Oseas 8
8
Diozen ba nchuybie'e kan gak ke Israelen xtol dan lloerawe loe lsak ka'
1Bkoell trompet ko'on,
ke llun to waka ya, be'nn llap
raw yell ke Xanllon.
Le bi bdap ake' baran dan ba bdichjbian,
na bi llun ake' kan nak lloa xtillan dan bsedra le aken.
2Na na' zak ake' llusia ake' lle ake' nada':
Llazaketo rwe' ka Dios ke Israel.
3Axha Israelen ba balliye'e kale dan nak dawen'na,
na kelen'na be'nn ka' llwiere le aken nawlloa ake' le ake'.
4Ni ke bnab aksre nada' kan braj ake' be'nn ka' wnebia le aken,
na kan braj ake' be'nn braw ke ake' ka', ni ke bneszera.
Ba bxhi ake' oro, na ya plat ke ake' ka'
nench'na benchaw ake' loe lsak ka'
na blleyi kwin ake'.
5Llakllrala bellen llwerao Samaria.
Bagolnin yel llaklla kian kone re'.
¿Ye arke llierere nench'na wayak re' yall 6be'nn israelitas?
Bellen lloeraw Samarian bi naken Dios,
ba benchaw ake' konen niana aken,
kelen'na goxjtimba.
7Le aken guz ake' bee xhen,
na warap ake' bee bdon;
bi gat da warap ake' raw lix ke ake' ka',
ni ke gakze koej ake' yesj pan ke trigon,
na chetkarize ba guk braj ake' raten,
beꞌnn zak gayubre gaw aken.
8Ba bdeb ake' Israelen.
Be'nn sjalla latj yell-liw yubre llre akre le ake'
kaꞌ to da bibi zak,
9dan biaj ake' janab ake' gukre ke Asirian,
ka to burr ba bi nmaxh.
Efraín'na ba wewe'e xtue'e kaꞌ.
10Na lakse wewe'e be'nn sjalla latj yell-liw yubre,
nada' guslas ake',
na to tiemp bill su
be'nn wnebia le ake'.
11Efraín'na ba benchawe'e dazan raw bkuy,
na bi gukrenen le'e, na blliyren le'e benee daxhinj.
12Lakse bzoja dazan da wzajnie le'e,
le'en bi biazrallen.
13Le aken llawe akre gut ake' bayix nench'na lloeraw ake' nada',
na llawe akre llaw ake' ber ke bayix ki,
axha nada', Xan ake', bi zoa nbaraz kone le ake',
wallajdinlalla da mar kaꞌ ba ben aken,
na wsakzia le ake' ni ke daxhinj ke ake' kaꞌ,
na guna nench'na wayaj ake' Egipton dayubre.
14Israelen llunchawe'e yo' raw ake',
axha llalalle noxhan ben le'e.
Judán llaral llkwise'e yell xhen ake', na ze xhen da sjanak war chuch,
axha nada' gadan yi', na wzeya
yoyte da ka' llunchaw aken.
Valgt i Øjeblikket:
Oseas 8: ZPUPAT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind