MAWOOKIONYI 2
2
1Nahong'u ruwehu na oruka shilemariso, na osangaṟimo loke lose. 2 Na mfiri fo mfungade Ruwa kamarisa iṟunda lyake lyose alelyiṟunda; kasia moo mfiri fo mfungade, alakiṟunde-se iṟunda lilya lyake awelyiṟunda. 3Ruwa kafuwikya mboṟa mfiri fo mfungade, kafutana mwele, kipfa Ruwa naleonyonyia kada alaṟunda iṟunda lyake lyose. 4Nyi wudo kishari kya ruwehu na orukenyi kilewumbo.
Mhunda fo Edeni
Mkonu fulya Mndumii-Ruwa alewumba ruwehu na oruka, 5kuwewode kilimu kya mdeminyipfo, manya madema hawemeoṟishe kindopfo, kyamba Mndumii-Ruwa awemeolotsie oruka mvuo-pfo, manya kuweipfo mndu modema-pfo; 6mtiima fukado fukawika mmeṟa orukenyi. 7 Mndumii-Ruwa kawumba mndu kui kilulyi, kamwifilia mṟufu fo moo mbuonyi; mndu kawa kindo kii na moo. 8Mndumii-Ruwa kodonga mdemi Edenyi kulya ora lo ngamenyi, kawikapfo mnducho alemwumba. 9 Mndumii-Ruwa kaoṟisha orukenyi orio ikidi lya kiweṟe keambuya na iloda hakaweloda ikuliaho; na ikidi lya moo ipfo makidi hawi ha mhunda fulya, na ikidi lya wuṟango lyemanyisha shicha na shiwicho. 10Kukawuka meda kulya mhundenyi fo Edenyi fonosia mhunda fulya, na kuwokialyo fukawada mbanga tsiina. 11Rina lya mbanga ya kuwoka nyi Pishoni; nyifo futengetie oruka lose lo Havila; luwode sahapu; 12sahapu ya orukalu injicha; kuipfo mafuda hepfaama helaho bedola, na maho ha wuhuru wung'anyi helaho Shohamu. 13Mbanga ya kawi nyi Gihoni; nyiyo itengetie oruka lose lo Kushi. 14Mbanga ya kaṟaṟu nyi Hidekeli nyiyo iidie Ashuru. Na mbanga ya kaana nyi Frati. 15Mndumii-Ruwa kambika mnducho kulya mhundenyi fo Edenyi, nafudeme na ifuachikia. 16Mndumii-Ruwa kawawasa mnducho, kehamba, “Ndunda tsa orio ikidi kunu mhundenyi na ochikulia, 17kyaindi ndunda tsa ikidilyo lyemanya shindo shicha na shiwicho manya kulalye, cha kipfa mkonu ochilya ndunda tsa ikidilyo kya lohi nochipfa.”
18Mndumii-Ruwa kahamba, “Chi kicha mndu nakae kikoke amonyipfo, njechimbikia momwikanyia afananyi nao.” 19Mndumii-Ruwa kaende napfo mando hai na moo ha mbaṟi tsifoi ha ngeṟenyi ahawuta ipfo terinyi na orio ilehe lya ruwehu, kaendie mnducho naambuye chandu echihadumbuya marina; orio kiumbe kii na moo, rina mnducho alekidumbuya lyikawa nlyo rina lyakyo. 20Adamu kadumbuya shuma shose marina, na malehe ha ruwehu, na orio indo lya ngeṟenyi; kya indi kulawoneke motarama mnducho msa asumhanyi nao. 21Mndumii-Ruwa kaendie mnducho mado ha mnengerile; kalaa; numa Mndumii-Ruwa kawutaho owari loke lumu, kashikiaho na nyama alyando alewuta awari lulya, 22na owari lulya aleluwuta ipfo ko mnducho Mndumii-Ruwa kaluwumba mndu mka, kamwende na ko mnducho. 23Mnducho kahamba: “Wulalu ichu nyi fuo kiidi kya mafuo hako, na nyama kiidi kya nyama tsako, kyasiang'u nechilaho nyi mndu mka, kipfa nambute ko mndumsoṟo.” 24 Ko ikyo mndu msoṟo nechilekana na ndee na mae nahende iwadana na mka oke, nawo wechiwa mbihu fumu. 25Nawo wawei kitaṟe wawawi, mndu cho na mka cho oke, nawo manya walaṟeenze.
Valgt i Øjeblikket:
MAWOOKIONYI 2: KIM2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Kimochi Bible © Bible Society of Tanzania, 2016.