Matayo 27
27
1Nga kowa dre di, koani dridri dii o̱ei, maliga diakia dii e be, aii ta ta Yesuru aii kofuro akodi drale: 2aii dreki adini lambezo, dreki adini drizo, adini fezo miri Pilato togi talepi didre.
3Dra Yudasi adini felepi di, i kono a ta adini tavo dre di, ala ai togo dre, dre parata fedaro ñadingi‐dri‐mudri dii ajizo koani dridri dii vuna, maliga vuna be, 4dre tazo, ki di, Ma o takonji dre, ma dre kari konji‐ako di fele dise. Aii dreki tazo, Tai nidi amadre angini ya? Ami tai e. 5Adi dre parata fedaro dii bezo vo lolo di na, dre njizo; adi dre lizo dre ai tandi izo base. 6Koani dridri dii dreki parata fedaro dii todozo, dreki tazo, Parata nii bazo sandu‐parata‐bazo di lena togi e ko, dre adrele kari lagi dise. 7Aii dreki ta tazo, dreki amvu ledri‐olepi di adea gizo parata nii diise tai ditoa sizo buna dise. 8Tandu nidise i dre amvu nadi zile, “Amvu kari adea” vese nadise ñanomvano di a be. 9Dra a o Yeremiya, nabi e ni tai akele, dre tazo, ki di, Aii dreki parata fedaro ñadingi‐dri‐mudri dii dozo, lagi akodi i dre lagi lale di adea akodi arukaba dia Yisarele diikia lagia. 10Aii dreki parata nii fezo dia ledri‐olepi amvuse di dre, ngoro Miri dre tale madre ditini.
11Yesu dre adrezo miri togi‐talepi di kandra: miri togi‐talepi di dre adi ti zizo, ki di, Mi mokonzi Yudakia e ya? Yesu dre tazo adidre, ki di, Mi are ta nidi ta. 12Koani dridri dii, maliga dii be kolodza ta adiru di, adi ako ta tale aii ti tejia ko. 13Dra Pilato ta adidre, ki di, Mi yi ta bi aii dre tadale ami ru dii ko ya? 14Adi dre ta akozo adi ti tejia ko, kadre nitini miri togi‐talepi di ni lindri ga we. 15Nga ñale murungu nadi tu miri togi‐talepi di go dia alo bagona di tri dia lezolepi diidre, akodi aii dre lele di. 16Bago dia be ai dreka, akodi ru la’u, runa Baraba. 17Tandu nidise aii kokeberu di, Pilato ta aiidre, ki di, Mi le ma kotri amidre adi ya? 18Adi dre nile dise aii feki akodi aiiki togo dre asuale akodiru dise. 19Adi dre lirira’a vo lirizo tavo tazo di a, ai toko mu i vuna dre tazo, ki di, Mi kadre ta o ago ta olepi piri nadiru tejia ko: ma dre lizale tai bi dii kitu nidise torobise akodise dise. 20Koani dridri dii, maliga be dreki dia lezolepi diiki ozo aiiki togo laja, aii koziro Baraba, Yesuni tizazo. 21Miri togi‐talepi di dre ta akozo, dre tazo aiidre, ki di, Dia iri nii mi le ma kotri angodi ya? Aii dreki tazo, ki di, Baraba. 22Pilato ta aiidre, ki di, Ma ko’o ado ta ya Yesu i dre zile Kristu di dre. Aii o̱ei taki, ki di, A ko’o akodi kipale. 23Adi dre tazo, Adose ya? Akodi o ado tai ya konji di? Aii dreki trezo ambani, ki di, A ko’o akodi kipale. 24Kadre nitini Pilato kono dre di, i lavu tai nidi ko, amba tai nidi aii dre ngara’a luluga, adi do yi, dre ai dreka jizo dia lezolepi dii kandra, dre tara’a, Ma adre tani kari ago ta olepi piri ni a dise; amiki tai e. 25Dia o̱ei dii dreki ta akozo, ki di, Akodia kari kadre amadri, amaki mvadri. 26Dra adi tri Baraba aiidre: adre Yesu bezo kinise dre fezo, a kokiparo.
27Dra tukutuku miri togi‐talepi di adea seki Yesu marañana aii dreki kopañi kebezo o̱ei adi vuna. 28Aii dreki bongo ngizo adi ruse o̱ei, dreki bongo keka di ašozo adiru. 29Aii dreki kuci lesezo paripariru asole adi dri; dreki lomi bazo adi dreka drigualese; aii dreki kayiti tizo tandile adi kandra, dreki adini tabizo, dre tazo, Ari be, Mokonzi Yudakia di. 30Aii dreki tusu fuzo adiru, dre lomi dozo, dreki adi dri coazo. 31Aii kotabi adi dre di, aii ngi bongo adi ruse, dreki adini bongo tosozo adi ru, dreki adini sezo lile kipale.
32Aii dreki afora’a, aii dreki dia Kurenea di runa Simona kusuzo: aii oki akodi lumbase adi koliro aii be, adini fa atipatipa do. 33Aii koca vo runa Gologota a di, ala vo nidi ru zile, Vo drifa adea. 34Aii feki bino adidre mvule akudu ngialo nga kujikuji di be: adi kotambe dre di, adi le mvule ko. 35Aii kokipa adi dre di, aii dreki adini bongo lanjizo aiiki kofulease, gumari bera’a: 36aii dreki lirizo vudri, dreki adini kindrizo nale. 37Aii dreki ta lodzale adiru di bazo adi drile, a tisidre, ki di, NIDI YESU E, MOKONZI YUDAKIA DI. 38Dra a kipa kugu iri dii adi be, alo di drigualese, alo di lijilese. 39Dia lavulepi dii dreki adini dazo, aiiki dri kaiyara’a. 40Dreki tazo, Mi yekaluni tizalepi di, yekaluni silepi kitu na diise; mi kotedri mi: mi adre Nzambeni Mva dí, mi kasi fa atipatipa drise. 41Ngoro nitini koani dridri dii akodi tabira’a dia ta‐tisilepi dii e, maliga e be, ta, ki di, 42Adi tedri dia azia dii; kicoa i tedri ko. Adi mokonzi Yisarele diikia di e; adi kasi fa atipatipa drise ñanomvano, ama koka’i adidre. 43Adi ka’i Nzambedre; akodi kopa adi ñanomvano, akodi adre lovose adi be di: adi dre tale dise, ki di, Ma Nzambeni Mva e. 44Kugu kipale adi be dii indi dreki adini voazo voavoa nitini.
45Saa njikazi dise vo o̱ei go adrele tinimvaro saa nji‐dri‐su dre acazo. 46Saa nji‐dri‐su añi, Yesu dre trezo kuli be dradra, dre tazo, Eloi Eloi, lama sabakitani, tai nidi e, Ama Nzambe, ama Nzambe, mi ta’i ma dre adose ya? 47Dia arukaba adrelepi lagana dii koyi ta nidi dre di, ta, ki di, Ago nidi ara Eliyani zi. 48Drañano dia alo di dre razo, dre mamalia ozo kolosu be, dre sozo lomidri, dre fezo adidre mvule. 49Dia azina dii o̱ei taki, ki di, Mi kota’i; ama konoki Eliya ali adini tedri di. 50Yesu dre trezo todia kuli dra se, dre ai lindri fezo lile. 51Mi no ka, bongo kacua yekalu adea a si ana iri, kurulese cale tabuna; vo dre ai kaiya; kira sidre; 52mogo njida; i dre dia aiyilepi lolo bi diiki ruba tingazo; 53tako adi ngadre dra ase di, aii dre afora’a mogo lese, dre ba murungu lolo di na sizo, dre agazo dia bi dii kandra. 54Kendurioni, dia adrelepi Yesuni no di akodi be dii, aii kono kidikidi kokaiya vo di, tai i dre ole dii be, aii ro nga ambani we, dre tazo, ki di, Akodi Nzambeni Mva e pati. 55Toko bi dii aii li Yesu vuse Galilayalese dre ta ora’a adise, dreki adrezo nale ta no rararo; 56adreki aiiki kofulena Maria Magadala e, Maria e, andre Yakobo adea, Yose adea be, Zebedayani anjia andre adea.
57Kitu kondi di, ngaliyi Arimatayalese di, runa Yosefa akodi tandi dia Yesuni tayilepi di e, dre alizo: 58ago nidi li Pilato vuna, dre Yesuni rumva zizo adi ti. Dra Pilato ta a kofe wa. 59Yosefa dre rumva dozo, dre ndrazo gotono‐bongo ketekete dise, 60Dre bazo ai tandini bu todina, adi di bu kirana: dre kira murungu di lilizo butise, dre njizo. 61Maria Magadala adre nale, Maria azina di be lirira’a bu lagana.
62Kitu velero dise, kitu nidi nga ledezo velero di, koani dridri dii Farusii be dreki rukebezo Pilato vuna, 63dre tazo, ki di, Bwana, tai aga ama lena dia kinzo olepi nadi tadre adi dre adrera’a lidriru, ki di, Kitu na velero dise, ma konga todia. 64Tandu nidise, mi kofe tai, a koliki bu tani cale kitu na diise, ngale dia ai tayilepi dii aliki di, dreki adini kuguzo, dreki tazo mundiadre, ki di, Adi ngadre dradra ase; kinzo velero di kadre amba kinzo dridri di konji di ruse. 65Pilato ta aiidre, ki di, Dia ta lamalepi dii be ami dreka: mi kodo amiki lati lizo. Mi ko’o tai iriñise ngoro mi dre ole di tini. 66Kadre nitini aii lidre dreki tai ozo iriñise, adre kira ozo tete, dia ta lamalepi dii dreki adrera’a aii be.
Valgt i Øjeblikket:
Matayo 27: LOG
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
first printed by the British and Foreign Bible Society in 1924 and 1927.
