Marako 14
14
1Dra kitu iri velero dise nga ñale Lavuzodi adea, mapa ta̱ku ako di be, o acale: koani dridri dii e, dia tatišilepi dii be dreki ta ndazo adini ruzo toloñose adini fuzo drale: 2aii dre tale dise, ki di, A koru akodi nga ñara’a ko, ta kola̱piro ko.
3Adi dre adrera’a Betaniana, Simona karidiani jona, dre lirira’a nga ña, toko aca aluku do ngulepi tani di be, lagina murungugu, akodi dre aluku fuzo, dre do dazo adi dri. 4Dia arukaba adreki komba o aiiki kofulena, ki di, Tandu do tizazo di ado ya? 5I dre do nidi gile makuta adre lavule kama na dise, dre tefezo dia lemerero dii dri̱. Aii adreki toko nidi amuṅa. 6Yesu dre taza, Mì kota’i akodi, mì adre akodini arukia adose ya? Akodi o ta tani madri kani’a. 7Mì dre adrele dia lemerero dii be kolia dise, mi kicoa ta tani o aiidri ta lavo ko ru ami di: ma adre ami be kolia ko. 8Adi o i tini: adi li ama rumva dridri ama šizo buna di. 9Ma ta amidri pati, Vo angodi ya angi tandu tani voase o̱ei, a ta ta toko nidi adea ole di, akodia ru kadrero amve.
10Yudasi Keliota, akodi alo di mudri‐dri‐iri niiki ketona, dre njizo koani dridri dii vuna, i kofero adi aiidri. 11Aii ko yi di, dre lenzezo, dre ta taza aii kofe parata adidri pati. Akodi dre lokia Yesuni fezo aiidri di nda.
12Kitu dridri di mapa ta̱ku ako di ñazo dise, aii kofu za Nzambe ledezo di, nga ñale lavuzo di adea, dia adi tayilepi dii dreki taza adidri, Mi le mà koli angua ya nga ñale lavuzo di lede mi koñaro? 13Adi dre dia iri ai tayilepi dii muzo, dre taza aiidri, Mì koli ba murunguna, ago yile dri be di o kušu ami: mì koli akodi vuse; 14jo angodi ya adi ko’o šile, mì kota joli’idri, ki di, Togilii ta di ama joale kumu dre lirizo di angua ya, ama nga ñale lavuzo di ñara dia ama tayilepi dii be. 15Akodia tandi kotada joale murungu di kuruna di amidri, alede nga be lana; mì kolede nga amadri ñale nale. 16Dia adi tayilepi nii dreki afozo, dreki cazo ba murunguna, dreki ta kušuzo ngoro adi dre tale aiidri di tini, aii dreki nga ñale lavuzo di ledezo.
17Kitu ko ndi di adi ali mudri‐dri‐iri nii be. 18Aii dreki lirira’a, nga ñara’a, Yesu ki di. Ma ta amidri pati, dia alo di amiki kofulena ama felepi di, e akodi nga ñalepi ma be di. 19Aiiki togo ba gale tizaro, aii dre taza adidri kaloma kaloma, ki di. Ma e ya? 20Adi dre taza aiidri, Akodi dia alo di e mudri‐dri‐iri niiki kofulena, akodi drika solepi saanina ma be di. 21Adamuni Mva dre lile dise ngoro adini tandu tišile di tini, tiza kadre dia anda Adamuni Mvani felepi di dri̱: tani su ta i dre ago anda tizo ko.
22Aii dreki nga ñara’a, adi do mapa ko ba beneditu ru a di, dre topizo, dre fezo aiidri, ki di, Mi kodo, nidi ama rumva e. 23Adi dre kega dozo, kofe merisi di, dre fezo aiidri: aii o̱ei dreki mvuzo. 24Adi dre taza aiidri, Nidi ama kari mondra adea, a da dia bi dise. 25Ma ta amidri pati, Ma go tejia biño lo’wa mvu ko, kitu ma dre todia mvuzo di mataya Nzambe adeaa.
26Aii ko ngo longua di, aii dreki fozo lile kira Bilayana.
27Yesu dre taza aiidri, Ami o̱ei mì ko’o dele: i dre tišile dise, ki di, Ma kocoa kabilikia‐likilepi di, kabilikia dreki labuzo wayaro. 28Kadre nitini tako ma ngadre di‐a, ma koliro amidri dridri Galilayana. 29Petero dre taza adidri, Ngale dia o̱ei dii ko’o dele ya di, ma kode ko. 30Yesu dre taza adidri, Ma ta midri pati, andru nga̱ci nise taugua o cira be vese iri, mi koka̱i ta mase dridri vese na. 31Adi adre ta ta gbiagbia ambani, ki di, Ma kodra mi be iriti di, ma koka̱i ta mise ko. Aii o̱ei koangia aii adreki ta tazo di tini.
32Aii dreki alizo vo runa Getesemanea: adi dre taza dia ai tayilepi dii dri̱, Mì koliri konua, ma dre ngora’a Nzambe kandra. 33Adi dre Petero e, Yakobo e, Yoane be, aiiki drizo, adini lindri dre andu bazo gale gaga we, adini togo dre gazo kuku tizase. 34Adi dre taza aiidri, Ama lindri adre tiza be ambani ma kodraro asa: mì kadre konua, mì kolama ta. 35Adi dre lizo dridri ca, dre dezo vudri, dre ngozo Nzambedri saa, ko kicoa, adini lavu di. 36Adi dre taza, Abba, Tata, ta pi mi tejia ko; mi kodo kega nidi ma tise: kadre ta ma dre lele di ko, kadre ta mi dre lele di kani’a. 37Adi dre alizo, dre aiiki kušuzo ayikora’a, dre taza Peterodri, ki di, Simona, mi adre ayiko ya? mi kicoa ta lama saa alo di ko ya? 38Mì kolama ta, mì kongo Nzambe kandra mì koširo vo dia litizo di lena ko: teri adre lavo be pati, rumva iriñi ako kani’a. 39Adi dre njizo todia, ngole Nzambedri, dre ta alo dridri niiki tara’a. 40Adi dre alizo todia, dre aiiki kušuzo ayikora’a, ayi dre aiiki ole we dise: aii ni ta akole adi ti ko. 41Adi dre alizo vese na di, dre taza aiidri, Mì ka̱yi lovole ñano: kadre kodopi; saa acadre; mì no ka, a fe Adamuni Mva dia takonji olepi dii dri̱ka. 42Mì konga, mà koli wa: mì no ka, dia ama felepi di o alile añi.
43Drañano adi dre ta tara’a, Yudasi ali, dia alo di mudri‐dri‐iri nii kofulena, dialezolepi dii be, sengee be, kutufae be, adi ali aba koani dridri dii e, dia tatišilepi dii e, maligae be aii vulese. 44Dia adini felepi di dre ta tadazo aiidri, ki di, Dia anda ma kondro tina di, akodi e; mì koru akodi, dre akodia asezo lizo aba kolaparo ko. 45Adi ali di, drañano i ali akodi vuna, dre taza, Rabbi, dre akodia ti ndrozo. 46Aii dreki dri̱ka bazo akodiru, dre akodia ruzo. 47Dia anda dia adrelepi ai laga diiki ketona ngi̱ si senge, dre adremakandra koani murungu di adea gazo, dre bina loazo. 48Yesu dre ta akozo, dre taza aiidri, Mì afo sengee be, kutufae be, kugu runa tini ama ru ya? 49Ma adre ami be yekaluna ta tadara’a kitu vuse kolia, mi dre ama ruzo ko: a o ta nidi ta tišile dii kakero. 50Aii dreki adini ta’izo, dreki lapazo o̱ei.
51Kadura anda dre lizo adi vuse, i dre gotono‐bongo bezo rubana riru diru: aii dreki adini ruzo; 52adi dre gotono‐bongo ta’izo, dre lapazo riru.
53Aii dreki Yesu ni asezo lizo aba koani murungu di vuna: koani dridri o̱ei dii e, maligae, dia tatišilepi dii be aii dreki rukebezo adi vuna. 54Petero dre alizo adi vuse rararo šile mvumvu koani murungu di adea lena; adi dre lirira’a sazoe be, aci yora’a. 55Kadre nitini koani dridri dii e, dia rukebelepi vura ta dii be dreki tandu ndazo alale Yesuru adini bazo drale, aii dre kušuzo ko. 56Dia bi dii dreki tandu tale kinzoro dise, aiiki tandu adre alo ko. 57Dia anda dreki ngazo kuru, dreki tandu kinzoro di tazo adiru, ki di. 58Mà yi ta adi dre tale di, ki di, Ma kotiza yekalu šile dri̱kase nidi; kitu na ma koširo azina dri̱ka ako di. 59Kadre ta nidise di aiiki tandu adre alo di ko kani’a. 60Koani murungu di dre ngazo kuru aiiki kofulana, dre ta lizizo Yesu ti, ki di, Mi ako ta tale ko ya? ado ta ya dia nii dreki tale miru di. 61Yesu agi titi, dre ta akozo aii ti ko. Koani murungu di dre ta lizizo adi ti todia, dre taza adidri, Mi Kristu Mva Dia ru ledele di adea ya? 62Yesu dre taza, Ma e: mì kono Adamuni Mva dre lirira’a iriñini drigualese, dre alira’a nduruku bu adea be. 63Koani murungu di dre ai bongo tišizo, dre taza, Mà le dia azina tandu talepi dii angini ya? 64Mi yi adini tai Nzambe dazo di: mì adre ado ta ta ami lena ya? Aii dreki akodia tavo tazo akodi su drale. 65Dia arukaba dre tušu bazo fule adiru, dre adini mibale takozo, dre adi ni sazo, dre taza adidri, Mi kotada ta: adremakandra dreki adini sazo dri̱kase.
66Petero dre adrera’a tabulese mvumvuna: adremakandra tokoro alo di koani murungu adea o alile, 67Dre Peteroni nozo aci yora’a, ba mi adini no, dre taza, Mi koangia mi adre dia Nazaretalese di be, akodi Yesu. 68Adi dre ka̱izoa, ki di, Ma ni ko, ma yi ta mi dre tale di ko: adi dre fozo lile jokogbona; ta’ugua adre cira bezo. 69Adremakandra tokoro ni dre adini nozo, dre ta bazo tale todi dia adrelepi añi dii dri̱, ki di, Ago nidi aikia di. 70Adi dre ka̱izo todia. Drando dia adrelepi lagana nii dreki taza Peterodri todia, ki di, Mi adre aiiki kofulena pati, mi dre adrele dia Galilayalese di e dise. 71Adi dre tandu bazo dia litrizo, dia wazo, ki di, Dia mi dre adrele ta tale di ma ni ko kani’a. 72Drañano vese iri ta’ugua adre cira be. Ta Yesu adea tale adidri di aga Petero a, ngoro Yesu adre tale di tini, ki di, Agolowa o cira be vese iri, mi koka̱i ta mase dridri vese na. Adi ko tušu ta nidi di nga mindra be.
Valgt i Øjeblikket:
Marako 14: LOG
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
first printed by the British and Foreign Bible Society in 1924 and 1927.
