Markus 4

'Ade-'ade mangale ngowa'a guḏa matengo

(Mat. 13:1-9; Luk. 8:4-8)

1Yesus 'o doto'o moju toma talaga Galilea ma 'uḏu. Ngowa'a repe masala 'U sigoloḏi. Sababu gena-ge Unanga 'o tagi i'a 'O mabalene re 'O tegoro tala toma oti ma dara toma ḇanyo ma re'u, re ngowa'a repe 'aḏi made-de'oso toma talaga ma 'uḏu.#Luk. 5:1-3 2Ḏua Yesus 'o pula'a do-doto'o ma repe re 'o 'ade-'ade. Unanga 'o kanau so'o ne:

3“Na 'isene! 'Age rema ngowa'a 'a'a guḏa matengo 'a siare 'ai gisisi. 4Wakutu unanga 'a siare, 'age rema gisisi mamuni'a 'i eta'a toma ngo'omo ma 'uḏu. Ḏua namo diwanga 'i sapolo ya tubu'u simoini gisisi gena-ge. 5'Age mamuni'a ḏi'i 'i eta'a toma tana'a maḏi-maḏi. Gisisi gena-ge matai konyo lai caiti sababu ma tana'a pa'i ceka'a ua. 6Mada'a wakutu wangere ma la'o pere ie ya 'erese go-gonyo gena-ge ḏua 'i wa'alo caiti singadolo 'i ngonono sababu ma 'utu'u 'i osama ngido ua. 7'Age mamuni'a ḏi'i 'i eta'a toma rurubu dodowo'o ma golona. Ḏua rurubu dodowo'o gena-ge 'i konyo re ya pilatu gisisi ma go-gonyo gena-ge singadolo 'i sengene. Dadi gisisi gena-ge 'i sowo'o ua. 8Mada'a 'age mamuni'a ḏi'i 'i eta'a toma tana'a ma la-la'eme, gisisi gena-ge 'i konyo rema ma go-gonyo lai rousu singadolo 'i sowo'o: 'Age ma sowo'o sidu'o sou nyagi ro'ange, 'age ma sowo'o sidu'o sou nyagi rarama re 'age ma sowo'o sidu'o sou latu moi.”

9Yesus 'o kanau, “Na'o reninga ngau'u, ni 'isene la-la!”

I'a sa'olo Yesus 'o doto'o reo 'ade-'ade

(Mat. 13:10-17; Luk. 8:9-10)

10Wakutu Yesus pa'i 'o matengo, ngowa-ngowa'a ga'a ya 'isene 'Ai do-doto'o 'aḏi sapolo ra Unanga ma'u mete'e re 'Ai me-mete'e nga nyagi moi re nga muḏiḏi; ananga 'aḏi golo'o Yesus 'o pula'a 'Ai 'ade-'ade gena-ge ma maksudu. 11Ḏua Yesus 'o sangoro ra ananga, “Ma Jou'ongu Madutu 'o pula'a cocatu ḏua ra ngini, la ni waro mangale rahasia Unanga 'ai Pareta. Mada'a Ngoi to doto'o ngowa'a 'aḏi ngaku Ngoi ua reo 'ade-'ade. 12Dadi,

‘kalaha ananga nga'unu 'aḏi oḏi'i,

ananga ya sahe ua 'oru ga'a 'i dadi;

kalaha ananga nga'unu ya 'isene,

ananga ya sahe ua ma maksudu.

Enanga 'i dadi so'o gena, la ananga gena-ge ya oḏi'i ua re ya sahe ua,

la awa ananga 'aḏi sapolo ra Ma Jou'ongu Madutu

re Unanga ya'u singi-ngiranga ua manga ḏosa.’ ”#Yes. 6:9-10

Yesus 'o sitarangi 'ade-'ade mangale ngowa'a guḏa matengo

(Mat. 13:18-23; Luk. 8:11-15)

13Yesus 'o kanau i'a ra ananga, “Na'o ngini ni sahe ua 'ade-'ade nena-ne, marai ḇato 'ade-'ade ma lelegu ḏi'i ni sahe ua! 14Ngowa'a 'a'a guḏa gena-ge ma tero sa'olo ngowa'a ga'a singadolo Ma Jou'ongu Madutu 'ai habari. 15Gisisi 'i eta'a toma ngo'omo ma 'uḏu ma tero ngowa-ngowa'a 'aḏi 'isene habari gena-ge. Wakutu ya 'isene, 'Iblisi 'i sapolo re ya wuru'u habari gena-ge ra ananga manga 'akala re sinyingara ma dara. 16Gisisi ga'a 'i eta'a toma tana'a maḏi-maḏi gena-ge ma tero sa'olo ngowa'a 'aḏi 'isene habari gena-ge re jau-jau ya dawongo remanga roanga tamanga 'akala re sinyingara. 17Mada'a habari gena-ge 'i utu'u ua tamanga 'akala re sinyingara singadolo 'i tahana ti'ara ua. Dadi wakutu 'aḏi sanga susa re sangisara bolo sanga sikisa sababu 'aḏi ngaku habari gena-ge, ananga jau-jau 'aḏi celolo ḏuḏunu i'a. 18Gisisi 'i eta'a toma rurubu dodowo'o ma golona gena-ge ma tero sa'olo ngowa-ngowa'a 'aḏi 'isene habari gena-ge, 19mada'a 'aḏi dodato mangale manga 'ahu. Ananga 'aḏi mau manga 'ahu pai-pai'i, re tamanga 'akala re sinyingara ma dara manga nyafusu lai lamo'o ḏi'i. Sababu gena-ge, habari tamanga 'akala re sinyingara ma dara ma 'ahu 'i peletoro singadolo 'i sowo'o ua. 20Gisisi 'i eta'a toma tana'a ma la-la'eme gena-ge ma tero sa'olo ngowa'a ga'a 'aḏi 'isene habari ya dawongo singadolo 'i sowo'o lai repe: 'age ma sowo'o sidu'o soi nyagi ro'ange, 'age ma sowo'o sidu'o soi nyagi rarama re 'age ḏi'i 'i ma sowo'o sidu'o soi latu moi.”

'Ade-'ade mangale 'o poci sidamunu reo tampayanga

(Luk. 8:16-18)

21Yesus 'o kanau, “Sanga ua; matengo i'a tagala 'o poci kara ya damunu reo tampayanga bolo ya siga'e toma dederu ma 'aḏu! Balasu ya sigare toma poci ma ngi'i.#Mat. 5:15; Luk. 11:33 22'Oru ḇato ga'a 'i gogono nange-ne, ḏuanga i'a 'i supu, re 'oru ḇato 'i siajele ua nange-ne, ḏuanga i'a ngowa'a ya waro.#Mat. 10:26; Luk. 12:2 23Sababu gena-ge, na'o reninga ngau'u, ni 'isene!”

24Yesus dadunu 'o kanau, “Ni 'isene re ni totoho la-la: Ninga du-duga ga'a ngini ni pake di'a situga toma ngowa'a lelegu, du-duga gena-ge Ma Jou'ongu Madutu 'a pake 'a situga ra ngini re lebe lamo'o i'a ḏi'i!#Mat. 7:2; Luk. 6:38 25Sababu 'a guna ḇato ro sanga wo-waro mangale 'ori i'a go-gogono, Ma Jou'ongu Madutu 'a sidogo ḏi'i wo-waro gena-ge. Mada'a 'a guna ḇato 'o sanga wo-waro ua mangale 'ori i'a go-gogono; 'oru ḇato, kalaha unanga ra sanga pa'i wo-waro ceka'a ua ḇato, gena-ge Ma Jou'ongu Madutu 'a 'oro ḏi'i.”#Mat. 13:12, 25:29; Luk. 19:26

'Ade-'ade mangale gisisi ma go-gonyo

26Yesus 'a dowanga moju 'ai demo-demo nena-ne: “Ma Jou'ongu Madutu 'ai Pareta 'i ma tero sa'olo 'ade-'ade mangale ngowa'a 'a'a guḏa matengo 'a siare 'ai gisisi tai guḏa. 27Lo-lobi'i unanga 'o otu, wa-wangere 'o momi'i, gisisi gena-ge 'i konyo re 'i ramasa. Mada'a unanga 'a waro ua, ma rupa sa'olo enanga 'i konyo re ma rupa sa'olo enanga 'i ramasa. 28Pa'i tana'a ḇato enanga ya sikonyo re ya siramasa singadolo sisupu ma sowo'o; siḏa-siḏa ma gu-gu'u, gena ḏua ma gutingana kara ma sowo'o. 29Wakutu gandum gena-ge re 'i romu'u, ngowa'a ya rari re ya lomu ma sowo'o sababu ma 'orasa 'i ngadolo ḏua.”#Yl. 3:13

'Ade-'ade mangale gisisi lai ceka'a madutu

(Mat. 13:31-32, 34; Luk. 13:18-19)

30-31Yesus 'o sano, “Ma Jou'ongu Madutu 'ai Pareta; ni site-tero 'oru? Ma Jou'ongu Madutu 'ai Pareta ma tero sa'olo ma 'ade-'ade so'o ne: Ngowa'a matengo 'o 'oro gisisi ma moi 'i ngai moi ḏua kara 'a so'ana toma tana'a. Gisisi gena-ge lai 'alusu madutu. 32Mada'a 'i konyo re 'i ramasa singadolo 'i dadi lamo'o re 'i kau'u madutu, 'i palisi'i joro-joro ma lelegu. 'Age rema umanga singadolo 'o namo diwanga 'i matai sapolo re 'i 'a'a ma ngi'i re 'i masidaḏusu.”

33Yesus 'o doto'o ngowa-ngowa'a re 'O pake 'ade-'ade fara muḏuo i'a gena-ge, re ananga ya sahe mete'e manga nga'unu. 34Soi moi mai i'a ua, Unanga 'o pake ua 'ade-'ade na'o 'O doto'o ngowa-ngowa'a. Mada'a na'o Unanga masiretene re 'Ai me-mete'e, Unanga 'a sitarangi mo-moini ra ananga.

Yesus 'o sitogumu rato

(Mat. 8:23-27; Luk. 8:22-25)

35Cori lobi'i ino ma wangere gena-ge ḏua. Yesus 'o kanau i'a Tai me-mete'e, “Ino, ngene wo sidete da'a kaci moi.”

36Ḏua, Unanga 'o mabalene toma oti siḏa; re 'Ai me-mete'e tuu'u i'a, kara 'aḏi sidete. Ananga ya'u sisoi'i tala ngowa'a repe toma talaga ma 'uḏu. Ngowa'a repe gena-ge 'aḏi mabalene toma oti-oti lelegu ḏi'i re 'aḏi sidete tuu'u. 37Wakutu 'aḏi sidete, rato 'i sapolo. Momoku 'i pere singadolo 'o oti sa'i ri romanga reo ḇanyo. 38Yesus 'o otu toma oti ma lasere, 'ai sae'e 'a siwangini re 'o nora. 'Ai me-mete'e 'U tamanga Unanga. Ananga 'aḏi tuduba, “Guru, i'a sa'olo ngana na siwaro i'a ua na'o ngene ne sa'i re wo jala?”

39Unanga 'o momi'i, ḏua 'a sikanga rato re talaga, “Togumu, masiogoro!” Rato 'i taraha re 'o talaga 'i dadi ogo-ogoro i'a. 40Gena ḏua, Unanga 'o ḇangata 'Ai me-mete'e, “I'a sa'olo ni mojongo! I'a sa'olo ni ngaku ua!”

41Ananga 'aḏi matai mojongo masala re 'aḏi ma'u kanau matengo re matengo, “Unanga nena-ne 'o dadi 'oru! Singadolo rato re 'o momoku mai ya mete'e Unanga 'ai parenta!”

Valgt i Øjeblikket:

Markus 4: SNT

Markering

Del

Kopiér