Lucas 9
9
Jesús tpakkexy y'ixpëjkpëttëjjk Yës Teety y'aaw y'ayuujk kajpxwa'kxpë
1Jesús tyaxmujjky nimajkmäjtsk y'ixpëjkpëttëjjk, nits mëjk'ajjt tmooy jäts jaa'y tokniwa'atstë't mëjjku'ujy jäts mëët jaa'y tyëktso'oktë't. 2Nits tpakkejjxy jäts nijkxy tmatya'aktë Yës Teety y'aaw y'ayuujk nits mëët pa'amjaa'y tyëktso'oktë't. 3Jäts tnëëjmjaay:
—Najjyë mnëjkxtë't kä'ä xpakko'ntë't: mtajjk, mxuumy, kääky, meeny, ni wit mati' mpëmnaxtë'p. 4Pën maj mja'ata'aktë, kuttëjjkëtë tu'ukyë, kunë'm jä' kajjp mtsoo'nëtë't. 5Pën maj kajjp jaa'y mkakkuppekyëtë, naxtë jä'yë jäts ku mpitsë'mtë't kajjp'am wixit'të nax'ooky mtekyëjjxy, najjts kyä'äjxjë'ëkt jäts tëj jä' jaa'y Yës Teety tyëk'ampëktë.
6Nits Jesús y'ixpëjkpëttëjjk tsyoo'ntë jäts nyëjkxtë kajjp kajjp tmatya'aktë Yës Teety y'aaw y'ayuujk jäts mëët pa'amjaa'y tyëktso'oktë.
Herodes kä'ä t'ijxë pën jä' Jesús
7Nits Herodes t'amatoonajjxy tukkë'yë tij y'ijjty tuujnë'p; jäts attëy'ajat ttattaany jä'ku nitu'ukën jaa'y y'ijjty wya'antë jäts Juan Bautista tëj jyükypyeky, 8janitu'uk wya'antë jäts yëk'ayuujknajxpë Elías jä', jämts pën wantë'p jäts tu'uk yëk'ayuujknajxpë tëj jyükypyeky mati' jeknyë jüky'eetyë. 9Nits Herodes wyaany:
—Ëjts kë'm nniwaa'n'ajjt jäts Juan tyëk'ooktë't. ¿Pënts jä' mati' ixyam yëknikkajpxp yëknimatyakp?
Jäkëjxts y'ijjty Herodes tja'ijxëwya'any Jesús.
Jesús tyëkkay nimuwoxk miijl jaa'y
10Kuts apóstolestëjjk wyimpijtnëtë, jäts tmatyaajkjäätyë Jesús tukkë'yë tij y'ijjty tëj ttuntë. Nits Jesús pyawaajjëtë tu'uk kajjp mati' txëëw Betsaida. 11Kuts jaa'y tnijaa'w'eetyë maj y'ijjty tëj Jesús nyijkxy, nits tpanëjkxtë; jäts Jesús yëkxon wyaatsoojjëtë, nits myatyaajkxëtë Yës Teety y'aaw y'ayuujk jäts mëët tyëktsoojky pa'amjaa'y. 12Kuts xëëw kyitaknë, nits apóstolestëjjk tnëëjmjäätyë Jesús:
—Pakkäjxkëjxnë yë' jaa'y, wä'n tnëjkxtë kajjpjotm ok maj nitu'ukën jaa'y tsyëënë kamjoojty jäts pyoo'kxtë't nits mëët t'ijxta'atë't tij kya'ytyë'p y'uuktë'p, jä'ku nittij yaj kya'ity.
13Nits Jesús nyëë'mxëtë:
—Yekkaytyë miits.
Jäts apóstolestëjjk y'atsootë:
—Muwoxkë'm ëëts jä'yë nmëëtë tsapkääky jäts jamäjtsk ajkx, nit ku ëëts nijkxy njuy kääky tojkx jäts nitukkë'yë jaa'y ntaniwaajt'ëë'yë'n.
14Jä'ku nimuwoxk miijlë'n y'ijjty yaa'ytyëjjk. Nits Jesús tnëëjmjaay y'ixpëjkpëttëjjk:
—Nëëjmëtë jaa'y nits niwixtekxymyajjkjäty tsyëën'y'oyëtë't.
15Najjts y'ixpëjkpëttëjjk jaa'y tyëktsëëny'oyëkyëjxtë. 16Nits Jesús tkoony muwoxk tsapkääky mëët jamäjtsk ajkx, jäts tsapwinm pya't'ijxy nits tkunuu'kxtaajky, nitnë'mts tujkwä'kxy jäts tmooy y'ixpëjkpëttëjjk nits jaa'y tanipaattëtë't. 17Jäts nitukkë'yë jaa'y ku'uxyë kyaytyë, kuts kaytyuk tpiimujknëtë majkmäjtsk käptyuj ojts y'ütsy.
Pedro tnikkäjpxy pën jä' Jesús
18Tu'kyaajjë ku Jesús y'ijjty nyuu'kxta'aky nityu'uk appak'itjötypy, jäjpts y'ixpëjkpëttëjjk nyija'ajtë, Nits Jesús tyëktëëy:
—¿Ntsoj jaa'y wya'antë pën ëjts?
19Nits jä' y'atsootë:
—Jäm nitu'ukën pën wantë'p jäts mijts Juan Bautista, jatu'uk wya'antë jäts yëk'ayuujknajxpë Elías mijts, jämts pën wantë'p jäts tu'uk yëk'ayuujknajxpë tëj jyükypyeky mati' jeknyë jyüky'eetyë.
20—Nits Jesús yyëktëëjjëtë, ¿jäts miits, ntsoj mwa'antë pën ëjts?
Nits Pedro t'atsooy:
—Cristo mijts, Yës Teety y'uu'nk.
Jesús tnikkäjpxy y'oo'jkën
21Nits Jesús mëjk tyappawaajnëtë jäts kä'ä pën twaajnëtë't. 22Nits nyëë'mxëtë:
—Tsätsymyëjk y'ayowa'any yaa'ytyëjjk y'uu'nk, ka'oy'ijxë'p majaa'ytyëjjk, teety nyiwintsëntëjjk mëët pawaa'n yëk'ixpëjkpëttëjjk. Jäts jaa'y yëk'ookë't, kyutuwëëk xëëwts nijkxy jatu'kyaajjë jyükypyeky.
23Nits Jesús tnëëjmjaay nitukkë'yë y'ixpëjkpëttëjjk:
—Pënpën ëjts xmuttunwamp, wä'n tjaa'tyakkoy mati' tsyöjkypy y'oyjyaa'w'eepy, nits wä'n tpakkë'ëy kryus jawom jawom najjts ëjts xpattuu'yo'oyty. 24Jä'ku pën kamajtstu'utyë'm jyüky'ajjt tjaa'w'eepy, ttakkoo'yxyë'p jä'; pënpënts ëjts këjxm oo'kp, pyaatp jä' jüky'ajjt mati' xëmëkkëjxm. 25¿Tij jaa'y wyaa'nxë't oyë'm tjamëëtë't mëjk'ajjt, meeny, kuttujjk yaj it naxwiin, jäts jyüky'ajjt takkoykyunäxy y'itt? 26Pënpën ëjts xkutso'oyjyaa'w'eepy jäts mëët tkutso'oyjyawë ëjts n'aaw n'ayuujk, ninyajj jä' yaa'ytyëjjk y'uu'nk kutso'oyjyaw'attë't ku tmumi'nt myëjk'ajjt jäm tsapjotm. 27Tëy ëjts miits nnëëjmëtë, nitu'ukën nii'xyë'n miits yaj ixyam, kä'ä y'ooktë't kunë'm Yës Teety kyuttujjkë'n t'ijxtë't.
Ku Jesús tyikkätsy
28Ku najj Jesús tnëëjmjaay y'ixpëjkpëttëjjk, kyutuktujjk xëëw tmëët'ëëy Pedro, Santiago mëët Juan nuu'kxtakpë kojpkëjxm. 29Kuts y'ijjty Jesús jäm nyuu'kxta'aky, nits wyiin y'aaw tyikkajjtsy, jäts wyit poop tëë'kxp jyajtkëjjxy; 30nits atsu'ujky kyä'äjxjë'ëjky Moisés mëët Elías, 31jäts tu'uk yëk'ääp ajajjk nyijajjëtë, jä'äts jä' y'ijjty kyajpxtë'p myatyaktë'p ntsoj Jesús y'ookt jäm Jerusalén, jyükypyëkt nits ntsoj nyëjkxnë't tsapjotm. 32Oyë'm Pedro mëët myuku'uktëjjk mëjk y'ijjty tsuuj jya'ooktë, jüky y'a'ijxtë, najjts t'ijxtë Jesús myëjk'ajjt mëët nimäjtsk jaa'y mati' jäm y'ijjty Jesús myëëtnakyajpxë'p. 33Kuts y'ijjty tsyoonwanëtë Moisés mëët Elías, nits Pedro tnëëjmjaay Jesús:
—Wintsën, ¡oynyäxy ku ëëts nyajjë! Wä'n ëëts tyëk'oyë tuwëëk ujts'aytyëjjk: Tu'uk mijts mjä'ä, jatu'uk Moisés, jäts jatu'uk Elías jyä'.
Nikkä'äts Pedro y'ijjty tnijawë puttij najj tyijjpy. 34Niyam y'ijjty najj yä'äny ku yoots nyijuu'xëtë, jäts yootsjötypy mëjk tsyë'ëjk'eetyë. 35Nits jäjp tu'uk ayuujk tmatootë mati' wamp: «Ëjts ya'at n'uu'nk, mati' ëjts tëj nwin'ijxy nwinköny: Yë' mmumato'otë'p.»
36Ku najj tmatookitaktë, nits Jesús jatu'kyaajjë nityu'uk tyaany. Jäts Pedro, Juan mëët Santiago, nippën tkawaajnjäätyë tij y'ijjty tëj t'ijxtë t'aa'xtuktë.
Jesús tyëktso'oky tu'uk una'ajnk
37Kyujawom tsyoo'nëtë jäm kojpkëjxm jäts kyitaknëtë, nimay ojts Jesús jaa'y yo'ytsyoyë. 38Nits jäm jaa'y'akujkm tu'uk yaa'ytyëjjk mëjknäxy kyajpxkeejky:
—Wintsën, tunmay'ajjt, puttëjjkëjyääky ëjts n'uu'nk, tu'ukëm ëjts yë' nmajjnkë; 39mëjk yë' yyëk'ayoyë tu'uk mëjjku'ujy tyumpë, atsu'ujkjäty yyëktsap'aake'ekyë jäts yëkmönyë, nits mëët öö'pky tyok'ëëtsyë, jäts kä'ä jätyë myajtstu'tyë. 40Tëj ëjts njamunuu'kxta'aky m'ixpëjkpëttëjjk nits jyeexyë tokniwa'atstë mëjjku'ujy, kä'äts tëj yyëkmata'akyëtë.
41Jäts Jesús y'atsooy:
—¡Miits kattëyjyaa'w'eepyë jäts ka'oytyumpë jaa'y! ¿Winaak jumëjjt ëjts miits njakta'awa'ant jäts kë'm xtu'ntë't? Yëkmin yaj m'uu'nk.
42Kuts jä' una'ajnk Jesús y'ijjty t'anëjkxë, nits mëjjku'ujy yyëkkitaajjë jäts mëjknäxy yëkwippijpëjjkë; nits Jesús twinku'oj'ajjty jä' mëjjku'ujy, najjts tyëktsoojky jä' una'ajnk nits tyeety tkë'moynyë. 43Jäts nitukkë'yë jaa'y pënjäty jäm y'ijjtytë attëy'ajat tyankëjxtë ntsoj Yës Teety myëjk'ajjt tyëknikkä'äjxjë'ëky.
Jesús mumäjtskyaajjë y'oo'jkën tnikkäjpxy
Niyam y'ijjty jaa'y attëy'ajat, ku Jesús tnëëjmjaay y'ixpëjkpëttëjjk:
44—Matowtë yëkxon ntsoj ëjts nwa'anwa'any jäts katij xjaa'tyakkooytyë: Jä'ku yëkkë'yakwamp yaa'ytyëjjk y'uu'nk myutsip'eewyë kyë'jë'm.
45Nippën tkawinjaa'w'ëëy tij jä' najj tyijjpy Jesús, jä'ku kä'änë'm y'ijjty winjaa'w'ajjtë'n tmëëtëtë; ninyajjmë tsë'ëjk'eetyë'p y'ijjty jäts tyëktë'ëtë't tij jä' najj tyijjpy.
¿Pën tnimëjj'eepy?
46Nit'ämpy Jesús y'ixpëjkpëttëjjk nyayëktëë'axajjëtë tu'uk janitu'uk pën tnimëjj'eepy. 47Ku Jesús tnijaa'w'ajjty ntsoj jä' wyinmaytyë y'ixpëjkpëttëjjk, nits tu'uk una'ajnk'uu'nk tyaxtsooy jäts pyaa'aajy tkejjxy 48nits tnëëjmjaay y'ixpëjkpëttëjjk:
—Pënpën ëjts këjxm tkuppëjkp tu'uk una'ajnk'uu'nk naa'xk ya'at, ëjts jä' wyä'në na'it xkuppëjkp; pënpënts ëjts xkuppëjkp, jä'jä' na'it kyuppejkypy pën ëjts xpakkäjxp. Jakëjxts ëjts nwa'any, pën tuta'aky'ajjt tjakyäjpp, jä'äts tnimëjj'eepy.
Pën xkamutsip'ëë'yë'm, xputtëjjk'ëë'yë'm jä'
49Nits Juan tnëëjmjaay Jesús:
—Wintsën, tëj ëëts tu'uk jaa'y n'ijxy mëjjku'ujy tyëkpitsemy mijts këjxm; tëts ëëts nnëëjmë jäts kä'ä najj y'atë'ëtst, jä'ku kä'ä ëëtë'm jä' xmëëtyo'ymyujjkyë'n.
50Nits Jesús y'atsooy:
—Katij x'akkajpxtujjkëtë, pënpën ëëtë'm xkamutsip'ajjtyë'm, xmuku'ukwaa'nyë'm jä'.
Jesús t'ojjy Santiago mëët Juan
51Ku y'ijjty wyinkonnë jä' xëëw maj Jesús wyimpijtnë't tsapjotm, nits Jesús tu'ukyë jyoojt tkejjxy najjts nyijkxy Jerusalén. 52Jäts tkäjxtuwëjjky nitu'ukën kukkexy'eepyë, jä'äts nëjkxtë maj tu'uk mutskkajjp Samaria y'itjotm jäts t'ijxta'atë't tëjjk maj jya'ata'aktë't; 53jäts samaria'tjaa'y kä'ä tkuppëjktë jäts Jesús jäm jya'ata'akt, jä'ku kyumaytyë'p jä' y'ijjty jäts Jerusalén jä' nyijkxy. 54Kuts najj t'ijxtë Santiago mëët Juan, jäts Jesús tnëëjmjäätyë:
—Wintsën, ¿wä'n ëëts tnuu'kxta'aky jäts jëën nyaxkita'akt nits nitukkë'yë jaa'y nyaxtoykyëxtë't?
55Nits Jesús wya'kwimpijjty jäts twinku'oj'ajjty y'ixpëjkpëttëjjk. 56Nits nyëjkxtë ayam jatu'uk mutskkajjp.
Ntsoj tsyippë Jesús npattuu'yo'ojyë'n
57Jäm tuu'am tu'uk jaa'y tpat'të, jä'äts Jesús tnëëjmjaay:
—Wintsën, npanëjkxp ëjts mijts pënmaj mnijkxy.
58Jäts Jesús t'atsooy:
—Jäm waajx tmëëtë tsa'aajnk jäts joon pyä'än maj mya'atë; nits yaa'ytyëjjk y'uu'nk nikkä' tmëëtë maj mya'at.
59Nits Jesús jatu'uk jaa'y tnëëjmjaay:
—Pattuu'yo'yky ëjts.
Jäts jä' jaa'y y'atsooy:
—Wintsën, a'ijx wä'n ëjts jawyiin nteety t'oknittajjë nits ëjts ntsoont.
60Nits Jesús t'atsooy:
—Wä'n oo'kpëttëjjk kë'm y'oo'kpë tnittajjëtë; nëjkx mijts Yës Teety y'aaw y'ayuujk xkajpxwa'kxë. 61Jatu'uk jaa'y Jesús nyëë'mxë:
—Wintsën, ëjts mijts njappattuu'yo'oywyämpy, a'ijxk ëjts jyeexyë, wä'n ëjts jawyiin nmuku'uktëjjk t'aswaajnë.
62Jäts Jesús t'atsooy:
—Pënpën yëkyuup jäts y'ijxwimpity, kä'äts jya'att maj jäm Yës Teety yyëkkutüky.
Valgt i Øjeblikket:
Lucas 9: LUKMya
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
