मत्ती 11

यूहना बपतिस्मा जिऊमिठाच गा प्रश्न

(लूका 7:18-35)

1मेटे यीशु हेजा बारह चेलाकूके गा निर्देश जीके मेना, मेटे देटेन पुरानौर गेन इथू एठा खाबोर घालके डो देटे टे ओलेन। 2यूहन्ना नी जेलेन यीशु मसीह गा कामय गा खाबोर आजुमटे हेजा चेलाकू तलाटे बार्खिंजके दियाटे इनी कोकोम्बारा कुलकेकु, 3“चोच आमका मसीह मेना, डीचके कुकूल वादा परमेश्वर नी डाके डा या आले तुनिका दूसरा गा राह डोगे?” 4यीशु नी दिकुके जवाब जीके, जो चोचकाभी आपे दोडो एठा आजुम लक्के मेना, देटेन सेबाई सेने डो यूहन्ना मंडीकी। 5कि अंधा दोडोवा होय, एठा लंगडा सेंद्रा इखाटबा होय, कोळ्या सजाऊबा होय, एठा बेहेरा आजुमबा होय, मुर्द जीटाऊवा होय, एठा गिरबोकु के अच्छा खाबोर घालेवा होय। 6एठा धन्य होय देटेन, दियागा विश्वास इंजा लिंजाटे बान बिट।

यीशु गा द्वारा यूहन्ना गा सम्मान

7मेटे यूहन्ना चेलाकू देटे टे ओले मेना, मेटे यीशु गर्दी के यूहन्ना गा बारेन गघाल लज्जे, “आपे सुनसान जगान चोच दोडो ओले डा? चोच कोयो टे ओखेंज मिनी डोंगळाके? 8डाबोलटे आपे चोच दोडो ओले डा? चोच नेरोम आंगी उरिके मिनी कोरो के? जो येनोगो आंगी उरिवा होय, दिकु राजभवनेन थंदळवा होय।

9मेटे डाबोलटे चोच दोडो ओले डा? चोच तुनिका परमेश्वर गा कोनेटे मंडीमिठाच के दोडो गा घल्जी? हेन, इंज आपेटे मंडीवाकी, येटेन देटेन होय जो परमेश्वर कोंटे मंडीमिठाच टे भी खाट होय। 10यूहन्ना देटेन कोरो होय दियागा बारेन पवित्र ग्रंथ इनी मंडीवा होय, कि ‘डोगे इंज इंजागा खाबोर जिऊमिठाचके अमा सम्मान कुलेजबा, जो अमा सम्मा कोरा तैयारेवा।’ #मला. 3:1 11इंज आपेटे सच्चो मंडीवाकी, आए टाएन जोभी कोरोकु डायेन होय दिकु तलाटे म्याखोमभी यूहन्ना बपतिस्मा जिऊमिठाच जाटे खाट बाऊ होय। एठाभी स्वर्ग गा राज्यन सानी टे सानी भी यूहन्ना टे खाट होय।

12एठा मेटे टे यूहन्ना बपतिस्मा जिऊमिठाच खाबोर गघाल सुरुके, डी टेमो साटे आए टाएन स्वर्ग गा राज्य ताखातदार टे फाईलातिंजू लाके होय, एठा खीजो कुरकू नी एने लिंजेन हामला डाए लक्के। 13परमेश्वर गा कोनेटे मंडीमिठाच गा द्वारा ओल्के मिनी सेबाई पुस्ताक गेन मूसा गा नियम गेन यूहन्ना बपतिस्मा जिऊमिठाच गा हेजे गा टेमो टाएन राज्य गा बारेन ओल्के मेना। 14अगर आपे इनी सच्चाई गेन विश्वास दोडो टासो आजुमे, यूहन्ना का देटेन एलिय्याह होय दियागा दूसरा बार हेजे गा बारेन मंडीके डा।#मला. 4:5 15जेकाभी इनी बातो के आजुमबा होय जो इंज मंडीवा, डीके सामझातिंजू गा कोशिश डाए।

16इंज इनी टेमो गा कुरकू गा तुल्ना तुनी कुरकू सेंग्गोन डाए? दिकु डी चफनीकू गा रोंगो होय, जो शिकायत लक्के होय, एठा दिकु इनी बातो टे शांती बाऊ कि दूसरा पंचाती कुरकू चोच दडा लक्के होय। 17आलेनी आपेगा घल्जी खुशी गा संगीत साडीके पेनो आपे बान नाचोडुका आलेनी कासु गा संगीत साडीके एठा आम नी बान नाचोडुका, एठा आपेनी छाती बान मुंडादुका।

18चोयाकी यूहन्ना बपतिस्मा जिऊमिठाच दूसरा कुरकू गा रोंगो न जोजोम एठा न अंगूर गा रेस्सो नुनू डा, इनिघल्जी दिकु मंडी डा कि दिजेन भूतो मुके डा। 19मेटे इंज कोरो गा कोण मेना एठा इंजा आटा सादा होय, एठा दिकु मंडीवाकी डोगे खादळया एठा सिडू कुत्या कोरो होय, टेक्सा सा मिंकू एठा पापोकु गा सोपती होय। पेनो ज्ञान हेजा सेबाई कामयनौर गेन सच्चो ठहरातिंज्के होय।”

मन बान इखाट मिंकू लिजेन हाय

(लूका 10:13-15)

20डी कुरकू गा धिक्कार केकु, दिकुनी यीशु नी घोनेच अचम्बो कामय डाके डा। चोयाकी दिकुनी पापो के आराटे परमेश्वर गा कोनेन इकुगा मन बान बदलाडुका डा। 21धिक्कार होय आम लिंजेन खुराजीन शहर! धिक्कार होय आम लिंजेन बैतसैदा शहर! जो अचम्बो कामय आमेननी डाके, अगर दिकु सोर एठा सैदा शहरेन डाके टासो, मेटे देटेन कासु आंगी उरीटे कापरेन होप येंडाटे पेलाका मन बदलाके धारे।

22पेनो इंज आपेटे सच्चो मंडीवा होय कि न्याय गा दिन परमेश्वर जो सजा सोर एठा सैदा शहर के जेबा, देटेन डी सजा घोनेच कमुबा जो देटेन आपेके जेबा। 23एठा हे कफरनहूम शहर गा कुरकू, चोच आपे स्वर्ग टाएन ऊचाऊबा मेना? आमनी नरक टाएन इटान बोचोगुवा, जो शक्तीगा कामय आमेननी डाके होय, अगर सदोम शहर गेन डाके धारे, मेटे देटेन आए टाएन थंदळ डा। 24पेनो इंज आपेटे सच्चो मंडीवा होय कि न्याय गा दिन परमेश्वर जो सजा सदोम शहर के जेबा, देटेन डी सजा घोनेच कमुबा जो देटेन आपेके जेबा।

यीशु गा मेरान आराम्बो

(लूका 10:21-22)

25डीका टेमो यीशु नी मंडीके, “हे स्वर्ग बाटे बदळा एठा पृथ्वी गा प्रभु, इंज अमागा धन्यवाद डाएवा मेना, कि आमनी इनी बातो के ज्ञानी एठा सामझदार कुरकू टे उखुटे डोके, एठा जो कुरकू आनपाळ कुरकू गा रोंगो होय दिकु लिंजेन ओटके होय। 26सच्चो होय स्वर्ग बाटे, चोयाकी आमेन इनिका अच्छा लगातिंजे।”

27इंजा स्वर्ग बाटे गा वोजीटे इंज्के सेबाई सोपातिंज्के होय। स्वर्ग बाटे गा अलावा जेका कोण के बान हाडाई एठा न जेका स्वर्ग बाटे के हाडाई होय, एठा बस कोण एठा इनिजगा अलावा कोण अदा कास कुरकू के स्वर्ग बाटे बारेन गघाल चाहतावा।

28“हे सेबाई कामय मिंकू एठा ओजाटे दबातिंज्के कुरकू, इंजा मेरान हेजे, इंज आपेके आराम्बो जेबा। 29इंजा टाऊटे हेजे एठा इंजाटे इठोए चोयाकी इंज नम्र एठा दिल गेन दिन मेना, एठा आपे आपेगा दिल गेन आराम्बो घाटाऊवा। 30चोयाकी इंज जो दडा गा हुकूम जेबा मेना, डीके दडा मुश्किल बाऊ।”

Valgt i Øjeblikket:

मत्ती 11: GOKNT

Markering

Del

Kopiér