যোহন 4
4
শমরীয় মিলেবো
1যীশু যে যোহনত্তুন্ বোউত্ বেশ্ শিচ্চ্য গরের্ আর বাপ্তিষ্ম দের্ সিয়েন্ ফরীশীগুনে শুন্ন্যন্। 2(খালিক্ যীশু নিজে বাপ্তিষ্ম ন-দের্, তা শিচ্চ্যগুনে দেদন্।) 3যীশু সিয়েন্ কোই পারিনে যিহূদিয়া রেজ্য ফেলেনে আরঅ গালীলোত্ গেলঅ। 4গালীলোত্ যেবার্ সময় তাত্তুন্ শমরিয়া রেজ্য ভিদিরেদি যাহ্ পড়িলো। 5তে শুখর নাঙে শমরিয়ার্ এক্কান্ আদামত্ লুমিলো। যাকোবে তা পুয়ো যোষেফরে যে ভূইয়ান দান গোজ্যে এ আদামান্ এলঅ সিয়েন কায়-কুরে। 6সে জাগানত্ যাকোবর্ কূয়ো এলঅ। পধত্ আঢ্তে আঢ্তে অরান্ ওইনে যীশু সে কূয়োবো কুরে বুজিলো।
সেক্কে বেলান্ প্রায় দিবুজ্যে। 7-8যীশুর্ শিচ্চ্যগুনে হানা কিনিবাত্যে আদামত্ যেয়োন্; এমন্ সময়োত্ শমরিয়ার্ এক্কো মিলে পানি তুলিবাত্যে এলঅ। যীশু তারে কলঅ, “মরে এক্কেনা পানি হেবাত্তে দে।”
9সেই শমরীয় মিলেবো তারে কলঅ, “মুই দঅ শমরীয় মিলে। তুই যিহূদী ওইনে কেধোক্ক্যেন্ গুরি মত্তুন্ পানি মাগর্?” মিলেবো এ কধাগান্ কলঅ কিয়া যিহূদী আর শমরীয়গুনো ইধু উদোন্-বজন্ ন-এলঅ।
10যীশু সেই মিলেবোরে জোব্ দিলো, “তুই যুনি কোই পাত্তে গোজেন দানান্ কি আর কন্না তত্তুন্ পানি মাগের্ সালে তুয়ই তা ইধু পানি মাগিদে আর তে তরে জেদা পানি দিদো।”
11মিলেবো কলঅ, “মাত্তর্ তত্তুন্ পানি তুলিবাত্যে কিচ্চু নেই আর কূয়োবোয়ো গভীন্। সালে সেই জেদা পানিগান্ কুত্তুন্ পেলে? 12তুই আমা পূরোণিমানুচ্ যাকোবত্তুন্ দঅ দাঙর্ নয়। এ কুয়োবো তে আমারে দিয়্যে। তে নিজে আর তা পুয়োগুনে এ কুয়োবোত্তুন্ পানি হেদাক্ আর তার্ য়েমানুনেয়ো হেদাক্।”
13সেক্কে যীশু কলঅ, “যে কেঅ এ পানিগান্ খায় তার আরঅ তিরেচ্ পেবঅ। 14মাত্তর্ মুই যে পানিগান্ দিম্, যে সিয়েন্ হেবঅ তার্ আর কনদিন্অ তিরেচ্ ন-পেবঅ। সে পানিগান্ তা মন ভিদিরে ঊদুরি উদিনে পয়নালা ধোক্ক্যেন্ ওইনে উমর জিংকানি দান্ গুরিবো।”
15ইয়েন্দোই মিলেবো যীশুরে কলঅ, “সালে মরে সে পানিগান্ দে যেন মর্ তিরেচ্ ন-পায় আর পানি তুলিবাত্যে ইয়োত্ এজা ন-পরে।”
16যীশু তারে কলঅ, “সালে যাহ্, তঅ নেক্কোরে ইধু ডাগি আন্।”
17মিলেবো কলঅ, “মাত্তর্ মত্তুন্ দঅ নেক্ নেই।”
যীশু তারে কলঅ, “তুই ঠিগ্ কধা কোইয়োচ্ তত্তুন্ নেক্ নেই, 18কিত্যে এ ভিদিরে তর্ পাচ্চো নেক্ ওইয়োন্, আর ইক্কিনে যে তঅ সমারে আঘে তে তর্ নেক্ নয়। তুই সত্য কধা কোইয়োচ্।”
19সেক্কে মিলেবো যীশুরে কলঅ, “মুই ইক্কিনে বুঝি পারিলুং তুই এক্কো ভাববাদী। 20আমা পূরোণি মানুচ্চুনে এ মুড়োবোত্ উবোসনা গুরিদাক্, মাত্তর্ তুমি কোই থাগ যিরূশালেমত্ মানুচ্চুনোর্ উবোসনা গরানা উজিত্।”
21যীশু তারে কলঅ, “শুন্, মঅ কধাগান্ বিশ্বেজ্ গর্, এমন্ সময় এজের্ যেক্কে বাবা গোজেনর্ উবোসনা তুমি এ মুড়োবোত্-অ ন-গুরিবা, যিরূশালেমত্-অ ন-গুরিবা। 22তুমি যিবেরে ন-চিনো সিবের্ উবোসনা গুরি থাগঅ, মাত্তর্ আমি যিবেরে জানিই তার্ উবোসনা গুরিই, কিয়া পাপত্তুন্ উদ্ধোর্ পেবার্ পথ যিহূদীগুনোর্ মাধ্যমে এচ্চ্যে। 23মাত্তর্ এমন্ সময় এজের্, এমন্ কি, ইক্কিনে সেই সময় এচ্চ্যে যেক্কে আজল্ উবোসনা গুরিয়্যেগুনে আত্মায় আর সত্যলোই বাবার্ উবোসনা গুরিবাক্। বাপ্পোয়ো এবাবোত্যে উবোসনা গুরিয়্যেগুনোরে তগায়। 24গোজেনে আত্মা; যিগুনে তার্ উবোসনা গরন্, আত্মায় আর সত্যলোই তারার্ সে উবোসনা গরা পুরিবো।”
25সেক্কে সে মিলেবো কলঅ, “মুই কোই পারং, মশীহ, যিবেরে খ্রীষ্ট কন্, তে এজের্। তে যেক্কে এবঅ সেক্কে বেক্কানি আমারে জানেব।”
26যীশু তারে কলঅ, “মুয়ই সিবে, যে তঅ সমারে কধা কর্।”
27এমন্ সময় যীশুর শিচ্চ্যগুনে এইনে এক্কো মিলে সমারে যীশুরে কধা কধে দেগিনে আমক্ অলাক্। মাত্তর্ তো তারা কনজনে ন-কলাক্, “তুই কি চর্?” বা “কিত্তে তুই তা সমারে কধা কর্?”
28সে মিলেবো সেক্কে তা কুম্মো থোইনে আদামত্ গেলঅ আর মানুচ্চুনোরে কলঅ, 29“তুমি এইনে এক্কো মান্জ্যরে চগি। মুই জিংকানিত্ যিয়েনি গোজ্যং সিয়েনি বেক্কানি তে মরে কোই দিয়্যে। সালে তেয়ই কি সেই মশীহ?” 30সেক্কে মানুচ্চুনে আদামত্তুন্ নিগিলিনেই যীশু ইধু এজা ধুরিলাক্।
31এ ভিদিরে তা শিচ্চ্যগুনে তারে কোজোলি গুরিনে কলাক্, “মাষ্টরবাবু, কিজু হা।”
32যীশু তারারে কলঅ, “ম ইধু এমন্ হানা আঘে যিয়েনর কধা তুমি কোই ন-পার।”
33সেক্কে শিচ্চ্যগুনে কুয়োকি গরা ধুরিলাক্, “সালে কি কনজনে তারে কনঅ হানা আনি দুয়োন্?”
34সেক্কে যীশু তারারে কলঅ, “যে মরে পাধেয়্যে তা আওজ্চান্ পালন্ গরানা আর তা কামান্ থুম্ গরানাগান্ অলঅ মর্ হানা। 35তুমি কি ন-কঅ, ‘আর চের্ মাস বাগি আঘে, সে পরেদি শোজ্য কাবিবার্ সময় অবঅ’? মাত্তর্ মুই তমারে কঙর্, চোগ্ তুলিনে একবার্ ক্ষেদ ইন্দি রিনি চঅ, শোজ্য কাবিবার্ অক্ত ওইয়্যে। 36যে শোজ্য কাবে তে ইক্কিনে বেতন পার্ আর উমর্অ জিংকানিত্যে শোজ্য থুবেই রাগার্। সিয়েনত্যে যে বীজ্ সিদে আর যে শোজ্য কাবে, দ্বিজনে সং সং গুরি হুজী অন্। 37ইয়েন্দোই এ কধাগান্ প্রমাণ অয় যে, ‘একজনে বীজ্ ফেলায় আর অন্য একজনে কাবে।’ 38মুই তমারে এমন্ শোজ্য কাবিবাত্যে দিপাধেলুং যিয়েনত্যে তুমি কাম্ ন-গরঅ। অন্যগুনে কাম্ গোজ্যন্ আর তুমি সে কামর্ ফসল কাপ্প্য।”
39যে মিলেবো ইয়েন্ কোইনে সাক্ষ্য দেত্তে, তে যিয়েনি গোজ্যে বেক্কানি তে তারে কোই দিয়্যে, তা কধা শুনিনে সে আদামর্ ভালোক্কুন্ শমরীয় যীশু উগুরে বিশ্বেজ্ গুরিলাক্। 40তারা যীশু ইধু যেইনে তারে তারা সমারে থেবাত্তে কোজোলী গুরিলাক্। সেনত্তে যীশু সিধু দ্বিদিন্ থেলঅ। 41সেক্কে তা কধা শুনিনে আরঅ ভালোক্কুন্ মান্জ্যে বিশ্বেজ্ গুরিলাক্। 42সে মিলেবোরে তারা কলাক্, “ইক্কে যে আমি বিশ্বেজ্ গুরির্ সিয়েন তঅ কধালোই নয়, মাত্তর্ আমি নিজে তা কধা শুনিনে বুঝি পাজ্জ্যেই যে, তে ঘেচ্চ্যেক্গুরি মান্জ্যরে উদ্ধোর্ গুরিয়্যে।”
রাজার্ চাগর পুয়োবো গম্ অলঅ
43-44সেনত্যে যীশু নিজে কোইয়্যেদে, নিজো দেজত্ ভাববাদীর্ সর্মান নেই; সে কধাগান্ পুরেবাত্তে শমরিয়াত্ দ্বিদিন্ থানার্ পরেদি তে সিয়োত্তুন গালীল রেজ্যত্ গেলগোই। 45পরব সময়োত্ যীশু যিরূশালেমত্ যিয়েনি গোজ্যে, গালীলো মানুচ্চুনে সে পরবত্ যেয়োন্ বিলি বেক্কানি দেক্ক্যন্। ইয়েনত্তে যীশু যেক্কে গালীলোত্ গেলঅ সেক্কে সিধুগো মানুচ্চুনে তারে গুজি ললাক্।
46যেরেদি যীশু আরঅ গালীলো সেই কান্না আদামত্ গেলঅ। ইয়েনত্ তে পানিগানরে আংগুর-রস বানেয়্যে। গালীলো কফরনাহূম শঅরত্ এক্কো রাজার্ চাগর অসুগোত্ ভুগের্। 47যীশু যিহূদিয়াত্তুন্ গালীলোত্ এচ্চ্যে শুনিনে সেই রাজার্ চাগর্বো তা ইধু গেলঅ আর কোজোলী গুরিলো যেনে তে কফরনাহূমোত্ যেইনে তা পুয়োবোরে গম্ গরে। তা পুয়োবো সেক্কে মরং মরং ওইয়্যে।
48যীশু সেই রাজার্ চাগর্বোরে কলঅ, “কনঅ চিহ্নো বা কনঅ আমক্ অবার্ কাম ন-দেগিলে তুমি কনঅ বাবদে বিশ্বেজ্ ন-গুরিবা।”
49সেক্কে সেই রাজার্ চাগর্বো কলঅ, “দোয়্যে গুরিনে মঅ পুয়োবো মুরিবার্ আগেদি আয়।”
50যীশু তারে কলঅ, “তুই যাহ্, তঅ পুয়োবো বাঁজিলো।” সেক্কে তে যীশুর্ কধালোই বিশ্বেজ্ গুরিনে গেলগোই।
51সেই চাগর্বো যেক্কে ঘরত্ ফিরি যার্ সেক্কে পধত্ তা চাগরুনে তাইধু যেইনে কলাক্, “তঅ পুয়োবো গম্ ওই যেইয়্যে।”
52তে সেই চাগরুনোরে পুযোর্ গুরিলো, “তে কক্কে গম্ ওইয়্যে?”
তারা কলাক্, “গেল্লে কেল্ল্যে দিবুজ্যে একটার্ সময় তা জ্বরান্ গম্ ওইয়্যে।”
53ইয়েন্দোই পুয়োবোর্ বাপ্পো বুঝি পারিলো, ঠিগ্ সেলক্কে যীশু তারে কোইয়্যে, “তঅ পুয়োবো বাঁজিলো।” সেক্কে সেই রাজার্ চাগর্বো আর তা পরিবারর্ বেক্কুনে যীশু উগুরে বিশ্বেজ্ গুরিলাক্।
54যিহূদিয়াত্তুন্ গালীলোত্ এজানার্ পরেদি যীশু এই দ্বিলম্বর্ আমক্ অইদে কামান্ গুরিলো।
Valgt i Øjeblikket:
যোহন 4: CBT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright © 2021 Bangladesh Bible Society
