କୁଲାକାନ୍ 1
1
ପାରିଚାଏ
1ହେ ଥିୟୁଫିଲୁସ୍, ଇଙ୍ଗ୍ ପାହିଲା କିତାବ୍ ରେ ହେନ୍ ସବେନ୍ କାଜି କୋରାଃ ବିଷାୟ୍ ରେ ଅଲ୍ କେଦାଇଙ୍ଗ୍ ଅକନାଃ ୟୀଶୁ ସୁରୁ ଏତେ କାମି ଲେଦାଏ ଆଡୋଃ ଶିଖାଅ ତାଇନାଏ, 2ଇନିଃ ଏନ୍ ହୁଲାଙ୍ଗ୍ ସାନ୍ତେ ଚିମିନ୍ ସାନ୍ ଚେତାନ୍ କାଏ ରାକାବ୍ ଜାନାଏ, ପାବିତାର୍ ଆତ୍ମା ରାଃ ହୋରାତେ ଏନ୍ କୁଲାକାନ୍ ଚେଲା କୋକେ ଅକନ୍ କୋକେ ଆଏଃ ସାଲା ଲେଃକୋୱାଏ ଆନାଚୁ ଏମ୍ କେଦାଏ। 3ଏନ୍ତେ ଇନିଃ ଦୁକୁ ସାହାଅ କେତେ ଗୋଜୋଃ ତାୟୋମ୍ତେ ଥିମ୍ବାଗି ପୋକ୍ତା କାଜି କୋଲୋଃ ଆଏଃ ଆପାନ୍ କେ ଇନ୍କୁକେ ଜୀହିଃ ଦେଖାଅ କେଃକୋୱାଏ, ହାର୍ ଚାଲିଶ୍ ଦିନ୍ ସାନ୍ତେ ଇନିଃ ଇନ୍କୁକେ ନେଲ୍ ଜାନାଏ, ହାର୍ ପାର୍ମେଶ୍ଵାର୍ ରାଃ ରାଇଜ୍ ରାଃ ବାକାଣ୍ ଉଦୁବ୍ କୋତାଇନାଏ। 4ଆଡୋଃ ଇନ୍କୁ ଲୋଃ ମିଶା ଜୋମ୍ ଇମ୍ତା ନାପାମ୍ କେତେ ଇନ୍କୁକେ ନେ ଆନାଚୁ ଏମାଃକୋୱାଏ, “ୟୀରୁଶାଲେମ୍ ସାହାର୍ କେ ଆଲୋପେ ବାଗେୟା, ମେନ୍ଦୋ ଆବା ଗାଃ ଏନ୍ କାଜି କେ ପୁରା ହୋବାଅଃ ତେୟାଃକେ ନେଲ୍ ହୋରା କାତେପେ, ଅକନାଃ ବିଷାୟ୍ ରେ ଇଙ୍ଗ୍ଆଃ ତେ ଆପେ ଆୟୁମ୍ ଛାବା କାଦାପେ। 5ଚିୟାଃଚି ଯୋହାନ୍ ଦୋ ଦାଆ ରେ ବାପ୍ତିସ୍ମା ଏମ୍କେଦାଏ ମେନ୍ଦୋ ହୁଡିଙ୍ଗ୍ ଦିନ୍ ରାଃ ତାୟୋମ୍ତେ ଆପେ ପାବିତାର୍ ଆତ୍ମା ତେ ବାପ୍ତିସ୍ମା ନାମେୟାପେ।”
ୟୀଶୁ ସିର୍ମାଦିଶୁମ୍ ଇଦି ଜାନାଏ
6ଏନାଲାଗିନ୍ ଇନ୍କୁ ହୁଣ୍ଡି କେତେ ୟୀଶୁ କେ କୁଲିକିଜାକୋ, “ହେ ପ୍ରାଭୁ, ଚିନାଃ ଆମ୍ ନେ ସାମାୟ୍ ରେଗି ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋକେ ରାଇଜ୍ ଏମ୍ ରୁଆଡ଼୍ କୋୱାମ୍?” 7ଇନିଃ ଇନ୍କୁକେ କାଜିକେଃକୋୱାଏ, “ଏନ୍ ସାମାୟ୍ କେ ୟାଦୋ ଏନ୍ ହୁଲାଙ୍ଗ୍ କେ ସାରିନ୍ ଅକନାଃକେ ଆବା ଆଜାଃ ଗି ଆଧିକାର୍ ରେ ମାଣ୍ଡାଅ କାଦାଏ, ଆପେୟାଃ କାମି ନାହାଲା। 8ମେନ୍ଦୋ ଚିମ୍ତା ପାବିତାର୍ ଆତ୍ମା ଆପେୟାଃ ଚେତାନ୍ ରେ ହିଜୁଗା ଇମ୍ତା ଆପେ ପେଡ଼େଏ ନାମେୟାପେ; ଆଡୋଃ ୟୀରୁଶାଲେମ୍ ସାହାର୍ ହାର୍ ସବେନ୍ ୟାହୁଦୀୟା ଜିଲ୍ଲା ହାର୍ ସାମାରୀୟା ଜିଲ୍ଲା ରେ, ହାର୍ ଅତେ ରାଃ ଗେନା ସାନ୍ ଇଙ୍ଗ୍ଆଃ ବିଷାୟ୍ ରେ ହୋଡ଼ୋକୋକେ ଉଦୁବ୍ କୋୱାପେ।” 9ନେୟା କାଜି ତାୟୋମ୍ତେ ୟୀଶୁ ଇନ୍କୁୱାଃ ନେଲ୍-ନେଲ୍ ଲୋଃଗି ଚେତାନ୍ ଇଦି ଜାନାଏ, ହାର୍ ମିୟାଃ ରିମିଲ୍ ଇନିଃକେ ଇନ୍କୁୱାଃ ମେଏଃ ତେ ଉକୁ ତାଜାଏ। 10ଇନିଜାଃ ସେନୋଃ ସାମାୟ୍ ରେ ଚିମ୍ତା ଇନ୍କୁ ରିମିଲ୍ଦିଶୁମ୍ ପାଡ଼୍ ନେଲ୍ ତାଇନାକୋ, ଏଣ୍ଡେ ନେଲେପେ, ବାରିୟା ହୋଡ଼ ପୁଣ୍ଡୀ ଲିଜାଃ ତୁସିଙ୍ଗ୍କାନ୍ ଇନ୍କୁୱାଃ ନାଡ଼େଏ ରେ ହିଜୁଃ ତିଙ୍ଗୁ ଜାନାକୋ। 11ଆଡୋଃ ଇନ୍କୁକେ କାଜିକେଦାକୋ, “ହେ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ, ଆପେ ଚିନାଃ ମେନ୍ତେ ତିଙ୍ଗୁ କେତେ ରିମିଲ୍ଦିଶୁମ୍ ପାଡ଼୍ ନେଲ୍ ତାନାପେ? ନେ ୟୀଶୁ ଗି ଅକନିଃ ଆପେ ନାଡ଼େଏ ତେ ସିର୍ମାଦିଶୁମ୍ ରେ ଇଦି ଜାନାଏ, ଜେଲେକା ତେ ଆପେ ଇନିଃକେ ସିର୍ମାଦିଶୁମ୍ ସେନ୍ତାନ୍ ନେଲ୍ କିଜାପେ ଏନ୍ଲେକାଗି ଇନିଃ ଆଡୋଃଗି ହିଜୁଗାଏ।”
ମାତିୟାହ୍ କେ ୟାହୁଦା ରାଃ ପାଦ୍ ନାମ୍ ଜାନା
12ଏନା ତାୟୋମ୍ତେ କୁଲାକାନ୍ ଚେଲାକୋ ଜୈତୁନ୍ ନୁତୁମ୍ ବୁରୁ ଏତେ ଅକନାଃ ୟୀରୁଶାଲେମ୍ ନାଡ଼େଏ ମିୟାଃ ଆରାମେ ହୁଲାଙ୍ଗ୍ ରାଃ ସାଙ୍ଗିନ୍#1:12 ସାଙ୍ଗିନ୍ 1 କି.ମି. ରେ ମେନାଃ, ଏନ୍ ସାହାର୍ ତେ ରୁଆଡ଼୍ ଜାନାକୋ। 13ଚିମ୍ତା ଇନ୍କୁ ହେନ୍ତାଃ ସେଟେର୍ ଜାନାକୋ ଏଣ୍ଡେ ହେନ୍ ଚେତାନ୍ କୋଠୋରୀ ରେ ସେନ୍ ଜାନାକୋ, ଅକତାଃ ପାତ୍ରାସ୍ ଆଡୋଃ ଯୋହାନ୍ ଆଡୋଃ ୟାକୁବ୍ ଆଡୋଃ ଆନ୍ଦ୍ରିୟାସ୍ ଆଡୋଃ ଫିଲିପୁସ୍ ଆଡୋଃ ଥୋମା ଆଡୋଃ ବାର୍ତୁଲ୍ମୈ ଆଡୋଃ ମାତ୍ତି ଆଡୋଃ ହାଲ୍ଫାଇ ରାଃ ହୋନ୍ ୟାକୁବ୍ ଆଡୋଃ ଶିମୋନ୍ ଯେଲୋତେସ୍ ଆଡୋଃ ୟାକୁବ୍ ରାଃ ହୋନ୍କଡ଼ା ୟାହୁଦା ତାଇନ୍ ତାଇନାକୋ। 14ନିକୁ ସବେନ୍ କୋ ଚିମିନାଙ୍ଗ୍ କୁଡ଼ିକୋ ଲୋଃ ଆଡୋଃ ୟୀଶୁ ରାଃ ଏଙ୍ଗା ମାରିୟାମ୍ ଆଡୋଃ ଇନିଜାଃ ହାଗାକୋ ଲୋଃ ମିୟାଃ ମୋନ୍ ହୋବାକେତେ ବିନ୍ତି ରେ ତାଇ ଜାନାକୋ। 15ଏନ୍ ହୁଲାଙ୍ଗ୍ କୋରେ ପାତ୍ରାସ୍ ହାଗା କୋୱାଃ ଥାଲା ରେ ଅକନ୍କୋ ଏକ୍ ଶାଅ ବିଶ୍ ହୋଡ଼ୋ ଲାଗ୍ଭାଗ୍ ତାଇକେନାକୋ, ଏନ୍ତାଃ ତିଙ୍ଗୁ କେତେ କାଜିକେଦାଏ, 16“ହେ ହାଗାକୋ, ଲାଗାତିଙ୍ଗ୍ ତାଇକେନା ଚି ପାବିତାର୍ ପୁଥି ରାଃ ଏନ୍ ଅଲାକାନ୍ କାଜି ପୁରାଅଃକା ଅକନାଃ ପାବିତାର୍ ଆତ୍ମା ଦାଉଦ୍ ରାଃ ମୋଚା ତେ ୟାହୁଦା ରାଃ ବିଷାୟ୍ ରେ, ଅକନିଃ ୟୀଶୁ କେ ସାସାବ୍ କୋୱାଃ ଆଗୁଆ ତାଇକେନାଏ, ସିଦା ଏତେ କାଜିଲେଦାଏ। 17ଚିୟାଃଚି ଇନିଃ ଦୋ ଆବୁ ଲୋଃ ଗିନ୍ତି ଜାନାଏ, ଆଡୋଃ ନେ ସେୱା କାମି ରେ ହାନାଟିଙ୍ଗ୍ ନାମ୍ କେଦାଏ। 18(ଇନିଃ ଆଧାର୍ମ୍ ରାଃ କାମି ତେ ମିୟାଃ ଅତେ କିରିଙ୍ଗ୍ କେଦାଏ, ଆଡୋଃ ବୋଅ ତିରୁବ୍ ଉୟୁଃଜାନାଏ ଆଡୋଃ ଇନିଜାଃ ଲାହେଃ ଫାଡ଼ାଆ ଜାନା ଆଡୋଃ ଇନିଜାଃ ସବେନ୍ ପଟାକୋ ଅଡୋଙ୍ଗ୍ ଜାନା। 19ନେ କାଜି କେ ୟୀରୁଶାଲେମ୍ ସାହାର୍ ରେନ୍ ସବେନ୍ ତାଇତାନ୍ ହୋଡ଼ୋକୋ ସାରିକେଦାକୋ, ନେତାଃ ସାନ୍ ଚି ଏନ୍ ଅତେ ରାଃ ନୁତୁମ୍ ଇନ୍କୁୱାଃ ଭାଷା ରେ ‘ହାକାଲ୍ଦମା’ ମାନେ ‘ମାୟୋମ୍ ରାଃ ଅତେ’ କାଜି ଜାନା)। 20ଦାଉଦ୍ ରାଃ ଦୁରାଙ୍ଗ୍ ପୁଥି ରେ ଅଲାକାନା,
‘ଇନିଜାଃ ଅଡ଼୍ଆଃ ଉଜ୍ଡ଼ାଅ କୋଃଚା, ହାର୍ ଏଣ୍ଡେରେ ଜେତାଏ କାକୋ ତାଇନୋଃଚା,’ ହାର୍ ‘ଇନିଜାଃ ପାଦ୍ ଜାହାଁଏ ଏଟାଃନିଃ ଇଦିକେ ଚାଏ।’
21ଏନାମେନ୍ତେ ଚିମିନ୍ ହୁଲାଙ୍ଗ୍ ସାନ୍ତେ ପ୍ରାଭୁ ୟୀଶୁ ଆବୁ ଲୋଃ ହିଜୁଃ ସେନୋଃ ତାଇକେନାଏ, ମାନେ ଯୋହାନ୍ ରାଃ ବାପ୍ତିସ୍ମା ତାଃଏତେ ଇନିଜାଃ ଆବୁୱାଃ ନାଡ଼େଜେତେ ଚେତାନ୍ ଇଦି ଜାକେଦ୍, ଅକନ୍କୋ ସବେନ୍ ସାମାୟ୍ ଆବୁ ଲୋଃ ତାଇନ୍ ତାଇକେନାକୋ, 22ବୁଗିନ୍ ହୋବାଅଃ ତେୟାଃ ଚି ଇନ୍କୁ ଏତେ ମିୟାଃ ହୋଡ଼ ଆବୁ ଲୋଃ ଇନିଜାଃ ଜୀବିନିରିଦ୍ ରାଃ ଗୋୱା ହୋବା କେନୋଃ କାଏ।” 23ଏନ୍ତେ ଇନ୍କୁ ବାରିୟା ହୋଡ଼ କିନ୍କେ ତିଙ୍ଗୁ କେଦାକୋ, ମିହୋଡ଼୍ ଯୋସେଫ୍ କେ ଅକନିଃ ବାର୍-ସାବା କାଜିଅଃୱାଏ, ଅକନିଜାଃ କିଲି ୟୁସ୍ତୁସ୍ ତାନାଃ, ଏଟାଃ ହୋଡ଼ ମାତିୟାସ୍ କେ, 24ହାର୍ ନେୟା ବିନ୍ତି କେଦାକୋ, “ହେ ପ୍ରାଭୁ, ଆମ୍ ଦୋ ସବେନ୍ କୋୱାଃ ମୋନ୍ କେ ସାରିୟାମ୍, ଏନାତେ ନେୟା ଉଦୁବ୍ ତାମ୍ ଚି ନେ ବାରାନ୍କିନ୍ ଏତେ ଆମ୍ ଅକଏ କେ ସାଲା କେଦାମ୍, 25ଏନାତେ ଇନିଃ ନେ ସେୱା କାମି ହାର୍ କୁଲାକାନ୍ ଚେଲା ପାଦ୍ ରାଃ କାମି ଇଦିକାଏ, ଅକନାଃ କେ ୟାହୁଦା ବାଗେକେତେ ଆଜାଃ ଜାଗା ତେ ସେନୋଃ ଜାନାଏ।” 26ଏନ୍ତେ ଇନ୍କୁ ଇନ୍କିନାଃ ଲାଗିନ୍ ଖୁଡ଼୍ଖୁଡ଼ି ଉୟୁଃ କେଦାକୋ, ହାର୍ ଖୁଡ଼୍ଖୁଡ଼ି ମାତିୟାସ୍ ଗାଃ ନୁତୁମ୍ ରେ ଅଡୋଙ୍ଗ୍ ଜାନା। ଏନାତେ ଇନିଃ ଏନ୍ ଏଗାରା କୁଲାକାନ୍ ଚେଲା କୋଲୋଃ ଲେକା ଜାନାଏ।
Valgt i Øjeblikket:
କୁଲାକାନ୍ 1: UNXNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.