मत्ती 10
10
यीशु का बारह चेला
(मरक 3:13-19; 6:7-13; लूका 6:12-16; 9:1-6)
1फिर यीशु ल बारह चेलों तैं अफ मा बुलै के अर ऊं तैं दुष्टात्मा तैं निकलण को अधिकार दींनि की उ सब प्रकार की बिमारियों अर सब प्रकार की कमजोरियों तैं दूर कैरो। 2यूं बारह प्रेरितों का नौं यु छिन पैलो शमौन पतरस अर वेको भैय अन्द्रियास जब्दी को नौंनो याकूब अर वेको भैय यूहन्ना। 3फिलिप्पुस अर बरतुल्मै, थोमा अर चुंगि लींण वलो मत्ती, हलफई को नौंनो याकूब अर तद्दी। 4शमौन कनानी अर यहूदा इस्करियोती जैल यीशु तैं वेका दुश्मनों का हथों मा पकड़वै दींनि।
चेलों तैं सेवा कु भिजै जांण
5यीशु ल बारह चेलों तैं पैली ही इन आज्ञा दे के भेजि, “अन्यजातियों कि तरपां नि ज्यां अर सामरी जाति मा नि ज्यां।#10:5 यिर्म. 50:6” 6इस्राएल का लुखुं मा जावा, जु पिता परमेश्वर बट्टी दूर हवे गैनी, जन हरचि ढिबरो अपड़ा रखवला बट्टी दूर हवे जांद। 7अर चलद-चलद यु प्रचार कैरा कि स्वर्ग कु राज्य नजदीक ऐ गै। 8बिमारों तैं खूब कैरा मुर्दों तैं ज्यूँदो कैरा कोढ़ियों तैं शुद्ध कैरा अर दुष्टात्मा तैं निकलै तुम ल मुफ्त मा पै तुम भि मुफ्त मा द्या। 9अपड़ा पटुकूं मा सोना, चांदी अर तांमु का सिक्का जमा नि करयां। 10बट्टा कु न त झोला रखा, न द्वी-द्वी कुर्ता, न जुत्ता अर न लाठो रखा किलैकि मजदूर तैं वेको खांणु मिलण चयणु च। 11जै कै शहर य गौं जैला त पता लगा कि उख कु काबिल च? अर तब तक उख बट्टी विदा नि हुयां वेका इख रावा। 12घौर मा भितर जांण दफा वे तैं आशीष दियां। 13जु वे घौर का लोग काबिल होला त तुमारो कल्याण ऊं पर होलो पर जु उ काबिल नि होला त तुमारो कल्याण तुम मा वापिस ऐ जालो। 14जु कुई तुम तैं स्वीकार नि कैरो अर तुम्हरी बातों तैं नि सुंणौ त वे घौर य वे शहर बट्टी निकली के अपड़ा खुट्टों की धूल उखि झाड़ी दियां। 15मि तुम मा सच बुल्णु छौं कि न्याय का जांच का दिन वे शहर की दशा से सदोम अर अमोरा शहर कि दशा जादा सैंण जुगुत हवेलि।
आंण वलो कठिन बगत
(मरक 13:9-13; लूका 21:12-17)
16“देखा मि तुम तैं ढिबरों का जन भेड़ियों का बीच मा भिजद इलै गुरो जन बुद्धिमान अर कबूतर जन भोला बंणा।” 17पर लुखुं बट्टी सचेत रावा किलैकि उ तुम तैं यहूदियों का मिलणा का भवन मा सौंपला अर अपड़ी महासभा मा तुम पर कोड़ा मरला। 18तुम मि कु राज्यपालों का अर राजाओं का संमणी अर अन्य-जाति पर गव्है हूंणु कु पेश किये जैला। 19जब उ तुम तैं पकड़वाला त तुम फिकर नि करयां कि हम ल कन कै बुल्ण किलैकि जु कुछ तुम ल बुल्ण होलो उ वे बगत तुम तैं बतये जालो। 20किलैकि बुल्ण वला तुम नि होल्या पर तुमारी परमेश्वर की आत्मा तुमारा द्वारा बुलली।
21भैय, अपड़ा भैय तैं, अर बुबा नौंना तैं, मरणु कु द्याला, अर नौंना बाला ब्वे-बुबा का विरोध मा उठि के ऊं तैं मरवै डलला।#10:21 मीका 7:6 22मेरा नौं का वजह से सब लोग तुम बट्टी बैर रखला पर जु आखिर तक धीरज रखलो वेको ही उद्धार होलो। 23जब उ तुम तैं एक शहर मा सताला त तब तुम हैंका शहर मा चलि ज्यां। मि तुम मा बुल्णु छौं कि तुम इस्राएल देश का सभि शहर मा नि जै सकिल्या कि तब तक मि मनिख कु नौंनो ऐ जौलु।
चेला हुणौं कु मतलब
24“चेला अपड़ा गुरु से बड़ो नि हूंद अर न सेवक अपड़ा स्वामि से।” 25चेला का गुरु से अर दासों कु गुरु का समान हूंण बराबर च अर जब उ मि तैं घौर का मालिक कु शैतान बुल्दा छिन, त मेरा घौर का लुखुं तैं अर भि बुरा नौं बट्टी बुलाला।
कै बट्टी डैरा?
(लूका 12:2-7)
26इलै ऊं लुखुं बट्टी नि डरयां जु तुम तैं धमकी दींद उ बगत आंणु च जब सब कुछ जु ढँकुयों च उ संमणी ऐ जालो, अर जु कुछ गुप्त च उ सब तैं पता चलि जालो। 27जु कुछ भि मि अंधेरा मा बुल्दो छौं, वे तैं उज्यला मा बोला; जु कुछ तुम बट्टी कन्दूड़ो मा बुलै गै, वेकु प्रचार हर जगह कैरा। 28जु देह तैं मारि सकदींनि, पर आत्मा तैं नि मारि सकदींनि ऊं बट्टी नि डरयां पर परमेश्वर बट्टी डैरा जु प्राण अर देह द्वीयूं तैं नरक मा नाश कैरी सकदु 29क्य एक पैसा मा द्वी गौरैयों नि बिकदिंन? तब भि तुमारा बुबा कि इच्छा बगैर ऊंमा बट्टी एक भि धरती पर नि गिरि सकिदि। 30परमेश्वर तुम्हरी जीवन का बारा मा चिंता करदो च उ यु भि जंणदु च की तुमारा मुंड मा कथग बाल छिनी। #10:30 लूका 12:7 31इलै डैरा न तुम्हरी कीमत भौत गौरेयों से भि बढ़ि के छा।
यीशु तैं स्वीकार या अस्वीकार कन
(लूका 12:8-9; 12:51-53; 14:26-27)
32जु कुई भि लुखुं का संमणी इन बोलु की मि यीशु को चेला छों त मि भि वे तैं अपड़ा स्वर्गीय बुबा का संमणी स्वीकार करलो। 33जु उ दूसरों का संमणी यु बुल्ण से डरदु च की उ मेरा चेला छिन, त मि अपड़ा बुबा जु स्वर्ग मा च बोलि दयुलु की यु मेरा चेला नि छिन। 34“इन नि सोचा कि मि धरती पर लुखुं का बीच मा शान्ति लांणु कु अयुं छौं, मि लुखुं का बीच मा शान्ति नि बल्कि लड़ै करवांणु कु अयुं छौं।” 35मि त इलै अयुं छौं कि मनिख तैं वेका बुबा बट्टी अर नौंनि तैं वीं कि ब्वे बट्टी अर ब्वारि तैं वीं कि सासु का विरुद्ध कैर द्यो 36मनिख्युं का बैरी ऊंका वे अपड़ा परिवार का ही लोग होला। 37“जु ब्वे-बुबा तैं मि से जादा प्रेम करद उ मेरा लैख नि च अर जु नौंना य नौंनि तैं मि से जादा प्रेम करद उ भि मेरा चेला बनण का लैख नि च।#10:37 लूका 14:26” 38अर जु मेरा चेला हूंण का कारण अपड़ी सूली उठांण अर मुरण कु भि तैयार हो अर मेरा पिछनैं नि चलो उ मेरू चेला हूंणा का लैख नि च। 39जु कुई अपड़ो जीवन बचौण चौ उ वे तैं गवांलू पर जु कुई मेरा बाना अर शुभ सन्देश का बाना अपड़ा आत्मा तैं गवांलू उ अनन्त जीवन तैं पालो।
प्रतिफल
(मरक 9:41)
40“जु तुम तैं स्वीकार करदो उ मि तैं स्वीकार करदो अर जु मि तैं स्वीकार करदो उ मेरा भिजण वला तैं स्वीकार करदो।” 41जु परमेश्वर का तरपां बट्टी बुल्दो तैं परमेश्वर का तरपां बट्टी बुल्दो जांणि के स्वीकार कैर उ परमेश्वर का तरपां बट्टी बुल्ण वलो का समान ईनाम पालो अर जु धर्मी आदिम तैं धर्मी जांणि के स्वीकार कैर उ धर्मी को ईनाम पालो। 42जु कुई यूं छुटो मा बट्टी एक तैं भि मेरू चेला जांणि कै भस एक गिलास ठंड़ो पांणी पिलालो की तुम मसीह का चेला कहलांदा छा त मि तुम मा सच बुल्ण छौं उ निश्चित रूप से ईनाम पालो।
Valgt i Øjeblikket:
मत्ती 10: GHMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
