Luk 8

Nda ge ka kàre Zeso pe ma

1Guwa̰, Zeso gaa an suwal ga̰a̰l mage suwal jiyale ma diŋ, ka wan nda fare mage oy Fare ge Kwaɗa ge muluk ge Dok ne pe. Nda ge ame hateya ge wol pɔgwa zi ma kaa ɓanna ge ne. 2Nda zaab a̰me ge Zeso ee on̰om ge sone ma waɗ ge num zì ya zum ma, ge a zo̰o̰ num ma kaa dagre ge ne waɗme. Nda zaab mbe ma buwal zì, Mari ge àa tol ne Magdala, ge on̰om ge sone ma wuwa ge ne zì har ɓỳala kaa, 3Johana ge Kuza ndu ge koy Heroɗ kaŋ gan ma gwale, Suzan mage nda zaab ge ɗogle ma gḛḛ-gḛḛ. Nda zaab mbe ma mɔɗwag ka mbaa Zeso mage na nda ge ame hateya ma ge maa kaŋ seɗɗa ma me.

Fare sḭḭ ge ndu ge gaa kaŋ pagal

Mat 13.1-23; Mrk 4.1-25

4Ajo̰o̰ nda mbo ge suwal ga̰a̰l ma diŋ ya hini-hini, ɓase ma kwate ya ne ta nɔnɔg, ɗege kee num fare sḭḭ mbe no go: 5Ge dwam a̰me go ɗu, ba ge gaa kaŋ a̰me zuɗ ge na diŋ ya mbo dol swa. Sok ge ka cigi swa go, a̰me ma kale ge vin̰a pul yà, nda ndal num ge maa ko se, njoole ge pḭḭ zige ma coɗ num gezi me. 6A̰me ma deɗ ge sok her go. Sok ge àa tiya digi, àa fin̰a gezi gaw, ge dape suwa be kaɗ num pe zì tɔgwal to. 7A̰me ge ɗogle ma me ɗe, àa deɗ ge kore ma buwal zì, kore ma don digi ge num dagre, àa kage num se me. 8Ɗaŋɗe, ge cùb ma deɗ ge suwa ge kwaɗa go, àa don digi, ge diige kan pagal ge ndwa na ta ngoyon̰. Zeso hee na ka̰a̰l digi, jan num iya go: Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa!

9Ne nda ge ame hateya ma ele ne go, fare sḭḭ mbe pe wanna gyana de. 10Gwan num janna go: «Dok ngay fare ɗimil ge muluk ge na ne ma ḛ, ɗaŋɗe, ge nda ge ɗogle ma pe, àa jan num ne ge fare sḭḭ

“Kaŋ mbe ma dee ya keeya ndwa go num ndi sok,

Ɗaŋɗe, num kuwa sok to,

Num za̰a̰ fare me,

Ɗaŋɗe, num wa̰a̰ ne pe to.”#Eza 6.9.»

Zeso wan zum fare sḭḭ ge ndu ge dol swa ne pe

11Ḛ za̰a̰ fare sḭḭ mbe pe wanna no: Kaŋ rusu a fare ge Dok ne. 12Vin̰a pul ge kaŋ rusu dee ne go mbe, ngay diir ge nda ge za̰a̰ fare ge Dok ne ma way, guwa̰ go Ba ge ho̰o̰l mbo ya tele num vin̰a ge hoɗ fareba, ndwa go num see monna to. 13Her pagal ma, ngay diir ge num ge za̰a̰ fare ge Dok ne ma way, àa ame ne ge laa saal ɓame, ɗaŋɗe, àa n̰a ne vin̰a ge kee tèmel maa zì to. Ago, hoɗ fareba ge num way swag boo, sok ge pe heeya ma deɗ-ɗa num pagal, àa tigri ge guwa̰. 14Suwa ge kore do̰ no ge ne pagal, ngay diir ge num ge za̰a̰ fare ge Dok ne ma way, guwa̰ go, iigiya ma, yan kaŋ seɗɗa pe ma, ɓyare tii ge kàɗɗa ge dunin̰a ne ma kale num pagal, àa daa mbo mboya ge jwab to. 15Suwa ge kwaɗa, ngay diir ge num ge za̰a̰ fare ge Dok ne ma way, àa ame ne ge maa dul wa ma zì, àa koy ne kwaɗa, ge deŋel ge num way zì, àa ka mbo mboya ge jwab.

Fare sḭḭ ge kɔn̰al pagal

Mrk 4.21-26

16Zeso gwan jan num go iya: Ndu a̰me ge dun lampe ol ɗoo, kubi ne sòo zì koo ee ne ge saŋal pe zì go de? Ɗaŋɗe, ee ne kaŋ ee lampe pe pagal, ndwa go nda ge waɗ-ɗa zok zì ma kuwa ne hon kɔn̰al. 17Ago kaŋ a̰me ge way no ge sego ma peɗ mbo dyan zum kɔn̰al go. Kaŋ ge kee ge ɗimil zì ma, nda mbo kuwa num benna kɔn̰al. 18Ḛ ndi fare ge Dok ne mbe ge ḛ za̰a̰ num no ma kwaɗa, ago ndu ge no go ge a̰me, Dok mbo gwan hon ne kon pagal, ɗaŋɗe, ndu ge no be a̰me, Dok mbo ame ge fyalag mbe ge dwaɗ no go na go ge ne gezi.

Zeso sele ge fareba ma

Mat 12.46-50; Mrk 3.31-35

19Zeso na̰ mage ne na̰ van ge soɗob ma mbo ya ndil ne, ɗaŋɗe, àa seɗ vin̰a ge deɗ ne ta zì yà guwa to, ge dape nda yagle gḛḛ. 20Nda mbo ya kee ne kuwaya go ne na̰ mage ne na̰ van ma go zum, num ɓyare ndil ne. 21Sok mbe go, gwan num janna go: Mbi na̰ mage mbi na̰ van ma, a num ge za̰a̰ fare ge Dok ne ma, àa kee tèmel ge ne pagal me.

Pool ge Zeso ne sa̰a̰m labreya pagal

Mat 8.23-27; Mrk 4.35-41

22Ɗeɗ-ɗa ge dwam a̰me go ɗu, Zeso mage na nda ge ame hateya ma ndee ge faa ga̰a̰l go, jan num go: Ke kwaɗa go nè haa mbo ge mangaɗam ga̰a̰l wa lee gene yà. Àa ɓyan zum mboya me. 23Sok haaya go, fii dwam, sa̰a̰m ɗege ya labreya ge mangaɗam ga̰a̰l pul go, ka ndàa mam ya faa go, àa gaa guwa ge ɗimiya. 24Ne nda ge ame hateya ma mbo ya kore ne digi, àa jan ne go: Ba ge hateya, Ba ge hateya, mo kuwa go nè mbo swày no to de! Zeso kore digi, ngwabe sa̰a̰m mage sḭ̀ḭl, àa iyal se, sok kale mḛḛ cub. 25Guwa̰ jan num go: Hoɗ fareba ge ḛ ḛ mbe ma dii no de? Voo wan num, àa ka kee ajab me, àa ka jan ta ge ta buwal zì go: Ndu mbe no ɗaa, a huɗi ne, ge go wa ka hoɗ sa̰a̰m mage sḭ̀ḭl ma na wa ɗoo, àa wa ka za̰a̰ ne me de.

Ndu ge no ge on̰om ge sone ge see zonna

Mat 8.28-34; Mrk 5.1-20

26Àa deɗ-ɗa yabeya ge suwa ge suwal ga̰a̰l Geraza ne go, kaa ge suwa ge Galile ne ndwa nga. 27Sok ge Zeso ka̰a̰ na ko ya wa kal digi gaw, ndu ge suwal a̰me ɗu ge no ge on̰om ge sone ma gḛḛ-gḛḛ ge na zì mbo ya seɗ ne. Kee ya kaal ge gaa ya an swala, ne sok kàɗɗa kaɗ ge sḭḭ ma buwal zì me. 28Sok ge ka̰a̰ na ndwa kuwa Zeso, ɗege poɗ luuluu, guu na ko ge ne ndwa se, hee na ka̰a̰l digi jan ne go: Mo Zeso ge Dok ge digi vyaw Van, Mo ɓyare da ge mbi ta de? Mbi kaɗe mo kaɗe, za̰a̰ mbi yal to. 29Ndu mbe jin̰a ano mbe no ge dape, Zeso ho na wa ge on̰om ge sone pagal, ne wuwa zum ge ndu mbe zì. Ago kee ya kaal ge on̰om ge sone mbe tandaŋe ne no go. Àa ka koy ne vwalla se ge zul mage ɓyala walam ma, ɗaŋɗe, ka hal num gezi, on̰om ge sone mbe ka ee ne chiya mbo ge babur pul ma yà. 30Zeso ele ne go: Mo dḭḭl gyana de? Gwan ge ne janna go: Mbi dḭḭl vwag twam jan. Ago on̰om ge sone ma kaa gḛḛ ge ne zì. 31Àa kaɗe Zeso ge aa ta go, ne yin̰a maa ge ndu mbe zì mbo kan maa ge tugul ga̰a̰l ge ɗugul heleg se yà to.

32Ajo̰o̰ sok mbe go, vwag ge kosoŋ ma way ka zam kaŋ zam ge njal kin̰a go, on̰om ge sone mbe ma gwan kaɗe ne go ne ho maa vin̰a waɗ ge kosoŋ mbe ma zì. Ne sḛ hon num vin̰a. 33On̰om ge sone mbe ma ndage ge ndu mbe zì ya, àa waɗ ge kosoŋ ma zì. Kosoŋ mbe ma ɗege soo ge digi ya, àa zon ge wa kal digi mbo mangaɗam ga̰a̰l se yà, àa njoɗ mam gezi mɔɗwag. 34Sok ge nda ge koy num ma kuwa kaŋ mbe ge kê ma go, àa jay soo, àa mbo dasare fare mbe ge suwal ga̰a̰l diŋ, ge suwal ge jiyale ma diŋ me. 35Nda ge fare mbo seɗ num ma mbo ya, ndwa kuwa kaŋ ge kê mbe ma ge maa ndwa. Àa deɗ-ɗa ge Zeso ta, àa seɗ ndu ge on̰om ge sone ma ndage ge ne zì mbe kàɗɗa ge ne ko pul se, ne angal eeya se, ge ba̰a̰ ma na ta. Voo wan num me. 36Num ge kuwa zonna ge ndu mbe ne ge maa ndwa ma, ka wan maa ka̰a̰m fare pe go ndu ge kaa ge on̰om ge sone ma na zì mbe, ne see zonna pe gyana de. 37Ajo̰o̰ voo wuwa nda ge suwal ga̰a̰l ge Geraza diŋ-ge ma zì gḛḛ go ɗe, àa mbo ya jan Zeso go ne ɗege ge maa suwa go. Sok ge ndee faa ndwa gwanna go ɗe, 38ndu mbe ge on̰om ge sone ma ndage ge ne zì mbe, ka kaɗe ne ge aa tene go, ne n̰a na mboya dagre ge na. Ɗaŋɗe, Zeso vin ne to, jan ne go: 39Guwa̰ ge mo ka̰a̰m buwal zì yà, dasare kaŋ ge Dok kê mo num ma peɗ ge num ta. Ndu mbe gwan diŋ, dasare kaŋ ge Zeso kê ge na mbe ma ge nda ge suwal ga̰a̰l diŋ-ge ma ta peɗ.

Zonna ge gwale ge tuguɗi ne mage tanna ge Jayrus van ne

Mat 9.1, 18-26; Mrk 5.21-43

40Sok ge Zeso gwan deɗ-ɗa lee gene go, ɓase ge kaa se kaɗ da̰a̰re ne ma mbo ya kun ne. 41Sok mbe go, ndu a̰me ge àa ka tol ne Jayrus, ge kaa ga̰a̰l ge zok kee kaɗeya ge Yahuɗ ma way pagal deɗ-ɗa me. Mbo ya guu na ko ne ndwa se, ka gwarge tene sok kaɗe ne go go, ne mbo ya na diŋ, 42ge dape ne van ge gwale guwa ge del wol pɔgwa zi, ɗu kikiɗ ge ne tok go, ka kee tuguɗi ge gene ne mbo swày. Zeso sok mbo ge ne yà go, ɓase ma terse ne ya zì.

43Ge sok mbe go, gwale a̰me ɗu waɗme ge keeya del wol pɔgwa zi ge swàm na ta, [ge aa na kaŋ seɗɗa ma ya banna kakaɗag ndwa zon tene], ge ndu a̰me see vin̰a zon ne to me, 44ɓirsi yà bàba mbo taɗ Zeso ba̰a̰ wa ge ne guwa̰. Ge sok mbe go gaw, swàm ge ka kan ne ta mbo ya aaya. 45Zeso ele sok go: Ndu a̰me taɗ mbi ya go, a huɗi de? Ndu ge diige ka janna go ne na to. Piyer jan ne go: Ba ge hateya, nda ɓase, àa terse mo ja zì, àa ɓyan mo no lee gene me-lee gene me ɗe! 46Ɗaŋɗe, Zeso gwan ge ne janna go: Ndu a̰me taa mbi ɗaŋ, ago mbi ge kuwaya go pool a̰me waɗ ja zum ge mbi zì ya. 47Sok ge gwale mbe see go, àa kuwa kaŋ ge na kê mbe ya go, mbo ya guu na ko ne ndwa se ndaɗɗa ririg, ka wan fare ge ee na taɗ Zeso pe gezi kɔn̰al ge nda ndwa go peɗ, pe gyana ge na seɗ zonna ya no gaw. 48Zeso jan ne go: Mbi van, hoɗ fareba ge amo zon mo ya go. Mbo ge halas.

49Zeso gale be aa na fare faaya to peɗ, ndu a̰me ɗu ge ɗege no ge ga̰a̰l ge zok kee kaɗeya ge Yahuɗ ma way Jayrus diŋ ya, jan ne go: Lwage Ba ge hateya to, mo van wa dibi ya yà. 50Ɗaŋɗe, Zeso za̰a̰ fare mbe ma, jan ga̰a̰l ge zok kee kaɗeya ge Yahuɗ ma way go: Iigi tene to, ɗeŋew go mo kaa ge hoɗ fareba, mo van mà mon ge swày zì. 51Sok ge yin̰a diŋ yà, tele nda ge ɓase ma ya zum, n̰a diŋ yà ɗeŋew Piyer, Yohana, Jak me no, van gwale ba mage ne na̰ me. 52Nda ge sok mbe go ma ka fyalla, àa ka kiimi ta. Zeso jan num go: «Ḛ fiya to, be suu suu to, fii go dwam.» 53Sok mbe go, àa ka coɗ ta ge ne, ajo̰o̰ àa ge kuwaya tytyaɗ go van mbe suu suu. 54Ɗaŋɗe, sok ge àa wuwa zì yà, Zeso wan van gwale tok, tol ne ndaal ɗaɗ go: Van kale, kore digi. 55Sok mbe go, on̰om gwan-na ge ne zì, van gwale ɗege digi gaw, Zeso hoɗ na wa go àa ho̰ ne kaŋ zam. 56Van gwale ba ma ka kee ajab, ɗaŋɗe, Zeso hoɗ num na wa go, num jin̰a ndu a̰me fare mbe to.

Valgt i Øjeblikket:

Luk 8: kiaGRB

Markering

Del

Kopiér