Génesis 6
6
Naaxwiinyëtë ja'ayëty y'ëxëëktu'un y'ëxëëkkajpxënëty
1Ko yë naaxwiinyëtë ja'ay ojts ëka'any jyuuky'ajtsoontë yaa naaxwiiny. Ets tyajmëxu'unk'ajtë y'u'unkëty to'oxytyëjkpë ets jëtu'un yä'ktë pyäjtë. 2Yë Dios yë tyuunpëtëjk ko t'ijxtë ya'atë to'oxy'ëna'këty janty'oy janty tsujëtypë. Ënet ojts twin'ixtë aakjä'ä oyëtypë ets mëët pyëjktë y'uktë, mëti'ipë ënety tyimtsojkën'ajtëpën. 3Ënet yë Wintsën ojts y'ënä'äny: Ëjts ka'apës jëtu'un nkupëkëty ets naaxwiinyëtë ja'ay jyuuky'atëty xëmëkyëjxm, jä'ä ko yë'ë, xixy yë je'eyë. Paaty je'eyë jyuuky'atëty mëko'px ja i'px jëmëjt.
4Jää ojts ëka'any jya'të yë ja'ayëty mëti'ipë yajtijtëpën ja'aypyajkyeny ko ja Dios ja tyuunpëtëjk nyämyujkëtë mëët ja to'oxy'ëna'këty mëti'ipë ënety yi'iyë myëmaay myëët'ajtëpën yääyëpë naaxwiinyën. Ko myiintë jyajtë ja y'u'unk y'ëna'këty, yë'ë jëtu'un ojts jotmëk y'itë ko ijty ja tsip tyunyë jeky'äjty.
5Ko jëtu'un ja Dios t'ijxy ko ja naaxwiinyëtë ja'ay tyëkooynyë ets je'eyë xëmë tmëmaay tmëët'ajnë wi'ix pyokytyunëtyën. 6Mëk ja Wintsën tja'awëy jä'ä ko kë'ëm ënety të t'ëkyajkojy ja ja'ay. Mëët ja mëkjotmay, 7ojts y'ënä'äny: Nyajkutëkoyëpës ënät yë ja'ay naaxwiinypë mëti'ipës të nyajkojyën ets näjyëtu'un yë jëyujkëty mëti'ipë jëën ëkë'ëy tëjk ëkë'ëy ijtëpën tsënaaytyëpën; näjyëtu'un yë mëti'ipë myox tyukye'eytyëpën ets joon jëyujk mëti'ipë kääkjëtijtëpën. Mëkës tyam njawë koos ojts kë'ëm nyajkojy.
8Yë Dios ojts tni''ijxkëtä'äky tu'uk yë ja'ay mëti'ipë xyëëwajtën Noé, yë'ë oy ënety yë Dios tmëtuny.
Yë Noé kyepytyëjk nëëwinye'epyë
9Ya'atë jëtu'un nyimëtyä'äky'äjtyp yë Noé.
Ko yë Noé jyuuky'äjty, jëtu'un ojts winë tuny ijxtëm ja Dios y'ëne'emyën. Yë'ë tu'uk ojts oy jyuuky'äty ma ja naaxwiinyëtë ja'ayëtyën. 10Noé nitëkëëk ijty yë myaank, jä'ä xyëëwajtëp Sem, Cam ets Jafed.
11Ma ja Tiosën ujts ënety ja naaxwiinyëtë yajpaaty mëët ja ëxëëktu'un ëxëëk kajpxën. 12Jä'ä ko ja naaxwiinyëtë ja'ayëty tëë ënety wyinma'anytyëkoytyë. Ko ja Dios t'ijxy ko yaa naaxwiiny naaxkëjxy mëj këjää ënety ja ja'ay pyokytyuunë. 13Ënet yë Dios t'ënëmaay ja Noé: Tyam tëëjës ntuknipëjktaakë koos yë naaxwiinyëtë ja'ay tu'kë'ëyë nyajkutëkooytya'aja'any. Jä'ä ko yë'ëjëty mëj këjää të pyokytyuntë. Paatykyëjxm ëxëëk yë ja'ayëty nyätyuun nyay'ënëmaayënëtë. Nyajkutëkooytya'ajäämpyës tu'kë'ëyë winë mapaat yë naaxwiinyëtë y'ëwtityën. 14Paaty mijts yakoj tu'uk yë kepy nëëwinye'epyë, yë'ë juunëtypë kepy jootjoty mpëjkta'akëp, kanaak yë nyi'akojtuk, e ko ënety jëtu'un të xykyoj'apatëtyä'äy, ënät nëjkx xy'atsi'tstujkta'ay maajaty y'ëwa'atsëtyën mëët yë o'tsn ëkë kepy'u'pky këtiipë ja nëë tyëkëty. 15Ko nëjkx xyajkojy yë kepy nëëwinye'epyë, yë'ë ya'atë kijpxëny nëjkx xyajtuny: jä'ä xyaj'ayeny'atëty tëkë'px majkmokx xajpk ets jä'ä xyajmëjjwiin'atëty majkmäjtsk xajpk ja kujkm ets xyajkëjxm'atëty wëxtujk xajpk ja kujkm. 16Tëkëëk nikë'ë xy'oytyunëty ets xypyëjkta'akëty tu'uk yë nyi'ëwa'atsajtën itkujky ma nyawopën, jä'ä xytyukkukä'äkëty yë nyikë'ë mëët yë nyawop tu'k'kë'ënuux ets mëët yë nyitëjk'aaw pa'apa'a. 17Nkäxäämpyës yë mëjkomtuu mëti'ipë nyikoonpatëpën yë naaxwiinyëtë ets tëkokyë winë kyutëkooytya'ajëty, mëti'ipë juukyajtënmëëtën yaa naaxwiiny. Tu'kë'ëyë jënu'un naaxkëjxy winë yajpaatyën o'kta'atëp. 18E mëët mijts ntunäämpyës tu'uk yë käjpxytyu'unën. Mijts jap nëjkx mtëkë ma kepytyëjkën nëëwinye'epyë ets m'u'unk m'ëna'k ets mto'oxytyëjk ets mtsu'utëjk. 19Näyjyëtu'un yë jëyujkëty nëjkxëp jap xypyëjktä'äky ma kepytyëjkën nëëwinye'epyë, aaktu'kyä'äy tu'kto'oxyëty, yä'äypyë ets to'oxypyë. Wä'än timmyëti'ipë jëyujkëty jënu'un yajpaatyën yaa naaxwiiny ets yë'ëjëty näjyëtu'un nëjkx wyë'ëmtë juuky'ajtpë yaa naaxwiiny ijxtëm mijtsën. 20Aaknimäjtskjaty nëjkx yë jëyujk mpaatëkëty jap ma ja kepytyëjkën nëëwinye'epyë, oy tyimmëti'ipë jëyujkëty, yë joon jëyujk ets jëyujk mëti'ipë tsënaaytyëpën ma jëën tëjkën, mëti'ipë myox tyukye'eytyëpën ets jëtu'un jyaak juuky'ajtkojtëty naaxwiiny. 21Nipëjkpät näjyëtu'un yë jë'kxy pëky may mëti'ipë nëjkx xyjyi'kxy xypyikën ets mëti'ipë nëjkx tjë'kx tpëktën yë jëyujkëty jap ma ja kepy nëëwinye'epyën.
22Ënet yë Noé ojts jëtu'un tkuuytyuunta'ay ijxtëm ënety yë Dios të y'ënë'ëmxëtyën.
Valgt i Øjeblikket:
Génesis 6: QUETZMIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia Dc en Mixe de Quetzaltepec, Oaxaca México © Sociedad Bíblica de México, A.C.