LUKA 20
20
Matla a Jesu moo a tswang teng.
1Mohlang oo, ka tsatsi le leng, ha a ntse a ruta batho tempeleng, a ba bolella Evangeli, baprista ba baholo, le bangodi, le baholo ba setjhaba ba tla, 2ba bua le yena, ba re: Ako re bolelle matla ao o etsang ntho tseo ka wona, le hoba ya o fileng matla ao ke mang na? 3A araba, a re ho bona: Ke tla le botsa taba le nna. 4Mpolelleng, na kolobetso ya Johanne e ne e tswa lehodimong, kapa e ne e tswa bathong na? 5Jwale ba eletsana hammoho, ba re: Ha re ka re: E ne e tswa lehodimong, o tla re: Ha le a ka la e dumela keng? 6Mme ha re ka re: E ne e tswa bathong, setjhaba kaofela se tla re tlepetsa ka majwe; hobane se kgotswe hoba Johanne e ne e le moporofeta. 7Ba araba, ba re: Ha re tsebe moo e tswang teng. 8Yaba Jesu o re ho bona: Le nna nke ke ka le bolella matla ao ke etsang ntho tseo ka wona.
Setshwantsho sa balemi, le sa lejwe la sekgutlo.
9Yaba o qala ho bolella batho setshwantsho sena: Motho wa horeng o ne a hlome tshimo ya merara; a e laeletsa balemi, a ntoo eta ka tshiu tse teletsana. 10Ka nako ya ho kotula, a romela mohlanka wa hae ho balemi, hore ba mo fe ditholwana tsa merara; empa balemi ba mo otla, mme ba mo kgutlisa a le feela. 11A eketsa a roma mohlanka e mong; le yena ba mo otla, ba mo hlabisa dihlong, mme ba mo kgutlisa a le feela. 12A eketsa a roma wa boraro; mme hobane ba mo ntshe kotsi, ba mo lelekisa. 13Yaba monga tshimo ya merara o re: Ke tla etsa jwang? Ke tla roma mora wa ka, eo ke mo ratang; ha ba mmona, ekaba ba tla mo hlonepha. 14Empa balemi, yare ha ba mmona, ba bolellana, ba re: Enwa ke mojalefa; tloong, re mmolayeng, lefa e tle e be la rona. 15Eitse hobane ba mo lahlele kantle ho tshimo ya merara, ba mmolaya. Mme jwale, monga tshimo ya merara o tla ba etsa jwang? 16O tla tla, a timetse balemi bao; mme tshimo ya merara o tla e nea ba bang. Ha ba utlwa hoo, ba re: ho se ke ha eba jwalo! 17A mpa a ba tjamela, a re: Mme ke eng hona ho ngodilweng: Lejwe le lahlilweng ke dihahi, ke lona le entsweng la motheo la sekgutlo? 18E mong le e mong ya tla wela hodima lejwe leo, o tla robeha; mme le tla pitla eo le mo welang hodimo.
19Baprista ba baholo le bangodi ba batla ho isa matsoho ho yena ka yona nako eo, empa ba tshaba batho; hobane efela ba ne ba tsebile hoba o lekantse bona ka setshwantsho seo.
Jesu o botswa dipotso bakeng sa lekgetho le ntshetswang Sesare, — le sa tsoho ya bafu.
20Yaba ba mo ela hloko, ba roma dihlwela, tsa iketsa batho ba lokileng, hore di tle di mo tshwase dipolelong tsa hae, hore ba mo neele matleng le matsohong a mmusisi. 21Ba mmotsa, ba re: Moruti, re a tseba hobane o bua le ho ruta ka ho loka; ha o tadime tshobotsi ya motho, o mpa o hlile o ruta tsela ya Modimo kannete. 22Na ho a re lokela ho ntshetsa Sesare lekgetho, kapa tjhe? 23Eitse ha a lemoha mano a bona, a re ho bona: Le ntekelang? 24Mpontsheng denare. E na le setshwantsho sa mang, le lengolo la mang? Ba araba, ba re: La Sesare. 25Yaba o re ho bona: Ha ho le jwalo, ntshetsang Sesare tseo e leng tsa Sesare, le Modimo tseo e leng tsa Modimo. 26Ba sitwa ho mo tshwasa polelong tseo tsa hae pela batho; ba makatswa feela ke karabo ya hae, mme ba kgutsa.
27Yaba ba bang ba basadusi, ba latolang tsoho ya bafu, ba tla ho yena, ba mmotsa, 28ba re: Moruti, Moshe o re ngoletse, a re: Moholwane wa motho ha a shwele a ena le mosadi, empa a se na bana, e ka kgona moenae a nke mohlolohadi eo wa hae, a tle a hlahisetse ngwanabo bana. 29Jwale, bara ba motho ba ne ba le teng, ba supile; wa pele ho bona a nyala mosadi, a shwa a se na bana. 30Wa bobedi a nka mosadi eo, mme a shwa a se na bana le yena. 31Le wa boraro a mo nka; mme ha eba jwalo ho bona ba supileng: ba eshwa, ba sa siye bana. 32Kamora bona kaofela, le yena mosadi eo a shwa. 33Hleka mohla tsoho ya bafu, mosadi e tla ba wa ofe ho bona, haele moo ba supileng ba ne ba mo nyetse? 34Jesu a araba, a re ho bona: Bana ba lefatshe lena ba nyala, mme ba nyalwa; 35empa ba tlang ho newa tokelo ya ho bona lefatshe le tlang le tsoho ya bafu, ba ke ke ba nyala, le hona ba ke ke ba nyalwa. 36Hobane ha ba sa tla hlola ba eshwa; hobane ba tla tshwana le mangeloi, mme e tla ba bara ba Modimo, ha e se e le bara ba tsoho. 37Haele hobane bafu ba tla tsoha, Moshe le yena o ho bonahaditse, mohla a leng pela sehlahla, ha a bitsa Morena, Modimo wa Abrahama, le Modimo wa Isaaka, le Modimo wa Jakobo. 38Athe Modimo hase Modimo wa bafu, ke wa ba phelang; hobane ho wona batho kaofela ke ba phelang. 39Yaba ba bang ho bangodi ba bua, ba re: Moruti, o arabile hantle. 40Hobane ba ne ba tshaba ho boela ba mmotsa taba leha e le nngwe.
Kreste ke mora mang?
41Empa a ba bolella, a re: Ho thwe, Kreste ke mora wa Davida jwang, 42kanthe Davida yena o boletse bukeng ya Dipesaleme, a re: Morena o boleletse Morena wa ka, a re: Dula letsohong la ka le letona, 43ke be ke bee bao e leng dira ho wena bonamelo ba maoto a hao? 44Ana jwale, Davida ha a mmitsa Morena wa hae, e ka ba mora wa hae jwang?
Bangodi ba nyatswa ke Jesu.
45Yaba o bolella barutuwa ba hae, batho bohle ba ntse ba mametse, 46a re: Phemang bangodi, ba ratang ho itsamaela ka dikobo tse telele, le ho dumediswa mapatlelong; ba ratang ditulo tse kapele masinagogeng, le ditulo tse kapele meketeng. 47Ba metsa matlo a basadi ba bahlolohadi ka ho re, ba ba etsetsa merapelo e melelele. Ba tla ahlolwa ka kahlolo e fetisisang.
Valgt i Øjeblikket:
LUKA 20: SSO61-SO
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Bible Society of South Africa 1961. Used with permission. All rights reserved.
