मत्ती 1

यीशु मसीह गा पीढी

(लूका 3:23-38)

1अब्राहम गा कोणकु, जो राजा दाऊद गा कोणकु, इनी यीशु मसीह जुना सनाकु गा जीमू सूची होय। 2अब्राहम कोणटे इसहाक, इसहाक कोणटे याकूब, एठा याकूब कोणटे यहूदा एठा दियागा डाईटे डायेन होय।

3यहूदा गा किमिनटे तामार, यहूदा एठा तामार गा कोणटे पेरेस एठा जेरह, एठा पेरेस गा कोणटे हेस्रोन, एठा हिस्रोन गा कोणटे एराम। 4एठा एराम गा कोणटे अम्मीनादाब, एठा अम्मीनादाब गा कोणटे नहशोन एठा नहशोन कोणटे सलमोन। #रूत. 4:19-20

5सलमोन एठा राहाब (जो गैर-यहूदी बान डा) गा कोणटे बोअज, एठा बोअज एठा रूत (जो गैर-यहूदी बान डा) गा कोणटे ओबेद, एठा ओबेद गा कोणटे यिशै।

6एठा यिशै गा कोणटे दाऊद राजा, एठा दाऊद गा कोणटे सुलैमान डी जापाएटे डायेन मेना जो पेला ऊरीय्याह गा जापाएटे होय। #2शमू. 12:24 7सुलैमान गा कोणटे रहबाम एठा रहबाम गा कोणटे अबिय्याह, एठा अबिय्याह गा कोणटे आसा। 8आसा गा कोणटे यहोशाफात, एठा यहोशाफात गा कोणटे योराम, एठा योराम गा कोणटे उज्जियाह।

9उज्जियाह गा कोणटे योताम एठा योताम गा कोणटे आहाज एठा आहाज गा कोणटे हिजकिय्याह। 10हिजकिय्याह गा कोणटे मनश्शे, एठा मनश्शे गा कोणटे आमोन, एठा आमोन गा कोणटे योशिय्याह।

11योशिय्याह, यकुन्याह एठा दियागा डाईटे टाकु गा आजा डा, मेटे इस्राएल कूके बेबीलोन शहर गेन बंदी आरुटे पेला डाएन मेना डा। #यिर्म. 27:20 12बंदी आरुटे बेबीलोन शहर सेने गा टेमो टे साटे यीशु गा जनम टाएन दियागा जुना सनाकु डा। यकुन्याह गा कोणटे शालतियेल, एठा शालतियेल गा कोणटे जरुब्बाबेल।

13जरुब्बाबेल गा कोणटे अबीहूद, एठा अबीहूद गा कोणटे एलयाकीम, एठा एलयाकीम गा कोणटे अजोर। 14अजोर गा कोणटे सादोक, एठा सादोक गा कोणटे अखीम, एठा अखीम गा कोणटे एलीहूद। 15एलीहूद गा कोणटे एलीआजर, एठा एलीआजर गा कोणटे मत्तान, एठा मत्तान गा कोणटे याकूब।

16याकूब गा कोणटे यूसुफ, जो मरियम गा सानाटे डा। एठा मरियम वोजीटे परमेश्वर गा आत्मा टे यीशु डाएन मेना, जो मसीह मेनबा होय।

17अब्राहम टे दाऊद टाएन सेबाई चौदा पीढी डायेन एठा राजा दाऊद गा टेमो साटे डी टेमो टाएन मेटे इस्राएल कुरकू के बंदी आरुटे बेबीलोन शहर गेन सैय्येकु जब टाएन चौदा पीढी डायेन। एठा बंदी आरुटे बेबीलोन सेने टेमो टे साटे यीशु मसीह टाएन चौदा पीढी डायेन।

यीशु मसीह गा जनम

(लूका 1:26-38; 2:1-7)

18यीशु मसीह गा जनम डाऊ गा पेला इनी रोंगो डायेन। कि जब दियागा आंटे मरियम गा मंगनी यूसुफ गा सेंग्गोन डायेन, मेटे दिकुगा ब्याह डाऊटे पेला। जब डीच सळाका डा, मेटे डीच पवित्र आत्मा गा शक्ती गा वोजीटे लाज हेन।

19यूसुफ दियागा उरामिठाच म्या धर्मी कोरो डा एठा डीचके सेबाईका रुपोटे बदनाम दडा बान मेन डा। इनिघल्जी डीचनी कायोम टेका हेजा सगाईके तेठया गा निर्णय डावे। ब्याह टे पेलाटेका लाज हेन जोकी मूसा गा नियम गा खिलाफबेन डा।

20मेटे डीच इनी बातो के सोचातिंज लक्के डा, मेटे परमेश्वर गा स्वर्गदूत दिजेन डोएन डो मंडी लज्जे, “हे यूसुफ! राजा दाऊद गा कोणकुटे, आम मरियम के अमा जापाए आरुटे बाकी हिगरा। चोयाकी जो दियागा लाजेन होय डीच पवित्र आत्मा शक्तीटे होय। 21डी सानी पोट्टा डाऊवा एठा आम दियागा जीमू यीशु डोकी, चोयाकी डीच आबुगा कुरकू गा दिकुगा पापो टे उध्दार डायेबा।”

22इनी सेबाई इनिघल्जी डायेन ताकी डी सेबाईका पुरायु जो परमेश्वर नी यशायाह जो परमेश्वर गा कोनेटे मंडीमिठाच गा वोजीटे यीशु गा जनम गा बारेन मंडीके डा यशायाह नी इनी रोंगो ओल्के, 23“डोगे म्या सळाका तराई लाज हेजेवा एठा म्या सानी पोट्टा डाऊवा, एठा दियागा जीमू इम्मानुएल डोएबा” डेगा मतलब होय परमेश्वर आलेगा सेंग्गोन।

24मेटे यूसुफ दुनूमाटे झाठ्ठोयेन डो परमेश्वर गा स्वर्गदूत गा हुकूम रोंगो डीचनी मरियम टे ब्याह डावे एठा डीचके हेजा उरान सालेनेच। 25एठा जब टाएन डी सानी पोट्टा बान डाऊ टाक्के मेटे टाएन दिकुनी तुनिकाभी कोम्बोर संबंध बान दोडुका। जब दियागा पेला कोण डाएन, मेटे यूसुफ नी दियागा जीमू यीशु डोके।

Valgt i Øjeblikket:

मत्ती 1: GOKNT

Markering

Del

Kopiér