Matius 1
1
Yesus Kristus bi amui
(Luk. 3:23-38)
1Men krombot Yesus Kristus bi amui. Yesus Kristus bi amui dik yo mo yeraja Daud. Daud waii bi amui mo Abraham. Yesus Kristus bi amui kadit Abraham sor kom mo yeraja Daud anare:
2-6aAbraham nyim,
Abraham waii pe Isak,
Isak waii pe Yakub,
Yakub waii pe Yehuda si bi nji,
Yehuda waii pe Peres si Zerah
(gato bi im mo Tamar),
Peres waii pe Hezron,
Hezron waii pe Ram,
Ram waii pe Aminadab,
Aminadab waii pe Nahason,
Nahason waii pe Salmon,
Salmon waii pe Boas
(gato bi im mo Rahab),
Boas waii pe Obet
(gato bi im mo Rut),
Obet waii pe Isai,
Isai waii pe yeraja Daud.
6b-11Kadit yeraja Daud kem mo bur ré mu kom mo kam gato ye Babel but ye Israel ne sino tepsu án bi pakwerut, Yesus Kristus bi amui gum anare:
Yeraja Daud pe Salomo (gato bi im mo Uria bi nggonna),
Salomo waii pe Rehabeam,
Rehabeam waii pe Abia,
Abia waii pe Asa,
Asa waii pe Yosafat,
Yosafat waii pe Yoram,
Yoram waii pe Uzia,
Uzia waii pe Yotam,
Yotam waii pe Ahas,
Ahas waii pe Hizkia,
Hizkia waii pe Manasye,
Manasye waii pe Amon,
Amon waii pe Yosia,
Yosia waii pe Yekhonya si bi nji.
12-16Kadit kam gato ye Babel but ye Israel mu kom mo kam gato Maria kem su Yefun Yesus, Yesus Kristus bi amui anare:
Yekhonya,
Yekhonya waii pe Sealtiel,
Sealtiel waii pe Zerubabel,
Zerubabel waii pe Abihud,
Abihud waii pe Elyakim,
Elyakim waii pe Azur,
Azur waii pe Zadok,
Zadok waii pe Akhim,
Akhim waii pe Eliud,
Eliud waii pe Eleazar,
Eleazar waii pe Matan,
Matan waii pe Yakub,
Yakub waii pe Yusuf,
gato kra Maria.
Maria gare anato kem su Yesus gato ye kendo gum do, Kristus.
17Sane kadit Abraham mu kom mo yeraja Daud, Abraham pe bi pa, gato gum do, Isak or o Isak waii pe bi pa gato gum do Yakub, or o Yakub waii pe bi pa-i, or o bi pa-i waii pe o si bi pa-i waii pe o, sane sane sor kom mo wam musyu dik sop at. Sane dom kadit Daud mu kom mo kam gato ye Babel but ye Israel, Daud pe bi pa-i gato waii pe bi pa-i ne wam musyu dik sop at dom. Sane o, kadit kam gato ye Babel but ye Israel mu kom mo kam gato Maria kem su Yesus Kristus, ye ku bi pa gato ku bi pa-i ne wam musyu dik sop at dom.
Maria kem su Yefun Yesus
(Luk. 2:1-7)
18Ji krom sukdu subot Maria kem su Yesus Kristus. Yusuf nggorwa Maria nyim wé re, wo an we yo kra nde tó, Maria syimfar re. Yefun Allah Gen anato ben Maria syimfar re. 19Yusuf ré ye gato ben sukndo tepsu Yefun mit. An bariwa an ben Maria damen mo yé mwa gwem, sane an nut do, an sombok Maria wé, wo an yo kibot sukdu ne i-ke rer wa ye yi jam nde. 20Yusuf nutbot os yo wa an sombok Maria wé sa, an semda ku Yefun bi malaikat ge dik yo. Malaikat ne ki nai an do, ”Yusuf, nan bi amui mo Daud, nan nyu nde, nan kra su Maria sor, we Pa gato Maria syimfar su ne anato ma kadit Yefun Allah Gen. 21Bere Maria kem su pa yebris, orete nan kendo pa ne gum do Yesus, we Pa ne ma mo bur ré wa ós An bi nje-i. Bere An tepsu suktot wa tot sukibit gato An bi yetuge-i ben ne wé re.”
22Suk mwa ré ye benbot subere suktaru gato Yefun tarubot yenabi ne bor. Yenabi ne ki do, 23”Nggonnak ge dik yo gato sem su yebris mo nde, bere syimfar, orete nggon ne kem su pa yebris. Pa ne bere ye kendo gum do, Imanuel.” (Imanuel bi sukjimnut do, ”Yefun Allah sisu men kem sino.”)
24Sane tepsu gato Yusuf sun an benbot suk gato Yefun bi malaikat ki nai an ne. An gwat Maria mu mo an bi nu tepsu an bi nggon kra. 25An we kra pe, sarewo Maria kem su pa nde tó, Yusuf si Maria yo sem su yu nde tó. Maria kem su Pa ne, orete Yusuf kendo Pa ne gum do Yesus.
Valgt i Øjeblikket:
Matius 1: KGR
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
@LAI 2004, 2014
