Lik 12
12
Dunman klolɛ ndɛ bɔ Jésus kannin'n
(An `nian Mat 10:26-27)
1Kɛ ɔ yoli sɔ'n, sran akpi-akpi be yiali, ɔ man be fufu be wiengu su. Jésus i sɔnnzɔnfuɛ'm be yɛ ɔ dun mmua kannin ndɛ kleli be-ɔ, ɔ seli be kɛ: «An `nian amún wun kpa Farizifuɛ'm be kpaun ayre bɔ yɛlɛ dunman klolɛ'n i lika. 2Sa kwlaa nga sran'm be katakata su'n, i wie fi su ka-man lɛ b'ɔ su fite-man nglo-ɔ, yɛ ndɛ fi su ka-man nvialiɛ nun bɔ be su si-man nun-ɔn. 3I sɔ'n ti, ndɛ nga an fia kɔnguɛ kannin'n, ɔ ´tɛ nzra nun, yɛ nga an tu i aswre sua lɔ'n, be ´bo i ndolo.»
Sran ng'ɔ ti bɔ an sro i'n
(An `nian Mat 10:28-31)
4«Amun bɔ an ti n janvuɛ'n, n ´kan ndɛ kun kle amun. Nán an sro be nga be kun sran, bɔ be kwla yo-mɛn i sa fi kun'n. 5M ma kle amun sran nga bɔ yɛ an `sro i'n. An `sro Nyanmiɛn bɔ kɛ ɔ kun sran'n, ɔ kwla fɛ i yi nyrɛnnɛn lika nun'n, i yɛ an `sro i-ɔ. 6?Be yo-man ndrofia nnun atɛ bablu nnyɔn? Sanngɛ ɔ nin i sɔ ngba'n, Nyanmiɛn nyin fi-man be nun kun. 7Ɔ si amún ti ndrɛ'n bɔbɔ i nuan. Ɔ man, nán srɛ kun amun mlɔnmlɔn, sran kun ti kpa tra ndrofia kpanngban.»
Be nga be se kɛ be ti Krist liɛ'n
(An `nian Mat 10:32-33; 12:32; 10:19-20)
8«Nanwlɛ, sran ng'ɔ bo n dunman sran'm be nyrun'n, m bɔ n kacili Sran'n kusu m ´bo i dunman Nyanmiɛn i anz'm be nyrun. 9Sanngɛ sran ng'ɔ yo i wun sran'm be nyrun kɛ ɔ si-man min'n, m bɔ n kacili Sran'n n kusu n ´kɛn Nyanmiɛn i anz'm be nyrun kɛ n si-mɛn i.
10Sran kwlaa ng'ɔ kan m bɔ n kacili Sran'n mín wun ndɛ'n, be ´yaci cɛ i, sanngɛ sran ng'ɔ saci Nyanmiɛn Wawɛ'n i dunman'n, be su yaci cɛ-mɛn i mlɔnmlɔn.
11Kɛ be ´fa amun kɔ Nyanmiɛn ndɛ suanlɛ nin i srɛlɛ sua'm be nun, ɔ nin jɔlɛ difuɛ mun nin kpɛnngbɛn'm bé ja su'n, nán an koko ndɛ nga amun ´kan nan amu'an nyan amún ti'n, nin i kanlɛ wafa nga amun ´kan'n, 12afin Nyanmiɛn Wawɛ'n bɔbɔ ɔ ´kle amun ndɛ nga amun ´kan'n dɔ kunngba sɔ'n su.»
Bian anyanbeunfuɛ sinnglinfuɛ'n
13Be bɔ be yiali lɛ'n, kun seli Jésus kɛ: «Nja, se min niaan bian'n man e cɛ aja bɔ é si yaci mannin ye'n.» 14Yɛ Jésus seli i kɛ: «?Nja, wan yɛ ɔ fa min sieli kɛ n yo amun jɔlɛ difuɛ nin amun ninnge cɛfuɛ-ɔ?» 15I sin ɔ seli be kɛ: «An `nian amún wun kpa konvi kpli yolɛ'n i lika, afin man sran nyɛn i wun ɔ nyɛn i wun sɛ, nán ninnge sɔ mun yɛ be mɛn i nguan-an.» 16Ɔ buli be nyanndra kun. Ɔ seli kɛ: «Bian anyanbeunfuɛ kun i fie'n yoli ye kpa. 17Ɔ buli akunndan ɔ seli kɛ: ‹N ninnge mun yɛ be o yɛ, n lɛ-man lika n gua-man be nun. ?N ´yo i sɛ?› 18Akunndan kun kpɛnnin i klun, ɔ seli kɛ: ‹Nga m ma yo'n yɛ, m ma bubu tanngannin nga mun, n ´kplan uflɛ dandan kpa, n ´fa min awie'n nin min ninnge'n kwlaa guagua be nun. 19Kɛ ɔ ko yo sɔ'n, n ´tran ase, n ´de wunmiɛn, n ´di n klun like, afin ninnge ng'ɔ o yɛ'n, n ´di lele ɔ su wie-man. N klun a jɔ siɛn'n.› 20Sanngɛ Nyanmiɛn usali bian sɔ'n kɛ: ‹?Sinnglinfuɛ, ndɛ kɔnguɛ be ´fa wɔ, yɛ ninnge nga a yiayia be su yɛ'n, ɔ ´kɔ waan sa nun ?› 21Sran ng'ɔ kunndɛ ninnge kɛ ɔ ´nyɛn i wun, b'ɔ lɛ-man Nyanmiɛn ninnge'm be wie fi'n, kɛ ɔ ti sɔ-ɔ.»
Ngokoɛ
(An `nian Mat 6:25-34)
22Kɛ ɔ yoli sɔ'n, Jésus seli i sɔnnzɔnfuɛ'm be kɛ: «I sɔ'n ti, nán an koko ninnge bɔ an lɛ-mɛn'n ti se kɛ: ‹?Nguɛ yɛ e ´di-ɔ? ?E ´nyan tannin nin yɛ e kla-a?› 23Afin nguan'n ti kpa tra aliɛ'n, yɛ wunnɛn'n ti kpa tra tannin. 24An `nian kuankuan mun, be gua-man awie, yɛ be kpɛ-man awie, be lɛ-man kuku nin tanngannin, sanngɛ Nyanmiɛn ta be. An ti kpa tra anunman mun kpɛ blu! 25?Amun nun onin yɛ i kokolɛ nun ɔ kwla guɛ i afuɛ'n su bɔ kaan-an? 26?Sɛ an kwla-man like kaan kɛ nga sa yo'n, nguɛ ti yɛ like nga'm be ti an koko-ɔ? 27An `nian waka nyrɛ mun, be to-man jese, yɛ be wu-man tannin, sanngɛ Salomɔn bɔbɔ ɔ nin i anyanbeun'n kwlaa ɔ'a kla-man be nun wafa kun wunsu tannin le . 28?Sɛ Nyanmiɛn yo ijre bɔ ndɛ be o blo lɔ, bɔ ainman be ´gua be sin nun'n be klanman kɛ nga sa'n, ɔ kata-man amun wun sɔ kpɛ blu? ?An lafi-man Nyanmiɛn su? 29Nán an bu like nga amun ´di'n nin nzue nga amun ´nɔn'n i akunndan, yɛ nán an sanngan amun wun akunndan. 30Mɛn wunmuan'n nun be bɔ be su-man Nyanmiɛn'n, be yɛ be fa bé nyin blo ninnge sɔ'm be kunndɛlɛ su-ɔ. Amun Si si kɛ amún sa mian ninnge sɔ'm bé wun. 31An `dun mmua fa amún wun man Nyanmiɛn, man ɔ sie amun, i sin ɔ ´fa ninnge sɔ mun uka su man amun.»
Anyanbeun kpa'n
(An `nian Mat 6:19-21)
32«Amun bɔ an ti kɛ bua akpasua kaan kun sa'n, nán srɛ kun amun, yɛlɛ kɛ amun Si klo kɛ amun tran be ng'ɔ sie be'n be nun.
33An `yo amun ninnge'm be atɛ, an `fɛ i sika'n cɛ yalɛfuɛ mun. An `kpɛ bɛtrɔ b'ɔ yo-man nvuɛn bɔ like wie-man nun'n, an `sie i Nyanmiɛn su lɔ, lɔ liɛ'n, awiefuɛ kɔ-man lɔ, nvɔlɛ di-man like lɔ. 34Afin lika nga amun anwlɛn su ninnge'n wo lɛ'n, lɛ yɛ amun akunndan'n wo-ɔ.»
Tran minndɛlɛ
35«An `tanndan amún wun, an `sɔ amun kannin'n. 36Sran bɔ be su minndɛ be min'n bɔ kɛ ɔ fin atɔnvlɛ bo ju lɛ cɛ'n, b'ɔ bobo anuan'n be tike'n, an yo kɛ be liɛ'n sa. 37Be nga kɛ be min'n ´ba'n bé nyin o i sin'n, be liɛ su ti ye! An `nian nga b'ɔ ´yo'n yɛ: ɔ ´fɛ i tannin'n kpɛ i bo, ɔ man be ´tran ase, yɛ i bɔbɔ ɔ ´isa aliɛ nga be wa di'n man be-ɔ. 38Be nga bɔ sɛ ɔ ba kɔnguɛ afiɛn annzɛ akɔ nyinman klikli su'n, bɔ sɛ ɔ to be bé nyin o su sɔ'n, be liɛ su ti ye! 39Man amun wun i wlɛ kpa kɛ sɛ awlo bo kpɛn kun si dɔ nga awiefuɛ'n ba su'n, ɔ su yaci-mɛn i lɛ kɛ ɔ fiti i sua'n. 40Amun kusu, an `buabua amún wun sie, afin m bɔ n kacili Sran'n m ´ba dɔ nga an bu-man min akunndan'n su'n.»
Junman difuɛ ng'ɔ ti kpa'n nin ng'ɔ ti-man kpa'n
(An `nian Mat 24:45-51)
41Yɛ Piɛr usɛli i kɛ: «?Nannan, e yɛ a bu nyanndra sɔ'n kle ye annzɛ e ngba-a?» 42Yɛ e Min'n seli kɛ: «?Wan yɛ ɔ ti sran kpa b'ɔ si like su nian kpa, bɔ i min'n fɛ i sie i minniɛn'm be su kɛ ɔ man be aliɛ cɛn bɔ be sieli'n su nin-ɔn? 43I sɔfuɛ nga bɔ kɛ i min'n ´to i'n ɔ di i junman sɔ'n, i liɛ su ti ye! 44An `nian nga b'ɔ ´yo'n yɛ, ɔ ´fɛ i ninnge'n kwlaa wlɛ i sa nun. 45Sanngɛ sɛ i sran sɔ'n bu akunndan se kɛ: ‹Min Min'n i balɛ'n ɔ'a cɛ,› sɛ ɔ tɔ i min'n i sran yasua mun nin i sran mmla'm bé su bo be'n, sɛ ɔ di like nɔn nzan bo'n, 46sran sɔ'n i min'n ɔ ´ba cɛn nga i nyin nun-mɛn i balɛ'n su kun'n, ɔ nin dɔ nga ɔ si-man kɛ i su yɛ ɔ ba'n. Ɔ ´kpɛkpɛ i nun, ɔ man awieliɛ kunngba ng'ɔ wie be nga be ti-man sran kpa'n, ɔ ´wie i wie. 47Sran ng'ɔ si sa nga i min'n klo kɛ ɔ `yo'n sanngɛ b'ɔ bu-mɛn i akunndan yo-man'n, be ´bo i dan kpa. 48Sanngɛ sran ng'ɔ si-man nun nan ɔ yo sa wie b'ɔ nin fɔ tulɛ fata'n, be ´bo i kaan sa. Sran nga be mɛn i like kpanngban'n, sran sɔ'n yɛ be ´se i kɛ ɔ `fa kpanngban bla-a, yɛ nga bɔ be fa like kpanngban wlɛ i sa nun'n, be ´jran su kɛ ɔ fa kpanngban kpa bla .»
Jésus ti'n sran nin sran'm be afiɛn ɔ ´saci
(An `nian Mat 10:34-36)
49«M bali mɛn'n nun wɔlɛ, ɔ ka n ngunmin-ɔn ɔ'a sɔ! 50Batɛm wafa kun o lɛ bɔ san n ´yo, ɔ ka n ngunmin'n b'a yo min m'an nyan min ti! 51?An bu i kɛ m bali sran'm be afiɛn siesielɛ? Nɛ́n i sɔ ti-ɔ, sran'm be afiɛn sacilɛ yɛ m bali-ɔ. 52Afin kɛ ɔ fin ndɛ'n, sran nnun bɔ be o awlo kun nun'n, be ´bu nun, nsan bé bo ´yo kun nnyɔn bé wun, yɛ nnyɔn kusu bé bo ´yo kun nsan bé wun. 53Yasua kun nin i wa yasua'n be ´bu, yɛ ba yasua kun nin i si be ´bu, bla kun nin i wa bla'n be ´bu, yɛ ba bla kun nin i nin be ´bu, bla kun nin i wa yasua i yi'n be ´bu, yɛ bla kun nin i wun i nin'n be ´bu .»
Blɛ'n i nzɔliɛ
(An `nian Mat 16:2-3; Mar 8:11-12)
54Ɔ seli sran'm be ekun kɛ: «Kɛ an wun kɛ nyanmiɛn'n bo'n ɔ'a dun wia atɔliɛ lɔ'n, kpɛkuun an se kɛ, nzue wa tɔ, yɛ ɔ kpɛn su. 55Yɛ kɛ an wun kɛ aunngban'n fin papla nun lɔ ba'n, an se kɛ, ndɛ aunyɛyɛ'n ´ba, yɛ ɔ kpɛn su. 56Dunman klofuɛ mun, an si asiɛ'n su wa nin nyanmiɛn su lɔ ninnge'm be nzɔliɛ mun. ?Nguɛ ti yɛ an sie-man blɛ nga an wo nun yɛ'n i nzɔliɛ nin-ɔn?»
Sran nnyɔn be afiɛn siesielɛ
(An `nian Mat 5:25-26)
57«?Ɔ yo sɛ yɛ an kwla wun-man like ng'ɔ ti kpa'n i wlɛ-ɔ? 58Sɛ sran sanman wɔ'n bɔ amun ´kɔ jɔlɛ difuɛ'm bé ja su'n, kɛ an tɛ wo atin nun'n, mian ɔ nyin siesie jɔlɛ sɔ'n man ɔ wie nan ɔ'a fa-man wɔ a man-man jɔlɛ difuɛ'n, nan i kusu ɔ'a fa-man wɔ a man-man sonja'n nan sonja sɔ'n ɔ'a wla-man wɔ bisua'n ti. 59Sɛ ɔ yo sɔ'n, nanwlɛ a su fin-man lɔ fite-man lele san a ´wie i kalɛ'n kwlaa tutu, bablu kun bɔ su ka-man.»
Valgt i Øjeblikket:
Lik 12: BB98
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Baoulé Bible © Alliance Biblique de Côte d'Ivoire, 1998.
