Luka 2
2
1Wena mafuku owu kudi Aŋusitusi Kesari hikukufuma izu dakwila nawu asoneki antu amumatuŋa ejima. 2Diku kusoneka kwatachi kweliluwu hadiŋiyi Kerini nguvulu yaSiriya. 3Dichi antu ejima hiyakuya nakuyisoneka, iwu hamukala wawu, iwu hamukala wawu. 4Yosefu niyena hakunyamuka muŊaliliya, kumukala waNazareta, hakuya muYudeya kumukala waDavidi, ijina dawu Betelemi, muloŋa wadiŋi wakwivumu damutaŋa waDavidi; 5akamusoneki hamu naMariya oteliyi, henohu nakulishi dehi ivumu. 6Chadiŋuwu kwenoku, mafuku akusapuluka awana nikuwana. 7Hakuvwala wedi windi weyala, hakumuvuŋavuŋa mwihina, hakumukamika mwadiishililaŋawu ayimuna, muloŋa mwitala dawenyi mwabulili hakukama.
8Kwena kwituŋodu kwadiŋi tubiŋa twawanyikoku, adiŋi mwisaŋa nakuhemba nyikoku yawu nawufuku. 9Kaŋelu kaYehova hakwimana kwadiŋuwu; lubanji lwakulema kwaYehova hilukuyitoŋekela chejeji kwi-ndo; atiya niwoma nankashi. 10Kaŋelu hakuyila nindi, Bayi mutiya womaku; tiyenu, nayileteli nsaŋu yayiwahi yamuzaŋalu wasweja, wakekala kudi antu ejima. 11Muloŋa ifuku dalelu, mumukala waDavidi, munavwaliki dehi Chamwinu, diyi Kristu, Mwanta. 12Chinjikijilu chimukumwiluka nachu, mukuwana mukeki anamuvuŋavuŋi mwihina, nakami mwadiishililaŋawu ayimuna. 13Kukasumuka hadi owu kaŋelu, hihadi izaza dawakwamwiwulu hiyakuhameka Nzambi, 14nawu, Kudi Nzambi mwiwulu dakubadika kwikali kulema, heseki hekali kuwunda hakachi kawantu atiyaloŋayi kuwaha. 15Chelili aŋelu anayishiyi dehi anayi dehi mwiwulu, atubiŋa hiyakudileja wumu namukwawu nawu, Tuyenu kuBetelemi katataka, tutali ichichuma chinamwekani chanatulejuwu kudi Yehova. 16Hiyakuya lufuchi, hiyakuwana Mariya niYosefu, nimukeki nakami mwadiishililaŋawu ayimuna. 17Chanachimonuwu hiyakutiyakesha nsaŋu yaniwu mwana yayilejeluwu. 18Antu ejima chanatiyuwu yuma yayilejeluwu kudi atubiŋa hiyakuhayama. 19Hakwila Mariya wahembeli yuma yejimiyi, hakuyitoŋashana mumuchima windi. 20Atubiŋa hiyakufunta nakulemesha Nzambi, nikumuhameka nayuma yatiyiluwu niyamwenuwu yejima, mwomwayilejeluwu.
21Chawanini mafuku atanu nasatu akumwalamisha mwana, anamutumbili ijina dindi nawu YESU, mwomwanamutumbiluwu kudi kaŋelu helili wuchidi kanda amubaabi mwivumu.
22Chawanini mafuku akuyijilika amwaya nshimbi jaMosi, amuleteli mwana kuYerusalema kulonda kumushikŋa kudi Yehova; 23mwomwasonekeluwu munshimbi jaYehova nawu, Anyana amayala asambilaŋa kuvwalika ejima, akayitenaŋa nawu ajila, ambala aYehova; 24akahani chimuna chakuketula chasonekawu munshimbi jaYehova, hela tutela tuyedi, hela anyana katupompa ayedi. 25MuYerusalema mwadiŋi muntu wumu ijina dindi Simeyona; yena muntu iwu wadiŋi waloŋa, wukweti kalemesha kakulemesha Nzambi, wadiŋi nakutalila chamba kayikundejawu aIsarela; Spiritu Wajila wadiŋi hadi yena. 26Henohu amumwekeshela dehi kudi Spiritu Wajila nawu hakafwaku, kufwa chiŋa namoni dehi Kristu waYehova. 27Hakwijila mutembeli chakumwendesha kudi Spiritu. Chamuleteluwu mwana Yesu kudi anvwali jindi kulonda amwili mwaya chaaku chakunshimbi, 28hohenohu hakumutambula mumakasa, hakukisula Nzambi nkisu, 29nindi, Ichi dinu eyi Yehova, ŋiteji ami kambuŋeyi niyi chawunda, mwomuwahosha dehi; 30muloŋa namoni dehi namesu ami wamwinu weyi, 31wuwunaloŋeshi dehi kumesu anyuza yejima; 32chejeji chakutoŋekela aJentili, ni kulema kwawantu eyi aIsarela.
33Tata yindi namama yindi hiyakuhayama yuma yatenenuwu mwana. 34Simeyona hakuyikiswila nkisu, hakumwila mama yindi Mariya nindi, Tiya, iwu mwana anamutoŋoli dehi kwikala wakudimbwisha niwakuhindwisha aIsarela amavulu; kulonda akekali chinjikijilu chakutenawu chatama. 35Eŋa, mpoku yakabali yakapwika mumuchima weyeyi aweni zwa, kulonda kumwekesha yitoŋojoka yajindawu antu amavulu munyichima yawu.
36Hadiŋi nawa kaprofwetu wamumbanda Ana, mwana kaFwanuweli, wakumuza waAsheri; wadiŋi wasweja dehi kukula, kufuma hasumbukiliyi washakamini nanfumwindi nyaka yitanu nayiyedi, 37henohu wela dehi nfwila wanyaka makumi atanu nasatu nanyaka yiwana; hafuminaŋa mutembeluku, wafukaminaŋa niwufuku nimwaana, nakulembelela kwakujiŋojoka nanzala yakuleka kudya. 38Yena mpinji oyu hakwinza, hakusakilila Nzambi, hakumushimuna kudi antu ejima adiŋi nakutalila kukuula kwamba kakúulawu Yerusalema.
39Chanamanishuwu yuma yakunshimbi jaYehova yejima, hiyakufunta kuŊaliliya kumukala wawu awenawu kuNazareta. 40Mwana hakuya nakukula, akwata niŋovu, asweja nima ana; amutiya nikuwaha kudi Nzambi.
41Anvwali jindi ayilaŋa kuYerusalema hamwaka hamwaka hachawija chapaseka. 42Helili nashiki dehi munyaka ikumi nayiyedi, hiyakukanduka kuYerusalema mwomuchaaku chachawijochu. 43Chanawanishuwu mafuku owu hiyakufunta, mwana Yesu hakushala muYerusalema. Anvwali jindi kuchiluka nehi, 44atoŋojokeli nawu wudi muchendu. Hiyakwenda lwendu lwefuku dimu, hiyakumukeŋakeŋa hadi awusoku wawu, nihadi akwawu adilukiluwu nawu. 45Chabuliluwu kumumona, hiyakufunta cheŋi kuYerusalema nakumukeŋakeŋa. 46Chimunahiti mafuku asatu hiyakumuwana mutembeli, nashakami mukachi kawankuluŋaŋa nakutiya nikuyihujola.
47Ejima adiŋi nakumutiya ahayamini kashinshi kindi nimwakuyakulayi.
48Chanamuwanuwu hiyakuhayama; mama yindi hakumwila nindi, Mwanami wunatukoŋelidi mwenimu? Nitata yeyi ninami tunakukeŋakei nawushona. 49Hakuyila nindi, Mwankeŋelaŋadi? Munabulilidi kwiluka nenu ami chiŋa niikalaŋa mwitala daTata yami? 50Odu izu dahosheliyi nawena hidayilumbulukililuku. 51Hakukunkumuka nawu, hakushika nawu kuNazareta; hakuyovwahilaŋa. Mama yindi hakusweka yuma yejimiyi mumuchima windi. 52Yesu hakukula nikumaana nikuchiminu, rinumona nikuwaha nikudi Nzambi nikudi antu.
Valgt i Øjeblikket:
Luka 2: MW62
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Lunda: Ndembu (Lunda of Kalunda) © B. F. B. S. 1962.
