Luk 5

Tolla ge nda ge ame hateya ge zḛḛge ma way

Mat 4.18-22; Mrk 1.16-20

1Ɗeɗ-ɗa dwam a̰me go go, Zeso mḛḛ mangaɗam ga̰a̰l ge Jenezareɗ ne wa go, ɓase ma ndaa ta ya ne ta zì ndwa za̰a̰ fare ge Dok ne, àa terse ne ya zì. 2Kuwa faa ma zi yabeya ge wa kal go, nda ge swaɗ soso ma kan maa ko ja digi usi maa kuwal ma. 3Zeso ndee ge faa a̰me go ɗu, a Simo̰ nee ne, kaɗe ne go ne ɓin̰a maa ge wa kal zì ya zum nde. Guwa̰ kaɗ na pe se, ka hate nda mbe ma ge faa mbe pul-la.

4Sok ge aa na fare hateya go, jan Simo̰ go: Ḛ ɗiibi, ḛ mbo dol kuwal ge ɗugul zum ya gale. 5Simo̰ gwan ge ne janna go: Ba ge hateya, i duwa ɗaal ge ndwa petere sok swaɗ soso go, i be wan a̰me to, ɗaŋɗe, ge fare ge mo jin̰a no pe ɗe, i ge mbi ka̰a̰m ma mbo dol kuwal-la gale. 6Sok ge àa doo kuwal go, num kuwal mbo ya ceŋe ge sini, ge go ɓyare ka taabe gezi. 7Àa tol maa ka̰a̰m ge no faa ge ɗogle go ma go, num mbo ya mbaa maa ndwa zwal kuwal mbe ya digi. Àa mbo ya mbaa num ge zwal kuwal-la digi, àa huy faa mbe ge zi ma lalabaɗ, guwa ge ɗimiya. 8Sok ge Simo̰ ge Zeso ho̰ ne dḭḭl go Piyer kuwa kaŋ mbe ma go, guu na ko ge Zeso ndwa se, jan ne go: Bagezok, hiri tene ge ziya nde, ge dape, mbi ndu ge kee sone ne. 9Sok mbe go, voo mbo ya wan Simo̰, ɓanna ge na ka̰a̰m ge kaa dagre ge na ma, ge sini ge maa wa̰a̰ ge gḛḛ ceɗeɗ mbe pe. 10Voo mbo ya wan Jak mage Yohana ge Zebede van ma, num ka̰a̰m ge mbo ya wan num tok ma waɗme. Ɗaŋɗe, Zeso jan Simo̰ go: Chiya voo to, a gaa mbo zḛḛ no, mo mbo kaɗ ba ge gene nda duwana ma ya ge mbi ta. 11Sok mbe go, àa zwal maa faa ma ya wa kal digi, àa n̰a maa kaŋ ma peɗ, àa ɓan mboya dagre ge Zeso.

Zonna ge ndu ge kṵṵ swàm ne

Mat 8.2-4; Mrk 1.40-45

12Dwam a̰me ɗu, Zeso kaa ge suwal ga̰a̰l a̰me ge no suwa ge na no ne go diŋ, ndu a̰me ge kṵṵ swàm njɔnjwaɗ deɗ-ɗa ne ta. Sok ge kuwa Zeso go, kubi na pul ge suwa se, ka gwarge tene ne ta, janna go: Bagezok, kaɗɗa mo vinna, mo ge pool zon mbi, mbi wa haɗ kɔn̰al. 13Zeso ee na tok ge ne ta, jan ne go: Mbi vinna go, see zonna. Ge sok mbe go gaw, ndu ge kṵṵ swàm mbe bol haɗ somndol mbambala, haɗ kɔn̰al me. 14Guwa̰ Zeso tele ne go, ne jin̰a ndu a̰me fare mbe to. Ɗaŋɗe, ne mbo ngay tene ge ba ge kee tuwaleya ta, ne wa gaa hon bobo ge Moyiz ho na wa go, ne kaa sayda ge nda ta peɗ go, na zon-na go, na haɗ-ɗa kɔn̰al.

15Sok mbe go, nda ka faa ne fare ɗogle-ɗogle, nda ka mbwaɗɗa lulum za̰a̰ ne mage ka ɓyare vin̰a ge zonna ne ge ne ta, ge maa tuguɗi ma go. 16Kaɗɗa ge Zeso ɗe, ge mojo̰o̰ a ha̰a̰le keeya go, mbo go yalaŋ, ge sok ge kṵwa̰ no go to yà, ka kee kaɗeya.

Zonna ge ndu ge looɗeya ne

Mat 9.1-8; Mrk 2.1-12

17Ɗeɗ-ɗa go, dwam a̰me go ɗu Zeso wa ya ka hate nda, Farisi mage nda ge hate eeya ge Moyiz ne ma kaa ne ziya guwa. Àa mbo ge suwal van ge jiyale ge Galile ne mage Jude ne ma yà, ge Jerusalem yà me. Bagezok Dok ka hon ne pool ge zon nda ge tuguɗi ma. 18Sok mbe go, nda a̰me ma in ndu ge looɗeya a̰me ya ɗu, ge saŋal go, àa ka ɓyare vin̰a ge maa wuwa ge ne diŋ yà, maa wa mbo ee ne ge Zeso ndwa se. 19Ajo̰o̰ nda kaa gḛḛ ge be ɗoo to ɗe, àa seɗ vin̰a ge waɗ ge ne, ne ta zì yà to. Àa ndee ge ne zok pagal digi, àa zuɗ zok pagal, àa siri ne ge digi fiiya na saŋal go ge tàal, ge Zeso ndwa se, nda buwal zì. 20Sok ge Zeso kuwa hoɗ fareba ge num way go, jan ndu ge looɗeya mbe go: «Mbi pore mo sone ma ya go.» 21Nda ge hate eeya ge Moyiz ne mage Farisi ma mbo ya iigi digi giliw, ndu ge diige ɗege ka ele tene go: Ndu mbe daa jan fare ge go mbe ge dape de? Daa jan fare ge sone kakatag ge Dok pagal ge dape de? A huɗi ne ge pool ge pore sone ma, a be Dok sḛ ɗu to de? 22Ge sok mbe go waɗ, Zeso kuwa num dwaɗɗa ma, gwan ge num janna go: Ge dape dwaɗɗa ge go mbe ma wa kaɗ ḛ dul wa ma zì de? 23Jan ndu go: Mbi pore mo sone ma go me no, Ɗege digi mḛḛya mo ko ma pagal me ɗe, a ge diige dṵṵl gḛḛ ne zoo de? 24Ge sego, mbi kee ḛ kuwaya go, Van ge Ndu ne ge pool ge suwa pagal, ge pore nda duwana ma num sone ma. Guwa̰, jan ndu ge looɗeya mbe go: Ɗege digi, hê mo kaŋ fiiya, mo mbo mo yà. 25Ge sok mbe go baba, ɗege digi ge num ndwa go, hee saŋal ge na fii tuguɗi ne go mbe, ka sale Dok na ndwa zḛḛ yà, sok mbo na yà go. 26Nda peɗ ka kee ajab, voo wan num, àa ɗege sale Dok, àa ka janna go: Màno, i kuwa kaŋ ge i kuwa num dwam ɗu to ma ya no!

Tolla ge Zeso too Levi

Mat 9.9-17; Mrk 2.13-22

27Ge fare mbe guwa̰, Zeso waɗ-ɗa zum, kuwa ndu ge chal siyal a̰me, ge àa ka tol ne Levi, kàɗɗa ge na sok tèmel ge chal siyal ne go. Zeso jan ne go: Mbo ya mbi pe go. 28Levi ɗege ge na sok mbe go, n̰a na tèmel ge seɗ na bware mbe, mbo ge ne pe yà. 29Guwa̰, Levi kee vḛḛso kaŋ zam ge ga̰a̰l ge Zeso pe ge na diŋ. Nda ge chal siyal mage nda ge ɗogle ma kaɗ nɔnɔg ge sok mbe go, àa ka zam kaŋ zam ge num dagre. 30Farisi mage maa ka̰a̰m ge hate eeya ge Moyiz ne ma iigi digi, àa ka jan Zeso nda ge ame hateya ma go: Ge dape ḛ wa ka zam kaŋ zam dagre ge nda ge chal siyal mage nda ge kee sone ma me de? 31Sok ge num fare mbe ma dee ge Zeso tɔgwa zì go, jan num go: «A be nda ge duul pool ma ɓyare ndu ge zon nda pe ne to, ɗaŋɗe, a num ge tuguɗi ma. 32Mbi be mbo ya, ge nda ge temel ma pe to, ɗaŋɗe, tol nda ge kee sone ma, go num dee ya seŋe ta se.»

Fare eleya ge mam njuwal wanna pagal

33 Farisi ma jan Zeso go: Nda ge ame hateya ge Yohana ba ge kee nda baptem ne ma wan mam njuwal mage kee kaɗeya, ge i i ma kee mbe go waɗme. Sok mbe go me ɗe, mo nda ma zam kaŋ zam ge maa ɓyare go. 34Zeso gwan ge num janna go: Ḛ ge pool ee gwale jin̰al obe kondore ma wan mam njuwal teg ge gwale jin̰al obe gale no go ge num de? 35Dwam ma mbo mbo ya, nda duwana ma mbo wan gwale jin̰al obe ge num buwal zì, sok mbe go gale, àa wa ɗege wan mam njuwal go.

Kaŋ ge sabar mage kaŋ ge jin̰al

36Zeso jan num fare sḭḭ a̰me ɗu waɗme go: Ndu a̰me ge ɔwabe ba̰a̰ wa ge jin̰al wa dyan ba̰a̰ ge haɗ-ɗa kamal ge ne go de? Kaɗɗa na keeya mbe go, ba̰a̰ wa ge jin̰al mbe gwan taabe ge kamal na ta yà mɔɗwag, àa ame ta to.

37Ndu a̰me ge kan on̰or jìn̰al ge jin̰al ge ɗutulu ge kamal ma zì go de? Kaɗɗa na keeya mbe go, on̰or jìn̰al ge jin̰al fol ɗutulu mbe ma gezi, ɓul suwa zì, ɗutulu mbe ma daa gwan mbaa a̰me to. 38Ɗaŋɗe, ke kwaɗa go àa kan on̰or jìn̰al ge jin̰al ge ɗutulu ge jin̰al ma zì. 39Nè ge kuwaya go, ndu a̰me ge gwan ee na dwaɗɗa ge on̰or jìn̰al ge jin̰al pagal to, kaɗɗa na tare on̰or jìn̰al ge puuri ya go. Ago, gaa janna go: Mbi laa wa̰a̰ on̰or jìn̰al ge puuri.

Valgt i Øjeblikket:

Luk 5: kiaGRB

Markering

Del

Kopiér