Yoohani 1

Izwi lyahɨnza, lyahabha muntu

1Ʉwandilo ʉwa‑apelwe ɨvintu vyonti,#Bhaazya ʉWandilo 1:1. hwahali ni‑Izwi.#1:1 Izwi ɨpa litaawa ɨlyo ʉYoohani ahunʼnyanga Mwana wa Ngʉlʉbhɨ, ʉYeesu ʉKilisiti. Izwi ɨlyo lyahali peeka nʉ Ngʉlʉbhɨ. Nantele, Izwi ɨlyo ahali yʉ Ngʉlʉbhɨ. 2Afume hu wandilo, Izwi ʉyo ali peeka nʉ Ngʉlʉbhɨ.

3Ɨvintu vyonti vyahapeliilwe nʉ Ngʉlʉbhɨ ashilile Izwi ʉyo. Nantele nahamo ahantu nka heeka ha hahapeliilwe sinta ashilile hwa mwene. 4Izwi ʉyo ahali wandilo wɨ wʉʉmi. Ʉwʉʉmi ʉwo wuleeta ʉlukhozyo hwa bhantu bhonti. 5Ʉlukhozyo ʉlwo lukhozya hu hiisi, yope ɨhiisi ɨmeniilwe nʉ lukhozyo.

6ɄNgʉlʉbhɨ ahanʼsonteleziizye ʉmuntu ʉmo ʉyo itaawa lyakwe ahali yʉ Yoohani. 7Ʉmwene ahɨnzɨle abhe nʼsimishizi wɨ lukhozyo ʉlwo huje abhantu bhonti bhalole ʉlukhozyo na huje bhɨɨtɨshe. 8Leelo ʉmwene ʉYoohani saga ahali lukhozyo, lyoli ahɨnzɨle hubhabhʉʉzye abhantu ɨnongwa yɨ lukhozyo ʉlwo. 9Ʉlukhozyo ʉlwo lwahali lukhozyo lwɨ lyoli, ʉlwo lwahɨnzɨle mu nsi ɨnɨ hubhakhozezye abhantu bhonti.

10Izwi ahalɨɨho mu nsi ɨnɨ, yope ɨnsi yahapeliilwe hwi‑idala lyakwe. Leelo abhantu saga bhahamʼmɨɨnye. 11Ahɨnzɨle hwa bhantu bhaakwe, leelo abheene saga bhahamʼmwambɨlɨɨye. 12Leelo abhantu bhonti bha bhahamʼmwambɨlɨɨye na humʼmwɨtɨshe, ahabhabhɨɨshɨle abhe bhaana bha Ngʉlʉbhɨ. 13Abhe bhaana bha Ngʉlʉbhɨ ʉhwo, saga hwa‑apaapwe hwi‑idala ɨlya bhapaafi, awe hu nsʉngwo ɨzyɨ mʼbɨlɨ, awe hu kʉndwe wa muntu, leelo hu kʉndwe wa Ngʉlʉbhɨ yʉʉyo.

14Ɨshi, Izwi ʉyo ahabha muntu, wope ahɨnza, ahakhala peeka naatɨ. Atɨ tahawulola ʉmwamu waakwe, ʉmwamu wa wulolesya aje yʉ Mwana wa‑ali mwene ʉyo afumile hwa Daada ʉNgʉlʉbhɨ. Nantele ʉyo ali nɨ mpyana tee nɨ lyoli yonti. 15ɄYoohani ʉMwozi ahabhasimishizya abhantu ɨnongwa ɨzya muntu ʉyo, ahayanga hwi‑izwi igoosi ahaga, “Ʉnʉ ya yʉʉyo nahali ɨhubhabhʉʉzya huje, ‘Ahayɨnza ʉmuntu ʉmo hwisinda lyanɨ, ʉyo yʉ nʼgoosi hunshile anɨ, pɨpo ʉmwene ahalɨɨho hu habhaazyo anɨ lwɨ‑ɨnsɨɨle apaapwe.’ ”

16Afumilane nʉ lʉnjɨsu waakwe, ʉNgʉlʉbhɨ atonjezɨɨzye hutisaye ɨnsayo ɨnyinji tee. 17Ɨnjanjile ɨsho hu nongwa ya huje ʉNgʉlʉbhɨ ahafumiizye ɨndajizyo zyakwe ashilile hwa Moose.#1:17 Moose Bhaazya izwi Moose hu Ngalulanyo ɨyɨ Mazwi aMajenu hu malishilo wɨ shitaabu ɨshi. Leelo hu habhaazyo ɨha, alolesiizye ɨmpyana nɨ lyoli yaakwe hwi‑idala ɨlya Yeesu ʉKilisiti.#1:17 ɄKilisiti hwa huje ʉmuntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. 18Nʉʉmo ʉmuntu wowonti ʉyo alɨnjɨle hunʼnole ʉNgʉlʉbhɨ, leelo yʉ Mwana waakwe mwene, ʉyo wope ya‑ali yʉ Ngʉlʉbhɨ. Nantele ʉmwene ali peeka nʉ Ngʉlʉbhɨ ʉDaada. ɄMwana ʉyo ya yʉʉyo atiluliiye ʉNgʉlʉbhɨ.

Ʉsimishizi wa Yoohani ʉMwozi

(Mataayo 3:1-12; Maalʉko 1:1-8; Luuka 3:1-18)

19Isiku limo abhalongozi bha Bhayahuudi bhahabhasonteleziizye abhasayi bha Ngʉlʉbhɨ#1:19 abhasayi bha Ngʉlʉbhɨ Bhaazya izwi Bhasayi bha Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. na Bhalaawi afume hwi‑ibooma ɨlyɨ Yelusaleemu#1:19 Yelusaleemu Bhaazya izwi Yelusaleemu hu Ngalulanyo ɨyɨ Mazwi aMajenu hu malishilo wɨ shitaabu ɨshi. humʼmʉzɨɨlɨzye ʉYoohani huje, “Aawe we naanu?” 20Ʉmwene ahabhaamula sinta afise ɨlyoli, ahaga, “Anɨ saga ɨndi Mʼfyʉli.”#1:20 Mʼfyʉli Mu njango ɨyɨ Shiyunaani ɨsimbwilwe huje, Kilisiti, mu njango ɨyɨ Shiebulaniya bhayiga, Meesiya. ABhayahuudi bhahaliyangaga itaawa lya Meesiya huje, muntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. 21Bhope bhahamʼmʉzɨɨlɨzya bhahaga, “Ɨshi aawe we naanu? Wɨlɨ, aawe we nʼkuwi ʉEliya?” ɄYoohani ahabhaamula ahaga, “Ndaadi, anɨ saga nɨ Eliya.” Abheene bhahamʼmʉzɨɨlɨzya nantele bhahaga, “Wɨlɨ, aawe we nʼkuwi ʉwɨnjɨ, ʉyo tihunʼgʉʉlɨla huje ahwɨnza afume hwa Ngʉlʉbhɨ?”#Bhaazya ɨNyiizuho 18:15-22. ɄYoohani ahabhaamula ahaga, “Ndaadi.” 22Bhahamʼmʉzɨɨlɨzya nantele bhahaga, “Ɨshi tibhʉʉzye, aawe we naanu huje tibhale tibhabhʉʉzye bhaala bha bhatisonteleziizye. Aawe ʉhwiyanga huje we naanu?” 23ɄYoohani ahabhaamula alɨngaane na mazwi ga gasimbwilwe mu shitaabu sha nʼkuwi wa Ngʉlʉbhɨ#1:23 Ʉnʼkuwi wa Ngʉlʉbhɨ hwa huje ʉmuntu ʉyo ahubhabhʉʉzya abhantu ɨnongwa zya zifuma hwa Ngʉlʉbhɨ. ʉYesaaya ahaga,

“Ʉmʼmomvi ʉnʉ ya yʉʉla ahayilʉmbɨlɨlaga mu lʉʉgwa huje,

‘Lilɨnganyaaji idala lya Mwɨnɨ,#Bhaazya Yesaaya 40:3.

mugolosyaje idala lyakwe.’ ”

24Ɨpo abhantu bhaala bha bhahasonteleziiwe na Bhafalisaayo#1:24 Bhafalisaayo Bhaazya izwi Bhafalisaayo hu Ngalulanyo ɨyɨ Mazwi aMajenu hu malishilo wɨ shitaabu ɨshi. huje bhabhale hwa Yoohani, 25bhahamʼmʉzɨɨlɨzya bhahaga, “Aawe nkashele saga we Mʼfyʉli, awe saga we nʼkuwi ʉEliya, nantele saga ya yʉʉla ʉnʼkuwi ʉwɨnjɨ wa tihunʼgʉʉlɨla afume hwa Ngʉlʉbhɨ, ɨshi yeenu ʉhubhoozya abhantu?” 26ɄYoohani ahabhaamula ahaga, “Anɨ ɨhubhoozya na mɨnzɨ, leelo paahati yeenyu huli ʉmuntu ʉyo amwɨ saga mumʼmɨɨnye. 27Ʉyo ya yʉʉyo ahwɨnza hwisinda lyanɨ. Anɨ saga ɨhondɨɨye abhe nʼkalwe waakwe huje ɨngaawula ɨnkusa zyɨ ndaatʉ zyakwe.”#1:27 ɨngaawula ɨnkusa zyɨ ndaatʉ zyakwe Nkashele ʉnʼjenu atʉʉha mu nyumba, ʉnʼkalwe ahamʼmwawulaga ɨndaatʉ na humʼmwozye amanama gaakwe. Ɨmbombo ɨyo yahali ya nʼkalwe ʉwa pa nsi tee. 28Ɨgo gonti gahabhombɨɨshe hwi‑ibooma ɨlyɨ Besaniya, hwi‑isyɨla ɨli‑isooho ɨlyɨ Yolodaani, ʉhwo ʉYoohani ahali ahubhoozya abhantu.

ɄYeesu Mwana Ngoole wa Ngʉlʉbhɨ

29Ɨndaabhɨ yaakwe, ʉYoohani ahanʼnola ʉYeesu ahwɨnza hwa mwene. Ahabhabhʉʉzya abhantu ɨbho bhahali paala huje, “Enya, ʉyo wa‑ahwɨnza yʉ Mwana Ngoole#1:29 Mwana Ngoole Bhaazya izwi Nyaana ngoole hu Ngalulanyo ɨyɨ Mazwi aMajenu hu malishilo wɨ shitaabu ɨshi. wa Ngʉlʉbhɨ, ʉyo ahwefwa ɨmbiibhi zya bhantu bhonti!#Bhaazya Afume 12:21-28. 30Ʉnʉ ya yʉʉyo nahali ɨhubhabhʉʉzya huje, ‘Ahayɨnza ʉmuntu ʉmo hwisinda lyanɨ ʉyo yʉ nʼgoosi hunshile anɨ, pɨpo ʉmwene ahalɨɨho hu habhaazyo anɨ lwɨ‑ɨnsɨɨle apaapwe.’ 31Nanɨ saga nahamʼmɨɨnye huje yʉ naanu, lyoli nahɨnzɨle hubhoozye abhantu na mɨnzɨ huje abhantu abha hu nsi ɨyɨ Izilaeeli bhamʼmanye.” 32Ɨpo ʉYoohani ahafumya ʉsimishizi nantele ahaga, “Nahanʼnolile ʉMʼpepo wa Ngʉlʉbhɨ lwa‑ahumʼmwishila pa mwanya yaakwe afume hu mwanya nanshi ɨnkʉnda na‑asyale peeka nawo. 33Hwope ɨsho anɨ saga nahamʼmɨɨnye huje yʉ naanu, leelo ʉNgʉlʉbhɨ ya‑ahansonteleziizye ahwozye abhantu na mɨnzɨ ahambʉzɨɨzye huje, ‘Ʉmuntu ʉyo wanʼnola ʉMʼpepo waanɨ amʼmwishiiye pa mwanya yaakwe, ʉyo ya yʉʉyo ahayibha ahubhoozya abhantu hwi‑idala ɨlya Mʼpepo ʉMʼfinjile.’ ”#1:33 ahayibha ahubhoozya abhantu hwi‑idala ɨlya Mʼpepo ʉMʼfinjile Amazwi ɨga hwa huje ɨsho ʉNgʉlʉbhɨ ahubhasaya abhantu bhaakwe ɨbho bhalamba ɨmbiibhi zyabho. ɄNgʉlʉbhɨ ahunʼsonteelezya ʉMʼpepo ʉMʼfinjile huje abhanje akhala na bhantu bhaakwe. Bhaazya izwi Mʼpepo ʉMʼfinjile hu Ngalulanyo ɨyɨ Mazwi aMajenu hu malishilo wɨ shitaabu ɨshi. 34Ɨpo ʉYoohani ahaga, “Nanɨ ɨngalolile ɨgo gonti, nantele ɨsimishizya huje ʉyo yʉ Mwana wa Ngʉlʉbhɨ.”#1:34 Mwana wa Ngʉlʉbhɨ Bhaazya izwi Mwana wa Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi.

ɄYeesu ahubhasalula abhasundwe bhaakwe abha hwande

35Ɨndaabhɨ yaakwe, ʉYoohani ʉMwozi ahabha paala nantele peeka na bhasundwe bhabhɨɨlɨ mu bhasundwe bhaakwe. 36Ɨshi ʉYoohani lwa wanʼnola ʉYeesu ashila pa pɨɨpɨ na bheene, ahaga, “Enya, ʉyo wa‑ali Mwana Ngoole wa Ngʉlʉbhɨ.” 37Abhasundwe bha Yoohani bhaala bhabhɨɨlɨ lwa bhʉmvwa amazwi ɨgo, bhahaamula humʼmɨnjɨɨlɨle ʉYeesu. 38Ɨpo ʉYeesu ahagaluha hwisinda, ahabhalola abhasundwe bhaala bhahumʼmɨnjɨɨlɨla. Ahabhabhʉzɨɨlɨzya ahaga, “Wɨlɨ, muhwanza yeenu?” Bhope bhahamʼmwamula bhahaga, “Wee Mʼmanyizyi, ʉkhala hwi?” 39ɄYeesu ahabhaamula ahaga, “Ɨnzaji, namwɨ munza hupalole pɨ‑ɨkhala.” Ɨpo bhahamʼmɨnjɨɨlɨla na‑akhale peeka nawo. Mu saala ɨyi‑ishʉmi ɨya lyabheela, bhahafiha ɨpo ahali akhala, bhahalɨnda nawo isiku liila. 40ɄAnduleeya ʉmwanakwabho ʉSiimoni Peeteli, ahali ʉmo mwa bhaala bhabhɨɨlɨ bha bhahʉmvwɨzye amazwi ga Yoohani na humʼmɨnjɨɨlɨle ʉYeesu. 41ɄAnduleeya ahabhala nasʉʉti humʼmwanze ʉmwanakwabho ʉSiimoni Peeteli. Lwa wamʼmwaga, ahamʼmʉʉzya ahaga, “Tinʼnolile ʉMeesiya!” Itaawa ɨli hwa huje Kilisiti ʉyo Mʼfyʉli. 42Ɨpo ʉAnduleeya ahɨnza nʉ Siimoni hwa Yeesu. Wope ʉYeesu ahamʼmwenya ʉSiimoni, ahamʼmʉʉzya ahaga, “Aawe we Siimoni ʉmwana wa Yoohani. Afume ɨshi, itaawa lyaho lɨnza‑abhe we Keefa.” Itaawa ɨli hwa huje ʉPeeteli ʉyo Lyalawe.

ɄYeesu ahunʼsalula ʉFilipo nʉ Nasanaeeli

43Isiku ɨlyɨ ndaabhɨ yaakwe, ʉYeesu ahaamula abhale hu mukowa ʉgwɨ Galilaaya.#1:43 Galilaaya Bhaazya izwi Galilaaya hu Ngalulanyo ɨyɨ Mazwi aMajenu hu malishilo wɨ shitaabu ɨshi. Ɨpo ahamʼmwaga ʉFilipo, ahamʼmʉʉzya ahaga, “Ɨnzaga ʉmbɨnjɨlɨzyaje.” 44ɄFilipo ahali nʼkhaaya wa hwi‑ibooma ɨlyɨ Betisayida, ibooma lya bhahakhalaga ʉAnduleeya nʉ Peeteli. 45Ɨpo ʉFilipo ahamʼmwaga ʉNasanaeeli, ahamʼmʉʉzya ahaga, “Tinʼnolile ʉmuntu ʉla, ʉyo ʉMoose ahasimbile ɨnongwa zyakwe mu Shitaabu ɨshɨ Ndajizyo, nantele ʉyo abhakuwi bha Ngʉlʉbhɨ bhahayanjile ɨnongwa zyakwe. Itaawa lyakwe yʉ Yeesu, ʉyo afuma hwi‑ibooma ɨlyɨ Nazaleeti, ʉmwana wa Yoosefu.” 46Leelo ʉNasanaeeli ahamʼmʉzɨɨlɨzya ʉFilipo ahaga, “Hantu wɨlɨ ahinza ɨho habhajiiye afume hwi‑ibooma idoodo ɨlyɨ Nazaleeti?” Ɨpo ʉFilipo ahamʼmwamula ahaga, “Ɨnza, ʉhwilolele weewe.” 47ɄYeesu lwa wanʼnola ʉNasanaeeli ahwɨnza hwa mwene ahaga, “Enya, ʉmuntu ʉyo Mwizilaeeli wɨ lyoli, saga nʼgobezi.” 48ɄNasanaeeli ahamʼmʉzɨɨlɨzya ʉYeesu ahaga, “Wee Mwɨnɨ, ʉmɨɨnye wɨlɨ anɨ?” ɄYeesu ahamʼmwamula ahaga, “Hwope shʉ‑ʉsɨɨle akwiziwe nʉ Filipo, nahaʼlolile hu habhaazyo lwʉ‑ʉli pa nsi yi‑ikʉ.” 49Ɨpo ʉNasanaeeli ahamʼmwamula ahaga, “Wee Mʼmanyizyi, ɨshi naamanya huje aawe ʉli Mwana wa Ngʉlʉbhɨ, nantele ʉli Mwɨnɨ wɨ nsi ɨyɨ Izilaeeli!”#Bhaazya 2 Samweli 7:12-16. 50ɄYeesu ahamʼmwamula ahaga, “Wɨlɨ, ʉhwɨtɨha pɨpo ɨʼbhʉzɨɨzye huje nahaʼlolile hu habhaazyo lwa wahali ʉkhɨɨye pa nsi yi‑ikʉ? Ʉnza hugalole aganjɨ amagoosi tee ashile ɨga!” 51ɄYeesu ahajendeelela ayanje ahaga, “Lyoli ɨhubhabhʉʉzya huje, ahabhaazyo hahayɨnza ɨho mwahayilola ɨmwanya nyiigule, abhantumi#1:51 abhantumi Bhaazya izwi Bhantumi hu Ngalulanyo ɨyɨ Mazwi aMajenu hu malishilo wɨ shitaabu ɨshi. bha Ngʉlʉbhɨ bhahayibha bhazʉbha na hwishe hwi‑idala lyanɨ anɨ nɨMwana wa Muntu!”#1:51 nɨMwana wa Muntu Ɨli litaawa lya Yeesu ɨlyɨ mfiso. Bhaazya izwi Mwana wa Muntu hu Ngalulanyo ɨyɨ Mazwi aMajenu hu malishilo wɨ shitaabu ɨshi.

Valgt i Øjeblikket:

Yoohani 1: SBK

Markering

Del

Kopiér