পত্থম 9
9
নোহত্তে গোজেনর বেবস্থা
1গোজেনে নোহ আর তা পুয়োগুনোরে বর্ দিইনে কলঅ, “তুমি বংশবাড়েবার খেমতালোই জনেদি বাড়ি উদো আর পিত্থিমীগান ভোরেই ফেলঅ। 2পিতথিমীর্ বেক্ য়েমানুন্, আগাজ পেক্কুন, বুগেদি-আঢি বেড়েয়্যে পরান্বলাগুন, আর বড়্গাঙ মাচ্চুনে তমারে অমকদ দোরেইনে চলিবাক্। ইগুন তমা আঢত্ দিয়্যে অলঅ। 3জেদা আর ঘুরি বেড়েয়্যে বেক্ প্রাণীগুন তমার হানা অবঅ। হানা ইজেবে মুই আগে যেবাবোত্যে তমারে শোজ্য আর শাক্-পাদ্ দুয়োং সেবাবোত্যে ইক্কিনে বেক্কানি তমারে দিলুং; 4মাত্তর্ জেদাবাদে, অত্তাৎ লো-সুমুত্তো য়েরা তুমি ন-হেবা। 5কনজনে যুদি তমারে খুন গরন্ সালে মুই হামাক্কায় তমার লোগানি বদলে তার লোগান, অত্তাৎ তা পরাণান্ দাবি গুরিম্, তে য়েমান ওক্ বা মানুচ্ ওক্। মান্জ্য পরাণান্ যে মানুচ্চো নেজেব সিবে পরাণান্অ নেযা অবঅ-ইয়েন মর্ দাবি। 6গোজেনে মানুচ্চুনোরে তা ধোক্ক্যেন গুরি বানেইয়্যে; সেনত্ত্যে কনঅ মান্জ্যরে যুদি কেউ খুন্ গরন্ সালে অন্য একজনত্তুন্ সে খুনীবোর পরাণান্ নেযা অবঅ। 7তুমি তমার বংশবাড়েবার খেমতালোই নিজো মানুচ্চুন বাড়েই তুলো। তুমি পিত্থিমীর চেরোকিত্তে ছিদি পড়অ আর নিজো মানুচ্চুন্ আরঅ বাড়অ।”
8-10পরেদি গোজেনে নোহ আর তা পুয়োগুনোরে কলঅ, “তমার আর তঅ বংশধরুনোত্তে আর যিদুক্কুন জেদাপ্রাণী তমা লগে এলাক্, অত্তাৎ যিদুক্কুন পেক্ আর ঘোর্বো আহ্ ঝাড়্বো য়েমান তমা লগে জাহাজত্তুন্ নিগিলি এচ্চোন্-এক কধায় পিত্থিমীর বেক্ জেদাপরাণবলাগুনোত্তে মুই ইক্কিনে মর্ এ সুদোমান থিদেবর্ গরঙর্। 11সে সুদোমান অলঅ এবাবোত্যে, বান পানিলোই আর্ কনদিন্অ বেক্ পরান্বলারে মারে ফেলা ন-অবঅ আর গোদা পিত্থিমীগান শেজ্ গুরি দেদে ধোক্ক্যেন বান্অ আর ন-অবঅ।” 12-13গোজেনে আরঅ কলঅ, “যে সুদোমান মুই তমাত্তে আর তমা লগে বেক্ পরান্বলাগুনোত্তে থিদেবর্ গুরিলুঙ সিয়ানি বংশর পর বংশ ধুরিই চুলিবো। সে সুদোমর চিহ্নো ইজেবে মেঘ ভিদিরে মুই মর্ রান্জোনিগান্ দেগেম। ইয়ানই অবঅ পিত্থিমীগানত্তে মর্ সে সুদোমর চিহ্নোগান। 14যেক্কে মুই উগুরেন্দি মেঘ থুবেই রাগেম্ সেক্কে সিয়েন ভিদিরে এ রান্জোনিগান্ দেগা দিবো, 15আর সেক্কে তর্ আর বেক্ য়েমানুনোত্তে মর্ এ সুদোমর কধানি মুই মনত্ গুরিম্। সেনত্তে পানি বান্দোই আর কনদিন বেক্ পরান্বলাগুনোরে শেজ্ ন-গুরিম। 16মেঘঅ ভিদিরে যেক্কে সে রান্জোনিগান্ দেগা দিবো সেক্কে মুই সিয়ান্ দেগিনে পিত্থিমীর বেক্ পরান্বলাগুনোত্তে মর্ এ উমরর্ সুদোমর কধানি মনত্ রাগেম্ ।”
17গোজেনে সে পরেদি নোহরে কলঅ। “পিত্থিমীর বেক্ পরান্বলাগুনোত্তে মুই যে সুদোমান থিদেবর্ গোজ্যং ইয়ানই অলঅ তার চিহ্নো।”
নোহ আর তার পুয়োগুন্
18জাহাজত্তুন্ নোহর পুয়ো শেম, হাম আর যেফৎ-তারা নিগিলি এলাক্ । পরেদি কনান নাঙে হামর্ এক্কো পুয়ো ওইয়্যে। 19নোহর এ তিন্নো পুয়োর বংশধরুনে গোদা পিত্থিমীগানত্ ছিদি পড়িলাক্।
20নোহ চাষ-বাস্ গরানা আরম্ভ গুরিলো আর এক্কান্ আংগুর ক্ষেত্ গুরিলো। 21তে একদিন্যে আংগুর-রস হেইনে মাত্তল্ অলঅ আর নিজো তাম্বুলো ভিদিরে লাংটা ওইনে পড়ি রলঅ। 22কনান বাপ্পো হামে তা বাবর্ এ অবস্থা দেগিলো আর বারেদি যেইনে তার দ্বি ভেইয়োরে সিয়েন্ জানেই দিলো। 23মাত্তর্ শেম আর যেফৎ নিজোর কানা উগুরে এক্কানত্ ধরে কাবড়্ নিলাক্ আর পিজেদি আঢি যেইনে তারার্ বাপ্পোরে ঢাগি দিইনে এলাক্। তারার মুয়োনি উগুদোগুরি ফিরেয়্যে এলঅ বিলি বাপ্পোর্ লাংটা অবস্থাগান তারা চোগোত্ ন-পড়িলো। 24মাত্তল্ ছাড়ি যানার পরেদি নোহ তা চিগোন্ পুয়োবোর বেবহার কধানি জানি পারিল। 25সেক্কে তে কলঅ, “কনানে অভিশাব পেইয়্যে ওক্ । তে তার্ ভেইয়ুনোর বেক্কুনোত্তুন্ তলে পোজ্যে চাগর্ ওক্।”
26তে আরঅ কলঅ, “বর্ পেইয়্যে শেমর গোজেন লগেপ্রভু। কনানে শেমর চাগর ওক্। 27গোজেনে গোরোক, যেফতে যেনে বোউত্ জাগা জুড়ি থায়। তে শেমর তাম্বুলানত্ বজত্তি গোরোক্ আর কনানে তা চাগর ওক্।”
28পানি বান পরেদি নোহ আরঅ তিনশঅ বজর বাঁজি এলঅ। 29সাড়ে নয়শ বজর বাঁজি থানার পরেদি তে মুরি গেলঅ।
Valgt i Øjeblikket:
পত্থম 9: CBT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright © 2021 Bangladesh Bible Society