Marako 2
2
1Kitu azidise adi ko go cale todia Kaparanaumana di, rubina dre la’uzo akodi adre jona. 2Dia bi dii dreki rukebezo, kadre nitini vo aiidri adrezo di yokodo, vo jotile tejia yokodo: adi dre ta nidi taza aiidri. 3Aii dreki alizo dia dra dre ole abile di be adi vuna, dia su dii adreki akodia ado. 4Aii ko kicoa alile adi vuna añi ko di dia di diise, aii dre jodri njizo adini adrera’a, aii ko ṅo dre di aii teri langa dia dra dre ole abile di dre ayizo di bale vudri. 5Yesu dre aiikia ta ka’ile di nora’a, dre taza dia dra dre ole abile di dri̱, Mva, a tiza ami takonji da. 6Dia tatišilepi dii arukaba adreki lirile dale, dre ta tušura’a aiiki togona, 7Ago nidi adre ta ta nitini adose ya? Adi adre Nzambe da: adi kicoa diaki takonji tiza ya? alo Nzambe kicoa ni. 8Drañano Yesu dre atogiara’a ai terina aii adreki ta tušu nitini aii lena, adi dre taza aiidri, Mì tušu ta nii amiki togona adose ya? 9Kota dia dra dre ole abile di dri̱, A tiza ami takonji da; kota, Mi konga kuru, langa mina do, mi koli, ta angodi añi ya? 10Mì koniro Adamuni Mvani mi la̱njila̱nji vudri di diaki takonji tizazo (adi dre taza dia dra dre ole abile di dri̱), 11Ma ta midri, Mi konga kuru, mi kodo ami langa, njizo mi bana. 12Akodi dre ngazo kuru, drañano do ai langa, fozo aii mise o̱ei; kadre nitini aiiki lindri gaga o̱ei, aii dre utukufu bazo Nzamberu, dreki taza, Mà no ta nitini di tejia dridri ko.
13Adi dre fozo lile todia yitapara laga; dialezolepi dii o̱ei dreki rukebezo adi vuna, adi dre ta tadazo aiidri. 14Adi dre lavura’a i no Levi, mva Alafayo adea dre lirira’a midaia girana, adi dre taza akodidri, Mi kali ma vuse. Akodi dre ngazo lile adi vuse. 15Kadre nitini, adi adre lirile nga ña akodia jona, ateloni bi dii e, dia takonji olepi dii be, aii dreki lirizo Yesu e be, dia adini tayilepi dii be; aii dreki adrele bi dise, aii dreki lizo adi vuse. 16Dra dia tatišilepi dii Farusikia dii, aii dre nozoa adi liri nga ña dia takonji olepi dii be, atelonie be, aii dreki taza dia adini tayilepi di dri̱, Akodi adre nga ña, nga mvu atelonie be, dia takonji olepi dii be. 17Dra Yesu dre yizo, dre taza aiidri, Dia iriñi be dii leki alokoli’ini zi ko, dia drafulepi dii leki alokoli’ini zi: ma ali dia ta olepi piri diiki zi ko, ma ali dia takonji olepi diiki zi.
18Dia Yoaneni tayilepi dii Farusikia dii be, aii dreki nga labizo, aii dreki alizo, dreki taza adidri, Dia Yoaneni tayilepi dii, dia Farusikia tayilepi dii be aii adreki nga ga adose ya? Dia ami tayilepi dii adreki nga ga ko. 19Yesu dre taza aiidri, Kadura tecilepi ago toko gilepi di vuse dii kicoa nga ga, ago toko molepi di dre adrera’a aii be ya? Ago toko molepi di dre adrera’a aii be aii kicoa nga ga ko. 20Lokia niaca ago toko molepi di ruzo aiiki kofule‐ase, kitu naditu aii kadre nga ga kani’a. 21Dia ba bongoroga todi di bongo aku diru ko: kodi nitini di bongo dre dile bina’a di dre šizo asa, amba akuna tišini. 22Dia da teji biño aru biño joroa aku di lena ko, koda nitini di biño kofuro joroa be, biño dre rukizazo: a da biño todi di biño‐joroa todi di lena.
23Kadre nitini adi o lile tecibe monduna kitu sabiti adease; dia ai tayilepi dii dreki mondu bazo šile, aii dre lira’a. 24Farusii dreki taza adidri, Mi no ka, aii oki togi kitu sabiti adease ko adose ya? 25Adi dre taza aiidri, Mì na teji ta Dawidi dre ole kiono di ko ya? akodi kadre lavo be di, tebiri adre akodia o ni, dia adrelepi akodi be dii indi. 26Tandu akodi dre šile Nzambeni jona di dra Abiatara adre koani murungu diro, dre mapa ta‐tadazo di ñazo, mapa nidi koanii alo koñaro togise kodi’a, dre fezoa dia adrelepi akodi be di dri̱ indi. 27Adi dre taza aiidri, A ba kitu sabiti adea diase, a ba dia kitu sabiti adease ko. 28Kadre nitini Adamuni Mva adre kitu sabiti adea Miriru kani’a.
Valgt i Øjeblikket:
Marako 2: LOG
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
first printed by the British and Foreign Bible Society in 1924 and 1927.
