Dzwan 18
18
Dzudàs ə fè fyi yə̀ Yesù
(Matìyò 26.47-56; Mâk 14.43-50; Lukâs 22.47-53)
1Abù Yesù gwùŋì mà tsə nəniy, u ŋwò yə̀ nə̀ tsə̀təndii tə we tiy, ghu dàŋ fyi yə̀ fyìə̀ fə dzwì fə̀ fiy ghu tyoŋə nəniy nə̀ à də̀ Kilòn. Usum wiy kə də̀ awote, Yesù ə̀ zù anə uswum u ghà yə̀ nə̀ tsə̀təndii tə we tiy. 2Dzudàs wə̀ ù kə fê fyi nəniy Yesù, ù kə kwu ŋwô loʼo kə ghà kə̀, aŋwòə Yesù kə bà tsə̀ ani zee təmə dzəŋə awote nə̀ tsə̀təndii tə we tiy. 3Ŋgəd tə aghè àlwaʼa tiy nə̀ àghě Falàsî yìy ə twum tsə tə sǔgôʼ tə Lûm, nə̀ ghè liy yiy ghu kə kyiŋə̀ a ndàw Kə̀zə̀ akə̀lə̀ Dzudàs. Dzudàs ə nìy zù nə̀ sǔgôʼ tə̀ nə̀ àghè kyiŋə yə anə uswum wə Yesù kə də nəniy ate we nə̀ tsə̀təndii tə we tiy. Sǔgôʼ tə̀ ə kwu ŋkwab mə̀ tsam, nə̀ kàʼì tìy. 4Yəə Yesù kə kwu nəniy ayiə yə àdzə̀m a kə dziy fyi nə̀ we. U tsìy fyi bə̀ isəə bəb tsə a ghu nə, “Ghà khu ndiə?”
5Ghu bə̀lì kə a we nə, “Ghè khu Yesù, wà ìnaʼ i Nazalèt.”
Yesù mee a ghu nə, “Miə wə.”
Dzudàs wə̀ ù kə fê fyi nəniy we, ù kə tiy awote nə̀ sǔgôʼ tə̀. 6Yəə Yesù dzày tsə nəniy a ghu nə, “Miə wə.” Ghu ŋwò soŋ dzwoŋi yə̀ ibàm bvə̀ yə̀ ambvə̀dintsə. 7Yesù ə kàm bəb fəli tsə a ghu nə, “Ghà khu ndiə?”
Ghu bə̀lì kə a we nə, “Ghè khu Yesù, wà ìnaʼ i Nazalèt.”
8Yesù mee a ghu nə, “Mə mə dzày â ghà nə̀ à də̀ miə we.” Bəə à də nə̀ ghà khu miə, a dzày yə̀ nə̀ aghû yam ə ŋwô. 9Ayiə yə̀ kə ghî fyi ani zəŋi tsə nə̀ ayiə yə Yesù kə dzây a bû fyi àsoŋə̀ yìy. Ù kə dzày tsə nə̀ “Mə kamə kə̀ nây maʼà dzə̂ nəway wù ù mòʼ anə ghù yə̀ wò kə nyiə̀ â mìə̀.”
10Simùn Pità kə kwu kwab, u sòŋ fyi kwoʼ kə, tswa màʼà bə̀ tswuŋi kə u kwe ùnyiə u wè kə̀fàʼ ə̀ wù ùlwaʼà ùnè wìy ate. 11Yesù mee â Pità a we nə, “Zwə na dzwoŋi yə̀ kwab fiə̀ fìy anə byiəə! Wò mòʼò nə̀ mə liə way ani fii anə dzəd yə təli wam byay na nəniy nə̀ mə fii ate ə̀?”
Ghu nìy zù nə̀ Yesù akə̀lə̀ Anàs
12Sǔgôʼ tə Lûm nə̀ wè tə̀ sǔgôʼ ù nè wìy, nə̀ àghè Dzû à kyiŋə yiy kwi kwù tsə Yesù, 13nìy zù nə̀ we akə̀lə̀ Anàs. Anàs kə də̌ bèwiy awò Kaʼifàs wə̀ ù kə də nəniy wù ùlwaʼà ùnè wìy anə ŋə̀m kə ghà kə̀. 14À yù də̀ Kaʼifàs wə̀ ù kə dzây nəniy awò ŋgəd tə aghě Dzû tìy a ghu nə, “I dzwabə̀ nə̀ wù mòʼ pfə nyə̀ tuw ghè adzə̀m.”
Pità ə twe nə̀ ghe kwu way Yesù
(Matìyò 26.69,70; Mâk 14.66-68; Lukâs 22.55-57)
15Simùn Pità ə dzwùmì yə̀ Yesù we nə̀ tsə̀ndii Yesù ìlìy yìy. Wù ùlwaʼà ùnè wə̀ ə ŋge kwu tsə̀ndii ə̀ Yesù ì ghà yə̀. Tsə̀ndii yə tsìy nyi kwoʼ dzəŋi yə̀ nə̀ Yesù anə ntòʼ ə̀ wù ùlwaʼà ùnè wə̀, 16Pità ə kwuni təmi dòʼò tsə a bee anə ufə̀b u bà. Tsə̀ndii ìlìy yə̀ wù ùlwaʼà ùnè wə̀ kə kwu nəniy we, u tsìy fyi dzwoŋi yə̀ a bee, zù dzə̀ŋì tsə nə̀ wà ù yəŋi wə ù kə də anə ufə̀b u mbà, u nìy nyi kwoʼ yə̀ Pità anə fôŋə̀ mbà. 17Wà ùyəŋi wə ù kə də nəniy anə ufə̀b u mbà, u mee awò Pità a we nə, “Wò wee də̀ sòʼo tsə̀ndii ùlìy wìy ə?”
Pità ə bə̀lì kə a we nə, “Hǎy, mə way dzə tsə̀ndii ə̀ we.”
18Ufəb wiy kə ŋge də̀ ŋwô, aghee kəfàʼ nə̀ àghù yə̀ ghu kə kyiŋə̀ nəniy ndàw Kə̀zə̀, ghu təmi dòʼò zwaa ghu nə̀ ùvələ wiy. Pità ə zù təmi dòʼò yə̀ sòʼò awote, zwaa sòʼò we nə̀ ùvələ wiy.
Wù ùlwaʼà ùnè wìy bəb ayiə awò Yesù
(Matìyò 26.59-66; Mâk 14.55-64; Lukâs 22.66-71)
19Wù ùlwaʼà ùnè wə̀ ə bəb ayiə awò Yesù kumə̀ yə̀ nə̀ tsə̀təndii tə we tiy nə̀ àyiə yə ù tyi dê nəniy. 20Yesù ə bə̀lì kə a we nə, “Mə taw dzìy tsə̀ àyiə anə yiə yə aghê dzə̀mə̀ də ani zuw. Ayiə yə mə tyi dê nəniy àdzə̀m mə kə tyi dè anə ndaw tə udzəŋə tə aghě Dzû, nə̀ a ndàw Kə̀zə̀ loʼo tə aghê dzə̀mə̀ bê dzəŋə dyoʼò nəniy ate. Mə kamə kə̀ nû dzày kôʼ dzə̂ iyiə ìliy yiy. 21À də̌ kìə̀ wò bəbə nəniy ayiə yiy awò mìə̀ ə? Wò kwu ani bəbə yəə awò àghù yə̀ ghu zuw nəniy ayiə yə mə dzîy. À də̌ ghu ghu kwu nəniy ayiə yə mə dzây nəniy.”
22Abù Yesù dzày tsə nəniy ghii, wù ùkyiŋə̀ ùlìy wìy ə bwad nyi yə̀ we bəbə a we nə̀, “Wò də̌ ndiə ani dzəŋə nə̀ wù ùlwaʼà wìy anə ndzòʼò àyiə yiy?”
23Yesù ə bə̀lì kə a we nə, “Abu à də nə̀ mə dzây ŋwò iyiə ìbɛbə ìliy yiy, dzay fyi bə̀ iyiə i ghè yə̀ awò àghù yə̀ fəə àdzə̀m. Abu à kwuni də nə̀ mə̀ dzây àyiə àsoŋə̀ yìy, wò mìə̀ kwuni bwalə nə̀ìndiə?”
24Anàs ə twum zù Yesù awò Kaʼifàs ù kə də nəniy wù ùlwaʼà ùnè wìy nə̀ ghu nam kwù na ŋwoə we.
Pità ə twe fəli nə̀ ghe kwu way Yesù
(Matìyò 26.71-75; Mâk 14.69-72; Lukâs 22.58-62)
25Pità kə nam tiy kə a lòʼo kə uvə̀lə̀ kə̀, zwa we nə̀ ùvələ wiy. Aghê liy bù bəbə a we nə, “Wò we də̀ sòʼo tsə̀ndii wù wìy ə?”
Pità ə nam twe dzìy nə̀, “Hǎy mə way dzə tsə̀ndii ə̀ we.”
26Wè kə̀fàʼ ə̀ wù ùlwaʼà ùnè wə̀ ù kə də nəniy tɛ̀mə̀ ndaw nə̀ wù wə̀ Pità kə khîy ŋwò nəniy tswuŋi kə we kiy, u bəb tsə nə̀, “Mə mə̀ kə̀ kôʼ wô nə̀ Yesù anə uswum ə?”
27Pità ə nam twe. Yəə ù twe tsə nəniy ghii, mwaʼ kiy dyaŋi tuŋ tsə.
Ghu nìy bù nə̀ Yesù akə̀lə̀ Paylèt
(Matìyò 27.1,2,11-14; Mâk 15.1-5; Lukâs 23.1-5)
28Nə̀ zwù kə u tsuk kiy, ŋgəd tə aghě Dzû tìy ə nìy ŋwò fyi yə̀ nə̀ Yesù a ndàw Kaʼifàs, zù nə̀ we anə ntòʼ ə̀ wù wə̀ ù kə də nəniy tuw kiy anə mbwòʼ ə̀ Lûm. Ŋgəd tə aghě Lûm tìy kə kə̀ nyi kwoʼ dzə̂ anə ntoʼ, aŋwòə ghu kə liə way ani kəli udzə anə yiə yə byiə kə ghu kiy kə dzîy, tə̀ ghu ki də ani nyi inyi i ŋkàmə̀tâzaʼà mìy. 29Paylèt ə fyi bə̀ a bee, bəb tsə a ghu nə, “Ghà dziiy nə̀ wù wə̀ byɛbi kìə̀?”
30Ghu bə̀lì kə a we nə, “Ghèe mə̀ dziy bê dzə̀ wày nə̀ we akə̀lə̀ wò bəə ù mə̀ də kə̀ zəŋi iyiə ìbɛbə ìliy yiy.”
31Paylèt mee a ghu nə, “Ghàa nìy saʼ we anə yiə yə lâŋ kəli kiy dzîy.”
Ŋwàâ kə ghù kiy ə bə̀lì kə dzìy nə̀, “Ghǎ kə̀ bɛmə na dzə̂ nə̀ ghè wiy màʼà wù lìy wìy anə daʼa kələ.” 32Ayiə yə̀ kə fyi ani zəŋi tsə nə̀ ayiə yə Yesù kə dzây nə̀ a bû fyi àsoŋə̀ yìy anə sòŋə fə ù kə dzîy nəniy ndzòʼò ìpfə yə ù kì kwu nəniy ani pfə.
33Paylèt ə tsìy nyi kwoʼ dzwoŋi yə̀ anə ntoʼ toŋə tsə Yesù, bəbə a we nə, “Wò də̌ dòŋ kə aghě Dzû ə̀?”
34Yesù ə bə̀lì kə a we nə, “À yìy màŋ də̀ i môʼ yiə̀, moo aghê liy yiy bû dzày ŋwò iyiə ì liy yiy â wò kumə̀ bə̀ nə̀ mìə̀ ə̀?”
35Paylèt ə bə̀lì kə a we nə, “Wò mòʼò nə̀ mə də wè Dzû ə̀? À wò nîy bə̀ àghù yiə̀ fəə awò mìə̀, nə̀ ŋgəd tə aghè àlwaʼa tiy. Wò zəŋi mə̀yə?”
36Yesù mee a we nə, “Mə way dzə yəə à də̌ udòŋ wə̀ u saʼa nəniy fəə anə mbyi, abu mə mə̀ də yəə à də̌ udòŋ wə̀ u saʼa nəniy fəə anə mbyi, tsə̀təndii tam tiy mə ŋwây ani zəŋi tsə nə̀ ghu kə nyiə̀ dzə̀ miə awò ŋgəd tə aghě Dzû tìy. Hǎy mə way dzə yəə à də̌ udòŋ wə̀ u saʼa nəniy fəə anə mbyi!”
37Paylèt ə bəb yə̀ a we nə, “Wò fə̀ də̀ kədòŋ ə̀?”
Yesù ə dzày tsə a we nə, “Wò dzìy nə̀ mə də kədòŋ.” Ghu kə byi bə̀ mìə̀ fə anə mbyi nə̀ mə bû dzày bə̂ àyiə àsoŋə̀ yìy. Aghû yə̀ àdzə̀m ghu dzîy àyiə àsoŋə̀ yìy, ghu kwu ŋwô dzə̀ yam. 38Paylèt ə bəb yə̀ a we nə, “Ayiə àsoŋə̀ yìy də kiə̀?”
Ghu ba wiy Yesù
(Matìyò 27.15-31; Mâk 15.6-20; Lukâs 23.13-25)
Paylèt ə tsìy fyi dzwoŋi bə̀ abee dzày tsə nə̀, “Mə kə̀ kôʼ dzə̂ nə̀ wù wə̀ zəŋi iyiə ìbɛbə yiy!” 39Anə yiə yə biə kəli kiy dzîy nəniy nə̀, “Mə ki dzwəə myaʼa fyiə bə̂ wù wə̀ gha liə nəniy, abu a dziy bû nyi inyi i ŋkàmə̀tâzaʼà mìy, ghà liə nə̀ mə dzwə̂ maʼà fyi bə̂ dòŋ kə aghě Dzû kə̀?”
40Ŋwàâ kə ghù kə̀ bviʼi fyi kə məmbòŋ idoŋ nə̀, “Hǎy à wày dzə we, ghè liə nə̀ wò dzwəə maʼà fyi bə̂ Bàlabàs.” Də̀ə ghii nə̀ Bàlabàs kə khu tsə̀ ùtswə̀d anə inaʼ.
Valgt i Øjeblikket:
Dzwan 18: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
