मत्ती 4
4
यीशु री परीक्षा
1तैबै तेई बौगतै पवित्र-आत्मै यीशु सुनसान ज़ैगा बै नेऊ ताकि शैतानै रै द्वारा यीशु री परीक्षा होली। 2सौ चाल़ी ध्याड़ी, होर चाल़ी राती न भूखा होर शोखा रौहू, तैबै तेइबै भूख लागी। 3तैबै शैतानै तेइबै नेड़ एज़िया बोलू, “अगर तू परमेश्वरा रा बेटा सा, ता बोल, कि इन्हां पात्थरै री रोटी बणली।”
4यीशुऐ ज़वाब धिना, “पवित्र शास्त्रा न ऐ लिखू सा, ‘मांहणु सिर्फ़ रोटियै लाइया केल्हा नी, बल्कि परमेश्वरै रै मुँहा न निकलणू आल़ै हर एकी वचनै लाइया ज़िन्दै रौहणा।’ ”
5तैबै शैतानै सौ पवित्र यरूश्लेम शैहरा बै नेऊ होर मन्दिरै री सैभी न उथड़ी ज़ैगा पैंधै खड़ा केरू। 6होर तेइबै बोलू, “अगर तू परमेश्वरा रा बेटा सा, ता आपणै आपु बै औखै न भ्याँऊ शेट; किबैकि पवित्र शास्त्रा न लिखू सा कि,
“ ‘तेई तेरै बारै न आपणै स्वर्गदूता बै आदेश देणा,
होर तिन्हां तू हौथा हौथ च़कणा,
ताकि तेरी ज़ोंघा न पात्थरै लाइया ठोकर नी लोड़ी लागी।’ ”
7यीशुऐ तेइबै बोलू, “पवित्र शास्त्रा न ऐ बी लिखू सा, कि ‘तू आपणै प्रभु परमेश्वरै री परख मत केरदा।’ ” #बिधा. 6:16.
8तैबै शैतानै यीशु बोहू उथड़ै ढौगा पैंधै नेऊ होर सारी दुनियै रा राज़पाठ रिहाईया, 9होर तेइबै बोलू, “अगर तू टुँबड़ै पौड़िया मुँभै प्रणाम केरला, ता मूँ इन्हां सैभी राज़पाठा रा हक तौभै देणा।”
10तैबै यीशुऐ तेइबै बोलू, “ओ शैतान दूर हो, किबैकि पवित्र शास्त्रा न लिखू सा: ‘तू सिर्फ़ आपणै प्रभु परमेश्वरा बै प्रणाम केर, होर तेइरी भक्ति केर।’ ”
11तैबै शैतान तेई हागै न भैगू होर स्वर्गदूत एज़िया यीशु री जरूरता बै पूरा केरदै लागै।
यीशु री सेवा केरनै री शुरुआत
12ज़ैबै तेइयै ऐ शुणू कि यूहन्ना ढौकणै द्याऊ सा, ता सौ यहूदा ज़िलै बै छ़ौड़िआ गलील ज़िलै बै नौठा। 13होर नासरत नगरा बै छ़ौड़िआ कफरनहूम शैहरा न ज़ो समुन्द्रा रै कनारै ज़बूलून होर नपताली रै इलाकै न ज़ाइआ रौंहदा लागा। 14ताकि ज़ो यशायाह भविष्यवाणी केरनै रै द्वारा बोलू ती, सौ पूरा होला।
15“ज़बूलून होर नपताली रै इलाकै,
समुन्द्रा री बौता न यरदना नौई हागै होरी ज़ाति रा गलील,
16ज़ो लोका निहारै न बेठै ती, तिन्हैं बड़ा प्याशा हेरू; होर ज़ो मौऊती रै नेड़ बेठै ती,
तिन्हां पैंधै प्याशा च़मकू।”
17तेई बौगता यीशुऐ प्रचार केरना होर ऐण्ढा बोलणा शुरू केरू कि, “पापा न मन बदला किबैकि स्वर्गा रा राज्य नेड़ आऊ सा।”
पैहलै च़ेले बै शाधणा
18तेइयै गलीलै रै समुन्द्रा रै कनारै दुई भाई शमौन ज़ुणिबै पतरस बोला सी, होर तेइरा भाई अन्द्रियास समुन्द्रा न ज़ाल पाँदै हेरै; किबैकि ते मैच्छ़ी ढौकणु आल़ै ती। 19तैबै यीशुऐ तिन्हां बै बोलू, “मूँ पिछ़ै एज़ा, ज़ैण्ढै तुसै मैच्छ़ी ढौका सी, तैण्ढै मूँ तुसै मांहणु बै ढौकणु आल़ै परमेश्वरा रा च़ेला बनाणा सिखाणै।” 20ते तुरन्त जाला बै छ़ौड़िआ यीशु पिछ़ै औंढदै लागै।
21होर तौखै न आगै ज़ेही ज़ाइआ तेइयै दुई भाई जब्दी रै बेटै याकूब होर तेइरा भाई यूहन्ना हेरू। ते आपणै बापू जब्दी सैंघै किश्ती न आपणै ज़ाल ठीक केरदै हेरै। तेइयै ते भी शाधै। 22ते तुरन्त आपणी किश्ती होर आपणै बापू बै छ़ौड़िआ यीशु रै पिछ़ै औंढदै लागै।
यीशु रा बीमारी बै ठीक केरना
23यीशु सारै गलील ज़िलै न घूँमदा तिन्हरै आराधनालय न उपदेश देंदा, होर परमेश्वरै रै राज्य रा खुशी रा समाद प्रचार केरदा रौहू, होर लोकै री हर किस्मा री बीमारी होर कमज़ोरी बै दूर केरदा रौहू। 24सारै सीरिया देशा न तेइरा यश फैलदा रौहू; लोका सैभ बीमारा बै, ज़ो कई किस्मै री बीमारी होर दु:खा न डूबै ती होर ज़ुणिबै बुरी आत्मा फ़सी ती, ज़ुणिबै मिर्गी एज़ा ती होर ज़ुणिबै ध्रँग हुआ ती तेई हागै आंणै होर तेइयै ते सैभ ठीक केरै। 25गलील ज़िलै होर दिकापुलिस (दस शैहरा) होर यरूश्लेम शैहरा होर यहूदिया ज़िलै होर यरदन नौई रै ओरै पौरै री ज़ैगा न भीड़ै री भीड़ तेई पिछ़ै च़ली।
Valgt i Øjeblikket:
मत्ती 4: KFX-NT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
This work is licensed under Creative Commons Attribution-ShareAlike 4.0 License.