Luca 24

Jesú chok'ae p'irabarida

Mateo 28:1-10; Marco 16:1-8; Juan 20:1-10

1Tomione tap'ededa wẽrarã Jesú t'ɨbaridaadamá wãsidama. Ãchia k'ak'ua p'ɨrɨpataɨ k'era oodada ateewãsidama. [Ãchi ome waapẽarã wẽrarã sida wãsidama.]#24:1 Griego pedeade chi eda waapẽarã k'art'ade pedea corchetede bɨ newẽma. 2Maamina mawara waibɨa bɨpa chi uria jõat'ɨ bada ewa bari bɨ unusidama. 3Eda wãutade Tachi Chipari Jesú k'ak'ua ununaé pasima. 4Mãɨpuru ãchia k'awa k'ɨ̃risiadaé pasima. Mãɨya bɨde ãchi k'ait'a ẽpẽra ume unupisidama. Neet'á achiterrea jɨ̃ p'anasidama. 5Mãɨ k'orea wẽrarã minachia p'eradak'ari sĩraporode k'op'aneenak'ari, ãchi tau bɨɨrɨ ĩjũamá t'ɨpisidama. Mãɨne chi ẽpẽrarãpa ãchiá jarasidama:

—¿K'ãre k'orea mãrapa chok'ae bɨ piudaadarã t'ãena jɨrɨ p'anɨma? 6Ichi nãma bɨwẽma chok'ae p'irabarida pẽra.#24:6 Ichi nãma bɨwẽma chok'ae p'irabarida pẽra. Griego pedeade chi eda waapẽarã k'art'ade mãɨ newẽma. Mãɨ wapida Galileade p'anasidaɨde ichia mãrá jarada k'ɨ̃risiat'ɨ. 7Ichia nãɨya jarasima: “Mɨ, chi Ẽpẽra Warra ẽpẽerã k'achiarã́ jita teadai p'anɨma. Mɨ k'urusude peadaipɨ, maamina ewari ũpeaɨde chok'ae p'irabariipɨ”.#Luca 9:22; 18:31-33.

8Mãɨneepuru wẽrarãpa k'ɨ̃risiasidama Jesupa mãɨya jarada. 9Ara mãɨne jĩitea wãnak'ari Jesupa peedaɨrã once p'anɨa mãɨnepa ãarea waapẽarã́ ãchia ununana nepɨrɨsidama. 10María Magdalenapa, Juanapa, Santiago nae Mariapa, waapẽarã wẽrarã ãchi ome p'anɨ pida Jesupa peedaɨrã́ mãɨya nepɨrɨsidama. 11Maamina ãchia chi wẽerãpa paritua pedeamaa p'anɨane a k'ɨ̃risiasidadeepuru, ĩjãanaé pasima. 12Maamina Pedro mãɨ Jesú t'ɨbaridaadamá p'ira wãsima. Jãjorrea k'obeek'ari chi uriade eda ak'ɨside chi k'ak'ua pɨra bada chi porobat'u unusima. Mãɨ k'orea k'awa k'ɨ̃risiawẽa tedea wãsima.

Emaú p'uurudea wãpataɨ ode nipadada

Marco 16:12-13

13Ara mãɨ ewaride Jesude ĩjãapataɨrã ume Emaús p'uuru chak'edea wãuta pasima. Mãɨ p'uuru Jerusalenepa t'ɨmɨawẽa bɨma.#24:13 T'ɨmɨawẽa bɨma. Griego pedeade nãɨya bɨ bɨma: sesenta estadia. Mãɨ once kilómetro jĩra bɨma. 14Ãchia Jesú jõma mãɨyana k'orea pedea nipasidama. 15Mãɨya pedea wãutade Jesú ãchimá orrobarik'ari, ãchi ome wãpodosima. 16Maamina Jesú mãɨya bɨt'a ãchiá k'awapié pasima. 17Mãɨne Jesupa ãchiá idisima:

—¿Mãrapa k'ãre nepɨrɨ wãutama?

Mãɨ ũrisidaɨde k'ĩra piawẽa bai nɨp'aneesidama.#24:17 Mãɨ ũrisidaɨde k'ĩra piawẽa bai nɨp'aneesidama. Griego pedeade chi eda waapẽarã k'art'ade bɨ bɨma: ¿K'ãre k'orea k'ĩra piawẽa p'anɨma? 18Aba Cleop'á apataɨpa p'anoosima:

—Chi ẽpẽerã chok'ará Jerusalene cheepɨrɨdadepema ¿Pɨapuru atua bɨk'ãra nãɨ ewaride ãarea mãɨyana?

19Jesupa ãchiá idisima:

—¿K'ãret'a jara p'anɨma?

Ãchia p'anoosidama:

—Jesú Nazaré k'orea jara p'anɨma. Ichia ooda mãɨnepa jarada k'awapisima ichi Tachi Ak'õre pari pedeaparipɨ. Tachi Ak'õrepa mãɨnepa p'uurudepemarãpa ichi pia unusidama. 20Maamina p'uuru minachia k'awa p'anɨrãpa mãɨnepa p'aarerã chi mãɨrã chaarearãpa ichi chi Romanepema chaarearã́ teasidama, mãɨrãpa peapadaade adamẽrá. Maapae k'urusude barijira bɨk'ari peasidama. 21Ichiapuru tachi Israel p'uuru nepɨra pará bɨ k'aripayade a k'ɨ̃risia p'anasima. Maamina ichi peadada idiipa ewari ũpea pa bɨma.

22Maamina taidiidepemarã wẽerãpa jaradada k'orea tai k'awa k'ɨ̃risiadawẽa p'aneesidama. Ãchi idi tap'ededa ichi t'ɨbaridaadamá wãsidama. 23Chi k'ak'ua ununawẽ pẽra taimá jarade chesidama ãchia Tachi Ak'õrepa ɨt'aripa peedarã unusidaɨt'a. Mãɨrãpa ãchiá jarasidama Jesú chok'ae p'irabarisit'a. 24Mãɨ k'orea waapẽarã taidiidepemapa ak'ɨde wãsidama. Ichi t'ɨbaridaadamá ara wẽerãpa jaradada jĩra unusidama. Maamina ichi ununaé pasima.

25Mãɨpuru Jesupa ãchiá jarasima:

—¡Jõma Tachi Ak'õre pari pedeapataɨrãpa jaradada mãrapa ĩjãanawẽa p'anɨma! ¡Mãra k'ɨ̃risia nea p'anɨma! 26¿Tachi Ak'õrepa Tachi K'aripaparí teai jarada chi Choma beei naena minachia mĩa baiwẽ pasik'ãra?#Isaía 53:7-12.

27Maapae Tachi Ak'õre k'art'ade ichi k'orea bɨdada ãarea k'awa jarasima. Moisepa bɨda mãɨnepa Tachi Ak'õre pari pedeapataɨrãpa bɨdada ãarea k'awa jarasima.

28Mãɨya ãchi wãuta pada p'uurudea chesidama. Mãɨne Jesú jĩp'a wãru pasima. 29Maamina ãchi ome beemẽrá nãɨya minachia chichupuria idisidama:

—Ewari k'iupodo pẽra wãrãse. Tai ome beese.

Mãɨpuru ãchi ome beesima. 30Nek'outade Jesupa p'ana atak'ari Tachi Ak'õrea pia jarasima. T'oet'aak'ari ãchiá teasima. 31Mãɨneepuru Tachi Ak'õrepa ãchiá k'awapisima Jesú mãɨya bɨt'a.#24:31 Ãchiá k'awapisima. Griego pedeade nãɨya bɨ bɨma: Ãchi tau uruasidama. Maamina Jesú ara mãɨne wẽpasima. 32Mãɨne ãchi tuaba nãɨya jarasidama:

—Ichia Tachi Ak'õre pedea k'awa jara nipaside ¿tachi minachia arapá p'ananaé pasik'ãra?#24:32 Tachi minachia arapá p'anana. Griego pedeade nãɨya bɨ bɨma: Tachi sõ wãsia p'aneesidama.

33Ara mãɨne ãchi jĩitea Jerusalenea wãsidama. Mãma Jesupa peedaɨrã once p'anɨ waapẽarã ome chi ará jere nɨbɨ unusidama. 34Mãɨrãpa nãɨya jara p'anasidama:

—¡Tachi Chipari Jesú piarã chok'ae p'irabarisima! Simonoa ichi unupisima.

35Ara mãɨne ãchia nepɨrɨsidama ode mãɨyana. Ãchia jarasidama:

—Jesupa p'ana t'oet'aaside taipa k'awasidama ichi mãɨya bɨt'a.

Jesupa peedaɨrã́ ichi unupida

Mateo 28:16-20; Marco 16:14-18; Juan 20:19-23

36Wapida mãɨya nepɨrɨmaa p'anɨne Jesú ãchi esa bai nɨbee chesima. Maapae ãchiá jarasima:

—¡Ne k'ɨ̃risiawẽa p'anat'ɨ!

37Mãɨ unusidaɨde ãchi minachia p'erasidama, ichi jaoret'a unu p'anɨane a k'ɨ̃risiasida pẽra. 38Maamina Jesupa ãchiá jarasima:

—¿K'ãre k'orea mãra p'era p'anɨma? ¿K'ãre k'orea ĩjãanawẽa p'anɨma mɨ chok'ae p'irabarisit'a? 39Mɨ jua, mɨ jĩru sida ak'ɨt'ɨ. Mɨpɨ. Mɨ k'ak'ua t'õmarit'ɨ. Ẽpẽra jaore k'ak'ua newẽa baparima, mãɨne ak'ɨt'ɨ: mɨ k'ak'ua pará bɨma.#24:39 K'ak'ua. Griego pedeade nãɨya bɨ bɨma: chi chiera mãɨnepa bɨɨrɨ.

40Mãɨya jarak'ari ichi jua mãɨnepa jĩru ak'ɨpisima.#24:40 Griego pedeade chi eda waapẽarã k'art'ade mãɨ versículo newẽma. 41Maamina arapaapa ãchia wapida p'ue ĩjãanaé pasima. Ãchia k'awa k'ɨ̃risiadaé pasima. Mãɨ k'orea Jesupa ãchiá nãɨya idisima:

—¿Nãma chik'o uru p'anɨk'ãra?

42Mãɨ k'orea ãchia Jesua beta paada ãpia beet'aadak'ari teasidama. Jɨrrɨjõ sida teasidama.#24:42 Jɨrrɨjõ sida teasidama. Griego pedeade chok'ará k'art'ade mãɨ newẽma. 43Ara mãɨne jitak'ari ãchi k'ĩrari k'osima.

44Mãɨya bak'ari ãchiá jarasima:

—Mɨ wapida mãra ome baside jara bapachima mɨ k'orea naa bɨdada jõma mãɨyai bɨ. Mãɨ Moisepa bɨsima, Tachi Ak'õre pari pedeapataɨrãpa bɨsidama, mãɨnepa Salmo k'art'ade pida bɨ bɨma.

45Maapae Jesupa ãchiá k'ɨ̃risia teasima Tachi Ak'õre pedea k'awadamẽrá.#24:45 Ãchiá k'ɨ̃risia teasima. Griego pedeade nãɨya bɨ bɨma: ãchi k'ɨ̃risia ewasima. 46Nãɨya jarasima:

—Tachi Ak'õre k'art'ade nãɨya bɨ bɨma: Tachi Ak'õrepa Tachi K'aripaparí teai jarada minachia mĩa bɨma. Piuk'ari ewari ũpeaɨde chok'ae p'irabariipɨ. 47Maapae ichi t'ɨ̃nepa ichide ĩjãa berãpa ẽpẽrarã́ jaradaipɨ ãchi nemietá itu bɨdak'ari Tachi Ak'õremá chedamẽrá. Mãɨya Tachi Ak'õrepa ãchi nemietá k'ɨ̃risia atuaipɨ. Mãɨ naa Jerusalén p'uurude jaradak'ari jõma p'uuru becha jarade wãnaipɨ. 48Ara machi taupa mɨ mãɨyana jõma unusidama. 49Piarã mɨa mãramá mɨ Ak'õrepa ichi Jaore teai jarada peeipɨ. Mãɨpuru mãra nãma Jerusalene nɨp'aneet'ɨ aba ichi pajãnepa jua chaarea bɨ jitautadea.

Jesú pajãnea wãna

Marco 16:19-20

50Mãɨya bak'ari Jesupa ãchi Jerusalén p'uuru tajatá Betania p'uuru k'ait'a ateewãsima. Maapae ichi jua ɨt'aa jirak'ari ãchiá pia jarasima Tachi Ak'õrepa k'aripa bamẽrá. 51Mãɨya pia pedea bɨde Tachi Ak'õrepa ichi pajãnea ɨt'aa ateewãsima.#Hecho 1:9-11. 52Ãchia Jesua chi k'ɨ̃ria pedea p'ananak'ari sõpia Jerusalenea jĩitea wãsidama. 53Mãmãɨpa ãchi ewaricha Tachi Ak'õre te eda wãpachidama Tachi Ak'õrea pia pedeadai k'orea.#24:53 Griego pedeade chi eda waapẽarã k'art'ade mãɨ ɨ̃ari bɨ bɨma: Amén.

Valgt i Øjeblikket:

Luca 24: tdc

Markering

Del

Kopiér