Luk 6

Swa pagal halla dwam sabaɗ go

Mat 12.1-14; Mrk 2.23-28; 3.1-6

1Deɗ-ɗa dwam sabaɗ a̰me go go, Zeso ka kale ge gaaso ge geme ne wa go ge na nda ge ame hateya ma dagre. Sok mboya go, ne nda ge ame hateya ma ka orbe geme pagal sulla. 2Sok ge Farisi ma kuwa num, àa jan num go: Ge dape ḛ wa ka kee kaŋ ge àa ho̰ ḛ vin̰a kee ne to ge dwam sabaɗ go de? 3Zeso gwan ge num janna go: Ḛ be isi Maktub ge Dok ne pul sok ge jin̰a fare ge Daviɗ kaŋ ge ne kê ne to de? Dwam a̰me go ɗu, sok ge camal wa̰a̰ num ge na nda ma go, 4wuwa ge gur seɗ ta ge Dok ne zì no, zâ dupḛ ge àa nuusi num ge Dok pe ma no, ho̰ na nda ma no me to de? Dupḛ mbe ge àa ho̰ vin̰a go nda ge kee tuwaleya ma mbiya zam num ne ɗeŋew. 5Zeso gwan jan num iya go: Ḛ kuwa go mbi, Van ge Ndu ne, mbi ne ge pool ge faa fare ge dwam sabaɗ pagal.

Zonna ge ndu ge tok looɗeya ne

6Ɗeɗ-ɗa dwam sabaɗ a̰me ge ɗogle go, Zeso waɗ ge zok kee kaɗeya ge Yahuɗ ma way zì yà, ɗege hate nda. Ndu a̰me ɗu kaɗ sok mbe go tok matoson looɗeya. 7Nda ge hate eeya ge Moyiz ne mage Farisi ma dol maa ndwa keceɗ ge Zeso pagal go ne mà zon ndu ge dwam sabaɗ mbe go de, ge dape àa kaa ge dwaɗɗa ge wan ne ge fare a̰me. 8Ɗaŋɗe, kuwa num dwaɗɗa ma kuwa, jan ndu ge tok looɗeya go: Ɗege digi, mo mḛḛ ya nda tuwal zì go. Ne sḛ ɗege digi, mḛḛ ya nda tuwal zì me. 9Guwa̰ Zeso jan num go: Mbi ɓyare ele ḛ fare no: Nè eeya ma ho̰ vin̰a hon go, ge dwam sabaɗ go, àa ke ndu kwaɗa koo àa n̰a ne suuya de? Àa mo̰o̰ ndu on̰om koo àa n̰a ne banna de? 10Sok mbe go, an na ndwa ndil num peɗ, guwa̰ jan ndu ge tok looɗeya mbe go: Mwaɗe mo tok se yà. Kee mbe go me, ne tok seŋe ge mojo̰o̰ na kaa wal go. 11Ge ano mbe no pe, laa hoɗɗa waɗe nda ge hate eeya ge Moyiz ne mage Farisi ma pool. Àa ka ele ta ta buwal zì go maa see ma̰ fare ge ne pe de.

Talla ge nda ge temeya ge wol pɔgwa zi ma way

Mrk 3.13-19; Mat 10.1-15; Tkt 1.13

12Ɗeɗ-ɗa ge dwam mbe ma pul zì go, Zeso mbô ge njal kin̰a yà mbo kee kaɗeya, dwam ge na ndwa teŋleŋ, sok kaɗe Dok go. 13Sok ge sok kon̰ ya gezi, tol nda ge ame hateya ma ya, tal wol pɔgwa zi, hon num dḭḭl go nda ge temeya ma: 14Nda ge temeya mbe ma kaa Simo̰, ge ne sḛ chiya ne dḭḭl Piyer mage na na̰ van Andre, Jak, Yohana, Filib, Bartelemi, 15Mata, Tomas, Jak ge Alfe van, Simo̰ ge iyal kyarga ge na suwal pe, 16Jude ge Jak van, Yudas Iskariyoɗ me, ge mbo dee yaɗ Zeso ya gezi.

Fare hateya ge Zeso ne njal kin̰a go

Mat 5.2-12

17Zeso ndee ge njal kin̰a digi ya se ɓanna ge na nda ge ame hateya ma, mbo ya mḛḛ sok ta̰a̰sal ge nda ge ame hateya ma kaa go. Ɓase ge suwa Jude ma way ma, ge Jerusalem ne mage suwal ge mam wa go ge ma, ndwa go Tir mage Sido̰, àa kaɗ nɔnɔg ge sok mbe go waɗme. 18Àa mbo ya ndwa za̰a̰ fare mage ɓyare zonna pe, ge maa tuguɗi ma go. Nda ge kaa ge on̰om ge sone maa zì ma seɗ zonna waɗme. 19Ndu ge diige ka ɓyare vin̰a go na taa ne, ge dape pool a̰me ge zon nda ka waɗ ge ne zì ya zum, ka zon num peɗ me.

20Sok mbe go, Zeso hee na ndwa digi, ndil na nda ge ame hateya ma, jan num go:

Ḛ kee laa saal, ḛ ge no a̰se zì ma,

Ago muluk ge Dok ne ḛ ḛ ne.

21Ḛ kee laa saal, ḛ ge no camal ge sego ma,

Ago ḛ mbo hoɗege kaŋ zam to.

Ḛ kee laa saal, ḛ ge seɗ tiɗiya no ge sego ma,

Ago, Dok mbo iyal ḛ laa.

22Sok ge nda mbo kaɗ-ɗa ka sen ḛ, àa ka ɓyare ḛ ke baan ge maa to, àa ka jan fare ge sone ge diige pe peɗ, ndwa vḛḛne ḛ dḭḭl ge Van ge Ndu ne pe ɗe, ḛ ke laa saal. 23Ḛ ke laa saal, sok ge kaŋ mbe ma mbo deɗ ja ḛ pagal, ḛ kaa ge fafan̰ me, ge dape, poɗɗa ge ɓaŋlaŋ da̰a̰re ḛ go ge pḭḭ ma zì yà. Nda ge zwagre Dok wa ge ḛ ndwa zḛḛge ma, àa kê num mbe go waɗme.

24Woo! Ḛ ge gan njonjon̰ ma,

Ago ḛ see ḛ laa eyalla no gaw.

25Woo, ḛ ge an̰ no ge sego ma,

Ago camal mbo hun ḛ!

Woo, ḛ ge man no ge sego ma,

Ago ḛ mbo kaɗ ge kiimi zì,

Ge miim njɔnjwab ḛ ndwa go me!

26A kaŋ a̰se ne,

Kaɗɗa nda duwana ma peɗ kaɗ ge ḛ doreya.

Ago, num ba ma ka kee nda ge kee ta nda ge zwagre Dok wa ma mbe go no ba!

Fare hateya ge gele ta pagal

Mat 5.38-48; Rom 12.17-21

27Ɗaŋɗe, mbi jan ḛ ge za̰a̰ mbi ma go: Ḛ ngay laa wanna ge ḛ nda ge ho̰o̰l ma ta, ḛ kee nda ge sen ḛ ma kwaɗa me. 28Ḛ tare nda ge gene yal ya ḛ pagal ma wa. Ḛ kaɗe ge num ge kun hày ḛ pagal ma pe. 29Mbi jan ndu ge diige go: Kaɗɗa ndu a̰me byare mo ya gasa zì, seŋe ne lee gene waɗme. Kaɗɗa ndu a̰me harge mo ba̰a̰ ge yee gḛḛ ya, kaa ge be tele ne go ne ame mo ba̰a̰ ge pul zige to. 30Ndu ge diige ge ele a̰me ya ge mo tok go, ho̰ ne kaŋ mbe ge ele. Kaɗɗa ndu a̰me harge mo kaŋ seɗɗa ma, ele num pe daa to peɗ. 31Mbi jan ḛ iya go, ḛ ke nda ge ɗogle ma be go ca, kaŋ ge ḛ ɓyare go num kee ḛ num ma. 32Kaɗɗa go ḛ laa wan num ge laa wan ḛ ma ɗeŋew ɗe, ḛ kee ma̰ kaŋ ge ciciliŋ de? Nda ge kuwa Dok ge fareba to ma puy, num laa wan nda ge laa wan maa ma wan waɗme. 33Kaɗɗa ḛ ngay kwaɗa keeya ge nda ge kee ḛ kwaɗa ma ta ɗeŋew ɗe, ḛ kee ma̰ kaŋ ge ciciliŋ de? Nda ge kuwa Dok ge fareba to ma puy àa kee mbe go waɗme ɗe. 34Kaɗɗa ḛ hon gobso num ge ḛ ee ḛ jobreya no go num kin̰are poɗ ḛ ḛ gobso ma no, ḛ kee ma̰ kaŋ ge ciciliŋ de? Nda ge mbo laa ɓyareya ge Dok ne pagal to ma hon maa ka̰a̰m gobso mbe go waɗme ge dwaɗɗa ge go num kin̰are guwa̰re maa kaŋ mbe tem. 35Nde-nde ge ḛ laa wan ḛ nda ge ho̰o̰l ma, ḛ ke nda duwana ma kwaɗa mage hon nda gobso be ge dwaɗɗa ge go àa kin̰are guwa̰re ḛ num byalam go to. Ḛ poɗɗa mbo kaɗ ɓaŋlaŋ, go mbe no, ḛ mbo kaɗ Dok ge no pḭḭ ma zì yà van ma me, ge dape, ne sḛ kwaɗa ge nda ge kuwa kwaɗa to mage nda ge laa pisil ma ta. 36Ḛ kaa nda ge kuwa nda a̰se ma ge mojo̰o̰ ḛ Ba no ndu ge kuwa nda a̰se go.

Fare eeya ndu pagal

Mat 7.1-5, 15-20; 12.33-37

37Ḛ kṵṵ sariya ge ndu a̰me pagal to, Dok mbo kun ḛ sariya to me. Ḛ ee dṵṵl ge ndu pagal to, Dok mbo ee dṵṵl ge ḛ pagal to waɗme, ḛ pore nda, Dok mbo pore ḛ waɗme. 38Ḛ ho̰ nda kaŋ, Dok mbo hon ḛ waɗme. Dok mbo ngay ḛ kaŋ ma ngayya ge go ḛ mbyaɗ kwate num digi to, ibi num, gasage num, gaa surliya pipiw. Ago Dok mbo kee ḛ kaŋ ge ḛ kee nda gegene ma ne me.

39Guwa̰, Zeso gwan kee num fare sḭḭ a̰me ɗu waɗme go: Ndu ge ɓaal ge pool wan na kon ɔwara de? Num sḛ ma jwàg ge pool deɗ ge tugul se to de? 40Ndu ge ame hateya kaɗ ge ba ge hate na pagal digi to, ɗaŋɗe, ndu ge ame hateya ge see hateya mbyaɗɗa tab ge diige, mbo kaɗ ge na ba ge hate na go. 41Kee pe gyana, mo wa ka kuwa sugu ge mo na̰ van ndwa zige ɗag ɗoo, mo wa kuwa ɔwara murguli ge amo sḛ zige to me de? 42Koo kee pe gyana mo wa jan mo na̰ van go: N̰a mbi he sugu van ge lerbeŋ ge mo ndwa zige gezi ɗoo, zane no, mo kuwa ɔwara murguli go mo ndwa zige to me de. Ge mbuɗi nda ndwa, ee pe ndage ɔwara murguli ge mo ndwa zige gale ɓiya, guwa̰ go mo wa kuwa gyana ge mbo ndage sugu ge mo na̰ van ndwa zige gezi me.

43A fareba go ɔwara a̰me ge kwaɗa ge tol ndwa ge sone to, koo ge sone tol ndwa ge kwaɗa to me. 44Ago nda kuwa ɔwara ge kwaɗa ge diige ge ne ndwa tolla ta. Ndu ge hel fere ge ɔwara baŋre digi koo hel on̰or ndwa tolla ge kore za̰a̰l digi go de? 45Ndu ge ɗeŋer ngay kaŋ keeya ge kwaɗa, ndwa go ne dul wa kwaɗa. Ge sone, ngay kaŋ keeya ge sone ma, ndwa go ne dul wa sone me. Ago, a kaŋ ge pee no ndu dul wa zì ma, waɗ-ɗa ne wa zum ne.

Mboya ge fare ge Dok ne pagal

Mat 7.21-29; 2Pi 1.5-10

46Ge dape ḛ wa ka tol mbi ɗaɗag go: Bagezok! Bagezok ɗoo! Ḛ wa ka kee kaŋ ge mbi jan ḛ num ma to de? 47Mbi ɓyare ngay ḛ go, ndu ge diige ge mbo ge mbi pe go, ame mbi fare ma, kee tèmel ge num pagal me, ne dḭḭ ge da go de: 48A dinna ge ndu a̰me ge sḭḭ zok a̰me, al sok se yà ɗugul heleg, dol ne pe ge njal pagal go. Mam hḛḛreya mbo ya, muni soor ya zok mbe ta, be gul ne to, ge dape zok mbe sḭḭ kwaɗa. 49Ɗaŋɗe, ndu ge za̰a̰ mbi fare ma, ka kee tèmel ge num pagal go to, a dinna ge ndu ge sḭḭ zok ge suwa pagal ɓal, be al ne pe to go. Sok ge mam muni soor ya zok mbe ta, zok mbe kan se gaw, burmi burmiya ge go ndu daa gwan kuwa ne pe to peɗ.

Valgt i Øjeblikket:

Luk 6: kiaGRB

Markering

Del

Kopiér