Lukâs 8
8
Iyəŋi yə ghu kə fây nəniy Yesù
1Anə sòŋə fə̀ liy fiy, Yesù ə bwìy tsìy yə̀ anə tə nàʼà tə̀ sə̂ tìy nə̀ nàʼà tə̀ nê tìy, nìʼà tsìy yə̀ ntwùm ì dzòŋə̀ yìy kwùmə̀ yə̀ nə̀ àyiə yə Zə̀kìy saʼa nəniy aghee we yiy ate. Ù kə zè dzəŋə nə̀ tsə̀təndii tə we tə ìvəm nə̀ ghe tiy ibè, 2nə̀ iyəŋi àliy yiy ù kə dzwûm fyi nəniy nsìy mə̀bɛbə̀ mìy azoŋə̀ ghu, zəŋi taw kə sòʼò àliy yiy ghu kə dzaŋə̀. Ghu kə tyoŋə ìzəd i ùlìy wìy nə̀ à də̌ Mə̀li, ù kə ŋwô bə̂ anə inaʼ i Magdalà, Yesù kə dzwûm fyi nəniy nsìy mə̀bɛbə̀ mìy ìnsèmbe a zoŋə̀ we, 3nə̀ Dzùwanà, wìy Kuzà wə̀ ù kə də nəniy wù ùnè wìy a ndàw Helòd tè ghu kə saʼa nəniy ayiə yiy ate, nə̀ Sùzanà nə̀ ndə̀mə̀ iyəŋi àliy yiy. Iyəŋi yə̀ kə fìì tsə̀ Yesù nə̀ tsə̀təndii tə we tiy nə̀ ufyiə u ghu wiy.
Zə̀zə̌ fə wù ùswum wə ù kə təm ndzòʼ tìy
(Matìyò 13.1-9; Mâk 4.1-9)
4Ŋwàâ kə ghù kə̀ kə kə ŋwô bə̂ nəniy anə ndə̀mə̀ tə̀ nàʼà, kə lwe dzɛ̀mì na tsìy yə̀ Yesù.
Yesù ə dzày tsə zə̀zə̌ fə â ghu nə̀, 5“Ghà zuw! Wù ùswum ùlìy wìy kə zù ani zuu təndzòʼ anə uswum. Abù ù təmə yə̂ nəniy ndzòʼ tə̀, tə̀liy tiy tswaʼi dòʼò yə̀ anə dzəd, aghee bù təmi tsìy ate, ŋwùni bù tsuw fwu ŋwò kə. 6Ndzòʼ tə̀liy tiy tswaʼi yə̀ anə lòʼo tə una, tə də bày kwu way zuub tiy. Tə zə̀àŋì fyi kə, dzə̀ dòʼò tsə ghi pfə ŋwò nyi tswi tsə, aŋwòə zuub tə ghè tə̀ kə bày kwu way mwi. 7Ndzòʼ tə̀liy tiy tswaʼi yə̀ anə loʼo kə təfàb, abù tə fyi kə, fàb tə̌ nɛmə fyàŋì na tsə ndzòʼ tə ghè tə̀, tə də kə̀ nɛmə dzwâb. 8Ndzòʼ tə̀liy tiy tswaʼi yə̀ anə zùb tə̀ dzoŋə̀ tìy. Tə fyi kə, nɛmə kə, boŋ kə. Tə̀liy tiy boŋ kə təsam fəbwaam.”
Yesù ə dzày kəd tsə a ghu nə “Wù wə̀ ù kwu nəniy utswuŋi wiy, u zuw ayiə yə mə dzây.”
Yesù kə tyi dè ayiə anə mə zə̀zə̌ iyîkìə̀?
(Matìyò 13.10-17; Mâk 4.10-12)
9Tsə̀təndii tə Yesù tìy ə bəb yə̀ â Yesù a we nə̀ zə̀zə̌ fə̀ myìŋə̀ nə̀ìndiə. 10Yesù ə bə̀lì kə a ghu nə, “Zə̀kìy mə zəŋi nə̀ ghà kəli nù tə ayiə yə tə də nəniy anə yiə yə Zə̀kìy saʼa nəniy ate. Aghê liy yə̀ kwunə màŋə̀ zuw təŋə kə anə mə zə̀zə̌, tə̀ i ki fyi kpe tsə anə yiə yə ghu kə twâ naa anə ŋwàʼà k-a-zə̀ nə̀, ‘Ghu ki fwələ ghu də kòʼò wày, zwulə, zuw kyilə way.’ ”
Yesù ə tyi dzày yə̀ ìmyìŋi zə̀zə̌ fə
(Matìyò 13.18-23; Mâk 4.13-20)
11Zə̀zə̌ fə̀ myìŋə̀ nə̀, ndzòʼ tə̀ də̌ ntwùm ə̀ Kə̀zə̀. 12Ndzòʼ tə̀ tə kə tswaʼi anə dzəd tə də aghû yə̀ ghu kə zuw nəniy ntwùm ə̀ Kə̀zə̀, Satàn ə bù nìy ŋwò fyi kə ntwùm ìghè yə̀ anə fòŋ tə ghu anə yiə yə ghu də wày ani bɛmə tə̀ Zə̀kìy bii fyi ghu. 13Ndzòʼ tə̀ tə kə tswaʼi anə una, à də̀ aghû yə̀ ghu zuw tsə nəniy ntwùm ə̀ Kə̀zə̀ ghu bɛmə nə̀ dwiʼi kiy, ntwùm ìghè yə̀ ə kə̀ kwuni nəway muə̀ tə ghu tiy. Ghu byemə kə kə anə kə̀mə̀ fə fəsòŋə. Aŋwòə ibɛmə i ghu yiy bày taw way. Abù imwâmkòʼ yìy bû nəniy ghu bvə̀ səə yə̀ anə ibɛmə ighu 14Ndzòʼ tə̀ liy tə tə kə tswaʼi yə̂ anə lòʼo kə təfàb, tə də aghû yə̀ ghu zuw nəniy ntwùm ə̀ Kə̀zə̀, Ayiə ə mbyi, nə̀, niyoŋi kə ukhiy kiy, nə̀ ighaa yiy ani kəli tsə ndə̀mə̀ ndə̀mə̀ tə ufyiə, à də̀ ufyiə wə u kwuni fyaŋə̀ nia nəniy fôŋ tə ghu tiy, tə də kə̀ mu nəway utam wiy. 15Ndzòʼ tə̀ liy tə tə kə tswaʼi yə̂ anə zùb tə̀ dzoŋə̀ tìy, tə də yəə à də̀ aghû yə̀ ghu maʼà tsə nəniy iwee yiy ani zuw ntwùm ə̀ Kə̀zə̀, na tsə muə̀ fôŋ tə ghu anə dzə̀d ìdzòŋə̀ yìy ani zuw yə̀ awò ntwumə̀ ì ghè yə̀, ghu təmi dòʼò taw tse ate ani kòʼ tsə nə̀ ghu mu kə utam.
Abu ghu dà tsə nəniy kaʼì tìy, ghu gaʼ na kə idoŋə
(Mâk 4.21-25)
16“Wù lìy dà tsə dzə̀ wày kaʼì tìy u na nyi yə̀ a təŋə kəkaŋ moo a təŋə kày. Ghu kyê nia kə idoŋ aghê kòʼò àsə ate.
17Fyiə kə kə nû doʼò nəniy ghu kî nìy fyiə bə̀ ŋwò nə̀ndaa, fyiə kə kə kəəd doʼò, ghu kî fwukə myìʼà kə ŋwò.
18Ghà nîy tsə iyemì anə yiə yə ghà zuw nəniy, aŋwòə wù wə̀ ù kwu nəniy nyoŋə fiy, ghu ki nyə̀ fwuli yə̂ we nə̀ ndə̀mə̀ ùfyiə wiy. Wù wə̀ ù də kwu way fyiə kə̀ liy kiy, ghu ki nîy ŋwô mâ kə nyoŋə fə ù kwu nəniy.”
Zə̂ Yesù nə̀ awi zə̂ ə Yesù yìy
(Matìyò 12.46-50; Mâk 3.31-35)
19Zə̂ Yesù nə̀ àwizə ə Yesù yìy ə bù ani bù kòʼ Yesù, ghu də̀mə̀ kè ani kòʼ we nə̀ ŋwàâ kìy mə fè na ghu. 20Wù lìy wǐy dzày yə̀ a we nə̀, “Zə̂ yiə̀ nə̀ awizə̂ yiə̀ yìy də a bee ghu liə ani kòʼ wò.”
21U kwuni dzày yə̀ a ghu nə̀, “Zə̂ wam nə̀ àwizə̂ yamə də aghû yə̀ ghu zuw nəniy ayiə Kəzə̀ yìy, fàʼà kyoŋə yə̀ sòʼò àyiə Kəzə̀.”
Yesù kə bwi na tsə zoŋ
(Matìyò 8.23-27; Mâk 4.35-41)
22Abù kə tsuk fə̀liy fiy, Yesù ə dzày yə̀ awò tsə̀təndii tə we tiy nə̀, “Ŋgà dâŋ fiy a bə̀d kə iŋwù kə̀ liy kə.” Ghu ə nyi kə an-a-mfə̀n ŋwò yə̀ nə̀ ìdàŋ yìy. 23Anə yiə yə ghu bâŋə̀ zê nəniy mfə̀n kìy, Yesù ə kaʼ yə̀ ani bwuni. Zoŋ ə kaʼ tsə ani tsìy anə iŋwù, mwi kaʼ ani nyi kwoʼ an-a-mfə̀n. 24Tsə̀təndii tə we tiy zù zɛ̀m kə we nə̀, “A Mwe, A Mwe, ghè kî pfə kə ŋwò!” Yesù ə zɛ̀mə̀ kə̀ kwà yə̀ zoŋə nə̀ mbuw kə dzwî kə̀, zoŋ yə nə̀ mbuw kə dzwî kə̀ dyaŋi bwi dòʼò yə̀.
Loʼo tiy ŋwò dòʼò tsə moŋ. 25U bəb yə̀ a ghu nə̀, “Ibɛmə ghi yiy də yiə?”
Adzwə zwum ghu, ghu dzìy ani iwè nə̀, “À yù də ndiə? Zoŋ zuw dyaŋə lâŋ kə we kiy nə̀ mbuw kə dzwî kìy ə?”
Yesù ə zəŋi taw kə wù lìy wìy ù kə kwu nəniy usîy ùbɛbə wiy
(Matìyò 8.28-34; Mâk 5.1-20)
26Ghu nìy kə kəmfə̀n bù kwùm tsə a mbwòʼ ə̀ Gèlasà, dòʼò dàŋ fyi yə̀ a ŋgwùŋə̀ ìŋwù i Galìlî.#8.26 Uŋwàʼà ù liy wiy kwu nə à də̀ Gèlasà ùliy wiy kwu nə à də Gàdalà 27Abù Yesù dyaŋi fyi tsə nəniy an-a-mfə̀n, wù lìy wìy ə zù bù akə̀lə̀ we nə̀ ù mùə̀ awote anə inaʼ ighè yə̀, nə̀ nsìy mə̀bɛbə̀ mìy də azoŋə̀ we. A də̌ nə̀ wù ghè wə̀ mə mùə̀ anə ndaŋ k-a-ghab nə̀ ù dzə̀ŋə̀ wày ndzwu tiy, bòʼò dyòʼò sòʼò wày a ndaw. Mùə̀ təŋ kə anə adzwə təsày. 28Yəə ù kòʼ tsə nəniy Yesù, u kee fyi bə̀ kə̀bòŋ, bù nyaʼa tswi tsə a təŋə̀ Yesù, ŋwò bwoʼ fyi kə kəbôŋ idoŋ nə̀, “A Yesù, Wà Zə̀ kə̀ kə tsî fyi ufyiə udzə̀m, mə kwu iyiə ì ghaa yiy nə̀ wò ə? Kə̀lə̀ â wò, kə̀ nyiə̀ dzə̀ miə nə̀ mfəm” 29Ù kə ghî dzìy aŋwòə Yesù kə tsày tsə kəlâŋ nə̀ usîy ùbɛbə wə̀ ŋwò fyi azoŋə̀ wù wə̀. Usîy ùbɛbə wə̀ kə fyimə tsə̀ ŋwòə wù wə̀ anə ndə̀mə̀ sòŋə. Ghu kwi kwù na tsə awo we nə̀ ìfwe iwe yiy anə təntsaʼ. Abù usîy ùbɛbə wə̀ kwuni kaʼ tsə nəniy ani fyimi we, u kɛmə màʼà ntsaʼ tə ghè tə̀. Usîy wə̀ ə zəŋi tsə we nə̀ ù zù a lòʼo tə aghê də mùə̀ wày ate.
30Yesù ə bəb tsə awò ùsìy wə̀ a we nə, “Izəd yə̂ yìy tyoŋə nə̀ à də̌ ndiə?” Wù wə̀ ə bə̀lì kə nə̀, “Izəd yam yiy tyoŋə nə̀ à də̌ ndə̀m.” Ù kə ghii dzìy aŋwòə ndə̀mə̀ nsìy mə̀bɛbə̀ mìy kə də̀ azoŋə̀ we.
31Nsìy mə̀bɛbə̀ mə̀ ə tsə̀ŋə̀ bwoʼo kə Yesù nə̀ wokiy nə̀ ù kə twum dzə̀ ə ghu anə ntswam k-a-bwòʼ kə̀ Zə̀kìy nyiə̀ nəniy aghû yìy ate nə̀ mfəm.
32Saʼ kə umfə̀libyiə kiy kə kwùli də̀ awote anə ŋgìàŋì fə udoŋ u kə nyiə nəniy. Nsìy mə̀bɛbə̀ mə̀ ə bwoʼ yə̀ Yesù nə̀ wokiy nə̀ ù na tsə ghu zû nyi doʼò azoŋə̀ ùmfə̀libyiə u ghè wə̀. Yesù ə bɛmə yə̀. 33Nsìy mə̀bɛbə̀ mə̀ ə fyi bə̀ azoŋə̀ wù wə̀ zù nyi yə̀ azoŋə̀ ùmfə̀libyiə wə. Ùmfə̀libiə wə dyaŋi nyəŋ zù bvə̀ nyi tswi yə̀ anə mbə̀lì kə iŋwù, mu pfə yə̀ mwi awote.
34Aghû yə̀ ghu kə yemə̀ nəniy anə umfə̀libyiə wə, ghu kòʼ àyiə yə a fyi nəniy, ghu nyəŋ zù dzày yə̀ àyiə ghè yə anə inaʼ nə̀ anə iswum. 35Aghee fyi bə̀ anə lòʼo tədzə̀m ani bù kòʼ ìyiə yə i kə fyi nəniy. Abù ghu bû nəniy akə̀lə̀ Yesù, ghu bù kòʼ bə̀ wù wə̀ nsìy mə̀bɛbə̀ mìy fyi ŋwô tsə nəniy azoŋə̀ we, ù də nəniy a təŋə̀ Yesù nə̀ ù mə̀ dzə̀ŋì kəli ndzwu tiy nə̀ ùtwab u we wiy faʼà dzwàbə̀ ŋwò. Abù ghu kôʼ yə̂ nəniy we ghii, ghu ŋge tsəŋ. 36Aghû yə̀ ghu kə kôʼ àyiə yəə yiy, ghu dzày yə̀ àyiə ghè yə̀ a kə fyi nəniy nə̀ wù wə̀ nsìy mə̀bɛbə̀ mìy kə də nəniy azoŋə̀ we, nə̀ awò àghù yə̀ ghu kə bû nəniy nə̀ Yesù zəŋi taw kə ghu. 37Aghee mbwòʼ ə̀ ìghè yə̀ ìdzə̀m anə inaʼ i Gèlasà yə̀ ə dzày nə̀ Yesù ŋwò fyi anə mbwòʼ ə̀ ghu. Ghu kə ghi dzìy nə̀ Yesù ŋwò fyi awote anə mbwòʼ ə̀ ghu aŋwòə ghu maa ŋge tsəŋ tsìy fyi ayiə yə u kə zəŋi. Abù ghu dzây dzə ghii, Yesù ə zù nyi kə an-a-mfə̀n ŋwò i we yiy. 38Wù wə̀ nsìy mə̀bɛbə̀ mə̀ kə fyi ŋwò tsə nəniy azoŋə̀ we, u bwoʼ yə̀ Yesù nə̀ wokiy nə̀ ghe dzwumì yə̂ we.
Yesù ə twe yə̀ â we, kwuni dzày yə̀ a we nə, 39“Zù a ndaw ghii, wò zû dzây yə̂ kwab tə yiə tə zə̀kìy zəŋi nəniy â wò.”
Wù wə̀ ə ŋwò zù nàʼà tsìy yə̀ àyiə yə Yesù zəŋi nəniy nə̀ we anə inaʼ idzə̀m.
Yesù ə zɛ̀mə̀ kə wà uyəŋi ù lìy anə ipfə, zəŋi taw kə wìyəŋi ù lìy wìy
(Matìyò 9.18-26; Mâk 5.21-43)
40Abù Yesù dzwoŋi dâŋ yə̂ a ŋgwùŋ ìŋwù ì lìy yə, aghee bù kpe nìy kə we aŋwòə ghu kə lyimə we. 41Wù lìy wìy izəd i we yiy kə tyoŋə nə̀ à də̀ Dzalùs, ù kə də̌ wù ùsòŋə̀ wìy anə ndàw dzəŋə kə aghě Dzû, u bù nyaʼa tsə a təŋə̀ Yesù, bwoʼ Yesù nə̀ wokiy ghii nə̀ ù bù a ndàw ìghe, 42aŋwòə kə̀lə̀ kə wà we ùyəŋi kə dzàŋə̀ ŋwò nə̀ ù də̀ yə à də̀ təŋəmə̀ ìvəm nə̀ ghe tiy ibè. U də̀ anə ayiə à pfə yiy.
Abù Yesù sì zè nəniy anə dzəd, aghee gwòʼò yə̀ iwee azoŋə̀ we. 43Wìyəŋi ù lìy wìy ə də̀ anə ŋwàâ kə̀ nə̀ ù kə tsə̀ŋə̀ fyiə tsə̀ kə ŋwò anə təŋə̀mə̀ ìvəm nə̀ ghe tiy ìbè, u sə̀àŋì mà tsə ukhiy wə ù kə kwu nəniy awò àghě məntiə yiy, wù lìy wiy kə wày dzə ani byaŋi we.#8.43 Ùŋwàʼà ù liy wiy kwu dzə̀ wayU sə̀àŋì mà tsə ukhiy wə ù kə kwu nəniy awò àghě məntiə yiy. 44U kwoʼ bə̀ a dzə̀mə̀ Yesù, mwàm tsə̀ idzwə i ndzwu i we, ifyi yə ù kə fyiə i dyaŋi mày yə̀. 45Yesù ə bəb tsə nə̀, “À mìə̀ mwâm ndìə̀?” Abù aghê àdzə̀mə̀ twe nəniy nə̀ ghu we kə mwâm dzə̂, Pità dzày tsə a we nə, “A Mwe ə̀ mbyi, aghê mbaŋə gwòʼò tsə̀ ìwe azoŋə̀ wò, tyiŋə tsə̀ sòʼò wò bə̀lə̀ tə̀dzə̀m.”
46Yesù ə fə̀də̀ dzìy kə nə̀, “Wù lìy mə mwàm miə, aŋwòə mə zuw tsə ŋwô anə u we nàm nə̀ daʼa kiy mə ŋwò fyi azoŋə̀ mìə̀.” 47Abù wìyəŋi wə̀ kòʼ tsə nə̀ ghe way dzə ani nùw dòʼò, u kaʼ ani tsəŋi zù bù nyaʼa tswi tsə anə səkə Yesù, dzày yə̀ sələ kə iyiə kə ù mwàm nəniy Yesù ate anə səkə aghù yə̀. U dzày sòʼò a ghu nə ghe mə taw yə ghe dyaŋi mwàm tsə nəniy we. 48Yesù ə dzày yə̀ awò wìyəŋi wə nə̀, “A wa nam, ibɛmə yiə̀ yìy mə zəŋi nə̀ wò taw. Zu ŋwò anə ibvay.”
49Yəə Yesù namə dzəŋə̀ nəniy, wù lìy wìy ə zù bù a ndàw Dzalùs wə ù kə də̀ tuw kiy a ndàw dzəŋə kə ghě Dzû. Wù wə̀ ə dzày yə̀ a we nə, “Kə̀ kâm fyimi dzə̀ə àtyi dè, wa niə̀ ù yəŋi wə̀ mə pfə.”
50Abù Yesù zuw tsə ghii, u dzày yə̀ â Dzalùs a we nə, “Kə̀ tsəŋ dzə̀, màŋə kə̀li tsə kə ibɛmə yiy, wa niə̀ kì taw ŋwò.”
51Abù Yesù bù kwùm tsə nəniy a ndàw Dzalùs, u dzày tsə nə̀ a dzwùmə̀ nyiə kwoʼo bə̀ kə Pità ighe awò ndaw, we nə̀ Dzɛ̂m nə̀ Dzwan, nə̀ Zə̂ wa nə, nə̀ tè wa. 52A də̌ nə̀ aghê dîy tsə̀ wa nə, àliy yiy mwe yə̀ wa nə. Yesù ə dzày tsə nə̀, “Ghà kə dîy sòʼò, wa nə̀ bvunə ŋwò ù kamə kə̀ pfə dzə̂.”
53Ghu kaʼ ani tsoʼ Yesù, ghu kwu kə nə̀ wa nə̀ mə̀ pfə. 54Yesù ə kwi tsə wa nə anə ukwe, dzày tsə nə̀, “A wa nam, ŋwòə kə idoŋ!” 55Zwày kə we kiy fən nyi dzwoŋi bə̀. U dòʼò dzwoŋi bə̀ ùtâw wìy. U ŋwò təmi dyaŋi kə idoŋ. Yesù ə dzày yə̀ a ghu nə̀ ghu nyiə̀ we nə̀ fyiə kə̀ nyiə kiy. 56Idzwə yiy ŋge zwum tè wa nə nə̀ zə̂ we. Yesù ə kwuni sə̀ŋì fyi yə̀ kə̀tswuŋi â ghu nə̀ kə ghu nì dzîy dzə̂ iyiə yə i fyi nəniy â wè lìy.
Valgt i Øjeblikket:
Lukâs 8: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
