Juan 3
3
Jesús ets Nicodemo
1Jam ijty tu'uk ja fariseë ja'ay, Nicodemo'ajtp, mëj'äämpy ijty y'ity ma ja jutiis ja'ayëtyën. 2Yë'ë ojts ninëjkxy ja Jesús koots ets t'ënëmaay:
Wintsën, nija'awëtyëpës ko mijts Dios të mkexyë ets ëëts xyaj'ijxpëktëty, jä'ä ko ka'ap tjëkyepy pën tunëty ja mëj'ajtën ijxtëm mijts xytyunyën pën ka'ap ja Dios tmëëtëty.
3Ënet ja Jesús y'ënëmaayë:
Tëy mijts t'ënëëmë, pën ka'ap jatëkok ja ja'ay myëxu'unk'aty, ka'ap tjëkyepy t'ixëty ja Dios ja kyutujkën.
4Tä ja Nicodemo tyajtëëy:
¿Wi'ix tëy ja'ay jatëkok myëxu'unk'ajnëty? ¿Wä'än jëtää tu'uk ja'ay mëjja'aypyë tyëkëty tyaak jyootjoty ets jatëkok myëxu'unk'ajtwinpitëtyë?
5Ënet ja Jesús y'ëtsoowë:
Tëy mijts t'ënëëmë, pën ka'ap myëxu'unk'aty mëët ja nëë ets ja Dios ja Myëjaaw myëk'ajtën, ka'ap tjëkyepy tyëkëty ma ja Dios ja kyutujktaknën. 6Ja ja'ay jëtu'un myëxu'unk'atë ijxtëm yaa naaxwiinyëtën, ni'kx kopkën je'eyë; pën jatëkok mëxu'unjk'ajtp mëët ja Dios ja Myëjaaw myëk'ajtën, ka'ap ja kyëxë'ëky. 7Këtii nëkoo xymyëkjawë ko t'ënëëmën: Ko kopkpëky ko ja'ay jatëkok myëxu'unk'atëty. 8Yë poj, pojp oymyaajëty, ets oy jyayajmëtoy ko y'amu'uy; ka'ap yajnijawë maa tsyoony ets maa nyijkx; näjyëtu'un yë'ëjëty mëti'ipë mëxu'unk'ajtëpën jatëkok ka'ap yaj'ixtë.
9Tääts ja Nicodemo ojts tyajtëëwkojnëpë:
¿Wi'ix ya'atë jëtu'unpë tyunëtëty jyatëtëty?
10Ets ja Jesús y'ëtsoowë:
Israel ja'ay yaj'ijxpëjkpë mijts, ¿ets ka'ap ya'atë xynyijawë? 11Tëy mijts t'ënëëmë ko nija'awëtyëpës mëti'ipës nnikajpxtëpën, ets nija'awëtyëp ëëtsëty mëti'ipës të n'ixtën; je'eyëp ko miitsëty ka'ap xymyëpëktë mëti'ipë njatukmëmëtyaktëpën. 12Pën ka'ap miits xymyëpëktë ko ntukmëmatya'aktë mëti'ipë yaa naaxwiinyëtën, ¿wi'ix xymyëpëka'antë ko ntukmëmëtya'aktëty mëti'ipë tsajpjotmën?
13Ni pën tsajpjotm të kya'otsy, yi'iyë mëti'ipë jam të tsyoonyën ets yaa naaxwiiny të kyëtä'äky, yë'ë jëtu'un ja naaxwiinyëtë ja'ay ja y'U'unk. 14Jëtu'un ijxtëm ja Moisés ojts ja tsa'any tyajpëtë'ëkyën jam të'ëts'itjotm, näjyëtu'un ja naaxwiinyëtë ja'ay ja y'U'unk pyëtë'ëka'any; 15ets jëtu'un, pën mëpëjktëp ma yë'ëjën pyaatantëp ja juukyajtën xëmëkyëjxmëpë.
Tios tsyojkpy ja naaxwiinyëtë ja'ay
16Yë'ë ko Dios ni'ik ja naaxwiinyëtë ja'ay tsoky, paaty tkejxy ja y'U'unk tu'kpajkpë. Pën myëpëjkpy ka'ap y'ookëty, yë'ë myëët'atëp ja juukyajtën xëmëkyëjxmëpë. 17Jä'ä ko yë Dios ka'ap yë'ëkyëjxmëty tkejxy ja y'U'unk naaxwiiny ets tyajnitukëja'any ja naaxwiinyëtë ja'ay, yë'ëkyëjxm të tkexy ets tyaj'ëwaatsëpëtsëmëty ja ja'ay.
18Pën myëpëjkpy ja Dios ja y'U'unk; ka'ap nyitukëja'any; e mëti'ipë ka'ap myëpëkyën tëë nyitukë jä'äkyëjxm ko ka'ap të tmëpëky ja Dios ja y'U'unk tu'kpajkpë. 19Mëti'ipë ka'ap myëpëktën tëë nyitukëtë, jä'ä ko, yi'iyë ja ëxëëkpë tyuuntëp paaty ja kujaj kutë'kxën ka'ap të tsoktë ko të jyaminy yaa naaxwiiny. 20Pën tyuuntëp ja ëxëëkpë, y'ëxëëk ijxtëp ja të'kxën jajën, këtiipë yajnijawëty mëti'ipë tyuuntëpën. 21E ja mëti'ipë juuky'ajtëpën mëtëy, myëwinkoontëp ja kujaj kutë'kxën ets yaj'ix yajnijawëty tu'kë'ëyë mëti'ipë tyuuntëpën ijxtëm ja Dios tsokyën.
Ko Juan tnikäjpxy ja Jesús
22Ko jëtu'un tyuunë jyajtë, tääts ja Jesús ojts nyijkx mëët ja y'ijxpëjkpëtëjk Judea y'itjotm, ma ojts wäänë y'ityën ets tyajnëëpejty ja ja'ay. 23Näyjyëtu'un ja Juan ënety yajnëëpety jam Enón, winkon ma tu'uk ja kajpn txëëwatyën Salim, jä'ä ko ko ënety jam ja nëë; jamts ja ja'ay ijty nyëjkxtë ets nyëëpätë. 24Jëtu'un tyuunë jyajtë ka'anëm ënety ja Juan yajtsumnyëm.
25Ojts jënaakën ja Juan ja y'ijxpëjkpë tyajkäjpxykyojtë mëët tu'uk ja jutiis ja'ay wi'ix ja ja'ay nyäyajwa'atsëtëtyën, 26ets ojts tuk'ëwaanëtë ja Juan, ets t'ënëmaaytyë:
Wintsën, ja ja'ay mëti'ipë ënety mijts jam mëëtën, jam Jordán, mëti'ipë të xynyimëtyä'äkyën tam tyam yajnëëpety ets nimay ja ja'ay jyänty nyiminyë.
27Ets ja Juan y'ënëmaayëtë:
Ka'ap pën tii tmëëtëty pën ka'ap ja Dios të myo'oyë. 28Ojts miits kë'ëm xy'ixtë ko ojts n'ëna'anyës koos ka'ap ëjts nKristëty, je'eyës jëyëjp të nyajkexy. 29Ma ja pëjkën ukën y'ityën, ja ye'etyëjk yë'ë kyë'ë'am'ajtyp ja to'oxytyëjk; ets xoontakp ja pëjkpë ye'etyëjk ja myëku'uk mëti'ipë mëët oy nyämyäyën ko tmëtoy kyäjpxy myëtyä'äky ja pëjkpë ye'etyëjk. Näjyëtu'unës tyam, xoontakpës nyajpaaty ko Jesús ja y'aaw y'ayuk nmëtoowës. 30Yë'ë, ni'ik wyimpäta'any, e ëjts ni'ikyës naxymyëja'any.
Mëti'ipë tso'onpën jam këjxm
31Mëti'ipë tso'onpën jam këjxm, yë'ë tu'kë'ëyë winë nyikopk'ajtääpy. Mëti'ipë naaxwiinyën, naaxwiiny je'eyë tyuny, ets yi'iyë nyimëtyäkpy yaapë naaxwiinyën. E mëti'ipë tso'onpën tsajpjotm, yë'ë tu'kë'ëyë winë nyikopk'ajtääpy, 32yë'ë myëtyäkpy mëti'ipë të t'ixy të tmëtoyën, je'eyëp ko ka'ap pën të tkupëky ja tëyajtën mëti'ipë jyanikäjpxypën. 33E pën kyupëjkpy, yë'ë nyikäjpxyp ko Dios tyiyëty jyääntyëty. 34Pën ja Dios të kyexyë, Dios ja y'aaw y'ayuk myëtyäkpy, jä'ä ko Dios ja Jya'awën të tyäky ëmuumtu'ukjot. 35Ja Dios Teety tsyojkpy ja y'u'unk ets tëë tukkë'ëtëjkëtyä'äy mëti'ipë myëët'ajtypyën. 36Pën ja Dios U'unk myëpëjkpy, yë'ë myëët'ajtyp ja juukyajtën xëmëkyëjxmëpë; e mëti'ipë ka'ap tmëpëkyën Dios U'unk, ka'ap tmëët'ata'any ja juukyajtën xëmëkyëjxmëpë, yë'ë y'ëxajëjäämpy ja Dios ja tyiytyu'unën.
Valgt i Øjeblikket:
Juan 3: QUETZMIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia Dc en Mixe de Quetzaltepec, Oaxaca México © Sociedad Bíblica de México, A.C.
