Johanes 1
1
Jesu, aga nongen ad Jehova.
1Nandugian, nandugian nongen ge i do da. Nongen ogo i da baghege ndro Jehova. Jehova, aga nongen ogo. 2Nandugian nongen ogo i da ndro Jehova. 3I gin mengseni longu masigane gle nongen ogo, heb longu i do da ri bugane, i de gin hinen i bui. 4Nongen ogo i mamaren, gle ndoui aden, aga sul asu ndramed ber boan. 5Sul ogo ber lang i da hinganen le gor ndrogmoan. Gor ndrogmoan de gin somui leri bui.
6Jehova gin rendegien hom gamel i gin me, ngarn aden Johanes. 7I ogo, i gin me, beg boharni le ad sul ber lang. Su masigane su gboro ndoui gle sul. 8Johanes, aga sul ber lang bui, i beg boharni le ad sul. 9Sul ndangen ber lang, i da beg hinganen le ndro su ndramed masigane, le ndro homo ma homo, i gin meher le boan malabo. 10I do da le boan nandugian lie i gin mengseni gor masigane ber boan, gor masi de dansu le aden bui. 11I gin meher le gor aden, su loun aden de gin somui le aden bui, gin hangaini i. 12Su masi ge, su da gin somui le aden i gin hengen le ndro su, su gbosoui su mbunana ad Jehova. Aga su ge, su da gin boro ndoui le ngarn aden. 13Su mbunana ad Jehova, hom gamel de gin ilgi su bui, su de gin meher molhe bugane, Jehova ge i gin ilgi su.
14Nongen ogo gin me le boan le gor adu i gin ibdi sengen asu ndramed. Iou gin ilndri engerang aden, engerang ad Ndur Jehova, i da homo ge, dege Damen gin hengen i, engerang le golnisden ad Jehova ndangen. 15Johanes gin boharni le aden i vong i boi: I ogo, ber nandugian, io gin boi le aden: Homo i da gmeher muren i hanu me ordo i ber nandugian, io ge, io muren. 16Memrad aden i bulhege iou gin hedi gle memrad ogo bersi, ma bersilie le golnisden aden. 17Mose gin hengen le ndro su nongen ad Jehova ber goru, Jesu, aga Mesias, i gin daui le ndro du golnisden aden ndangen ge. 18Hom ndramed ber boan i de gin ilndri Jehova bersi bugane, Ndurn, homo ge, i da le berlalen ad Damen, i ge, i gin boharni me ndro du longu le ad Jehova.
Nongen ad Johanes le ad Jesu.
19Aga nongen ad Johanes, i da gin bosoui le ndro su Juda ber Jerusalem, be su gin rendegien su ndramed dohor ma su ndur Levi le ndro i, su endemani Johanes, i sie? 20Johanes i boharni le ndro su monen ge, i vong, i boi: Io de Kristo bui. 21Su ndemani i muren: Uo sie? Uo Elias? I bode: Io bui. Su ndemani i: Uo Provet manden i da beg meher? I bodeie: Bugane! 22Su ndemani i: Uo sie? Iou gbosoui sa le ndro su ndorlaben adu, su gin rendegien du le ndro uo? Uo ge uo hanguruen sa uo sie? 23I bodeie: Io ngasen ad homo i da loholo le marboga, i bai: Ghinen sal ad Ndorlaben gmonen, dege Provet Jesaia gin bai. 24Su da gin meher ndro i su Pharisi. 25Su ndemani Johanes malabo: Desa uo surhi su, ar uo Mesias bui, de Elias, de Provet bugane? 26Johanes i vong le ndro su, i bodeie: Io surhi su ge le ndran, homo ge i da le dogromu de danmu le aden bui. 27I da beg meher muren, io de vonei bui, io dari sumianegen giao. 28Aga gin meher le gor Betanien, i da le ndran Jordan horo, aga logna ad Johanes i da gin surhi su.
29Bing si muren, Johanes ilndri Jesu le sal, i me dala. Malabo i vong, i bai: E lele, aga Ndurmeh ad Jehova, i da sab longu momen ber gor masi. 30Aga i ge, io da gin bosoui le aden: Homo i gmeher muren, i da hanu me ordo. Ndangen i homo ber goru, io ge, io muren. 31Hanu io de dono i bui, Jehova i beg boharni le aden le ndro su Israel, le longu ogo io gin me, io da surhi su gle ndran. 32Boen Johanes i boharni lie i boi: Io gin ilndri Meluan, i da gin voh le belengan dege bal si, i la ndro i, i giroh. 33Hanu io de dono i bui, i ge, i da gin rendegien io le surhi su gle ndran, i gin bai me ndro io: Be uo ilndri Meluan i da voh, i la ndro homo i roh, i ge, i da surhi su gle Meluan Helian. 34Io ge, io gin ilndri i, io gin boharni: Aga Ndur Jehova.
Jesu ma su lao aden malimou.
35Si muren, Johanes i da lie ma sor lao aden marmou. 36Begmarn gle ndro Jesu, i da gin irgai, gin me. I vong, i boi: E lele, aga Ndurmeh ad Jehova. 37Sor lao aden marmou be sor hirong nongen ad Johanes, sor ndrbon Jesu. 38Jesu i belueni bormarn le ndrbon, i ilndri sor marmou, sor da muren. I ndemani sor: Mor gahi sa? Su bodeie: Rabi, aga i vonei Ndorlaben, um adem i da oho? 39I bodeie: Am ndro io, io gobsilieni i ndro mor. Sor la ndro i, sor ilndri um aden, sor dandon le rang ogo le ibia. 40Andreas, ndern ad Simon Petrus, i homo asoro, i da gin hirong nongen ad Johanes, i ndrbon Jesu. 41I gin ilndri ndern Simon, i vong le ndro i, i boi: Iou gin danoni Mesias, aga Kristo. 42I dulieni i le ndro Jesu, be i gin ilndri i, i vong i boi: Uo Simon, ndur Johanes, io bosoui garm Kevas, aga i vonei bad.
43Si muren, Jesu beg dogi le gor Galilea, i ilndri Philipus, i vong le ndro i, i bai: Or ndrbo. 44Philipus i homo ber Betsaida, aga gor ad Andreas sor Petrus. 45Philipus ilndri Natanael, i bai le ndro i: Iou gin danoni i ge, Mose gin hondre le aden, dagara su Provet, Jesu, Ndur Josev ber Nasaret. 46Natanael i bode: Sehe longu hian i gmeher le gor Nasaret? Philipus i bodeie: Am ogo, e lele i! 47Be Jesu gin ilndri Natanael, i da sohal sal le ndro i, i vong le aden, i boi: E lele, aga homo asu Israel monen ge, bergoln de hanguruen momen bui. 48Natanael i ndemani i, uo danem io derbe? Jesu i bodeie: Philipus de gin loh uo masou, io gin ilndri uo behendra gei vovei. 49Natanael i vong le ndro i, i boi: Ndorlaben, Uo Ndur Jehova, uo King asu Israel. 50Jesu i vong le ndro i: Uo danem boro i malabo be io da gin boi, io gin ilndri uo le behendra gei vovei, uo gelndri longu manden hanu gle longu ogo. 51Boen i boi lie: Ndangen, ndangen io boi le ndro mu: Malabo mu gilndri gor lundielang i deh, uomu ilndri su Angelo ad Jehova, su la belengan, su la boan.
Valgt i Øjeblikket:
Johanes 1: LLENT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Published by the British and Foreign Bible Society 1956
