Luka 4
4
1Yesu hakufuma kuYodana kwayiliyi, wenzala Spiritu Wajila, hiyakumutwalaŋa kudi Spiritu mwisaŋa, mwahita mafuku makumi awana, iku adi nakumweseka kudi diyabolu. 2Wena mafuku owu hadiili chumaku; chamanini mafuku owu hakutiya nzala. 3Diyabolu hakumwila nindi, Neyi wuMwana kaNzambi, hoshaku ilolidi dibalumuki dinkendi. 4Yesu hakumwakula nindi, Anasoneki nawu, Muntu hahandaŋa namankendi hohuku. 5Hakumutwala hewulu, hakumuleja mawanta amunu mwishina ejima yena mpinji oyu. 6Diyabolu hakumwila nindi, Nukukwinka mawantawa ejima ni kulema kwawu, muloŋa ananyinkuwu ami; yonsu muntu inakeŋi kwinka nukumwinkawu. 7Dichi neyi eyi wukudifukula kudami, wejima wukwi kala weyi. 8Yesu hakumwakula nindi, Anasoneki nawu, Kadifukulaŋa kudi Yehova Nzambi yeyi, diyi wakakalakelaŋa kanka windi hohu. 9Hakumutwala kuYerusalema, hakumusha hewulu datembeli, hakumwila nindi, Neyi wuMwana kaNzambi, dinati mwishina; 10muloŋa anasoneki nawu, Wakakulejela aŋelu jindi akakuhembaŋa; 11akakwaka namakasawu wakenza kahuma mwendu weyi kwilola. 12Yesu hakumwakula nindi, Aneli nawu, Bayi wakamweseka Yehova Nzambi yeyuku. 13Diyabolu chanamanishiyi kweseka kwejima, hakufuma kudi yena, nindi amoni hekwawu hakamwesekelayi.
14Yesu hakufunta kuŊaliliya naŋovu yaSpiritu; mpuhu yindi hiyikutiyakana mwahita mbadi yejimoyu. 15Hakuleja antu mumashikolawu, hiyakumuhamekaŋa kudi antu ejima.
16Hakwinza kuNazareta kwamuleleleluwu; hakwijila mushikola hefuku dasabata neyi chelilaŋayi dikalu, hakwimana nakutaŋa. 17Hiyakumwinka mukanda wakaprofwetu Isaya. Hakubakula mukanda, 18hakuwana hanasonekuwu nawu, Spiritu yaYehova wudi hadami, muloŋa wanwayisha dehi manji nishimwini atuzweŋi nsaŋu yayiwahi; nantemeshi kulonda nibidiki ankoli nsaŋu yakuyisubula, niamputamesu atoni; kulonda kuyumbaku antu anachikuwu, 19nishimuni mwaka waYehova wunawahi dehi. 20Hakujika mukanda, hakumwinkawu cheŋi mukwakuwimena, hakushakama; antu ejima adiŋi mushikola hiyakumuhuŋunwina mesu, hiyakumushinshika swi-i. 21Hakutachika kuyila nindi, Nsaŋu iyi yasonekeluwu yinalumbuluki kumatu enu lelu. 22Antu ejima hiyakumwiteja, hiyakuhayama mazu amawahi afumini kukanwa kindi; hiyakwila nawu, Hidiyi mwana kaYosefuku? 23Hakuyila nindi, Keŋa muntili chishimu chakwila nenu, Eyi chimbuki, duki eyi aweni. Yejima yitunatiyi yiwuneli kuKaperinawu, yili nikunu kwituŋa deyeyi aweni nawa. 24Hakuyila nindi, Nukuyileja chalala nami, kwosi kaprofwetu etejaŋawu mwituŋa dindi yomwenuku. 25Mwalala nukuyileja nami hanyaka yadiŋiyi Elija, hakwatiluwu nvula nyaka yisatu natukweji tutanu nakamu, haholokeli nzala yeneni mwituŋa dejima muIsarela, mwadiŋi ambanda anfwila amavulu. 26Hiyatemesheli Elija kudi wenaku, chiŋa kuZarefwati hohu, mwituŋa daZidoni, kudi mumbanda wanfwila. 27Nihadiŋi kaprofwetu Elisha, muIsarela mwadiŋi akwambumba amavulu; hosi atookesheluwuku chiŋa kaSiriya Nayamani hohu. 28Ejima adiŋi mushikola chanatiyuwu ochu, nyichima yawu yisweja nindombu; 29avwavumoka nikuvwavumoka, hiyakumushinjeka nawu afumi mumukala; hiyakumutwala kumukumu wampidi yatuŋiluwu mukala wawu, kulonda amukunwinuku. 30Yena hakuhanuka mukachi kawu, hakudiyila kwindi.
31Hakukunkumuka kuKaperinawu, mukala wakuŊaliliya. Hakuleja antu hasabata. 32Hiyakuhayama kuleja kwindi, muloŋa mazu indi adiŋi nawanta. 33Mushikola mwadini muntu wazakukaŋa demoni wazonda, hakubilela nezu daŊovu, 34nindi, Aka! EyiYesuwa kuNazareta, tudineyi nansaŋu? Wunenzi dehi nakutukisaŋana, tahindi? Nakwiluki yeyi Mukwakujila wambala waNzambi. 35Yesu hakumuhoshola nindi, Mwenaku, fumaku mudi muntu. Demoni amunata ninowu muntu mukachi kawu, afuma nimudi yena, nikumukatisha nehi. 36Antu ejima hiyakuhayama, hiyakuhosha muntu namukwawu nawu, Awa mazu anka? Hakuleja ademoni azonda nawanta niŋovu, hiyakufuma mudi antu. 37Mpuhu yindi yitiyakana nikwejima ndo.
38Hakunyamuka, hakufuma mushikola, hakwijila mwitala daShimona. Mawenu yaShimona wadiŋi wakata mashika aweni, hiyakumulembelelayi. 39Hakwimana kwadiŋiyi yena, hakuhoshola mashika, amufuma nikumufuma; hohenohu yohinduka nikuhinduka, hakuyikalakela.
40Chelili itaŋwa hidikuya nakuhuma, ejima adiŋi nawakwawu akata nyisoŋu yeŋi nayeŋi, hiyakumuletelawu; hakuyinaŋika makasindi wejima wawu, hakuyuka. 41Ademoni niwena hiyakufuma mudi antu amavulu nakukaloka nawu, Yeyi Mwana kaNzambi. Hakuyihoshola, hayiteja kuhoshaku, muloŋa amwilukili nawu diyi Kristu.
42Chikunachi, hakwidika hakuya mwisaŋa, mazaza awantu hiyakumukeŋakeŋa. Chanamuwanuwu, hiyakukeŋa nawu amwimiki abuli kufuma. 43Yena hakuyila nindi, chiŋa nishimwina nsaŋu yawanta waNzambi yayiwahi nikunyikala yi kwawu yinashali nawa; muloŋa dichi chantemesheleluwu. 44Hakushimunaŋa mumashikola amuŊaliliya.
Valgt i Øjeblikket:
Luka 4: MW62
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Lunda: Ndembu (Lunda of Kalunda) © B. F. B. S. 1962.
