यूहन्ना 15

अंगुरके लत आर ठ्यार

1“हमे सच्चा अंगुरके लतके जुगुर छियै, आर हमर पिता किसानके जुगुर छै। 2हरेक ठ्यार जे हमरासे जुड्ल छै आर फल नैफराबैछै ऊ ओकरा काटी दैछै, आर फल फराबेवाला सभेटा ठ्यारीके आरहौ बेसी फल फरै कहिके ऊ ओकरा साफ करैछै। 3हमर कहेल शिक्षासे तुहेंसब पहलहै शुद्ध भ्या गेल्हैं छे। 4तुहेंसब हमरामे र, आर हमे तोरासिमे रहबौ। जेरंके ठ्यार लतमे नैरहतै ते ऊ आपनहैं फल फराबे नैसक्तै, ओहिने करिके तुहेंसब कुछु बढियाँ नैकरे सकैछैं यदि तुहेंसब हमरामे नैरहभैं। 5हमे अंगुरके लतके जुगुर छियै, तुहेंसब ठ्यारके जुगुर छैं। अगर कोय हमरामे रहतै, आर हमे ओकरामे रहबै ते, ऊ बहुते बढियाँ काम कर्तै, कहिनेकी हमर बिना तुहेंसब कुछु नैकरे सक्भैं। 6कोय आदमी हमरामे नैरहतै ते, ओकरा काटिके ठ्यारके जुगुर फेकि देल जैछै। जब ऊ ठ्यार सुखी जैछै ते, ओकरा जमा करिके जर्या देल जैछै। 7यदि तुहेंसब हमरामे रहभैं, आर हमर शिक्षा तोरासिमे रहतौ ते, तोरासिके जे इच्छा लागैछौ माँग आर हमे ओकरा तोरसिके लिए पुरा कर्बौ। 8यदि तुहेंसब बहुते बढियाँ काम करैछैं ते, एकरद्वारा हमर पिताके महिमा प्रकट हैतै, आर एरंके तुहेंसब स्पष्ट करैछैं कि तुहेंसब हमर चेला छैं। 9जेरंके पिता हमरा प्रेम कैल्कै छे, ओहिने करिके हमे तोरासिसे प्रेम कैलियौ छे। तुहेंसब हमर प्रेममे र। 10अगर हमर आज्ञासिके पालन कर्भैं ते तुहेंसब हमर प्रेममे रहभैं, जेरंके हमे आपन पिताके आज्ञासब पालन कैलियै छे आर ओकर प्रेममे रहैछियै। 11हमे यी सभे बात तोरासिके सेल्याके कहैलियौ छे, कि तोरासिमे भी उहे आनन्द हौ जे आनन्द हमरामे छै। ताकी तुहेंसब पुरा आनन्दित भ्याजहैं।

12हमर आज्ञा यी छौ, कि जेरंके हमे तोरासिके प्रेम कैलियौ, तहुँसब एक दोसरसे ओहिने करिके प्रेम कर। 13आपन दोस्तके लिए आपन जान देना ही सबसे बडका प्रेम छै, एकरासे बडका प्रेम आर कुछु नैछै। 14यदि तुहेंसब हमर आज्ञापालन करैछैं ते तुहेंसब हमर दोस्त छैं। 15आबसे हमे तोरासिके नोकर नैकहबौ, कहिनेकी ओकर मालिक कोन चीज करैछै ओकर नोकरके मालुम नैहैछै। मगर हमे तोरासिके दोस्त कहैलियौ छे, कहिनेकी जे हमे हमर पितासे सुन्लियै छे, हमे ऊ सभे बात तोरासिके बत्या देलियौ छे। 16हमरा तुहेंसब नैचुन्लहैं छे, मगर हमे तोरासिके चुन्लियौ, आर तोरासिके नियुक्त कैलियौ छे, कि तुहेंसब जो आर बढियाँ काम कर आर तोरसिके बढियाँ काम सभे दिन रहौ। कहिनेकी तुहें हमर चेला छैं सेल्याके तुहेंसब जे कुछु भी हमर चेला हुऐके नातासे माँग्भैं, पिता तोरासिके देतौ। 17हमे तोरासिके यी आज्ञा देलियौ छे, ताकी तुहेंसब आपसमे एक दोसरसे प्रेम कर।”

संसारके आदमीसब चेलासिसे घृणा करैछै

18“यदि संसारके आदमीसब तोरासिके घृणा करैछौ ते, तुहेंसब जान, कि तोरासिके घृणा करैसे पहेला ऊसब हमरासे घृणा कैल्कै रहे। 19यदि तुहेंसब यी संसारके आदमीसिके जुगुर हैतिहैं ते संसारके आदमीसब तोरासिके आपन आदमी कहिके प्रेम कर्तियौ। मगर तुहेंसब यी संसारसे सम्बन्ध नैराखैछैं। कहिनेकी तोरासिके संसारसे हमे चुन्लियौ, सेल्याके संसारके आदमीसब तोरासिके घृणा करैछौ। 20जे बात हमे तोरासिके बतैलियौ छे ओकरा तुहेंसब याद राख,

‘नोकर आपन मालिकसे बढिके नैहैछै।’

यदि ऊसब हमरा सतैल्कै छे ते तोरहौसिके सतैतौ। ऊसब हमर शिक्षा पालन कर्तौ ते तोरसिके शिक्षा भी पालन कर्तौ। 21तुहेंसब हमर चेला छैं सेल्याके आदमीसब तोरसिके संगे एरं व्यवहार कर्तौ, कहिनेकी ऊसब हमरा भेजेवाला परमेश्वरके नैचिन्हैछै। 22हमे नैऐतियै आर ओकरासिके नैबतैतियै ते ऊसब पापके दोषी नैहैतियै, मगर आब ओकरासिके आपन पापके लिए कोनो बहाना नैछै। 23जे हमरासे घृणा करैछै, ऊ हमर पितासे भी घृणा करैछै। 24अगर ककरो नैकैल चमत्कार हमे ओकरसिके बीचमे नैकर्तियै ते ऊसब आपन पापके लिए दोषी नैहैतियै। मगर जे कुछु हमे कैलियै छे ऊसब देखल्कै छे तैय्योपर भी ऊसब हमर पिता आर हमरासे घृणा कैल्कै छे। 25यी ओकरा पुरा करैछै जे ओकरसिके विधि-विधानमे लिख्ल छै। ऊ कहैछै,

‘ऊसब बिना कोनो कारणके हमरासे घृणा कैल्कै।’

26हमे पिताके तरफसे तोरसिके लिए एकटा सहायक भेज्बौ। ऊ सहायक पवित्र आत्मा छै जे पिताके तरफसे आबैछै आर जे सच छै ओकरा प्रकट करैछै। जब ऊ ऐतै ते, ऊ तोरासिके हमर बारेमे बतैतौ। 27आर तुहेंसब संसारके हमर बारेमे बतैभैं, कहिनेकी तुहेंसब शुरुआतसे हमरसंगे छैं।”

Valgt i Øjeblikket:

यूहन्ना 15: KYVNT

Markering

Del

Kopiér