Luk 3

Fare oyya ge Yohana ba ge kee baptem ne

Mat 3.1-12; Mrk 1.1-8; Yoh 1.6-8, 19-28

1Del ge wol pɔgwa nuwan̰ ge Sezar#3.1 Sezar pe wanna wa garab go: Gan ga̰a̰l ge waɗe, ge ka no suwal ga̰a̰l Rom diŋ. Tiber ne, ge muluk ge na ne zì, sok mbe go, Pons Pilaɗ wa ya goformo̰ ge Jude ne, Heroɗ ge gan ga̰a̰l ge Galile ne, ne na̰ van Filib gan ga̰a̰l ge suwa ge Iture mage Trakoniɗ ne, Lisaniyas gan ga̰a̰l ge Abilen ne me, 2ge zaman ge An mage Kayf ga̰a̰l ge nda ge kee tuwaleya ma way ma ne go, Dok mbo ya ɓyan na fare ge Yohana ge Zakari van tok go, babur pul yà. 3Yohana ɗege anna ge suwa ge mangaɗam ga̰a̰l Urdun ziya guguwa ma go peɗ, ka oy fare gezi waŋ go: «Ḛ kee baptem ge ngay go ḛ seŋe ta ja se#3.3 A eya mboya ge laa ɓyareya ge Dok ne pagal., Dok wa pore ḛ ge ḛ kaŋ keeya ge sone ma go gezi.»

4Sok kee ano mbe go, kee fare ge maktub ge ndu ge zwagre Dok wa Ezay ne jan no go:

«Ano a ka̰a̰l ge ndu ge oy no ge babur pul go nee ne,

Ḛ ca vin̰a ge Bagezok pe,

Ḛ haa vin̰a ma temel ge ne pe me.#3.4 Caa vin̰a mage haɗ vin̰a ma temel, a nuusi ko pul mage nuusi nda duwana ma dul wa ma, ndwa ame Bagezok Zeso Krist.

5Ḛ mbuu sok ge baal ge diige ma peɗ,

Ḛ haa sok njal ma se yà sataɗ,

Ḛ seŋe vin̰a ge wargal gɔgɔrɔŋ ma temel taɗ,

Ḛ haa sok ɓuɓugur ma ta̰a̰sal

6Ndu ge diige peɗ mbo kuwa monna ge Dok ne gezi tyatyaɗ.»#Eza 40.3-5.

7Nda gḛḛ ka mbo ya ge Yohana ta, ne kê maa baptem, ne sḛ ka jan num go: Rusu ge dḭḭ ta ge gole go ma, a huɗi hate ḛ chiya twam ge Dok ne ge mbo no ya voo ne de? 8Ḛ mbo mboya ge jwab ge ngay go ḛ seŋe ta ja se. Ḛ kaa ge be ee ḛ pagal zì go: I mbo seɗ monna, ge dape i sḛ ma daa Abraham baŋ ma ne kade to. Ago mbi jan ḛ zum waŋ go, Dok ge pool seŋe njal ge ḛ kuwa num mbe ma no ma Abraham baŋ ma. 9Cay ee ya ee zoo ge ɔwara ma pe go, ɔwara ge diige peɗ ge tol ndwa ge kwaɗa to, àa chal ne gezi, àa dol ne ol zì.

10Ɓase ma ka ele ne go: Dok ɓyare ge i ta ma̰ kaŋ de? 11Gwan ge num janna go: Kaɗɗa ndu a̰me ge ḛ buwal zige go ge ba̰a̰ zi, ne ɔwabe ɗu hon ndu ge no be ba̰a̰, ndu ge no go ge kaŋ zam na diŋ, ne ke mbe go ca.

12 Nda ge chal siyal ma mbo ya waɗme go Yohana ke maa baptem, àa ele ne go: Ba ge hate nda, Dok ɓyare ge i ta ma̰ kaŋ de? 13Jan num go: Ḛ ele kaŋ ge àa ho wa ge eeya ma ta go àa kê num ma ɗeŋew. 14Asagar ma ele ne waɗme go: I ɗe, Dok ɓyare ge i ta ma̰ kaŋ de? Gwan ge num janna go: Ḛ harge ndu a̰me kaŋ to, ḛ kun hày ge ndu pagal to, ɗaŋɗe, ḛ ke tii ge poɗɗa ge àa poɗ ḛ ɗeŋew.

15Ajo̰o̰ ɓase ma sok da̰a̰reya go, ndu ge diige ka ele tene go Yohana mbe sḛ no ne kaɗ mà Krist, ndu ge Dok taa nee ne to de. 16Sok mbe go, Yohana gwan ge nda mbe ma peɗ janna go: Kaɗɗa ge mbi, mbi kee ḛ baptem ge mam se ge, ɗaŋɗe, ndu ge pool gḛḛ waɗeya, mbo ya, mbi be mbyaɗ ge saa ne tyako ma tàal to peɗ. Ne sḛ mbo kee ḛ baptem ge On̰om ge Harcal mage ol. 17A ge ta̰a̰l in̰ale swa ge na tok go, mbo in̰ale na swa gezi mɔɗwag, gisi mboo mbo kan ne ge ol ge piri to zì yà, ɗaŋɗe, kwate na swa ndwa ge hal se. 18Sok faa ɓase ma fare ge ɗogle ma gḛḛ-gḛḛ go, dee ya jan num Fare ge Kwaɗa ge Dok ne no.

Wanna ge Yohana ne daŋay zì

19Yohana mḛḛre Heroɗ ge gan ga̰a̰l waɗme, ge ne hee Herodiyaɗ, ge na na̰ van gwale pe, ge kaŋ keeya ge ne ne ge sone ge dogle ma pe peɗ me. 20Ge fare mbe no pe, gwan waɗ sone ge waɗe mbe ge zḛḛge zì iya, sok dibi Yohana ge daŋay zì go.

Baptem ge Zeso ne

Mat 3.13-17; Mrk 1.9-11; Yoh 1.32-34

21Sok ge Yohana ke ɓase ma peɗ baptem go, kee Zeso baptem waɗme. Guwa̰ ge ke baptem go, Zeso ɗege kaɗeya, pḭḭ tyan gezi, 22On̰om ge Harcal siri ge digi ya gelel ne pagal dinna ge maale go. Nda za̰a̰ ka̰a̰l a̰me ge pḭḭ zì ya, janna go: Mo mbi van ne, mbi laa wa̰a̰ mo gḛḛ, mbi sḛ kee tii ge mo pe.

Pe rusu cemeya ge Zeso ne

23Sok ge Zeso ee pe kee na tèmel go, ne del ka guwa ge del tapool ɗu. Nda ka dwaɗɗa go ne Jozef van ne, Jozef ge Eli van, 24Eli ge Mataɗ van, Mataɗ ge Levi van, Levi ge Melki van, Melki ge Yanay van, Yanay ge Jozef van, 25Jozef ge Matatiyas van, Matatiyas ge Amos van, Amos ge Nahum van, Nahum ge Esli van, Esli ge Nagay van, 26Nagay ge Maɗ van, Maɗ ge Matatiyas van, Matatiyas ge Semeyin van, Semeyin ge Yosek van, Yosek ge Yoda van, 27Yoda ge Yohana van, Yohana ge Reza van, Reza ge Zorobabel van, Zorobabel ge Salasiyel van, Salasiyel ge Neri van, 28Neri ge Melki van, Melki ge Adi van, Adi ge Kosam van, Kosam ge Elmadam van, Elmadam ge Er van, 29Er ge Zeso van, Zeso ge Eliyazar van, Eliyazar ge Yorim van, Yorim ge Mataɗ van, Mataɗ ge Levi van, 30Levi ge Simeyo̰ van, Simeyo̰ ge Yudas van, Yudas ge Jozef van, Jozef ge Yonam van, Yonam ge Eliyakim van, 31Eliyakim ge Meleya van, Meleya ge Mena van, Mena ge Matata van, Matata ge Natan van, Natan ge Daviɗ van, 32Daviɗ ge Jese van, Jese ge Obeɗ van, Obeɗ ge Buwaza van, Buwaza ge Sala van, Sala ge Nason van, 33Nason ge Aminadab van, Aminadab ge Admin van, Admin ge Arni van, Arni ge Esrom van, Esrom ge Perez van, Perez ge Juda van, 34Juda ge Jakob van, Jakob ge Isak van, Isak ge Abraham van, Abraham ge Tera van, Tera ge Nakor van, 35Nakor ge Serug van, Serug ge Rehu van, Rehu ge Peleg van, Peleg ge Eber van, Eber ge Sala van, 36Sala ge Kaynum van, Kaynum ge Arpakaɗ van, Arpakaɗ ge Sem van, Sem ge Nowe van, Nowe ge Lemeg van, 37Lemeg ge Matusalem van, Matusalem ge Enok van, Enok ge Yereɗ van, Yereɗ ge Malaleyel van, Malaleyel ge Kaynum van, 38Kaynum ge Enok van, Enok ge Seɗ van, Seɗ ge Adam van, Adam Dok kaŋ dolla ne.

Valgt i Øjeblikket:

Luk 3: kiaGRB

Markering

Del

Kopiér