍ତି କେ ସାରିୟାପେ, ହାର୍ ସାର୍ତି ଆପେକେ ରାଡ଼ା ପେୟାଏ।” 33ଇନ୍‍କୁ ୟୀଶୁ କେ କାଜିରୁଆଡ଼୍ କିଜାକୋ, “ଆଲେ ଦୋ ଆବ୍ରାହାମ୍ ରାଃ କିଲି ଏତେ ତାନ୍‍ଲେ ହାର୍ ଚିଉଲା ହ ଜାହେଁୟାଃ ଦାସୀ କାଲେ ବାଇକାନା। ଏଣ୍ଡେ ଆମ୍ ଚିଲ୍‍କା କାଜିତାନାମ୍, ଚି ଆପେ ରାଡ଼ା କେନୋଗାପେ?” 34ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍ ଚି ଅକଏ ପାପ୍ ତାନାଏ, ଇନିଃ ପାପ୍ ରାଃ ଦାସୀ ତାନିଃ। 35ଦାସୀ ସବେନ୍ ହୁଲାଙ୍ଗ୍ ନାଙ୍ଗ୍ ଅଡ଼୍ଆଃ ରେ କାଏ ତାଇନାଏ, ହୋନ୍‍କଡ଼ା ସବେନ୍ ହୁଲାଙ୍ଗ୍ ନାଙ୍ଗ୍ ତାଇନୋଗାଏ। 36ଏନାମେନ୍ତେ ଆଗାର୍ ହୋନ୍‍କଡ଼ା ଆପେକେ ରାଡ଼ା ପେୟାଏ, ଏଣ୍ଡେ ସାର୍ତି ଗି ଆପେ ରାଡ଼ା କେନୋଗାପେ। 37ଇଙ୍ଗ୍ ସାରିୟାଇଙ୍ଗ୍ ଚି ଆପେ ଆବ୍ରାହାମ୍ ରାଃ କିଲି ରେନ୍ ତାନ୍‍ପେ, ଏଣ୍ଡେ ହ ଇଙ୍ଗ୍ଆଃ ବାଚାନ୍ ଆପେୟାଃ ହିର୍‍ଦାୟ୍ ରେ ଜାଗା କାଏ ନାମ୍ ତାନା, ଏନାଲାଗିନ୍ ଆପେ ଇଙ୍ଗ୍‍କେ ଗୋଗୋଏଃ ସାନାଙ୍ଗ୍ ତାନାପେ। 38ଇଙ୍ଗ୍ ଏନାଗି କାଜିୟାଇଙ୍ଗ୍, ଅକନାଃ ଇଙ୍ଗ୍ଆଃ ଆପୁ ତାଃ ନେଲ୍ କାଦିଙ୍ଗ୍, ହାର୍ ଆପେ ଏନାଗି ରିକାତାନାପେ ଅକନାଃ ଆପେ ଆପେୟାଃ ଆପୁ ତେ ଆୟୁମ୍ କାଦାପେ।”

ଶାଏତାନ୍ ରାଃ ସାନ୍ତାନ୍

39ଇନ୍‍କୁ ଇନିଃକେ କାଜିରୁଆଡ଼୍ କିଜାକୋ, “ଆଲେୟାଃ ପୁର୍ଖା ଆପୁ ଦୋ ଆବ୍ରାହାମ୍ ତାନିଃ।” ୟୀଶୁ ଇନ୍‍କୁକେ କାଜିକେଃକୋୱାଏ, “ଆଗାର୍ ଆପେ ଆବ୍ରାହାମ୍ ରାଃ ସାନ୍ତାନ୍ ତାଇନ୍ ତେପେ, ଏଣ୍ଡେ ଆବ୍ରାହାମ୍ ଲେକା କାମି କାମିତେପେ। 40ମେନ୍ଦୋ ନାଆ ଆପେ ଇଙ୍ଗ୍ ଲେକାନ୍ ହୋଡ଼ କେ ଗୋଗୋଏଃ ସାନାଙ୍ଗ୍ ତାନାପେ, ଅକନିଃ ଆପେକେ ଏନ୍ ସାର୍ତି ବାଚାନ୍ ଉଦୁବ୍ କେଃପେୟାଏ ଅକନାଃ ପାର୍ମେଶ୍ଵାର୍ ଏତେ ଆୟୁମ୍ କେଦାଏ, ନେକା ଦୋ ଆବ୍ରାହାମ୍ କାଏ ରିକା ଲେଦାଏ। 41ଆପେ ଆପେୟାଃ ଆପୁ ଲେକା କାମି ତାନାପେ।” ଇନ୍‍କୁ ଇନିଃକେ କାଜିକେଦାକୋ, “ଆଲେ ବ୍ୟାଭିଚାର୍ ଏତେ କାଲେ ଜାନାମ୍ କାନା, ଆଲେୟାଃ ମିୟାଃଗି ଆପୁ ମେନାଇଜା ମାନେ ପାର୍ମେଶ୍ଵାର୍।” 42ୟୀଶୁ ଇନ୍‍କୁକେ କାଜିକେଃକୋୱାଏ, “ଆଗାର୍ ପାର୍ମେଶ୍ଵାର୍ ଆପେୟାଃ ଆପୁ ତାଇନ୍‍ତେ, ଏଣ୍ଡେ ଆପେ ଇଙ୍ଗ୍‍କେ ଦୁଲାଡ଼ିଙ୍ଗ୍ ତେପେ; ଚିୟାଃଚି ଇଙ୍ଗ୍ ପାର୍ମେଶ୍ଵାର୍ ଏତେ ହିଜୁଃ କାନିଙ୍ଗ୍। ଇଙ୍ଗ୍ ଇଙ୍ଗ୍ଆଃ ତେ କାଇଙ୍ଗ୍ ହିଜୁଃ କାନା, ମେନ୍ଦୋ ଇନିଃଗି ଇଙ୍ଗ୍‍କେ କୁଲ୍ କାଦିଙ୍ଗାଏ। 43ଆପେ ଇଙ୍ଗ୍ଆଃ ବାକାଣ୍ ଚିନାଃ ଲାଗିନ୍ କାପେ ବୁଝାଅଃ ତାନା? ନେୟା ଏନାମେନ୍ତେ ଚି ଆପେ ଇଙ୍ଗ୍ଆଃ ବାଚାନ୍ କାପେ ଆୟୁମ୍ ସାନାଙ୍ଗ୍ ତାନା। 44ଆପେ ଆପେୟାଃ ଆପୁ ଶାଏତାନ୍ ପାଡ଼େତେ ତାନ୍‍ପେ, ହାର୍ ଆପେ ଆପେୟାଃ ଆପୁ ରାଃ ଶିତୃ ସାନାଙ୍ଗ୍ କୋକେ ପୁରା ନାଙ୍ଗ୍ ସାନାଙ୍ଗ୍ ତାନାପେ। ଇନିଃ ଦୋ ସୁରୁଏତେ ଗୋଗୋଏଃନିଃ ତାନିଃ, ହାର୍ ସାର୍ତି ରେ ବାଇକେତେ କାଏ ତାଇଜାନାଏ, ଚିୟାଃଚି ଇନିଜାଃ ରେ ସାର୍ତି ବାନୋଗା। ଚିମ୍ତା ଇନିଃ ହିଡ଼େୟାଏ, ଆଜାଃ ସ୍ଵଭାବ୍ ଏତେ ଗି କାଜିୟାଏ, ଚିୟାଃଚି ଇନିଃ ହିହିଡ଼୍‍ନିଃ ତାନିଃ ହାର୍ ହିଡ଼୍-କାଜି ରାଃ ଆପୁ ତାନିଃ। 45ମେନ୍ଦୋ ଇଙ୍ଗ୍ ସାର୍ତି କାଜିୟାଇଙ୍ଗ୍, ଏଣ୍ଡେହ ଆପେ ଇଙ୍ଗ୍ଆଃ କାପେ ବିଶ୍ଵାସ୍ ତାନା। 46ଆପେ ଏତେ ଅକଏ ଇଙ୍ଗ୍‍କେ ପାପୀ ମେନ୍ତେ ଦୋଷୀ ବାଇତାନାଏ? ଆଗାର୍ ଇଙ୍ଗ୍ ସାର୍ତି କାଜିତାନିଙ୍ଗ୍, ଏଣ୍ଡେ ଆପେ ଇଙ୍ଗ୍ଆଃ ଚିନାଃ ଲାଗିନ୍ କାପେ ବିଶ୍ଵାସ୍ ତାନା? 47ଅକଏ ପାର୍ମେଶ୍ଵାର୍ ରାଃ ତାନିଃ, ଇନିଃ ପାର୍ମେଶ୍ଵାର୍ ରାଃ ବାକାଣ୍ ଆୟୁମ୍‍ୟାଏ, ହାର୍ ଆପେ ନେୟା ଲାଗିନ୍ କାପେ ଆୟୁମ୍‍ୟା ଚିୟାଃଚି ଆପେ ପାର୍ମେଶ୍ଵାର୍ ପାଡ଼େତେ ନାହାଲାପେ।”

ଆବ୍ରାହାମ୍ ସିଦାରେ ୟୀଶୁ

48ନେୟା ଆୟୁମ୍‍କେତେ ୟାହୁଦୀ ଗୁରୁ କୋ ଇନିଃକେ କାଜିକେଦାକୋ, “ଚିନାଃ ଆଲେ ଠିକ୍ କାଲେ କାଜିତାନା, ଚି ଆମ୍ ସାମାରୀୟା ତାନ୍‍ମେ, ହାର୍ ଆମାଃ ରେ ବୋଙ୍ଗାଆତ୍ମା ମେନିଜା?” 49ୟୀଶୁ କାଜିରୁଆଡ଼୍ କେଦାଏ, “ଇଙ୍ଗ୍ଆଃ ରେ ବୋଙ୍ଗାଆତ୍ମା ବାଙ୍ଗୁଇଜା, ମେନ୍ଦୋ ଇଙ୍ଗ୍ ଇଙ୍ଗ୍ଆଃ ଆପୁ ଗାଃ ମାଇନ୍ ତାନିଙ୍ଗ୍, ଆଡୋଃ ଆପେ ଇଙ୍ଗ୍ଆଃ କାପେ ମାଇନ୍ ତାନା। 50ମେନ୍ଦୋ ଇଙ୍ଗ୍ ଇଙ୍ଗ୍‍କେ ମାଇନ୍ ଏପେ ମେନ୍ତେ କାଇଙ୍ଗ୍ ସାନାଙ୍ଗ୍ ତାନା, ହାଁ, ମିହୋଡ଼୍ ମେନାଇଜା ଅକନିଃ ସାନାଙ୍ଗାଏ ଚି ଇଙ୍ଗ୍ଆଃ ମାଇନୋଃକା ଆଡୋଃ ଇଙ୍ଗ୍‍କେ କାକୋ ମାଇନ୍ କୋକେ ବିଚାର୍ କୋୱାୟାଏ। 51ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, ଆଗାର୍ ଜେତାଏ ଇଙ୍ଗ୍ଆଃ ବାଚାନ୍ କେ ମାନାତିଙ୍ଗ୍ ୟାଏ, ଏଣ୍ଡେ ଇନିଃ ଚିଉଲା ହ କାଏ ଗୋଜୋଗା।” 52ୟାହୁଦୀ ଗୁରୁ କୋ ଇନିଃକେ କାଜିକିଜାକୋ, “ନାଆ ଆଲେ ସାରିତାଦାଲେ ଚି ଆମାଃ ରେ ବୋଙ୍ଗାଆତ୍ମା ମେନିଜା। ଆବ୍ରାହାମ୍ ଗୋଏଃ ଜାନାଏ, ହାର୍ ନାବୀ କୋ ହ ଗୋଏଃ ଜାନାକୋ, ହାର୍ ଆମ୍ କାଜିୟାମ୍, ‘ଆଗାର୍ ଜେତାଏ ଇଙ୍ଗ୍ଆଃ ବାଚାନ୍ କେ ମାନାତିଙ୍ଗ୍ ୟାଏ ଏଣ୍ଡେ ଇନିଃ ଚିଉଲା ହ କାଏ ଗୋଜୋଗାଏ।’ 53ଆଲେୟାଃ ପୁର୍ଖା ଆପୁ ଆବ୍ରାହାମ୍ ଦୋ ଗୋଏଃ ଜାନାଏ। ଚିନାଃ ଆମ୍ ଇନିଃତେ ମାରାଙ୍ଗ୍ ତାନ୍‍ମେ? ହାର୍ ନାବୀ କୋ ହ ଗୋଏଃ ଜାନାକୋ। ଆମ୍ ଆପାନ୍‍କେ ଚିନାଃ ପାହୋମ୍ ତାନାମ୍? 54ୟୀଶୁ କାଜିରୁଆଡ଼୍ କେଃକୋୱାଏ, ଆଗାର୍ ଇଙ୍ଗ୍ ଇଙ୍ଗ୍ଆଃ ମାନାରାଙ୍ଗ୍ ରିକାୟାଇଙ୍ଗ୍, ଏଣ୍ଡେ ଇଙ୍ଗ୍ଆଃ ମାନାରାଙ୍ଗ୍ ଜାହାନାଃ ନାହାଲା, ମେନ୍ଦୋ ଇଙ୍ଗ୍ଆଃ ମାନାରାଙ୍ଗ୍ ରିକାନିଃ ଇଙ୍ଗ୍ଆଃ ଆପୁ ତାନିଃ, ଅକନିଃକେ ଆପେ କାଜିୟାପେ, ଚି ଇନିଃ ଆବୁୱାଃ ପାର୍ମେଶ୍ଵାର୍ ତାନିଃ। 55ଆପେ ଦୋ ଇନିଃକେ କାପେ ସାରିୟା, ମେନ୍ଦୋ ଇଙ୍ଗ୍ ଇନିଃକେ ସାରିୟାଇଙ୍ଗ୍, ହାର୍ ଆଗାର୍ ଇଙ୍ଗ୍ କାଜିୟାଇଙ୍ଗ୍ ଚି ଇନିଃକେ କାଇଙ୍ଗ୍ ସାରିୟା, ଏଣ୍ଡେ ଇଙ୍ଗ୍ ଆପେ ଲେକା ଲୋଗୋ ହୋଡ଼ ବାଇୟୋଗାଇଙ୍ଗ୍; ମେନ୍ଦୋ ଇଙ୍ଗ୍ ଇନିଃକେ ସାରିୟାଇଙ୍ଗ୍ ହାର୍ ଇନିଜାଃ ବାଚାନ୍ କେ ମାନାତିଙ୍ଗ୍ ୟାଇଙ୍ଗ୍। 56ଆପେୟାଃ ପୁର୍ଖା ଆପୁ ଆବ୍ରାହାମ୍ ଇଙ୍ଗ୍ଆଃ ହିଜୁଃ ରାଃ ହୁଲାଙ୍ଗ୍ କେ ନେନେଲ୍ ଆଶ୍ରା ରେ ଥିମ୍ବାଗି ରାଶିକାଅଃ ତାଇକେନାଏ; ଆଡୋଃ ଇନିଃ ନେଲ୍‍କେଦାଏ, ହାର୍ ରାଶିକା ଜାନାଏ।”

57ଏନ୍ତେ ୟାହୁଦୀ ଗୁରୁ କୋ ଇନିଃକେ କାଜିକେଦାକୋ, “ନାଆ ସାନ୍ ଆମ୍ ପାଚାଶ୍ ବାରାଶ୍ ରେନ୍ ହ କାମ୍ ହୋବାକାନା, ଏଣ୍ଡେ ହ ଆମ୍ ଆବ୍ରାହାମ୍ କେ ନେଲ୍ ତାଇଜାମ୍?” 58ୟୀଶୁ ଇନ୍‍କୁକେ କାଜିକେଃକୋୱାଏ, ଇଙ୍ଗ୍ ଆପେକେ ସାର୍ତି-ସାର୍ତି କାଜିତାନିଙ୍ଗ୍, “ଆବ୍ରାହାମ୍ ଜାନାମୋଃ ସିଦାରେ ଇଙ୍ଗ୍ ମେନାଇଙ୍ଗ୍‍ୟା।” 59ଏଣ୍ଡେ ଇନ୍‍କୁ ୟୀଶୁ କେ ଥେର୍ ଗୋଏଃ ଲାଗିନ୍ ଦିରି ଉଠାଓ କେଦାକୋ, ମେନ୍ଦୋ ୟୀଶୁ ଉକୁକେତେ ମାନ୍ଦିର୍ ଏତେ ଅଡୋଙ୍ଗ୍ ଜାନାଏ।

Valgt i Øjeblikket:

ଯୋହାନ୍ 8: UNXNT

Markering

Del

Kopiér