Luke 5
5
Zezi aswolo alwoni a nde a ncomi
1Cugu lemon Zezi kiigi li ka mpaana oduba o nkuumu Zenezarete#5.1 Oduba o Zenezarete wua ba acwolo nde se maa oduba wo Ngalile. Lekese nca Mareke 6. 53., ŋaa bege le baari le kaya ŋa asisari ka mpaana nde ma kayuga mbari a Njyami. 2Nde moni avaari mwele ka ofunuŋu oduba, eli abii ancu kiigi ama suruga ma kacuka akia a bo. 3Nde nyuniŋi nca vaari omon, ŋaa nde kiigi wo Simon. Ŋaa Zezi mpi nde akolokolo ma kaje nca owunu, nde ki manci kanca vaari, ŋaa nde yiga abaana ka yiziga bege le baari.
4Ntini ye mani nde kalyele, nde ŋa Simon ndi: «Selege ciina nca owunu, ŋaa lecuna akia a be ma anja.» 5Simon akaala ŋa nde ndi: «E mfumu, bizi le ma asala lempiibi le eciina, bizi le kibaga kalogo ŋi.» Ŋaa eli we mi lyele, mi elege okia ma anja. 6Ŋaa bo alege akia, bo ayagi bege le ancu, ŋa akia ayiga ma abaga. 7Bo bakasa abuga baali kanca vaari wo omon, njiimi ma kaya baga bo. Bo ayi, ŋa bo aso alusi avaari amwele, ŋaa avaari kiigi yiga ma ajiniŋa nca anja. 8Simon Pyere kamono bwa, nde vi ka ncina abwu a Zezi, ŋaa nde ndi: «Mfumu, ciege ka mpaana mi, kabila mi mbuuru wobi.» 9Simon bila abuga adugi bwa, bo ba amoni osizi ba ancu ba bumi bo. 10Kiigi ŋa Zake, ŋa Zan, mwana Zebede ba baaka bila Simon bo se amoni osizi baa. Ŋaa Zezi ŋa Simon ndi: «Ndaga kabaraga, we yiga amaka obaga baari.» 11Ŋaa bo ayi vuruga bila avaari ma kaya vuta bo ma ncie. Bo anyini biibi eso, ŋaa bo alwoni Zezi.
Zezi asalaga ngaa ebila
12Cugu lemon, Zezi kiigi li kanca kangundu kamon ka bungu le Ngalile, ŋaa mono balaga lemon njuru ema abya ma ebila kamono Zezi, nde yi va kacina Zezi kalii kanca ncie, ŋaa nde ndi: «Mfumu, mi yayi mini we ajia, we abuna kasalaga mi. Ŋaa mi nka cece.» 13Zezi legi jiala yila nde ŋa nde ndi: «Mi ŋa njala ni we wuuma, ŋaa ka cece.» Ŋaa kancinci ŋa nde ebila efi. 14Zezi yiezi nde ndi: «We bizi mbuuru kalyele. Ŋaa je mvyere njuru a we ŋa ompi ambwoŋi, ma buni nde kampa Njyami ambwoŋi, ma lemigi le eteende Moyize, ma bwa baari ayaa ndi we mi wuuma.» 15Ŋaa ncia Zezi eseligi eyeni ma angulu ma ancie ma tiniŋa lia, lembuuru le kukuna lekugi ma kayuga mbari a Njyami bila kasalaga anjuru a bo. 16Ŋaa Zezi yeni ka kabiri ye ndeotu ma kabwono.
Kabuka ka Zezi ka saligi
17Cugu lemon, Zezi kiigi ayiziga afarizi bila ayizigi angiri baafi ampugu ma bungu le Ngalile, ŋa Zide bila kangundu ka Zerizaleme, kiigi ali manci kapaana nde. Mpari a Njyami kiigi eli bila Zezi, ma kasalaga abieri. 18Abalaga ayi, bo kiigi amaabira kabuka kayila kakala. Bo baasaga kanyunuŋa nca njo ma kaswuza nde kavuzu o Zezi. 19Okorogo bo akibuna kanyunuŋa bila nde ŋi, kabila lembuuru le ma avula. Ŋaa bo akumi kayila okaami a njo, bo atubi mburu, bo aswuzi obieri kayila kakala ka nde, ka kari a bo aso, kavuzu o Zezi. 20Zezi kamono eyaligi ebo, nde ŋa obieri ndi: «Mi mi cieze maami a we maabi.» 21Ayizigi angiri bila afarizi amono ba cimiŋa ndi: «Nde wu na, we atuga Njyami. Kangula Njyami otu, mbuuru okima kibuna kacieze maami maabi ŋi.» 22Okorogo Zezi kiigi yayi ecimiŋi e bo ŋaa nde ŋa bo ndi: «Be mema le cimiŋa bwa? 23Yo jaa le mpasi ŋaa lelyele ni, maami a we maabi amiciege sikali yaga kakala ka we ŋaa we je? 24Ave be leyayi ni Mwana Mbwuru abuna kacieze maami maabi a baari kayila ncie.» Okorogo Zezi dugi ŋa kabuka: «Mi ŋa we ni, temeŋe, yaga kakala, je mpila we!» 25Parabu, kabuka ka sarigi ka miizi a baari aso. Nde kayagi kakala ka nde kaga baaka ma tolo, ŋaa nde yeni njo, nde aje ma kalyele ndi: «Lekuma le we Njyami! 26Ekoli baari aso, ŋa bo njuru eyaani.» Bo se yiga ba alyele ndi: «Lekuma le we Njyami! Lubu bizi lemi mono ekubu emaami ba lwari.»
Zezi acwolo Levi
27Amana bwa, Zezi cwugi nca mpugu, nde moni balaga lemon kanca ajanji ba bayaga lempo, nkuumu a nde Levi. Nde kiigi manci ka biri ye asala nde, ŋaa Zezi ŋa nde ndi: «Lwono mi.» 28Levi onyini e nde eso, temiŋi ŋa nde lwono Zezi.
29Levi kuzigi kiza leenini ka njo nde ma kayamba Zezi. Ŋaa kiigi ŋa ajanji ba kukuna ba bayaga lempo, bila bege le baari akima baakiigi ja bila bo. 30Afarizi bila ayizigi angiri baakiigi bila bo, ba ka ŋiina ka mpanaŋa bo, bo ŋa alwoni ndi: «Be mema leeja ŋa be lenyua bila angaa lempo, ŋa baari eli bo baasa maami maabi?» 31Zezi yagi mbari ŋa bo ndi: «Ka baari ba akaami angaa, baali ŋa kaama ma mbuuru we asalaga bo ŋi, ŋaa angaa kaama abieri.» 32Mi ka ma baari atele nja ŋi, okorogo ma baari baabi ma buni bo akaala eku.
Ekaali e Zezi ŋa Afarizien
33Afarizi ba alyele ŋa Zezi ndi: «Alwoni a Zan mva a bizi ali, bo ba sa eyila e njala bila bo ba sa obuoni, okorogo a we baaja, ba anyua.» 34Nde akaala ŋa bo ndi: «Be kibuna kaswuza adigi ba olumi aki njala eli olumi kini bila bo ŋi.» 35Ecugu be ya eli ba acieze olumi, ŋaa yia ntini ye maka bo njala.
36Ŋaa nde se wobi ŋa bo ma lempiini: «Mbwuru kibuna kavusa kabori ka mfa bila ke nyarigi ŋi, ma buni ncanke kabari ka mfa keenyarigi ka avusi bila kabori kia kabaagi.» 37Ŋaa mbuuru kibuna kalege mali ma anyarigi kanca kabori ka mpye ye kabaana ŋi, ncanke mpye ebaagi, mali ayirigi ŋa mpye ebii. 38Okorogo kalege mali ma anyarigi kanca ampie ma anyarigi. 39Ŋaa mbuuru, kibuna nyua mali akala, ŋaa nde vuri jii kanyua ma anyarigi ŋi, kalyele ciri ndi: «Mali akala ŋa ove.»
Valgt i Øjeblikket:
Luke 5: teg
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
