मरकुस 14

येशुहू माअलोओ योजना

(मत्ती 26.1-5; लूका 22.1-2; युहन्ना 11.45-53)

1बेन दिहोओ फासाडी वल्हाडण अने बेखमीर रोटाआ तीवार ओतुताहा तियाहा कोपटावाही केहेकोईत तोईत अने जीवे माईनो ओ मुख्य याजक अने शास्त्री पालते ओते 2पोन कोयु ओते, “पूर्वीच्या तेदीही नाहा, होय नाहा ओवो का माअहारोत माय गडबड उवे.”

येशुउ अभ्यंजन

(मत्ती 26.6-13; लूका 12.1-8)

3जाहा तो बेथानी इंही शिमोन कुष्ठरोगी कोअमे रोटूखाहू बोह्ये ओते, तेहलाम एक बुई अलाबास्त्रआ कुपिम जटामांसीच्या जाअखो किमतीइ शुद्ध तेल लेत आवयी; अने कुपी फाडीत तियाआ मुंडकापो ओतिला. 4पोन कोडु-कोडु आपाआ मोनामे चडफडीत कोयु, “आव सुगंधीत तेलाआ काहा नाश कोल्यु गोये? 5काहाके ऐ सुगंधीत तेल तीनहोव पेक्षा जाखा रुप्यामे वेसेत ते गोरगरीब आपलो आव्ये ओते” अने ते तियापो कुरकुर कोहू लागाडीत. 6येशु कोयु, “तीही सोडीत आपा; तीही काहा त्रास आपित होय? तीयी ताहा माकोअता हाजो कोल्यु होय. 7गौरगरीब तुमाआ आरी कायम रोत्ले, अने तुमु जर वाटत होय ताहा तियाआ आरी हाजो कोहू सेकतेहे; पण आय तुमाआ आरी कायम नाहा रोही. 8जे किबी ती कोहू शकली, तीयी कोल्यु; तीही माआ उत्तरकार्या याकोअता पाल्या पोरोत माआ डीला सुगंधीत द्रव्य लागाडले. 9आय तुमाआ खरोज कोत्लू का आखे जगुम तीइही किबी सुसमाचारो घोषणा कोअयी जानारू, तीइही तियाआ आव का माहा चर्चा पण तियाआ स्मरणार्थ सांगण्यात आविलो.”

यहूदाआ येशुउरी विश्वासघात

(मत्ती 26.14-16; लूका 22.3-6)

10यहूदा इस्करियोती विश्वासघात कोत्लू जो बारा शिष्यमेहरोत एक ओतु मुख्य याजका आव्यू का तियाहा तोआडीत देय 11तेहलाम यहुदी इस्कर्योत तो बारथेरोत एक ओतु, मुख्य यापो गोये का तियाहा याआ आथे तोईत आप.

आखरी भोज

(मत्ती 26.17-25; लूका 22.7-14,21-23; युहन्ना 13.21-30)

12बेखमीर रोटाहा तिवाराआ पाल्या तेदीही, ज्याम ते वल्हांडणाआ बलिदान पशु माअते ओते, तियाआ शिष्यांनी तियाहा फुसिअलो, “तू का जाआत्लू का आमाहा जात ताआ याकोअता वल्हांडणाचे तीयारी कोहू?” 13तिये आपाआ शिष्यांवाही मायरोत बेनुहू ओ कोत मोक्ल्यीत, “नगरामे जा, अने एक मांहु पअयोओ वोटलू विसित तुमामे जोडीत, तियाआ फासाडी चाल्यो. 14अने तो ज्या कोआत जानारू, तियाअ कोअमे को धन्याआ कोआ, गुरु कोत्लू का माआ उतरावयास ज्याम आय आपाआ शिष्यांवाही आरी वल्हांडण खाही कोयु होय? 15तो तुमामे एक होमजाड्ये अने तीयार कोअली वोडी अटारी देखाडीत आपी, तीइही आमा याकोअता तीयारी को” 16शिष्य निहित नगरामे आव्ये, अने जेहलो त्यानि तियाहा कोयु ओते, तियाअ प्रमाणोओ देखाये; अने वल्हांडण तीयार कोअयु. 17फासाडी हांजेपो उवी, ताहा तो बाराजो आरी आवयू. 18जाहा ते बोहित रोटू खाता ओता, ताहा येशु कोयु, “आय तुमामे खरोज कोत्लू का तुमाआ मायरोत एक, तो माआआरी रोटू कोईत ओतु, माहु तोईत आपी” 19ते नाराज उवे अने ते एक-एक कोईत तियाहा आखू लागाडीत, “नाहाकोत तो आय होय?” 20तिये तियाहा कोयु, तो बाराजनाहा मायरोत एक होय, जो माआआरी ताटूम आथे काल्त्लू. 21काहाके माअहा पोऱ्या ताहा, जेहलो तियाआ विषयी लेखीते जात्लू; पण तिया मांहुंपो धिक्कार ज्याआ मुळे माअहा पुत्र तोआहे.

चेलारी प्रभु भोज

(मत्ती 26.26-30; लूका 22.15-20; 1 कुरिन्थि 11.23-25)

22जाहा ते खातीज ओते, तिये रोटू लेदु, अने आशीर्वाद मागित तोडीअते, अने तियाहा आप्यी, अने कोयु, “ल्या ओ माआ डील होय.” 23फासाडी तिये पिदो लेत ईशोपकार स्मरण कोल्यु, अने तियाहा आप्लु; अने ते आखाहा तीयामरोत पिदो. 24तिये तियाहा कोयु, “ओ कराराआ रक्त होय, तो आखाहा कोअता ओंतिले जात्लू. 25आय तुमामे खरोज कोत्लू का द्राक्षाआ रोह तिया दिहेजा फासी केधी नाहा पीही, जोपोरोत देवाच्या राज्याम आय नवो न पिईलो” 26फासाडी ते स्तोत्र गावित बारथे जैतूनाआ डोगोपो गोये.

गतसमनी मेहे येशुउ प्रार्थना

(मत्ती 26.31-35; लूका 22.31-34; युहन्ना 13.36-38)

27तेहलाम येशु तियाहा कोयु, “तुमु आखे अडखळाल, काहाके लेखिलो होय आय होंबालीला माअयि, अने मेंढे दाणु घोणार 28पोन आय आपाआ जीवतो उविला गोठी तुमाआ पहीले गालीला मेहे जानारू.” 29पेत्र तियाहा कोयु, “जर आखे अडखळनार ताहा अडखळनार, पण आय अडखळनार नाहा.” 30येशु तियाहा कोयु, “आय तुमामे खरोज कोत्लू का आजुजे आव राती कुकडाहा बेन टायमोआ वाहलो आगाडी, तू तीन टायमोआ माहु नाहाकोही.” 31पोन तिये फासी जोरामे बोलतुल्यो, “जर माहु ताआ आरी मोईला पण लागाडीत, तेबी आयताआ नाकोनारो केधीज नाहा कोअनारू.” यारितीनि अने आखाज पण कोयु.

गतसमानी मेहे येशुउ प्रार्थना

(मत्ती 26.36-46; लूका 22.39-46)

32फासाडीनंतर ते गेथशेमाने नावोओ जागाही आव्ये, अने तिये आपाआ शिष्यांआ कोयु, “इही बोहित रो, जोपोरोत आय प्रार्थना कोअनारू.” 33अने तो पेत्र अने याकोब अने योहान याहा आपाआ आरी लेत गोल्यो, अने जास्तीज चकित अस्वस्थ उवहू लागाडीत, 34अने तियाहा कोयु, “माआ मोन जाखो दु:खी होय, यापर्यंत का आय मोईलापो होय तुमु इही थोबा, अने जागतू रो.” 35कोईत तो थोड आगाडी गोल्यो अने धरतीपो नाहीत प्रार्थना कराय लाग्यू का जर उवनारा होय ताहा ए वेल मापोरोत काडीत आप, 36अने कोयु, “ओ ओबा, ओ ओबा, ताहु आखे किबी उवहू सेकोहो; आव प्यालाहा मापोरोत काढीत टाक तेबी पोन माहु लागेहे तेहलूज नाहा, पण जे ताहु लागेहे तेहलूज ओवो.” 37कोईत तो आवयू अने तियाहा हुवतले पालीत पेत्राहा कोयु, “ओ शिमोन, तू हुवीत होय? की तू घटकाभरभी जगुहू नाहा? 38जागीत अने प्रार्थना कोईत रो का तुमु परीक्षेमेहे पोडहू कायना आत्माआ ताहा तीयार होय, पोन डील नोबलु होय.” 39अने तो फासी जातल्या गोल्यो अने तियाअ शब्दाम प्रार्थना कोअयी. 40फासी आवीत तियाहा हुविलो पाल्लये, काहाके त्याआं डोआं निंदोम ओती; अने मालुम ओते का तियाहा की उत्तर आपलो. 41फासाडी तिसऱ्या वेले आवीत तिये कोयु, “ओमे हुवीत रो अने विहाव ल्या, पुरो उवे घडका आवयी होय; पाला माअहा पोऱ्या पापी मांहाहा आथे तोईत आप्लु जात होय. 42उठा, चाला पाला, माहु तोईत आपणारो जागे आवयू होय.”

गतसमनी मेहे येशुहू धोखासी तोअलोओ

(मत्ती 26.47-56; लूका 22.47-53; युहन्ना 18.3-12)

43तोओ कोताच ओतु का यहूदा जो बाराजो मायरोत एक ओतु, आपाआ आरी मुख्य याजक अने शास्त्री अने बाह्हू यापोरोत एक वोडी गोर्दी लेत वेगु आवीत पुगीतगोयू, ते तलवार अने डेगाऱ्या लेदिओलो कोयु. 44तियाहा तोईत देणाऱ्याने तियाहा ओ खून कोत आप्लु ओते का ज्याहा आय चुंबन लेही तोज तो होय, तियाहा तोईत होंबलीत लेत जा. 45तो आवयू अने वेगु तियाआ जागे आवीत कोयु, “ओ गुरुजी” अने तियाहा जाखो मुकु लेदि. 46तेहलाम तिये तियाआ आथे मेकीत तियाहा तोईत लेधलो. 47तिया मायरोत जे जागे उभे ओते, एकाने तलवार साडाळीते महायाजकाआ दासोपो सालाडयी, अने तिया कान वाडीत टाक्यू. 48येशु तियाहा कोयु, “नाहाकोत तुमु बांड होमजीत माहु तोईला कोअता तलवार अने डेगाऱ्या लेत निकलीलू होय?” 49आयताहा हर एक तेदीही मंदिरोम तुमाआ आरी रोत शिक्षण आपित ओतु, फासाडी तेहलाम तुमु माहु नाहा तोअये पण ओ याकोअता उवे का पवित्रशास्त्र ची शब्द पुरो ओवो. 50यांपोरोत आखे शिष्य तियाहा सोडीत नाहीत गोये. 51एक जुवान आपाआ उगडो डीलोपो कापडे फंगीत तियाआ फासाडी चालते ओते; अने माहुही तियाहा तोअये 52पोन तो कापडे टाकीत उघडीताज नाह्यू.

येशु महासभा सामने

(मत्ती 26.57-68; लूका 22.54-55,63-71; युहन्ना 18.13-14,19-24)

53नंतर तिये येशुहू प्रमुख याआपो लेत गोये; अने आखे महायाजक अने बाह्हू अने शास्त्री तियाआ जागे एकटा. 54पेत्र दिहरू सेटे त्याच्यामागे-मागे महायाजकाआ खोलीम जा गोये, अने कामकोनारो आरी बोहित आगीई जागे हेकते बोहयु. 55मुख्य याजक अने आखे न्यायसभा येशुहू माईत ताकिला कोअता तियाआ विरूधोम पुरावू होदित ओते, पण नाहा जोड़ी. 56काहाके जाअखो जोओ तियाआ विरूधोम ए झुटी सांक्ष आपित ओते, पण तियाआ साक्षी एक हारखी नाहाओती. 57तोयों किबी माहु उठित तियाआ विरूधोम ए झुटी सांक्ष आप्यी ओती, 58“आमाहा तियाहा ओ कोत्ले ताहा होमल्यु होय, आय आव आथोवाही तीयार कोईओलो मंदिराहा तोडीत टाकही,” “अने तीन दिहे फासाडी दिहरो बोनाडनारू, जे आथोवाही बोनणारू नाहा,” 59यापोरोत पोन तियाआ साक्षी एकापोरोत पण निहथी नाहा. 60तेह्लाम महायाजकांवाही विसमे उभे रोत येशुहू फुसिअलो, “तू किबी उत्तर नाहा आपोहो? ओ मांहे ताआ विरूधोम नाहाकोत सांक्ष आपित होय?” 61अने ते उडदीज रोला, अने किबी उत्तर नाहा आप्लु महायाजकांवाही तियाहा फासी फ़ुस्ल्याआ, “नाहाकोत तू तियाअ परमेश्वरोओ पुत्र ख्रिस्त होय?” 62येशु कोयु, “आय होय, अने तुमु माअहा पोऱ्याहा सर्व सामर्थाआ हुदिवोल बोह्ये, अने जुगोमेऱ्या वादलाआरी आरी आविलावेले पालनारू” 63तर महायाजकांवाही आपाआ कापडे फाडीत कोयु, “ओमे आमाहा साक्षीदाराची फासी नाहाकोत गोरोज? 64तुमु ए निंदा कोअयी तुमामे नाहाकोत लागेहे?” तियाअ आखाज कोयु का ओ मरण दंडाहा पात्र होय. 65तेह्लाम केते जोओ तियापो थुंकू लागाडीत, “अने केते तियाआ सोब टापीत अने तियाहा मुक्यो माईत अने तियाहा कोइत्लु लागाडीत” भविष्यवाणी को अने कामदारावाही तियाहा तोईत सापकू माअये.

पतरसो इन्कार अने रोडलोओ

(मत्ती 26.69-75; लूका 22.56-62; युहन्ना 18.15-18,25-27)

66जाहा पेत्र निसे खोलीम ओतु, ताहा महायाजकाआ दासिमेरोत एक तीइही आवयी, 67अने पेत्राहा आगाडी शेक लेइअला पालीत तिया जागे एकहारको पाली पाल्लये अने कोइत्लु लागीई, “तू पण ताहा तियाअ नासरी येशुआरी ओतु” 68तिये नाहाकोयो, अने कोयु, “आय नाहा उलखित्लू अने नाहा होमजाडीत का तू कि कोयु होय.” फासाडी तो बारथे देवडीपो गोल्यो; अने कुकडू आअड्यू. 69ते दासी तियाहा पालहु तियाआ जे जागे उभे ओते, फासी कोइत्लु लागीई, “ओ त्यापैकी एक होय.” 70पोन तो फासी नकार कोअयु थोडो वेलेनंतर तिये जे जागे उभे ओते फासी पेत्राहा कोइत्लु लागाडीत, “खरोज तू त्यापैकी एक होय; काहाके तू गालील पण होय.” 71तोयो तो ओतो की तेबी अने शपथ लेहु लाग्यू, “आय आव मांहाहा, तियाहा तुमु ओलखीत, नाहा उलखित्लू.” 72तोयो लागेज दिहरा टायमोमें कुकडू वाहयू पेत्राहा ती गोठी जी येशुनी तियाहा कोल्यी ओती ओर आवयी कुकडावाही बेन टायमोआ आअडीलो पहीले तू तीन टायमोआ माआ नकार कोअही अने आव गोठीकोता विचार कोईत रोडू लाग्यू.

Valgt i Øjeblikket:

मरकुस 14: NOINT

Markering

Del

Kopiér