Génesis 16
16
Agar mëët ja y'u'unk Ismael
1Yë Sarai ka'ap ënety tjëkyepy tmo'ojëty yë u'unk maay yë Abram. Jam tu'uk ja tyuunpë, Agar xyëëwajtyp, Egiptë kyukajpnëty. 2Ënet t'ënëmaay ja Abram:
Ëk'ix, mijts mnija'ap ko yë Dios yë'ëjës xykyamoopy yë u'unk maay. E paaty yam nmënu'kxtä'äky ets xymyëët'atëty yë ntuunpës Agar. Wä'änxyëp yë Dios u'unk maay myo'ojëtëty etsës ëjts n'u'unk'atëty.
Ënet ja Abram ojts tkupëky ijxtëm ja Sarai y'ënë'ëmxëtyën. 3Ojts ja Abram tmëët'aty ja Agar, kom majk jëmëjt ma ënety jam Canaán të jyä'tyën. 4Ko ja Abram tmëët'ajty ja Agar, ja Agar ojts wyi'imy u'unk mëët. E ko nyäjya'awëyë u'unk mëët, ka'ap ojts t'ëkmëj'ijxnë ja wyintaj. 5Ënet ja Sarai t'ënëmaay ja nyiye'etyëjk Abram:
Mijts poky mëët'ajtyp koos yë Agar ka'ap xy'ëkmëj'ijxnë. Ëjts mijts kë'ëm të nmo'oy ets xymyëët'atëty ijxtëm jeexyë xytyo'oxytyëjkëtyën. E ko ënät nyäjyawëty u'unk nyëkëjxm'ajtyp, mëj këjxm nyäjya'awënë. Dios ënät ëna'anëp, pën yë poky myëët'ajtyp, pën ëjts ëkë mijts.
6Tä ja Abram y'ëtsooy ja tyo'oxytyëjk:
Yë mtuunpë mijts mkë'ë'am'ajtyp, mijts mnija'ap wi'ix xytyuna'any.
Ënet ja Sarai tukjoot'anpëjky ja Agar ets koonëm tyajkeky. 7Tëë ënety yë Agar yë të'ëts'it tpëjknë ko ojts tu'uk yë Dios tsyajpjotmëtë kukäjpxy myëkäjpxyë, jam winkon ma tu'uk nëëwookyën, jä'ä xyëëwajtyp Shur, 8ets yajtëëwë:
Agar, mëti'ipë tuunpë'ajtëpën yë Sarai. ¿Maa jëtu'un mtsoony? ets ¿maa jëtu'un mnëjkxy?
Ënet ja Agar y'ëtsooy:
Yë'ëjës nkukekpy yë nwintajës Sarai.
9Tä ojts ja Dios kyukajpxpë y'ënë'ëmxëty:
Wimpit jatëkok ma të mtsoonyën, ma mwintajën Sarai tyëjkën ets mëmëtow, pën tii mtuk'ënä'ämëp.
10Tyaa ja Dios kyukajpxpë ojts näjyëtu'un jyaakënë'ëmxëty:
Ëjts nyajmayëjäämpyës yë m'u'unk m'ëna'k,
ets m'ok'u'unk m'ok'ëna'k,
jëtu'un ijxtëm ka'ap pën tmëtyoowta'ajëtyën.
11Mijts u'unk maay mnëkëjxm'ajtyp,
ko myinëty jya'tëty naaxwiiny jä'ä xyëëwmo'ojëty Ismael,
jä'ä ko Dios tëë tmëtoow'ity yë mjë'ëyën myaxën.
12Jëtu'un nëjkx y'in'aty tä jëyujkën, mëti'ipë mëk inën.
Tsip tunëp oy tyimpënëty mëët,
ets tu'kë'ëyë tsiptuna'antëp mëët yë'ë.
Ja jyëën tyëjk ta'tspëky tyaj'itëty,
oy ja jyiiky myëku'uk kya'oyjyawëtëty.
13Yë Agar, yë'ë ënety Dios mëët të myëtyä'äky, paaty ojts txëëwmo'oy: Dios mëti'ipë winë y'ijxypyën tyuunpyën, jëtu'un nyämyä'äy nyätyajxëty: Tiosës kë'ëm të xytyim'ixy, e tyamës je'eyëm njaakjuuky'äty. 14E paaty näjyëtu'un jampë ja nëëjut txëëwaty: Ja nëëjut mëti'ipë juukyën ets xy'ixës. Ya'atë nëëjut jam yajpaaty itkujky ma Cadés mëët yë Béred nyäpyäätyë.
15Ënet yë Agar tu'uk yë u'unk tyajmëxu'unk'ajty, Abram mëët t'u'unk'aty. Jä'ä ojts txëëwmo'oy Ismael. 16Majkta'px tëtujk ënety yë Abram yë jyëmëjt ko myëxu'unk'ajty yë Ismael.
Valgt i Øjeblikket:
Génesis 16: QUETZMIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia Dc en Mixe de Quetzaltepec, Oaxaca México © Sociedad Bíblica de México, A.C.