Luca 23

Jesú Pilato k'ĩrari bada

Mateo 27:1-2; 27:11-14; Marco 15:1-5; Juan 18:28-38

1Ara mãɨne jõma chi ará judiorã minachia k'awa p'anɨrã p'irabaridak'ari Jesú Pilatomá ateewãsidama.#23:1 Romanepemarã minachia k'awa bɨ Tiberio apataɨpa Pilato Judea tuadepema minachia k'awa bɨt'a bɨsima ãyo 26—36. Chi judiorã chaarearãpa Jesú Pilatomá ateewãsidama ãchia chi eda jɨ̃a nɨberã peak'apachida pẽra. Aba romanepemarãpa mãɨya ɨtɨa p'anapachidama. 2Maapae Pilato k'ĩrari Jesú nãɨya nepɨra pará bɨade a para beesima:

—Taipa ũrisidama nãɨ ẽpẽrapa tai p'uuru k'ĩruupik'apii jĩra bɨt'a. Ichimá, taipa chi Romanepema chi atepe poro chaarea bɨ pae erreara k'oarapataɨ p'aai pia bɨwẽma. Mãɨ awara jara bɨma ichi chi Tachi Ak'õrepa Tachi K'aripaparí teai jaradapɨ. Mãɨpa ichi jõmãɨrã minachia k'awa bɨade a bɨma.

3Mãɨpuru Pilatopa Jesua idisima:

—¿Pɨ piarã judiorã poro jũra jɨ̃parí jɨ̃ bɨk'ãra?

Jesupa p'anoosima:

—Ãjã, pɨa mãɨya jara bɨma.

4Maapae Pilatopa p'aarerã chi mãɨrã chaarearã́ mãɨnepa ẽpẽrarã arí tuanarã́ jarasima:

—Mɨa unuwẽa bɨma nãɨ ẽpẽra nepɨra pará bɨt'a.

5Maamina mãicha jarasidama:

—Ichia jaratea bɨdepa tai judiorã k'ĩruupik'apiparima. Naa Galilea tuade mãɨya oosima mãɨnepa nãɨ p'uurude pida mãɨya oo bɨma.

Jesú Herodemá ateewãnana

6Mãɨ ũriside Pilatopa ãchiá idisima Jesú Galileadepema k'awai k'orea. 7Mãmapema k'awaside Jesú Herodemá peesima ichi nepɨra ak'ɨmẽrá.#23:7 Mãɨ Herode Antipa t'ɨ̃ jarapachidama. Herode Galileade chi minachia k'awa bɨ pasima maamina mãɨ ewaride Jerusalén p'uurude basima.

8Jesú unuside, Herode sõpia beesima, tãaraa basima Herodepa ichi unu k'ɨ̃ria bɨẽra. Ichia unu k'ɨ̃ria basima Jesupa ẽpẽrarãpa ne p'ue oodak'apɨ́ oorut'a. 9Herodepa Jesua ne wawaria idisima, maamina Jesupa mi ãpia pida p'anooé pasima. 10P'aarerã chaarearã mãɨnepa Moisepa bɨda jarateapataɨrã arí p'anasidama. Ãchia ichia ne minachia k'achia oo bɨade a jarasidama. 11Mãɨya p'anɨne Herodepa ichi papaká berã pida Jesú oo uru p'aneesidama mãɨnepa k'achia pedea p'aneesidama. Anamari auk'ará k'ɨrɨt'a Jesua jɨ̃pidak'ari ichi oo uru p'aneesidama. Mãɨya bak'ari Herodepa ichi jĩitea ateewãpisima Pilatomá. 12Mãɨ ewaridepa Pilato Herode ome chi nek'ĩramá pada ichi k'õp'ãero p'aneesidama.

Jesú peadai k'orea jaradada

Mateo 27:15-26; Marco 15:6-15; Juan 18:39—19:16

13Maapae Pilatopa chi p'uurude minachia berã, chi p'aarerã chi mãɨrã chaarearã mãɨnepa p'uurudepemarã ará t'ɨ̃k'oasima. 14Ãchiá nãɨya jarasima:

—Mãrapa mɨmá nãɨ ẽpẽra enemeesidama jaradai k'orea ichia p'uuru k'ĩruupik'api bɨ; maamina mãra k'ĩrari minachia ididamina mãrapa nepɨra pará bɨade adada k'orea, mɨa nepɨra pará unuwẽma. 15Herode pida ichi nepɨra newẽa bɨ ununa pẽra mɨmá jĩitea ateewãpisima. Mãɨpuru mãrapa k'awadaipɨ mãɨ peapii pia bɨwẽt'a. 16Mãɨ soapa p'epik'ari itu peeipɨ.

17Ãyocha mãɨ ewaride Pilatopa eda jɨ̃a nɨbe aba k'ẽet'aa peepachima.#23:17 Griego pedeade chok'ará k'art'ade mãɨ versículo newẽma. 18Maamina jõma chi minachia che nɨbɨ ẽpẽrarãpa nãɨya bia jarasidama:

—¡Jãɨ peapise! ¡Barrabat'u k'ẽet'aase!

19Mãɨ Barrabá eda jɨ̃a nɨbɨpi basima p'uuru k'ĩruupik'api bada k'orea mãɨnepa mĩa peada k'orea. 20Pilatopa Jesú k'aripa k'ɨ̃ria bɨẽra p'uurudepemarã́ mãicha pedeasima. 21Maamina mãicha jĩk'ua bia jarasidama:

—¡K'urusude barijira bɨk'ari peapise, k'urusude barijira bɨk'ari peapise!

22Mãɨne Pilatopa mãicha ãchiá jarasima:

—¿Maamina nãɨ ẽpẽrapa k'ãre nemietá oosima? Ichia nemietá oowẽa bɨma peadai k'orea. Mãɨpuru soapa p'epik'ari k'ẽet'aaipɨ.

23Maamina ãchi wapida jĩk'ua bia p'aneesidama Jesú k'urusude barijira bɨk'ari peapimẽrá. Mãɨ awara p'aarerã chi mãɨrã chaarearãpa ara mãɨ jĩra jĩk'ua jara p'aneesidama Pilatopa ãchia k'ɨ̃ria p'anana jĩra oomẽrá.#23:23 P'aarerã chi mãɨrã chaarearãpa. Griego pedeade chi eda waapẽarã k'art'ade mãɨ newẽma. 24Mãɨpuru Pilatopa ãchia jara p'anɨ jĩra oosima. 25Barrabapa p'uurudepemarã k'ĩruupik'adamina mãɨnepa mĩa peadamina Pilatopa ichi chi jɨ̃a nɨbɨpataɨ tedepema k'ẽet'aasima ẽpẽrarã puru ididada pẽra. Maapae ãchia k'ɨ̃ria p'anɨ jĩra Jesú oopisima.

Jesú k'urusude barijira bɨdada

Mateo 27:32-44; Marco 15:21-32; Juan 19:17-27

26Jesú k'urusude barijira bɨdai k'orea ateewãsidaɨde, Cirenenepema Simón p'uurudea cheru pasima. Jesupa k'urusu ua nipada mãɨ Simonoa uapidak'ari ichi k'aade ateepisidama.

27Mãɨ k'aade ẽpẽrarã chi chok'ará wãuta pasima. Mãɨne waapẽarã wẽrarã Jesú k'orea jẽa p'anasidama.#23:27 Jẽa p'anasidama. Ichiaba mãɨ ewaride ẽpẽerãpa sõp'uapa ãchi p'echu sĩpachidama. 28Jesupa ãchimá ak'ɨk'ari jarasima:

—Jerusalenepema wẽrarã, mɨ k'orea jẽarãt'ɨ; mãɨpari ara machi k'orea, mãra warrarã k'orea pida jẽat'ɨ. 29Ewari abaɨde ẽpẽrarãpa jaradaipɨ: “Minachia pia p'anɨma chi warra t'õnak'á p'anɨ wẽerã mãɨnepa chi jutopidak'á p'anɨ wẽerã”. 30Mãɨne eyá nãɨya jaradaipɨ: “Tai ɨ̃rɨ baese”. Waapẽarã eyá jaradaipɨ: “Tai ɨ̃rɨ anat'ɨse”.#Osea 10:8. 31Ẽpẽrarãpa mɨ, pak'uru onoa jĩra bɨ peadaipɨra,#23:31 Chi Tachi Ak'õrepa Tachi K'aripaparí teai jarada edaɨde «pak'uru t'uk'u» apachidama. Isaía 4:2-6; 11:1-5; Jeremia 23:5-6; 33:14-18; Zak'aria 3:8-10; 6:9-13. pak'uru p'õesã́ jĩra be ¿sak'aadaima?#Ezequiel 15:1-8.

32Jesú ome k'urusude peadai k'orea ẽpẽra k'achia berã ume ateewãsidama. 33Ĩjũa «Tachi Poro Bɨɨrɨ» apataɨmá chesidaɨde Jesú k'urusude barijira bɨsidama. Chi ẽpẽra k'achia berã sida k'urusude barijira bɨsidama, aba Jesú juaraari, aba ichi juawieri. 34[Mãɨne Jesupa jarasima: «Ak'õre, ãchia oo p'anɨ k'ɨ̃risia atuase. Ãchia oomaa p'anɨt'a atua p'anɨma».]#23:34 Griego pedeade chi eda waapẽarã k'art'ade pedea corchetede bɨ newẽma.

Mãɨ awara papaká berã ne jemenasidama Jesú neet'á sãmaasã́ jedadai k'awadai k'orea.#Salmo 22:18.

35Jõma mãɨ ẽpẽrarãpa ak'ɨ tuanasidama. Mãɨne chi minachia k'awa berãpa ichi nãɨya oo uru p'anasidama:

—Waapẽarã k'aripasima. Ichi chi Tachi Ak'õrepa Jɨrɨ Atadapɨra mãɨnepa Tachi K'aripaparí teai jaradapɨra, ¿ara ichi tuaba p'ue k'aripawẽk'ãra?

36-37Mãɨ awara papaká berã arí p'anɨpa Jesú oo uru p'anapachidama. Ãchia Jesua uvaba jɨjɨyá teade wãnak'ari jarasima:

—Pɨ piarã judiorã poro jũra jɨ̃parí jɨ̃ bɨpɨra, ara pɨ tuaba k'aripase.

38Pak'uru p'ep'edeade nãɨ pedea bɨdak'ari, mãɨ barijira bɨsidama Jesú poro ɨ̃rɨ k'urusude, k'awapidai k'orea ichi k'ãre k'orea peautat'a: «Nãɨ judiorã poro jũra jɨ̃parí jɨ̃ bɨpɨ».#23:38 Griego pedeade chi eda waapẽarã k'art'ade nãɨya bɨ bɨma: Griego pedeade, latin pedeade mãɨnepa hebreo pedeade.

39Mãɨne ẽpẽra aba nemietá ooda k'orea k'urusude barijira bɨdaadapa Jesú nãɨya k'achia pedeapachima:

—Pɨ piarã Tachi Ak'õrepa Tachi K'aripaparí teai jaradapɨra, pɨ tuaba k'aripak'ari tai sida k'aripase.

40Maamina chi abaɨpa ichi nãɨya ɨtɨasima:

—¿Pɨ sida ara mãɨya ɨtɨa p'anɨmina waidi Tachi Ak'õre wap'eawẽk'ãra? 41Tachi ume nãɨya piudai p'anɨma nemietá oodada pẽra. Maamina cha bɨ ẽpẽrapa ¿k'ãre nemietá oosima?

42Maapae ichia Jesua nãɨya jarasima:

—Pɨchidirã pɨchi juade ua beerude mɨne k'ɨ̃risiase.

43Mãɨ k'orea Jesupa ichiá jarasima:

—Mɨa piarã jararuma: pɨ naane mɨ ome pajãne baipɨ.#23:43 Pajã. Griego pedeade nãɨya bɨ bɨma: paraíso. Mãma chi jĩp'a berã piudaadarã pia p'ananaipɨ.

Jesú k'urusude piuda

Mateo 27:45-56; Marco 15:33-41; Juan 19:28-30

44-45Ɨmat'iip'aɨdepa waa ɨmata baarea, ĩjũa ãarea p'ãrio nɨbeesima. Tachi Ak'õre te minachia bɨde eda p'aru eatɨa jira bada esa k'õawãsima.#Éxodo 26:31-33. 46Ara mãɨne Jesupa jĩk'ua biasima:

—Ak'õre, mɨ jaore pɨ juade bɨruma.#Salmo 31:5.

Mãɨya jarak'ari k'ĩrawẽasima.

47Mãɨ unuside papaká berã chi mãɨrã chaarea bɨpa Tachi Ak'õrea nãɨya pia jarasima:

—Piarã nãɨ ẽpẽra jĩp'a basima.

48Jesú k'urusude peauta ak'ɨde wãnaanapa jõma mãɨyana ununak'ari sõp'uapa ãchi p'echu sĩ wãsidama jĩitea. 49Mãɨya p'anɨne ãarea chi Jesú unupataɨrãpa mãɨnepa wẽerã Galileadepa ichi k'aadea chedaadarãpa t'ɨmɨɨpa ak'ɨ p'anasidama.

Jesú t'ɨbaridada

Mateo 27:57-61; Marco 15:42-47; Juan 19:38-42

50-51Ẽpẽra José apataɨ basima. Ichi Arimatea p'uuru, Judea tuadepema pasima. Ẽpẽra pia basima mãɨnepa jĩp'a basima. Tachi Ak'õrepa ichidirã ichi juade ua bai nɨ basima. Ichi judiorã chaarearãnepema pasima, maamina ichimá ãchia pedea audada mãɨnepa ãchia oodada piawẽa basima. Ãchia oodada mietá unusima. 52Mãɨ José Pilatomá wãk'ari Jesú k'ak'ua idisima t'ɨbarii k'orea. 53Maapae Jesú edá jirak'ari porobapa pɨrak'ari p'ẽya uria k'orodade eda bɨsima. Mãɨ uria k'orodade waidi aba pida piuda t'ɨbaridak'a pasima.

54Mimianak'apɨ́ ewari ará papodo pẽra judiorãpa mãɨ ewari k'orea ne ãarea jõma oo p'ananai p'anasidama.

55Waapẽarã wẽrarã Jesú ome Galileadepa chedada José k'aade wãsidama. Chedak'ari p'ẽya uria k'oroda unusidama. Ichiaba Jesú eda bɨuta unusidama. 56Mãmãɨpa jĩitea wãnak'ari ãchia k'era oosidama chi k'ak'ua p'ɨrɨdai k'orea. Norema ɨ̃apaasidama Moisepa bɨdade jara bɨ jĩra.#Éxodo 20:10.

Valgt i Øjeblikket:

Luca 23: tdc

Markering

Del

Kopiér