TAUNET 12
12
Ng’olyot agobo Abraham: kuursetab Jehovah: Bandab Abram kowendi kanan
1Kilenji anyun Jehovah Abram, Ui inye eng’ emeng’ung’, ak eng’oldab tilionutiguk, ak eng’ gotab kwandang’ung’, ui emet ne amache aborun; 2ak ayain iegu bororiet ne o, ak aberurin, atoror kaineng’ung’ koeet; ak iegu kaberuret. 3Ak aberuri ichek che iberurin, ak achube agot ne sasin: ak kiberuri ortinwek tugul che bo ng’ony eng’ inye. 4Kiwa Abram anyun ko u ye kiga komwachi Jehovah; kiba koboto Lot: kiga kotar Abram kenyisiek tamanwogik tisab ak mut ye kingomandoi eng’ Haran. 5Kiimut Abram osotiondennyi Sarai, koboto Lot weritab ng’etab kamet, ak tugukwak tugul che kiga koyumjigei, ak bik che kiga konyor eng’ olin bo Haran; ak kimanda koba emetab Kanan; kiit anyun emetab Kanan. 6Ak kibun Abram emet kwenut agoi oldab Sekem, kot koit ketitab More. Ak kimi Kananik emonoto eng’ betusiechoto. 7Ak kimong’ji Jehovah Abram, ak kolenji, Agochini iyoteng’ung’ emoni: ak kiteekyi kaptisisiet Jehovah, ne kimong’ji inendet. 8Ak kiu kwo eng’ oloto agoi koit tulwet eng’ komostab kong’asis ne bo Betel, ak kiteech emainnyi, kimi Betel komostab cherongo, ak kimi Ai komostab kong’asis: ak kiteekyi kaptisisiet Jehovah eng’ oloto, ak kiguur kainetab Jehovah. 9Ak kiu Abram kogeny, kotokyigei Murot ne bo Tai.
Komi Abram Misri
10Ak kibiit rubet eng’ emonoto: kochortagei anyun Abram kwo Misri ak kotebe oloto; amu kieet rubet mising’ kong’wanit eng’ emet. 11Ak ye ki negit komong’ji Misri, kolenji osotiondennyi Sarai, Kas anyun nguno, angen ale i kobogoriot ne kararan; 12ak ye keerin bikab Misri, kole, Osotiondennyi ni: kobara, ak kobagakten isob. 13Kaigai imwa ile i tupchennyu, si komieit eng’ ane agobo inye, ak kosob sobondanyu amu inye. 14Ak ye kingoit Abram Misri, kogeer bikab Misri kobogoriondonoto kole kararan mising’. 15Ak kigeer bounik che bo Parao, kochoi inendet eng’ taitab Parao: ak kigimut kobogoriondonoto kwo gotab Parao. 16Ak koyachi Abram ne mie agobo inendet: ak kinyor kechirek, ak tuga, ak kirugikab sigirok, ak otwogik murenik, ak otwogik tibik, ak iyuogikab sigirok, ak tambesik. 17Kibir anyun Jehovah Parao ak gonnyi eng’ korotwek che yaachen amu Sarai kwondab Abram. 18Ak kiguur Parao anyun Abram ak kolenji, Nee ni kiiyaiywa? Kilya si memwawa ile inendet ko osotiondeng’ung’? 19Kilya si imwa ile, Inendet ko tupchennyu? Ak kiamutyigei anyun amu noto alen koek osotiondennyu: ineno anyun osotiondeng’ung’, imut, ak iwe. 20Ak king’at Parao bik agobo inendet: komut eng’ oret koboto osotiondennyi ak tugul che kitinyei.
Valgt i Øjeblikket:
TAUNET 12: BUKUIT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
God's word open for all
©Bible Society of Kenya, 2020