Yele-za-pɛr-tib 11
11
A Babɛl tẽw yir-cõcowla
1A nɩbɛ za tɩ ƴɛ̀rɛ nɩ ƴɛ̀r-pɛ-been ɛ́ a ƴɛ̀r-bie tɩ ɩ been. 2Zɩ̃ k'aa nɩsaalbɛ na tɩ cere a saa-pɛrɩ́ lowr a, bɛ tɩ nyɛ̃ nɩ zi-tɩ̃tal Mezopotami tẽw, zɩ̃ a be. 3Bɛ tɩ yel'ɩ à ŋá kʋ̀ taa: «Alɛ! Nyɩ ɩ tɩ ŋma birkiri nyʋ̃ɔ́.» Bɛ tɩ de nɩ a birkiri a ɩ kʋsɛbɛ, ɛ́ a gudurɔ̃ ɩ a birkiri cará tanɛ. 4Al pùorí bɛ yel: «Alɛ! Nyɩ ɩ tɩ mɛ tẽ-kpɛ̃ɛ nɩ yir-cõcowla a nyʋɔr na na do tɩ tɔ a salom a. Lɛ n'a tɩ na tɛr yúor, ɛ́ bɛ bɛ diw tɩ yaarɩ a tẽw za zu ɛ.»
5A Sore tɩ yi n a salom zu siw k'ʋʋ tɩ nyɛ̃ a tẽ-kpɛ̃ɛ nɩ a yir-cõcowla a nɩsaalbɛ na mɩɛr a. 6Al pùorí ʋ tɩɛr ʋ pʋɔ: «Nyɛ̃, nɩ-bʋʋr-been nɛbɛ, ƴɛ̀rɛ ƴɛ̀r-pɛ-been, ɛ́ nyɛ̃ a tome bɛ na tĩ tone a! Ƴɛrɛŋa a, bom za kʋ̃ tʋ̃ɔ́ piw bɛ sɔ́r a lɛ bɛ na tɩ́ɛrɛ kɛ́ bɛ ɩ a ƴãw ɛ. 7Alɛ! Tɩ siw tɩ ŋmɛ a bɛ ƴɛ̀rʋ nyaw taa bɛ ta cãà wone taa ƴɛ̀rʋ ɛ.» 8A Sore tɩ diw bɛ nɩ a be yaarɩ a tẽw zu ziir za, bɛ bɛr a tẽ-kpɛ̃ɛ mɛb. 9Alɛ n'a so bɛ por a tẽw yúor kɛ́ Babɛl. Bʋ̃ʋ n'ʋ vɛ̃, be n'a a Sore tɩ dam a tẽw za ƴɛ̀rʋ nyaw taa, ɛ́ a be n'a ʋ tɩ diw a nɩsaalbɛ yaarɩ a tẽw zu ziir za.
A sãàkʋm-kore yée, a na tĩ a Sɛ́m ɛ́ tɩ tɔ a Abraham a
10A Sɛ́m bʋʋrɛ n'ɩ bɛ ŋa. A Sɛ́m tɩ tɛr'ɩ yome kʋba (100) a lɛn daar ʋ na dɔw Arpakisadɩ a, a kʋ̃ɔ-paalʋ-kpɛ̃ɛ pùorí yome ayi sob. 11Ʋ na wa dɔw a Arpakisadɩ baar'a, ʋ tɩ cãà na maalɩ yome kɔbr anũu (500), dɔw bidɛbr nɩ pɔwyaar.
12A Arpakisadɩ tɩ tɛr'ɩ yome lɩz'a ayi ŋmãa anũu a lɛn daar ʋ na dɔw Sela a. 13Ʋ na wa dɔw a Sela baar'a, ʋ cãà na maalɩ yome kɔbr anaar dɔwlɩ yome ata (403), dɔw bidɛbr nɩ pɔwyaar.
14A Sela tɩ tɛr'ɩ yome lɩzɛr'ɩ pie a lɛn daar ʋ na dɔw Ebɛɛr a. 15Ʋ na wa dɔw a Ebɛɛr baar'a, ʋ cãà na maalɩ yome kɔbr anaar dɔwlɩ yome ata (403), dɔw bidɛbr nɩ pɔwyaar.
16A Ebɛɛr tɩ tɛr'ɩ yome lɩzɛr'ɩ pie nɩ anaar ɛ́ dɔw Pelɛgɩ. 17Ʋ na wa dɔw a Pelɛgɩ baar'a, ʋ cãà na maalɩ yome kɔbr anaar dɔwlɩ yome lɩzɛr'ɩ pie (430), dɔw bidɛbr nɩ pɔwyaar.
18A Pelɛgɩ tɩ tɛr'ɩ yome lɩzɛr'ɩ pie ɛ́ dɔw Erewu. 19Ʋ na wa dɔw a Erewu baar'a, ʋ cãà na maalɩ yome kɔbr ayi dɔwlɩ yome piwaɩ (209), dɔw bidɛbr nɩ pɔwyaar.
20A Erewu tɩ tɛr'ɩ yome lɩzɛr'ɩ pie nɩ ayi ɛ́ dɔw Serugɩ. 21Ʋ na wa dɔw a Serugɩ baar'a, ʋ cãà na maalɩ yome kɔbr ayi dɔwlɩ yome ayopõi (207), dɔw bidɛbr nɩ pɔwyaar.
22A Serugɩ tɩ tɛr'ɩ yome lɩzɛr'ɩ pie ɛ́ dɔw Nahɔɔr. 23Ʋ na wa dɔw a Nahɔɔr baar'a, ʋ cãà na maalɩ yome kɔbr ayi (200), dɔw bidɛbr nɩ pɔwyaar.
24A Nahɔɔr tɩ tɛr'ɩ yome lɩzɛr'ɩ piwaɩ ɛ́ dɔw Tera. 25Ʋ na wa dɔw a Tera baar'a, ʋ cãà na maalɩ yome lɩz'a ayʋɔb for bir (119), dɔw bidɛbr nɩ pɔwyaar.
26A Tera tɩ tɛr'ɩ yome lɩz'a ata nɩ pie ɛ́ dɔw Abram, Nahɔɔr nɩ Haran.
27A Tera bʋʋrɛ n'ɩ bɛ ŋa: Tera dɔw nɩ Abram, Nahɔɔr nɩ Haran. Haran dɔw Lɔtɩ, 28ɛ́ de niwn kpi a ʋ sãà Tera ƴãw, a ʋ tẽ-dɔwra Uur na be a Kalde tẽw a pʋɔ. 29A Abram nɩ a Nahɔɔr tɩ de nɩ pɔwbɛ: a Abram pɔw tɩ dɩ na kɛ́ Saraɩ, ɛ́ a Nahɔɔr pɔw dɩ kɛ́ Mɩlka na ɩ Haran pɔwyaa a. A Haran mɩ̀ cãà tɩ n'ɩ a Ɩsɩka sãà. 30A Saraɩ bɛ tɩ tɛr bie ɩ, pɔw ãan tɩ n'ʋ.
31A Tera tɩ tɛr'ɩ a ʋ bidɛb Abram nɩ a ʋ yãw Lɔtɩ na ɩ a Haran bidɛb a. Ʋ mɩ̀ tɩ tɛr'ɩ a ʋ bie-pɔw Saraɩ na ɩ a Abram pɔw a. Ʋ tɩ tɛr bɛ na yi n a Uur na be a Kalde tẽw a, k'ʋʋ cen nɩ Kanãa tẽw. Bɛ tɩ cen na tɩ ta Haran#11:31 Haran: Yée ŋmɛ̃ taa n'a: a ka a, tẽw yúor'ʋ. kpɩɛr a be. 32A Tera tɩ maal'ɩ yome kɔbr ayi dɔwlɩ yome anũu (205), ɛ́ kpi a Haran.
Valgt i Øjeblikket:
Yele-za-pɛr-tib 11: DBDC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en Dagara © Alliance Biblique du Burkina Faso, 2013.