Matayo 2
2
Varango va nyinyiri va taari ya ngama
1Llya meendi Yesu alewonika kulya Betilehemu ya Yuda fyeeri filya Herode etiri umangyi vakasha vandu vauka na taari ya ngama vakafika Yerusalemu. 2Vakaamba, “A mangyi yeyo ya Vayuda aleirwa akee kwi? Shamashika mmbo lulelollya nyinyiri yakwe kulya taari ya ngama neese mmbo lwasha lushemfirya-ndi.” 3Naasa mangyi Herode ekiita indo kasavaa kimwi na vandu woose va kulya Yerusalemu. 4Kasanyiria vakohani vaniini woose na velosha mavavaso evasunundaa mbony ta Kristo kundo ashewonikyaa. 5“Vakaamba ni kulya Betilehemu ya Yudaya. Shamashika ni kindo kikee kireiye ni ulya mwauya fisuku kaamba, 6‘Na yewe Betilehemu ya Uruka lwa Yuda nshi kukee nndu kwanyiiya vashilyi va Yuda-fo. Shamashika efo kwafo kwiikaa kuuke-fo mangyi ashiisaa vandu vakwe va Israeli.’ ” 7Nalyo mangyi ilya Herode kavaanga vaanga valya kirisi. Kavasununda vammbye kyeeri valelollya nyinyiri ilya. 8Kavaruma veende kulya Betilehemu kavavia, “Kweenngye mundevesa waarya kya mwana yeto. Mukankooya sheenngyeny mbony, na yeny shiveenda indemfiirya-ndi.” 9Naasa, vekiita kilya kya mangyi vakakweengya. Nalyo pariparii nyinyiri ilya valelollya kulya taari ya ngama ikasha ivasongoya shia. Ikaenda ikatana yairisha efo uwe usumanu na ando mwana ulya akai. 10Naasa elyi valollya nyinyiri ilya vakatirwa ni nsia nniini nnu. 11Vakaanga na efo mmba vakakooya kimwana kilya ando amwi na maye; vakamfiiryandi vakamwoolokyasi vakawuya vakaporomwa findo fyawo vasurummye fya usuri. Vakansimba findo fyawo fya pya fya wuuru uniini, ni saabu na ubani na manemane. 12Vakoorwa ni Iruva efo yooryeny valaviire kyaaro na kulya kwa Herode, kya indi vawuye na kulya urukeny lwawo veshiiraa shia ingyi.
Yesu arishisyo Misri
13Naasa elyi vaanga valya varie shia yeewuya, nsu wa Nndumi kasha ikoora na Yosefu efo yooryeny; kammbia, “Wara shia kweenda kwirye kimwana ekyo na maye kunderishia kulya Misri kundekaa-fo; shitani shakuvia-se shamashika Herode arie iruuya kimwana yekyo nakirumate.” 14Nalyo kawara shia yeenda arie kimwana kilya na maye elyi kio. Karishya kulya Misri kandekaa-fo. Herode katana afwa. 15Na kilya kikee kirere ni Nndumi na kana ka ulya Mwauya fisuku naambo kikooye iinukya; kyeamba,
“Ni kulya Misri mfo shilevaanga mwana wakwa.”
Vakoku vawaawa
16Nalyo Herode ankooya allembwa ni vaanga valya karooywa n'ngoo nnu. Karuma vana va kyuumi kulya Betilehemu na va kulya minyanuny koose vawaawa. Kupookya valya va myaaka ivii na valya vawuya-wuya numa; kyuuka na kyeeri kilya alesununda vaanga valya. 17Nalyo kilya kikee kirere ni ulya mwauya fisuku Yeremia kiveinukya indo elyi aleamba:
18“Ni unyanga luleitiwa kulya Rama,
ni kiiyo na ikwaalala kyuumu.
Ni Raheli akee iiya vana vakwe,
nta naleve iviirya muu neelyi valakiiyo-se.”
Yesu aviirwa ooka Misri
19Naasa Herode ekimaa ifwa, nsu wa Nndumi kasha ikoora na Yosefu efo yooryeny kulya Misri. 20Kammbia wara shia kweenda kurie kimwana na maye kundefika kulya urukeny lwa Israeli, kimmba valya valesia muu wa kimwana yekyo valemfwa. 21Nawe kawara shia keenda arie kimwana kilya na maye kandefika kulya urukeny lwa Israeli. 22Naasa ekivywa ni Arikelao atiri umangyi ando a ndeye Herode, kairyaa yeenda-fo, koorwa ni Iruva yooryeny kawara-se shia kandefika kulya myuungony ya Galilaya. 23Kashesamya muri uvaangwaa Nasareti, na kilya kikee kirere nivaauya fisuku naambo kikooye iinukya elyi vaambaye, “Ashevaangwa Nndu wa Nasareti.”
Valgt i Øjeblikket:
Matayo 2: MASNT00
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
New Testament in Kimashami © Bible Society of Tanzania, 2000.
