Jenesis 7
7
O baro bursin
1Mapalal o Del phenda e Noeeke:
Nak tu ta cho porodo ande llimia, soke tut dikhlem chacho angla ma ande gaia vicha gale vremeki. 2Ta katar suako zivirinie kai si chiste, ka le efta zivirinie diskinie ta efta zivirinie murus, a katar suako zivirinie kai inai chiste, ka le samo iek zivirinia diskinia ta iek zivirinia murus. 3Ta i katar e chiriklia e milosoke, efta zivirinie murus ta efta zivirinie diskinie, te sai aven katar suako chirikli pe phuv. 4Soke pala efta llive ios me ka cherav te avel iek bursin pe phuv saranda llive ta saranda racha. Ta ka zatriv sa so cherdem kai si le zivoto pe phuv. 5Ta o Noe cherda sa so o Del phendaia leke te cherel.
6E Noeeke sea sov stotine burs kana avilo o baro pai ta ucharda e phuv. 7Ta dia o Noe ande bari llimia pe chaurrenchar, pe rromiaia, ta pe borienchar, te na tason ando pai.#Mt 24.38-39; Lk 17.27. 8Katar e zivirinie chiste ta katar gola kai inai chiste, ta katar gola kai furian, ta katar gola kai terrinpe, pe phuv, 9die e Noeea ande bari llimia dui po dui zivirinie, zivirinie diskinie ta zivirinie murus, gia sar o Del phendaia leke te cherel.
10Pala e efta llive avile e bare paia, ta thode te ucharen e phuv. 11Kana saia e Noeeke sov stotine burs ando duito chon katar o llive desefta, thode te liken e paia kai si telal katar e phuv, ta phutardile ando miloso e bare paia.#2 P 3.6. 12Ta diapeke pe phuv saranda llive ta saranda racha. 13Ta isto ande gua llive dia ande bari llimia o Noe, ta leke chaurre, o Sem, o Kam ta o Jafet, ta leki rromi e Noeeki, ta leke trin boria. 14Ta lenchar die ande bari llimia katar suako zivirinia, gola kai si dive ta gola kai inai dive, ta i gola kai terrinpe pe phuv ta i katar e chiriklia. 15Sa e zivirinie die e Noeea andre ande bari llimia, dui po dui. 16E zivirinie kai avile ta kai die sea katar suako zivirinia, zivirinie murus ta zivirinie diskinie, gia sar o Del phendaia e Noeeke, ta mapalal o Del phangla o udar katar e bari llimia.
17Ta avile e bare paia pe phuv saranda llive, ta kana barile e paia, e bari llimia vazdinaili katar e phuv upral po pai. 18Ta e paia sa mai but bariona, a e bari llimia achela upral pe gola bare paia. 19Ta pe gachin barile e paia kai ucharde e mai bare burdura e phuviake. 20Ta barile e paia efta pole mai upre katar e mai bare burdura. 21Ta gia mule sa e manusa kai zivina pe phuv, ta isto gia mule e chiriklia, e zivirinie kai inai dive, ta e zivirinie kai si dive, ta i gola kai terrinpe pe phuv. 22Gia mula sa so saia le zivoto pe phuv. 23Samo o Noe ta gola kai sea ande bari llimia achile llunde. A sa ogola mule, e manusa, e zivirinie kai inai dive, e chiriklia e milosoke, ta e zivirinie kai terrinpe. 24Ta achile e paia upral pe phuv stotina ta pinta llivesa.
Valgt i Øjeblikket:
Jenesis 7: BACHRO
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia ande chib Romani © Sociedad Bíblica Chilena, 2018.