Wĭkheegŭn 4
4
1Netwāje tan toocheu Uksakŭmamŭn ookŭjeje’toonāpŭn Pălooseŭk ookese‐nootŭmatenea Sāsoosŭl ookesĕhlan ha ookese‐papteisooĕhlan peāme‐ŭkchā’oweu’ noojekĕhkemajĭhĭ skatŭk tĕtpeu Sabadĭs;
2Cheegow’ skat Sāsoos papteisooĕhlooĕkw, kānookŭloo tanĭk wĕtŭkĕhkemoojik oohŭkĕk papteisooĕhlooatooŭk;
3Oonŭkŭtŭmŭnāpŭn Lĕsweesooakĭk ha ŭlehāpŭn Goolelĕtk.
4Ha chooe‐lesabehāpŭn Samālĭk.
5Netwāje pŭkŭchehĕ oodānĕk Samālĭk tŭlā’lewe’sooweŭ’ Seikŭl, kwĭheu’ k’takŭmikwses tan Sako’p kese melătpŭn ookwŏŏsŭl Soosĕpŭl.
6Nŭt Sakop’ weuhtabĭlmŭset net tĕt eoopŭn. Sāsoos netwāje kŭspŭnāoos ŭnhoolbĕsĭn weuhtăbĭlmŭseelĭt. Ha tamahal’ abaskwe.
7Net Samāleāwĭskw’ pŭkŭchehĕ oonadapelŭm. Sāsoos ootĭhal: Sĭh’mooĭn’.
8Eebŭchŭl ĕgĕhkemătpŭnĭhĭ labasoo’bŭnĭk oodānĕk oonatŭnŏŏhmŭn’ea mechooagŭn.
9Neaga netwāje Samāleāwĭskw’ ootĭhal: Tan ŭlāu kel Lĕsweesooeŭn ĕgwĕjĭm’eŭn ĕlŭsmeŭn nel, nel Samāleāwĭskw’? Eebŭchŭl Lĕsweesŭk ha Samāleāweŭk skat oosewākaltoolte’weuk.
10Sāsoos asedāmat ootĭhal: Kŭjeje’tooŭnsŭpŭn Nŭkskam ootŭlĕlmŭgwĕmkāwāyăm, ha neaga ŭkchĭjehŭtsŭbŭn tan wĕn yoo’hoosk Sĭh’mooĭn’, kweloodŭmooŏnāpŭnp, ha ŭkmĭlkoonāpŭnp’ samagwŏn pĕmowhsooĭk.
11Apet ootĭhal: Sakŭm, toowŏbĭlmŭsoot’ skadama ŭkteuow’, ha weuhtăbĭlmŭset pĭhtălgŭt; netwāje tama tĕt ŭkteĭn yoot samagwŏn pĕmowhsooĭk?
12Kel ŭkpeāmespā’ skatŭk kŭmĭhtakwsŭnook’ Sako’p, tanak melĭnmŭkpŭn yoot weutabĭlmŭset, ha wĕjŭsmetpŭn nāgŭm, ha neaga oonejan’, ha neaga ootoohĕm’?
13Asedāmat Sāsoos ha ootĭhal: M’seu wĕn tan wĕjŭs’ŭmĭt yoot samagwŏn, apchŭch kŭdoowŏŏsŭmoo;
14Kānookŭloo tan wĕn wĕjŭs’ŭmĭt samagwŏn tan nel melook’ch, skatŭch kŭdoowŏŏsŭmeu askŭmeu’. Kānookŭloo samagwŏn tan melook’ch nel, ootabĭlmŭsĭnch’ oohŭkĕk, lemoos‐kakŭmetĕhāch askŭmowsooa’gŭnŭk.
15Abĭt ootĭhal: Sakŭm, melĭn yoot samagwŏn, wĕlaman skatŭch n’kŭdoowŏŏs’ŭmeu, kŭsŭna skatŭch noochkooĭhow nadapeelŭmoo.
16Sāsoos ootĭhal: Ulĭh’, ha wĭhkweman’ kooskedapĕm, ha koochkooĭhan yoot.
17Asedāmat āpet ha eetŭm: Skadama nooskedapĕmeu. Sāsoos ootĭhal: Koolămāheetŭm, Skadama nooskedapĕmeu:
18Eebŭchŭl kel nanoobŭnĭk kooskedăpāmŭk; kānookŭloo ooskedăp tan āuŭt tŭkā’ch, skat nesooweuneu. Ulāu eetŭmŭn.
19Apet ootĭhal: Sakŭm, nŭmĭhtoon ŭknekanĭkchĭjetakāweenooĭn.
20N’metakwsŭnook tŭlyŭmehatoo’bŭnĭk yoot woochŏŏk, kānookŭloo kelooow’ uktetŭmooteba Sāloosălĕmk ĕchooetŭlyŭmehamŭk.
21Sāsoos ootĭhal: Apet, oolămsĭtooĭn tĕbŭnaskooĭhak chkooehĕ tanŭch toocheu skatŭch wĭhwenooamawewa Wĕgwŏŏsĭt Nŭkskam yoot woochŏŏk, kŭsŭna Sāloosălĕmk.
22Kelooow’ skat kŭchejetoonea tan kākw wĭhwenooŏdŭmĕkw. Neloon nkŭjejĭhan tan wĭhwenooamoo’kŭt; eebŭchŭl kekāwagŭn oochehĕ Lesweesooĭkŏŏk.
23Kānookŭloo tĕbŭnaskooĭhak kŭteëgĕhĕ ha tŭkāch’ egĕhĕ, tan toocheu oolămāwagŭne-emehāwenooŭk wĭhwenooamawŏlch’ Wĕgwŏŏselejĭl Nŭkskamŭl ’mchŭchakoo‐ĭkŏŏk, ha oolămāwagŭn ĭkŏŏk. Eebŭchŭl Wĕgwŏŏsĭt Nŭkskam ookwelooŏhŭ wĭhwenoowŏmkoon yŭhŏŏht’.
24Nŭkskam ’mchŭchakweu, ha tanĭk wĭhwenooamajĭk, ootachooe‐ŭlewĭhwenooamawŏl ’mchŭchakoo ĭkŏŏk, ha oolămāwagŭn ĭkŏŏk.
25Apet ootĭhal: Nkŭjejĭhtoon tan Mĭmkwānoot chkooĭhĕ, tan ĕlewesĭt Newĕsk. Tan toocheu pŭkŭchehatŭch ’mseuŭch kĕkwsăl ŭktagŭnoodŭm‐agoonĕnooŭl.
26Sāsoos otĭhal: Nel wĕskooeemŭl, nel nŭt.
27Net tĕhna oopĕdabaseelĭn tanĭhĭ ĕgĕhkemajĭhĭ, ha asŭgedŭhasooltooŭk ooskooeman āpelejĭl. Kānookŭloo skadama wĕn eetŭmoo, Kākw kwelooŏhtooŭn? kŭsŭna, kĕkwsā’ wĕche‐ooskooeemŭt?
28Un āpet oonŭkŭlal ootatooŏhpelŭmŭsooteŭl, ha ŭlĭhĕ oodānĕk, ha ootĭha pŭmowsooenoo,
29Chkooabasĭkw, ha sagĭhook pŭmowsooĭn, tan agŭnoodŭmooĭtpŭn tan ’mseu kĕkwsāăl ĕletakeanpŭnĭl. Skat nŭt tan Mĭmkwĕnoot? Newĕskooĭt?
30Netwāje noodeabasetĭt oodānĕk, ha pĕdabasooŭk tan āelĭt.
31Net tĕhna tanĭk ĕgĕhkemoojĭk oohŭkĕk wekoodŭmooŏnea Sāsoosŭl ootĭhawŏl: ’Nsakŭma’mŭn, mĭts.
32Sāsoos ootĭha: N’teĭn mechooagŭn tan meeche, tan kelooow’ skat kĕje’jetoo’ĕkw.
33Netwāje nootŭkĕhkemoojĭk yŏŏhoodooltooŭk: Māch wĕn kĕkwsā’ ookesepĕjĭptooŏn tan meecheelĭt?
34Sāsoos ootĭha: Net neeloo n’tŭlĕhtagan nāgŭm ootooledŭhadŭmooagŭn tan pedŭkemĭtpŭn, ha n’ke’sātoo’ŏn ootlookāwagŭn.
35Skat ŭktedŭmoopa māch nā’ooŭk kesoosŭk toocheu’ kooŏkwnĭkhŭtĭn? Sagĭhŏŏk, ’ktehoolpa, woonagĕhtŏŏk ŭkseskoo’wŏl ha sagĭhtŏŏk pĕmskoodāgĭl, eebŭchŭl tŭkāch’ wŏtĕptādool ooche kooŏkwoonaasoo; (eebŭchŭl tŭkā’ch wŏbā’uŭl keslĕskwtāādool ooche kooŏkwoonaasoo.)
36Ha nāgŭm tan tĕmsawĕt oomŭsŭnŭmŭn abĕnkagŭn, ha koowŏkŭneegĕ askŭmowsooagŭn ĭkŏŏk: wĕlaman nāgŭm tan ĕkehkĕt ha nāgŭm tan tĕmsawĕt mowewŏŏledŭhasooŭkch’.
37Netwāje ŭlĭhak yoot kŭlooswagŭn: Pĕskw kehkĕ, ha kŭtŭk tŭmsawĕ.
38K’pŭchetakaloopŭn k’tŭmsawŏn tan skat kese segŭlookhŭtŭmooākoopŭn. Kŭtŭkek ooskedăpĕk’ segŭlookhŭtoo’bŭnĭk, ha kelooow’ kŭseabaseneapŭn oosegŭlookāwagŭnooŭk.
39Ha ŭktanakwsooŭk Samāleākāweŭk yoot oodānĕk tŭlāāyak, oolămsŭtŭmŭn’eal oohŭkĕk ooche āpet ookŭlooswa’gŭnŭk, tan ĕlĭnspeuwŏŏlamĭt, eetŭm: Nāgŭm nŭstoo’magoonŭl ’mseu kĕkwsāăl tanĭl ĕlāta’geanpŭnĭl.
40Netwāje tan toocheu’ Samāleākāweŭk pĕdabaseetĭt āeelĭt, wekoodŭmooŏnea wejāagoo’nea. Ha net tĕt kwŭneheeyoo nesoogŭneu’.
41Ha apch peāmĭktanakwsooŭk wĕjeoo-lămsŭtŭmooteetĭt nāgŭm ookŭlooswa’gŭnŭk.
42Ha ootehawŏl āpelejĭl: Tŭkwch noolamsŭtŭmootenĕn’ skatŭk kel ŭkŭlooswa’gŭnŭk, eebŭchŭl neloon’ noodooŏn’ ha ’nkŭje’jĭhan wŏŏt nŭt oolămāwagŭn ĭkŏŏk oonoojekekĕh’ooŏn ooskĭtkŭmĭkw.
43Un kese nesoogŭnŭkak Sāsoos oochemachĕhĕ yoot tĕt, ha pŭkŭchehĕ Goolelĕtk.
44Eebŭchŭl Sāsoos ĕlĭnspeuwŏŏlămā nekanĭkchĭjetakā’wenoo skat ookeche‐tŭmetŭhamkwŭsseewŭn oomŭtkĭk.
45Netwāje toocheu pŭkŭchehĕ Goolelĕtk Goolelĕtkāweŭk wĭhkwĕhlawŏl, eebŭchŭl kese nŭmĭhtoonea’bŭnĭl ’mseu kĕkwsăl kesātakwpŭnĭl Sāloosălĕmk wĭkhŭpaltemŭk. Eebŭchŭl nāgŭmow pĕdabasoo’bŭnĭk ĕtlewĭkhŭpaltĭmkŭpŭn.
46Neet Sāsoos apch pŭkŭchehĕ Cānāk, Goolelĕtk, tan tĕt ĕtlemĕkwabakātak’wpŭn samagwŏn. Ha tan wĕn ĕspesakŭmowĭt, (spesakŭm) eu, tan ookwŏŏsŭl ĕtlĭksenoo’kalejĭl Cāpŭlneŭmk’.
47Tan toocheu kese noo’tŭmat Sāsoosŭl oopŭkŭchehalĭn Lesweesooakĭk, ha kesoochehalĭn Goolelĕtk, oopŭkŭchanŭl ha wĭhkoodŭmooŏn ootŭle‐pŭnegwĕseelĭn, ha ooke’kŭhan ookwŏŏsŭl; eebŭchŭl kŭtemĕcheeneŭl.
48Sasoos ootĭhal: Skat nŭmĭhtoo’ŭn kenooŏskoodeegŭnŭl ha neaga asŭgedŭhaswa’gŭnŭl, skatŭch koolămsŭtŭmooŭn.
49Spesakŭm ootĭhal: Sakŭm chkooepŭnĕgwĕs’ mĕskw ’nkwŏŏs mĕhcheenĕkw.
50Sāsoos ootĭhal: Machŭha, kwŏŏs pŭmowsoo. Ha ooskedap wĕlamsŭtŭk kŭloosooagŭn tan Sāsoos yŭhat. Ha oomachŭhan.
51Net pĕmebŭnĕgwĕsĭt ootasegagoo ooskenoosŭm, ha ootŭleagŭnoodŭmooawŏl, ootĭhawŏl: Kwŏŏs pŭmowsoo.
52Toocheu’ pabĕhcheemat tan toocheu’ oomachĕhwŏŏl‐mŭlsenĕs’. Ootehawŏl: Wŏŏlagoo nĕkwt ăjeehĕ, looegŭnŭkāwā’ paskoodeegŭn, hŭpŭsooaagŭn ĕkwehooht.
53Netwāje oometakwsŭl ookŭjejetoo’lĭn net temeaoo paskoodeegŭn Sāsoos yŭhatpŭn, Kwŏŏs pŭmowsoo. Ha oolamsŭtŭmŭn nāgŭm, ha neaga ’mseu week ĕlebŭskak.
54Net yoot nesāwā’ kenooŏskoodeegŭn Sāsoos kesĕhtakw, kes kesuchehat Lĕsweesooakĭk, ha pŭkŭchehĕ Goolelĕtk.
Valgt i Øjeblikket:
Wĭkheegŭn 4: PQM1870
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1870.
