Lucas 8
8
To'oxytyëjjk mati' y'ijjty Jesús tputtëjjk'eetyë'p
1Kuts najj nyajxkëjjxy, nits Jesús tsyoo'jny mëët nimajkmäjtsk y'apostolestëjjk jäts t'ayo'ykyëjjxy mëjjkajjp, mutskkajjp jäts nitukkë'yë jaa'y twaajnë Yës Teety y'aaw y'ayuujk. 2Jäm y'ijjty mëët to'oxytyëjjktë mati' Jesús yëktsoojk jäts pënjäty mëjjku'ujy tyumpë tyokniwaajts. Mëët María mati' y'ijjty yëkkuxëëw'eepy Magdalena, jä' y'ijjty tëj pyitsëë'mxyë niwixtujjk mëjjku'ujy tyumpë; 3mëët Juana Cuza tyo'oxytyëjjk Herodes tyumpë; jäts mëët Susana; nits aweky wiijnk to'oxytyëjjktë mati' kääky tojkx t'ijxtë'p.
Kamtumpëjaa'y y'ijxpäjjt
4Nimay jaa'y tsyoo'ntë kyajjpjotm jäts nyëjkxtë Jesús nijkxy t'ijxtë. Nits Jesús myatyaajkxëtë tu'uk ijxpäjjt: 5«Tu'kyaajjë tu'uk kamtumpë nyijkxy kyamjötypy jäjpts najjyë tëmt twëjwa'kx'axajjy. Jämts mati' ojts nyaxkita'aky tuu'aajy, jä'äts yëktää'nwa'kxkëjxnë nits joon tpiikëjjxy. 6Jawäänë nyaxkitaajky tsakkëjjxy; kuts jä' jyamujjxy, ojts tyëtskëjxnë jä'ku katij tpaajty niknaajx. 7Jawäänë nyaxkita'aky yo'tspëjotm; kuts jä' tjamëëtye'ejky ojts nyiyonxëjpkexyë. 8Jäts mati' naxkitaajk oynyaxkëjjxy, jä'äts yää'jk jäts tyëëm'ajjty tu'kmukkö'pxy'am tu'ktëmt.»
Kuts najj Jesús myatyakkëjjxy, nits mëjk kyajpxkeejky: «¡Pënpën ya'at ayuujk tmatootë'p, winjawëtë yëkxon!»
Tikëjx Jesús myatya'aky ijxpäjjt këjxm
9Jäts Jesús y'ixpëjkpëttëjjk yyëktëëjjë tij jä' najj tyijjpy jä' ijxpäjjt mati' y'ijjty tëj tmatya'aky. 10Nits Jesús nyëë'mxëtë: «Tëj miits Yës Teety mtawinjaw'ätyëtë kyuttujjkë'n, mati' yu'utsy ijtp; jäts wiijnkjaa'y ijxpäjjt këjxm jä'yë tmukkäjpxy, oyë'm jä' yëkxon tja'ijxtë't tja'aa'xtuktë't kä'ä tij t'ijxpaat'të't, ninyajj oyë'm yëkxon tjamato'otë't kä'ä jä' twinjawëtë't.
Jesús tkajpxtëy ntsoj wyimpitsemy kamtumpëjaa'y y'ijxpäjjt
11»Najj yë' wyimpitsemy ijxpäjjt mati' ëjts tëj nmatya'aky: Mati' tëmt'eepy Yës Teety jä' y'aaw y'ayuujk; 12jäts tëmt mati' ojts nyaxkita'aky tuu'aajy jä' jaa'y jä'ätë mati' Yës Teety y'aaw y'ayuujk tmatoojjäätyë'p, nits jätyë mëjjku'ujy myiny jäts tyokjaa'tyakkoyëtë, nits kä'ä ttëyjyawëtë't jäts nitsoojkë'n tpaat'të't. 13Jä' tëmt mati' ojts nyaxkita'aky tsakkëjjxy jä' jaa'y jä'ätë mati' tmatootë'p Yës Teety y'aaw y'ayuujk jäts oy jotkujjk tmuttun'axajjtë, kumkä'änëmts yëkxon twinjawëtë; kuts nyiminyëtë atsijjpë'n atsuujxë'n jätyë jä' y'amutskëtë nits kä'ä t'oktëyjyaa'w'eenyëtë Yës Teety. 14Jä' tëmt mati' ojts nyaxkita'aky yo'tspëjötypy jä' jaa'y jä'ätë mati' tmatootë'p Yës Teety y'aaw y'ayuujk, nits tmaytyë ttajjtë tijjäty ka'ijjtxëtë'p najjts tuta'aky meeny tpanëjkxnëtë mëët xontaajk mati' ya'at jüky'ajjt y'awaa'n'eepy, jakëjxts kä'ä jyüky'ajjt tyikkatstë. 15Jäts tëmt mati' naxkitaajk oynyaxkëjjxy, jä' jaa'y jä'ätë mati' Yës Teety y'aaw y'ayuujk tmatoojjäätyë'p jäts tkuytyuntë tu'k'aaw tu'kjoojt, nits yëkxon Yës Teety tpattuu'yo'oytyë.
Pujjxjëën y'ijxpäjjt
16»Kä'ä pën tu'uk pujjxjëën tyëktoypyeky nits tnippe'eny witpa'tke'py ok tkukkonë maapäjjt pa'tke'py, oo'ktëy jä' këjxm tpëmtë jäts tkuno'okt pënjäty ja'atë'p. 17Ninyajjmë, kä'ä tij tu'uk yu'utsy y'ity mati' junë kayëkpaatp, nittij mëët tu'uk amää'tsk kya'ity mati' junë kayëknijawë'p. 18Jakëjxts ëjts nwa'any, winjawëtë yëkxon, pën tmëët winjaa'w'ajjt jakyëkmo'op jä', pënts tkamëët, yëkpëjjkë'p jä' mati' wääne jyamëët.»
Jesús y'ütsytyëjjk mëët tyaak
19Jesús y'ütsytyëjjk mëët tyaak nyëjkxtë maj jäjp y'ijjty Jesús, kä'äts jä' tpat'të jä'ku nimaynyäxy y'ijjty jaa'y. 20Nits Jesús jaa'y nyëë'mxë:
—Jäjp tëjkwimpy mtaak mëët m'ütsytyëjjk, mijts mukkajpxwaajnë'p.
21Nits Jesús y'atsooy:
—Jä' ëjts ntaak'eepy, nmuku'uk'eepy pënjäty Yës Teety y'aaw y'ayuujk t'amatoojäätyë'p jäts tkuytyuntë.
Jesús tyëk'attëyë tsätsytyuuj tsätsypyoj
22Tu'kyaajjë, Jesús tyëjjk'ëëy tu'uk kanëwjötypy mëët y'ixpëjkpëttëjjk, jäts tnëëjmjaay:
—Wä'n tnënajjxyë'n.
Nits tsyoo'ntë, 23jämts y'ijjty nyënaxtë jäts Jesús myaatakkooy. Ku atsu'ujky myiiny tsätsytyuuj tsätsypyoj, nits kanëwjötypy nëëj tyëjjkë'y'axajjnë jäts kyinwanëtë. 24Nits ojts Jesús tyëkniwijjtë, jäts tnëëjmjäätyë:
—¡Wintsën! ¡Wintsën! ¡Kinkëxwaa'nyë'm!
Nits Jesús tyenkyuk'ajjty jäts twinku'oj'ajjty jä' tuuj jä' poj, jätyë tukkë'yë y'attëyëkyëjjxy. 25Nits y'ixpëjkpëttëjjk tnëëjmjaay:
—¿Maj mtëyjyaa'w'ajjt y'it'të?
Tsë'ëjkë'y'oo'këjxtë'p jä' y'ijjty y'ixpëjkpëttëjjk nits attëy'ajat nyayëktëëjëtë tu'uk janitu'uk:
—¿Pën jaa'y yë', ntsoj yë' y'ijxë tuuj, poj, myumatoyë?
Yaa'ytyëjjk mati' maynyäxy mëjku'ujy tyumpë tatsënaajyë'p
26Kuts pyitsëmtë në'am, Gerasa y'itjotm, Galilea kyajjp'awimpy. 27Nits Jesús wyinajjky kanëwkëjxm, jämts nyimiijnë tu'uk yaa'ytyëjjk, mati' mëjjku'ujy tyumpë y'ijjty tatsënaajyë'p. Tëj y'ijjty jyäjknë maj kya'oknaxyojxnyë jäts nikkä' y'oktsënäänyë tyëjkëntüjpy, jäm jä' y'ijjty tsyëënë maj oo'kpë yëknittajjë. 28Kuts jä' jaa'y t'ijxpaajty Jesús, nits nyakyujxtänëtyaajkë Jesús wyinkujjky jäts mëjknäxy kyajpxkeejky:
—¡Katij ëjts xmuwa'any Jesús, Yës Teety tsapjotmë't y'uu'nk! ¡Tunmay'ajjt katij ëjts xyëk'ayoy!
29Jakëjxts najj wyaany jä'ku tëj y'ijjty Jesús tnëëjmë mëjjku'ujy tyumpë jäts tniwa'atst jä' yaa'ytyëjjk. Kawinaakyaajjë y'ijjty tëj mëjjku'ujy tyattëk'ätyë; jäts yëknijkxyë tëtsta'aky'itjötypy oyë'm jaa'y pujjxtejpxy jyattatsümyë, tukkë'yëts y'ijjty tpojtkexy. 30Nits Jesús tyëktëëy jä' yaa'ytyëjjk:
—¿Tij mxëëw?
Jäts jä' jaa'y y'atsooy:
—Legión ëjts nxëëw.
Jakëjx jä' najj wyaany jä'ku nimay jä' y'ijjty tëj mëjjku'ujy tyattëk'ätyë, 31nits mëjjku'ujy tmunuu'kxtaktë Jesús jäts katij pyakkexyëtë akkootsy'attüjpy ayoopë xëmëkkëjxm. 32Jäm y'ijjty tunkëjxm nimay kääm wyittit'të, nits mëjjku'ujy tnëëjmjäätyë Jesús jäts tnittukt nits kääm ttattëkkëtë't; nyi'atsoo'ajjt Jesús. 33Nits jä' mëjjku'ujy tniwatstë jä' jaa'y jäts kääm ttattëjjk'eetyë, nits kääm kyäts'appujtkëjxtë jäts mejyjyötpy ojts jya'akextë, jäjpts nyëxi'pxkëjxtë.
34Nits jaa'y mati' y'ijjty kääm t'ijxtë'p, kyäktakkoykyëjxtë jäts ojts tukkë'yë jaa'y twankëjjxëtë tij y'ijjty tëj t'ijxtë. 35Nits jä' jaa'y nyëjkx'oo'ktë jäts ojts t'ijxtë mati' y'ijjty tëj yëkwaajnëtë. Kuts jya'atë maj jäjp y'ijjty Jesús, jäjpts tpat'të jä' yaa'ytyëjjk mati' y'ijjty tëj pyitsëë'mxyë mëjjku'ujy, tsyëënë tëj nyaxyojjxnyë jäts tëj wyijjnë; nits jä' jaa'y mëjk ojts tsyë'ëkëtë. 36Jäts jaa'y pënjäty t'ijxtë tukkë'yë tij y'ijjty tëj tyünyë, jä'äts tmatyaajkjäätyë myuku'uktëjjk ntsoj y'ijxë y'ijjty Jesús tëj tyëktso'oky jä' yaa'ytyëjjk pën tsee'my mëjjku'ujy yyëk'ayoojjë'p. 37Nits nitukkë'yë Gerasa'tjaa'y tmunuu'kxtaktë Jesús jäts nyëjkxnë't, jä'ku tsë'ëjk'eetyë'p jä' y'ijjty. Najjts Jesús tyëjjk'eenyë kanëwjotm jatu'kyaajjë nits wyimpijtnë. 38Jäts yaa'ytyëjjk mati' mëjjku'ujy y'ijjty tëj nyiwa'atsyë tjamunuu'kxtaajky Jesús nits jyeexyë pyawayë, kä'äts Jesús kyuppëjjkë, jä'yë nyëë'mxë:
39—Nëjkxnë mtëjkëntüjpy jäts matya'ak tukkë'yë ntsoj tëj Yës Teety mputtëk'ätyë.
Nits jä' yaa'ytyëjjk nyëjkxnë tyëjkëntüjpy jäts tmatyaajkjaay tukkë'yë kajjp ntsoj Jesús y'ijjty tëj pyuttëk'ätyë.
To'oxytyëjjk mati' pëjjkë'p mëët Jairo nyëëx
40Kuts Jesús pyitsëëmy jatu'kyaajjë në'am Galilea y'itjotm, jämts y'ijjty nimay jaa'y y'a'ijxyë jä'äts waatsoojjë oy jotkujjk. 41Jäts mëët jäm jya'ajty tu'uk yaa'ytyëjjk mati' txëëw Jairo, jä' y'ijjty tniwintsën'eepy tëjjk maj jaa'y yo'ymyuktë. Jäts nyakyujxtänëtyaajkë nits Jesús tmunuu'kxtaajky jäts jyeexyë pyatsoonyë tyëjkëntüjpy, 42jä'ku tu'ukëm nyëëx mati' majkmäjtsk jumëjjt jüky'eepynyë'm, jä' y'ijjty ookwanë'p.
Kuts Jesús nyijkxy Jairo tyëjkëntüjpy, nimay jaa'y pyanëjkxë jäts Jesús nyajyaa'w'ajjtë jaa'y nyastijjë'y'oo'kexyë. 43Jämts mëët y'ijjty jaa'y'akujkm tu'uk to'oxytyëjjk mati' tëj tmutsënäänyë majkmäjtsk jumëjjt në'ëjpypya'am, tëj y'ijjty too'këjxnë tukkë'yë myaay pyëjkta'aky nits ttamuju'yty tsoy'eewyëttëjjk, jäts nippën kyamayë nits yëktso'okë't. 44Nits jä' to'oxytyëjjk t'anëjkx'ajjty Jesús winkon jäts ojts wyit ttaxajpäjjtë, nits tu'mtsyë ojts në'ëjpy y'attüky. 45Jäts Jesús wya'kwimpijjty nits jaa'y tyëktëëy:
—¿Pën ëjts tëj xtaxajjpety?
Kuts kä'ä pën tkuppeky pën tëj y'atë'ëtsy, jäts Pedro y'atsooy:
—Wintsën, maynyäxy jaa'y jäts mnastijjë'y'ookyë tum'aajny jatu'm'aajny nits mijts xyëktëy ¿pën ëjts tëj xtaxajjpety?
46Jäts Jesús wyan'atëëjtsy:
—Jäm tu'uk jaa'y pën ëjts tëj xtaxajjpety, jä'ku njaa'w'ajjt ëjts tëj nmajaaw pyitsemy.
47Kuts jä' to'oxytyëjjk t'ijxy nits tëj y'ijjty yyëkkumaynyë, jäts jawëtsë'ëkë t'anëjkx'ajjty Jesús jäts wyinkujjky nyakyujxtänëtyaajkë. Nits tmatyakkëjjxjaay nitukkë'yë jaa'y wyinkujjky tikëjxë'm y'ijjty tëj ttaxajjpety, jäts ntsoj y'ijxë y'ijjty mëët tëj tsyo'oky. 48Nits Jesús nyëë'mxë:
—Uu'nk, mtëyjyaa'w'ajjt këjxm mijts tëj mtso'oky. Nëjkxnë jotkujjk.
49Niyam y'ijjty Jesús najj yä'äny, ku jya'ajty tu'uk kukkexy'eepyë jäts Jairo yyëknëëjmjaay:
—Tëj mnëëx y'oo'knë; katij Wintsën x'oknä'mnë.
50Jä'äts Jesús myatoow nits tnëëjmjaay Jairo:
—Katij mtsë'ëkë; tëyjyaa'w'eeky ëjts, tso'okp jä' mnëëx.
51Kuts jya'ajty jäjp tëjkëntüjpy, kä'ä Jesús tsojjky jäts pyattëk'attë't nimay jaa'y, Pedro jä'yë tëjjk'ëëy, mëët Santiago, Juan, jäts kiixy'uu'nk tyeety tyaak. 52Nitukkë'yë jaa'y mati' jäjp y'ijjty, mëjk jä' tniya'axtë tnitsätsywinmaytyë jä' kiixy'uu'nk, nits Jesús tnëëjmjaay jä' jaa'y:
—Katij mya'axtë; kä'ä yë' y'ooky, maap yë' jä'yë.
53Nits jaa'y katij ttëyjyaa'w'eetyë jä'yë tnixiktë, jä'ku nyijaa'w'eetyë'p jä' y'ijjty yëkxon jäts tëj jä' kiixy'uu'nk y'oo'knë. 54Nits Jesús tmajjtsy kyë'këjjxy jä' kiixy'uu'nk jäts mëjk tmukkäjpxy:
—¡Kiixy, puttë'ëk!
55Nits jä' kiixy'uu'nk jyükypyëjjky; jäts jätyë pyuttë'ëjky, nits Jesús tniwaa'n'ëëy jäts tyëkka'ytyë't. 56Jäts nitteety nittaak attëy'ajat ttattantë; nits Jesús nyëë'mxëtë jäts katij pën tmatyaajkëtë tij tëj tyünyë.
Valgt i Øjeblikket:
Lucas 8: LUKMya
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
