यूहन्ना 6
6
पाँच हजार लुखुं तैं खांणु खिलांण
(मत्ती 14:13-21; मरक 6:30-44; लूका 9:10-17)
1यूं बातों का बाद यीशु गलील जिला कि झील मतलब तिबरियास कि झील का छाला मा गै। 2अर एक बड़ी भीड़ ऊंका पिछनै हवे गै किलैकि जु चमत्कार यीशु बिमारों पर दिखांदु छों उ ऊं तैं दिखदा छा। 3तब यीशु डांडा पर चढ़ी के अपड़ा चेलों का दगड़ी उख बैठी गैनी। 4यहूदियों कु फसह कु त्यौहार नजदीक छो। 5तब यीशु ल अपड़ा आंखा उठै के एक बड़ी भीड़ तैं अपड़ा संमणी औंण देखि त वेल फिलिप्पुस मा बोलि हम यूँका खांणु कु कख बट्टी रुट्टि मोल ल? 6ऊंल या बात वे तैं परखणु कु बोलि, किलैकि उ अफ जंणदा छा कि मिल क्य कन। 7फिलिप्पुस ल यीशु तैं जवाब दे, तीन रुट्टियुं की कीमत द्वी सौ दिन की मजदूरी का बराबर होली, यु भि यूं कु पूरी नि होलि, पर ऊंमा बट्टी हरेक तैं जर जरा मिली जौ। 8वेका चेलों मा बट्टी शमौन पतरस का भैय अन्द्रियास ल वेमा बोलि, 9इख एक नौंनो च जै मा जौं कि पाँच रुट्टि छिन अर द्वी माछा छिन पर इथग लुखुं कु उ क्य छिन? 10यीशु ल बोलि, लुखुं तैं बैठे द्या। वीं जगह म भौत घास छै तब लोग जौं मा पाँच हजार आदिम लगभग छा उ सभि बैठी गैनी। 11तब यीशु ल रुट्टियुं तैं पकड़ी अर धन्यवाद कैरी के बैठण वलो तैं बांटि दींनि अर उन ही माछों मा बट्टी जथग उ चांदा छा बांटि दींनि। 12जब सभि खै के छक हवे गैनी त यीशु न अपड़ा चेलों म बोलि, बचयां टुकड़ों तैं बटोरी ल्या कि कुछ ढुलै नि जौं। 13अर ऊंल बटोरी अर जौं कि पाँच रुट्टियुं का टुकड़ों बट्टी जु खांण वलो मा बट्टी बचि गै छा वांका बारह ठुपरा भुरिनि। 14तब जु चमत्कार यीशु ल कैरी के दिखै वे तैं उ लोग देखि के बुल्ण लगि गैनी उ परमेश्वर का तरपां बट्टी बुल्ण वलो जु दुनिया मा औंण वलो छो पक्को यूई च।#6:14 मत्ती 21:11 15यीशु यु जांणि के कि उ मि तैं राजा बनांणु कु पकड़ण चांणा छिन त डांडा पर यखुली चलि गै।
यीशु को पांणी पर चलण
(मत्ती 14:22-27; मरक 6:45-52)
16जब रुमुक हवे त ऊंका चेला झील का छाला गैनी 17अर नाव पर चढ़ी के झील का छाला कफरनहूम शहर मा जांण बैठी गैनी। वे बगत अंधेरो हवे गै छो अर यीशु अभि तक ऊँका संमणी नि ऐ छा। 18आंधी का कारण झील मा बौछार औंण बैठी गै छै। 19जब उ पुंगड़ा-पुंगड़ा पाँच या छह किलोमीटर का लगभग निकली गैनी त ऊंल यीशु तैं झील मा चलदो अर नाव का संमणी औंदु देखि अर चेला घबरै गैनी। 20पर यीशु ल ऊंमा बोलि, मि छौं डैरा न। 21अर चेला यीशु तैं नाव पर चड़ौंणु कु राजि हवे गैनी अर एकदम व नाव वीं जगह मा जै पौंछि जख उ तैं जांण छा।
लुखुं को यीशु तैं ढुँढ़ण
22दुसरा दिन वीं भीड़ ल जु झील का छाला पर खड़ी छै यु देखि कि इख एक तैं छोड़ी के और कुई नाव नि च अर यीशु अपड़ा चेलों का दगड़ी वीं नाव पर नि चढ़ी पर भस ऊंका ही चेला गै छा। 23तब दुसरी नाव तिबिरियास शहर बट्टी वीं जगह का संमणी ऐनी जख ऊंल प्रभु तैं धन्यवाद कना का बाद रुट्टि खै छै। 24इलै जब भीड़ ल देखि कि इख न यीशु छिन अर न ऊंका चेला त उ भि नावों पर चढ़ी के यीशु तैं ढुंडदि कफरनहूम शहर पौंछिनी।
यीशु जीवन की रुट्टि
25झील का छाला जब उ यीशु तैं मिलिनि त ऊंल बोलि, हे गुरु तु इख कब ऐ? 26यीशु ल ऊं तैं जवाब दे मि तुम मा सच-सच बुल्ण छौं तुम मि तैं इलै नि ढुंडणा छा कि तुम ल चमत्कार दिखिनि पर इलै कि तुम रुट्टि खै के छकि गै छा। 27खांणु कु मेहनत नि कैरा पर वे खांणु कु जु अनन्त जीवन तक ठैरद मि मनिख कु नौंनो तुम तैं यु खांणु दयुलु किलैकि पिता परमेश्वर ल मि तैं इन कनु कु अधिकार दियुं च। 28ऊंल यीशु तैं पूछि, परमेश्वर का कामों तैं कनु कु हम क्य करां? 29यीशु ल ऊं तैं जवाब दींनि परमेश्वर चांदु च की तुम वे पर विश्वास कैरा जै तैं वेल भेजि, वे पर विश्वास कैरा 30तब ऊंल यीशु तैं पूछि, तु कु वलो चमत्कार को चिन्ह दिखौंदी कि हम वे तैं देखि के त्वे पर विश्वास कैरा? तु कु वलो काम दिखौंदि? 31हमारा पूर्वजों ल एकांत जंगल मा मन्ना खै जन लिख्युं च, मूसा ल ऊं तैं खांणु कु स्वर्ग बट्टी रुट्टि दींनि #6:31 भज. 78:24 32यीशु ल ऊंमा बोलि मि तुम मा सच-सच बुल्ण छौं कि तुम तैं व रुट्टि स्वर्ग बट्टी मूसा ल नि द्ये पर मेरू पिता परमेश्वर तुम तैं सच्ची रुट्टि स्वर्ग बट्टी दींदु च। 33किलैकि परमेश्वर की रुट्टि उ ही च जु स्वर्ग बट्टी उतरी के दुनिया का लुखुं तैं जीवन दींद। 34तब ऊंल यीशु मा बोलि, हे प्रभु ईं रुट्टि हम तैं सदनी दींणु रौ।
35यीशु ल ऊंमा बोलि, अनन्त जीवन दींण वली रुट्टि मि छों जु मि मा औंणु च उ कभि भि भुखी नि होलो अर जु मि पर विश्वास करदो च उ कभि तिसलो नि होलो। 36पर मिल तुम मा बोलि, कि भलै ही तुम मि तैं दिखदा छा पर तुम मि पर विश्वास नि करदां। 37जु कुछ पिता परमेश्वर मि तैं दींद उ सब मि मा आलो अर जु कुई मि मा आलो वे तैं मि कभि नि निकललु। 38किलैकि मि अपड़ी मनसा न पर अपड़ा भिजण वला कि मनसा पूरी कनु कु स्वर्ग बट्टी उतरयूँ छौं 39अर मेरा भिजण वला कि मनसा या च कि जु कुछ वेल मि तैं दे वां बट्टी मि कुछ नि हरचौं पर वे तैं आखरी दिन फिर ज्यूँदो उठालो। 40किलैकि मेरा पिता परमेश्वर कि मनसा याचा कि जु कुई मि पर विश्वास करदो उ अनन्त जीवन पौ अर मि वे तैं अंत का दिन मा फिर ज्यूँदो उठौलु।
41इलै यहूदियों का अगुवा यीशु पर कुड़कुड़ाण लगि गैनी किलैकि ऊंल बोलि छो ज्वा रुट्टि स्वर्ग बट्टी उतरी व मि छौं। 42अर ऊंल बोलि क्य यु यूसुफ कु नौंनो यीशु नि च जैका ब्वे-बुबा तैं हम जंणदा छा? त उ कनके बुल्णु च कि मि स्वर्ग बट्टी उतरयूँ छौं? 43यीशु ल ऊं तैं जवाब दींनि कि आपस मा नि कुड़कुड़ावा। 44कुई मि मा नि ऐ सकद जब तक कि पिता जैल मि तैं भेजि वे तैं खींचि नि ल्यो अर मि वे तैं अंत का दिन मा ज्यूँदो उठै दयुलु। 45परमेश्वर का तरपां बट्टी बुल्ण वलो का लेखों मा यु लिख्युं च कि उ सब परमेश्वर का तरपां बट्टी सिखयां होला। जु कैल पिता परमेश्वर बट्टी सूंणि अर सीखी उ मि मा आंणु च।#6:45 यशा. 54:13 46कैल पिता परमेश्वर तैं नि देखि मि यखुली छों जु परमेश्वर कि तरपां बट्टी अयुं छों जैल वे तैं देखि 47मि तुम मा सच-सच बुल्ण छौं कि जु कुई मि पर विश्वास करदो अनन्त जीवन वेको ही च। 48अनन्त जीवन दींण वली रुट्टि मि छों। 49तुमारा बाप दादों ल एकांत जंगल मा मन्ना खै अर मोरि गैनी। 50य व रुट्टि च ज्वा स्वर्ग बट्टी उतरदी इलै की मनिख वामा बट्टी खौ अर नि मोरू। 51जीवन कि रुट्टि ज्वा स्वर्ग बट्टी उतरी मि छौं। जु कुई ईं रुट्टि मा बट्टी खौ त हमेशा ज्यूँदो रालो अर ज्वा रुट्टि मि दुनिया का जीवन कु दयुलु उ मेरी देह च।
52ईं बात पर यहूदियों ल आपस मा बोलि के झगड़ा कन बैठी गैनी कि यु आदिम कनके हम तैं अपड़ो देह खांणु कु दे सकद? 53यीशु ल ऊंमा बोलि, मि तुम मा सच-सच बुल्ण छौं कि जब तक मि मनिख कु नौंनो कु देह नि खांदो, अर मेरू ल्वे नि प्यूंदों, तुम मा जीवन नि च। 54जु मेरी देह खांदो अर मेरू ल्वे प्यूंदों च अनन्त जीवन वेको च अर मि वे तैं न्याय का दिन ज्यूँदो कैरी दयुलु। 55किलैकि मेरी देह सच मा खाणे कि चीज च अर मेरू ल्वे सच मा पीणैं कि चीज च। 56जु मेरी देह खांदु अर मेरू ल्वे पींदु उ मि मा मजबूत बणयूँ रौंदु च अर मि वेमा बणयूँ रौंदु। 57मेरा पिता परमेश्वर जैल मि तैं भेजि उ जीवन दींद जन वेल मि तैं जीवन दये वे जन मि भि वे आदिम तैं जीवन दयुलु जु मेरी देह तैं खांदु। 58ज्वा रुट्टि स्वर्ग बट्टी उतरी च, पूर्वजों ल खै, अर मोरि गैनी, पर जु कुई ईं रुट्टि तैं खालो उ सदनी ज्यूँदो रालो। 59यूं बातों तैं यीशु ल कफरनहूम शहर का एक यहूदियों का मिलणा का भवन मा उपदेश दींणा का बगत मा बुलिनि।
अनन्त जीवन कु वचन
60यीशु का चेलों मा बट्टी भौतों ल यु सूंणि के बोलि यु त कठिन शिक्षा च ईं तैं कु मांणी सकद? 61यीशु ल अपड़ा मन मा यु जांणि के कि मेरा चेला आपस मा ईं बात पर कुड़कुड़ाणा छिन ऊं बट्टी पूछि क्य यु तुम तैं मि पर विश्वास कन से रुकदो च? 62जु तुम मि मनिख कु नौंना तैं जख उ पैली छो उख मथि जांण देखि ल्या त क्य होलो?#6:62 भज. 47:5 63परमेश्वर की आत्मा जु जीवन दींण वली च देह बट्टी कुछ फैदा नीच जु बात मिल तुम बट्टी बुलीं छिनी उ आत्मा च, अर जीवन भि दींद। 64अर तुम मा कुछ इन छिन जु मि पर विश्वास नि करदींनि किलैकि यीशु पैली बट्टी जंणदु छो कि जु विश्वास नि करदींनि ऊं कु छिनी अर कु मि तैं पकड़वालो। 65अर यीशु ल बोलि, इलै मिल तुम मा बोलि छो कि जब तक कै तैं पिता परमेश्वर कि तरपां बट्टी यु वरदान नि दिये जौं तब तक उ मि मा नि ऐ सकदु।
पतरस कु विश्वास
66ईं बात पर यीशु का चेलों मा बट्टी भौत सी उल्टा फिरी गैनी अर वांका बाद ऊं दगड़ी नि गैनी। 67तब यीशु ल ऊं बारहों बट्टी बोलि क्य तुम भि जांण चांणा छा? 68शमौन पतरस ल यीशु तैं जवाब दे कि हे प्रभु हम कै मा जां? अनन्त जीवन त त्वे मा ही च 69अर हम ल विश्वास कैरी अर जांणि भि ग्यां कि तु एक पवित्र जन छै जै तैं पिता परमेश्वर ल भेजि। 70यीशु ल ऊं तैं जवाब दींनि क्य मिल तुम बारहों तैं नि चुणि? तब भि तुम मा बट्टी एक आदिम शैतान का वश मा च। 71यु वेल शमौन इस्करियोती का नौंना यहूदा इस्करियोती का बारा मा बोलि, जबकि उ बारहों शिष्यों मा बट्टी एक छो उ यीशु का दगड़ी विश्वासघात कन वलो छो।
Valgt i Øjeblikket:
यूहन्ना 6: GHMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
