Luuka 21

Ɨnsangu ya mʼfwɨle

(Maalʉko 12:41-44)

1ɄYeesu lwa‑ali mumuula mu lubhaga lwɨ nyumba ɨmfinjile ɨya Ngʉlʉbhɨ, aheenya, ahabhalola abhatabhazi lwa bhafumya ɨnsangu zyabho mu shɨlɨɨlo ɨsha‑afumizye ɨnsangu. 2Peeka nɨ‑ɨbho, ahanʼnola nʉ mʼfwɨle ʉmo ʉmʼpɨɨna, afumya ɨnsangu ʉtusenti tubhɨɨlɨ#21:2 ʉtusenti tubhɨɨlɨ Ahasenti hahali mpɨɨya ndoodo tee ashile ɨmpɨɨya zyonti ɨzyɨ habhaazyo haala. lwene. 3Ɨpo ʉYeesu ahaga, “Lyoli ɨhubhabhʉʉzya huje, ʉnʼshɨ ʉyo ʉmʼfwɨle ʉmʼpɨɨna afumiizye ɨnsangu ashile abhanjɨ bhonti ɨbha. 4Ɨnjanjile ɨsho, pɨpo abhantu abhanjɨ bhonti bhafumiizye ɨzya pa mwanya mu winji wɨ tabhazi waabho. Leelo ʉnʼshɨ ʉmʼfwɨle ʉnʉ hwope sha mʼpɨɨna mansi, afumiizye vyonti vya‑ahali navyo vya vyahamʼmwavwaga mu wʉʉmi waakwe!”

ɄYeesu akuwa abhugulwe hu nyumba ɨmfinjile ɨya Ngʉlʉbhɨ

(Mataayo 24:1-2; Maalʉko 13:1-2)

5Abhasundwe bha Yeesu bhamo bhahayangaga ɨnongwa ɨzyɨ nyumba ɨmfinjile ɨya Ngʉlʉbhɨ sha yahazengwilwe na mawe aminza, peeka nɨ vintu vya visʉngʉʉsya ɨvyo abhantu bhahafumiizye hwa Ngʉlʉbhɨ. Ɨpo ʉYeesu ahaga, 6“Ɨgo gonti ga muhugalola ɨshi, zyahayɨnza ɨnsiku ɨzyo gahayibhugulwa gonti, saga lyahayisyala iwe nka lyeka pa mwanya pi‑iwe ɨlyamwabho.”

Amalabha ga gahayifumila ɨnsiku ɨzya hu malishilo

(Mataayo 24:3-14; Maalʉko 13:3-13)

7Abhasundwe bhaala bhahamʼmʉzɨɨlɨzya bhahaga, “Wee Mʼmanyizyi, ɨgo gahayifumila ndi? Nantele, shimanyishizyo bhʉlɨ sha shahayibhonesya huje, ɨgo gapalamiiye afumile?” 8Ahabhabhʉʉzya ahaga, “Mubhe maaso mugandi agobelwe! Abhantu abhinji bhahayibha bhahulibhombela itaawa lyanɨ hwi‑ilenga na‑ayanje huje, ‘Anɨ nɨ Mʼfyʉli!’ Nantele, bhahayibha bhayanga aje, ‘Ahabhaazyo hapalamiiye!’ Abhantu ɨbho, mugandi hubhɨɨtɨshe! 9Ɨshi, lwa mwazyʉmvwa ɨnongwa ɨzyɨ lʉgʉ nɨ zya‑apɨndule ɨnsi, mugandi ahwogope. Ɨzyo lyoli zihwanziwa afumile nasʉʉti, leelo ʉmalishilo saga wahayɨnza lubhilo lwa galoleha ɨgo lwene.”

10ɄYeesu ahajendeelela ayanje huje, “Ɨnsi ɨmo yahayilwa nɨ nsi ɨyamwabho, ʉwumwɨnɨ wumo wahayilwa nʉ wumwɨnɨ ʉwamwabho. 11Mu mbali zinyinji hwahayibha na mantensya amagoosi agɨ nsi, yope ɨnzala yahayigwa, nɨ mpʉngo ɨzya hwambushizye zyahayifumila. Nantele, hwahayibha ɨvintu ɨvya hwogofye nɨ vimanyishizyo ɨvigoosi afume hu mwanya.

12Ɨshi, ɨgo gonti sha gasɨɨle afumile, abhantu bhahayihubhakhata amwɨ na hubhayɨmvye. Bhahayihubhatwala alongwe mu nyumba ɨzya‑apuutile na‑amanyiilile, na hubhakʉnje mu hoobhe. Nantele, bhahayihubhatwala hwa bhamwɨnɨ na hwa bhalongozi bhɨ nsi huje mulongwe, pɨpo munambɨlɨɨye anɨ. 13Leelo huliimwɨ, ɨho hahayibha habhaazyo ha hubhasimishizye abheene ʉlwɨtɨho lwenyu. 14Ɨshi, mugandi asɨɨbhe nasʉʉti sha hasɨɨle ahabhaazyo aha‑alongwe huje, munza hwiyʉʉmɨle wɨlɨ. 15Ɨnjanjile ɨsho hu nongwa ya‑aje, anɨ nahayihubhapeela amazwi aga‑ayanje nɨ njeele, ɨgo abhalʉgʉ bheenyu saga bhabhajiiye akhaanane nago na hubhamene.

16Nantele, mwahayisambushilwa hwope na bhapaafi bheenyu, abhaholo bheenyu, abhamwenyu na bhamanyani bheenyu. Nantele bhamo muuhati yeenyu bhahayihubhagoga. 17Abhantu bhonti bhahayihubhaviitilwa amwɨ, pɨpo muhumbɨnjɨɨlɨzya anɨ. 18Leelo, saga hahayiteega nka hasisi nka heeka mu matwe geenyu! 19Namwɨ nkashele mwajimbiilila, ɨpo mwahayambɨɨlɨla ʉwʉʉmi ʉwa wiila na wiila.”

ɄYeesu akuwa abhugulwe hwi‑ibooma ɨlyɨ Yelusaleemu

(Mataayo 24:15-21; Maalʉko 13:14-19)

20ɄYeesu ahonjela ayanje ahaga, “Ahabhaazyo ha mwahayilola ibooma ɨlyɨ Yelusaleemu lizyʉngʉlɨɨlwe na bhalwi, ɨpo mwahamanyaje huje, ahabhaazyo aha‑abhugulwe hwi‑ibooma ɨlyo hali pa pɨɨpɨ. 21Ɨshi hu habhaazyo ɨho, abhantu bha bhali hu mukowa ʉgwɨ Yudeeya, bhahashɨmbɨlɨlaje mu magamba! Bha bhali mwi‑ibooma ɨlyɨ Yelusaleemu, bhahafumaje na‑ashɨmbɨle, bhope bha bhali mu magʉnda, bhagandi aweele hwi‑ibooma. 22Ɨnjanjile ɨsho hu nongwa ya‑aje, ɨnsiku ɨzyo zyahayibha zyɨ lufundo huje, amazwi gonti ga gasimbwilwe mu Nsimbo ɨMfinjile gabhombeshe. 23Bhasheelile abhashɨ bhaala bha bhahayibha nɨ nyanda na bha bhahayibha bhahwonsya abhaana mu nsiku ɨzyo! Hwahayibha hukhome tee hu nsi ɨyo, lyope ilyoyo lya Ngʉlʉbhɨ lyahayihubhɨnzɨla abhantu abhɨ habhaazyo ɨho. 24Abhantu bhamo bhahayibudwa ni‑ipanga ɨlyoji, bhamo bhahayitwalwa hu kalwe hu nsi ɨzyɨnjɨ. Nantele abhantu bha saga Bhayahuudi bhahayɨnza hulikhanyanganye na hulibhugule ibooma ɨlyɨ Yelusaleemu, afishe ɨnsiku zyabho lwa zyahayibha zimaliishe.”

ɄYeesu ayanga aweele hwakwe

(Mataayo 24:29-31; Maalʉko 13:24-27)

25ɄYeesu ahajendeelela ayanje ahaga, “Vyahayiloleha ɨvimanyishizyo hwi‑isanya, hu mwezi na hu nzota. Nantele mu nsi ʉmu, ɨnsʉmbi zyahayibha na mabhilingwa amagoosi amamwamu tee. Ɨlyo lyahayihubhabhomba abhantu abhɨ nsi zyonti huje, bhagundushe na‑abhe nʉ wooga tee. 26Ɨgo gonti lwa gafumila mu nsi, abhantu bhahayiziliha amooyo hu nongwa yɨ wooga ʉgoosi. Bhahayisɨɨbhaga huje, ʉlʉgʉ ʉgoosi wuhwɨnza hu nongwa ya‑aje, ɨvintu vyonti ɨvya hu mwanya vyahayiyinga.

27Ɨpo abhantu bhonti bhahayihundola anɨ nɨMwana wa Muntu ɨhwɨnza mu mabhɨngo hwi‑ikhone ɨlinji nʉ mwamu ʉgoosi. 28Ɨshi, ɨgo gonti lwa gahayanda aloleshe, mwahabhanje nʉ lusʉʉbhɨlo nʉ luseshelo, pɨpo ɨgo galolesya huje, ʉNgʉlʉbhɨ ali pa pɨɨpɨ hubhagombole!”

Ɨshifwani ɨshi‑ikwi ɨlyɨ makʉ

(Mataayo 24:32-35; Maalʉko 13:28-31)

29Ɨpo ʉYeesu ahabhabhʉʉzya abhasundwe bhaakwe ɨshifwani ahaga, “Enyi ikʉ na makwi aganjɨ gonti. 30Lwa mulola amakwi ganda alembe, mumanya lwene huje, ahabhaazyo aha‑ayabhile hapalamiiye.

31Ɨshi, lwa muhuzilola ɨzyo zyatala abhombeshe, manyaji huje, ʉwumwɨnɨ ʉwa Ngʉlʉbhɨ wupalamiiye ahwɨnze. 32Lyoli ɨhubhabhʉʉzya huje, abhantu abhɨ habhaazyo ɨha saga bhahayifwa, sha zisɨɨle abhombeshe ɨzyo zyonti. 33Ɨnsi nɨ vintu vyonti ɨvya hu mwanya vyahayishila, leelo amazwi gaanɨ saga gahayishila nka lumo.”

Mubhe maaso

34“Mubhe maaso huje, mugandi amenwe nɨ nsʉngwo ɨmbiibhi, ʉmwezi nʉ wooga ʉwa mu nsi ʉmu. Isiku ɨlyo ɨlya hu malishilo lyahayihubhɨnzɨla hu ngundushizyo, 35nanshi ʉlwonzo. Isiku ɨlyo lyahayihubhɨnzɨla nalinaali abhantu bhonti mu nsi zyonti. 36Ɨshi, mubhe maaso ahabhaazyo honti. Munʼnaabhaje ʉNgʉlʉbhɨ huje, abhapeelaje ikhone ɨlya‑ashilile hu zyonti zya zyahayifumila, na hwɨmɨɨlɨle pitagaalila lyanɨ anɨ nɨMwana wa Muntu.”

37Mu nsiku ɨzyo, ʉYeesu ahabhamanyizyaga abhantu mu lubhaga lwɨ nyumba ɨmfinjile ɨya Ngʉlʉbhɨ. Nʉsiku, ahabhalaga agone mwi‑igamba ɨlyɨ Mizeyituuni. 38Shila lisiku, abhantu bhonti bhahabhalaga nashampwi mu lubhaga lwɨ nyumba ɨmfinjile ɨya Ngʉlʉbhɨ huje, bhanʼtejeelezye.

Valgt i Øjeblikket:

Luuka 21: SBK

Markering

Del

Kopiér